SANTIAGO

Nebʉra barau ɓuuɗe dauchia jãadua ɓuai ʉ̃rʉbena

1 Mʉ Santiagobʉ, Dachi Akõre baita bari trajabarii mauɗe Dachi Mechiu Jesucristo baita bari trajabarii. Nau karta ɓʉʉruu Israel 12 warrarãɗebena neepeɗaaɗarã* druacha nuree baita. Mʉʉba kʉ̃ria ɓuu machi biꞌia panaɗayu.

2 Ãbarã, barikia ãrea biꞌiwãe panuuɗe kĩrajʉʉ panásturu. 3 Machiba kuitaa panuu maka ãrea biꞌiwãe panuuɗe Dachi Akõreɗe ijãa paneeduubʉrã, biꞌia dauchia jãaduaɗai kuitaaɗai. 4 Mau biawãra dauchia jãadua paneeduubʉrã, ne jomaɗe biꞌia, jipa nureaɗai. Ɓistĩika biɗa nistaɗawẽa panuu nureaɗai.

5 Machiɗebena aɓaba kʉ̃risia kuitaawẽa niibʉrã, Dachi Akõremaa ʉtaa iɗii ɓuu. Maabae Dachi Akõreba deai. Ichimaa ʉtaa iɗiiduubʉrã iadaawẽa sõbiaɗeeba jomaurãmaa deabarii. 6 Maamina biawãra ijãa ɓuuɗeeba ʉtaa iɗi ɓuu. Ɓistĩika biɗa kʉ̃risiabai ɓuu Dachi Akõreba deabai. Maka kʉ̃risia ɓuu pũaturãba mar ʉ̃rape ãyaa adoebarii kĩra ɓuu. 7 Chi maka ɓuuba kʉ̃risiabai ɓuu Dachi Mechiuɗebena ne adaui. 8 Ichi kʉ̃risia ome uru ɓuuɗeeba araɓau kʉ̃risiaɗe ɓuakau.

9 Ãba chi nejarra barauwãe nii kĩrajʉʉ ɓuai ɓuu Dachi Akõre daaɗe mechiuɗeeba. 10 Maamina chi ẽbẽra barau nii kĩrajʉʉ ɓuai ɓuu Dachi Akõreba ichi chi nejarr barauwãe nii unu ɓuuɗeeba. Ẽbẽra barau nii ãrea ɓuabai nepono ãrea ɓuakau kĩra. 11 Ʉmada neeruuɗe pisiaba nepono kidua bʉʉbarii. Maabae chi nepono ɓaepeɗa chi mipitaa wãꞌãebarii. Ara mau kĩra ẽbẽra barau nii ewaricha chi nejarra adaui baita ɓuu biui.

12 Aɓa kachirua waui kʉ̃risia dauchia jãadua ɓuubʉrã, Dachi Akõre daaɗe ãrea biꞌia ɓuu.* Joma dauchia jãaduaruuɗe Dachi Akõreba boro jũra dearuu kĩra ichi ewaricha chokae ɓuabii. Dachi Akõreba joma ichi kʉ̃ria nureerã biawãraɗeeba maka chokae ɓuabiai.

13 Kachirua waui kʉ̃risia ɓeeruuɗe aɓau biɗa jaraabai ɓuu Dachi Akõreba mau makabii ɓuu. Dachi Akõreba kachirua waui kʉ̃risiakau mauɗe aɓaumaa biɗa mau makabikau. 14 Maumaarã kachirua waui kʉ̃risia ɓeebarii ara dachiba maka wau kʉ̃ria panuuɗeeba. 15 Kachirua waui kʉ̃risiapeɗa mau wau ɓeebarii. Maka wau ɓeesiiɗeeba biuruuɗe Dachi Akõreɗebena ewaricha awara ɓuai.

16 Ãbarã mʉa kʉ̃riakuabarii, ara machi du aɓa nau ʉ̃rʉbena setaa kũruarã́sturu: 17 Ʉtareeba Dachi Bajãaɗebena Akõreba ne joma ãrea biꞌia ɓee dachimaa deabarii. Ichiaburu ne joma bajãaɗe koabadau waukuasii. Maarã ewaricha araɓauɗe koaɗakau. Maumaarã Dachi Akõre kĩra awara ɓuakau mauɗe diware waukau. 18 Ichi kʉ̃riaɗeeba ichi beɗea biawãraɗeeba dachi chokae ɓuabiasii. Maka ne uu nuɓuuɗebena nabena chauɗa ichimaa deaɗa kĩra dachi joma ichiba wauɗaɗebena ichi baita biꞌia panuu.

19 Ãbarã mʉa kʉ̃riakuabarii, nau kʉ̃risia panásturu: Jomaurãba biꞌia ũriɗai baita nureaɗai panuu, biꞌia nureaɗai panuu, mauɗe barikia isa kĩruɗaabai panuu. 20 Dachi kĩruuduuɗe Dachi Akõreba jipa waubi ɓuu wauɗakau. 21 Mauɗeeba ne joma kachirua mauɗe ne joma jipawãe ɓuu ida ɓústuru. Maabae Dachi Akõreba ichi beɗea machi sõɗe ɓuɗa kʉ̃risia biaɗeeba ijã́sturu. Ara mau beɗeaba machi Dachi Akõreba kastikaiɗebena karibai.

22 Dachi Akõre beɗea jara ɓuu kĩra wau panásturu. Aɓaburu ũriiduu panarã́sturu. Maka nureebʉrã, ara machi du aɓa setaa kũrua nureaɗai. 23 Dachi Akõre beɗea ũri ɓuuba mau wauwẽebʉrã, ẽbẽraba ichi kĩedarr chi ichiabariiɗe unubarii kĩra ɓuu. 24 Maka unuuruuɗe ichi saka ɓuu unubarimina, ãyaa wãaruuɗe ara makʉɗe wãꞌãebibarii. 25 Maamina barikiuba Dachi Akõre beɗea ũriɗa kĩraba ɓuai ida ɓuwẽebʉrã, ãrea biꞌia ɓuai. Ẽbẽraba mau beɗea jipa ɓuu dachi kariba ɓuu ewaricha biꞌia kʉ̃risiapeɗa wau ɓuubʉrã, ichiba maka wau ɓuuɗeeba ãrea biꞌia ɓuai.

26 Aɓauba Dachi Akõreɗe ijãa ɓuu kʉ̃risia ɓuubʉrã, maamina ichi kẽrame biꞌia nuwẽebʉrã, ara ichi du aɓa setaa kũrua ɓuu. Biawãra bari ijãa ɓuu. 27 Chi biawãra ijãa ɓuuba naka waui ɓuu Dachi Bajãaɗebena Akõreba* ichiba wau ɓuu biꞌia unumera mauɗe jipa unumera: jẽramara mauɗe pẽdrãarã ãrea biꞌiwãe panuu aiɗai ɓuu, mauɗe nau iujãaɗe nuree kachirua wau ɓuabai ɓuu.

Aɓauba waabenarã kãyabãra aude kʉ̃riabai ɓuu

2 Ãbarã, machiba dachi bia nii Mechiu Jesucristoɗe ijãa panuuɗeeba aɓa chi waabenarã audeara biꞌia waurã́sturu. 2 Machi araa ãbua duanuuɗe ẽbẽra aɓaba juaɗe nee wauɗa jʉ̃ ɓuu, paru mipitaa ãrea iɗibadau ɓuu jʉ̃ ɓuu eɗa neeruubʉrã, mauɗe ẽbẽra chi nejarr barauwãe niiba paru sore jʉ̃ ɓuu eɗa neeruubʉrã, ¿Kãare sãaɗaima? 3 Machiba chi ãrea mipitaa jʉ̃ ɓuu biꞌia unuɗapeɗa maumaa nama biꞌia ɓuumaa akʉ ɓeese aaduubʉrã, mauɗe chi nejarr barauwãe nii jamaria ɓari nuɓeese aaduubʉrã, maebʉrã nama mʉ jʉ̃rʉ kaita jeeɗa akʉ ɓeese aaduubʉrã, ¿maarã ome ara machi tãeɗe kĩra awara wau panuuwãeka? ¿Kʉ̃risia kachiruaɗeeba maka jidea panuuwãeka? 4 —.

5 Ãbarã mʉa kʉ̃riakuabarii, ¡ũrísturu! ¿Dachi Akõreba nau iujãaɗe chi nejarr barauwãe nuree Jesucristoɗe ijãaɗamera karibasiiwãeka? Maka maarã barau panuu kĩra nuree. Dachi Akõreba maarã ichi juaɗe ua ɓuai. Maka biawãra jarasii, chi ichi kʉ̃ria nureerãmaa. 6 Maamina machiba chi mau chi nejarr barauwãe nii biꞌia nii ichiaɗakau. Mʉʉba iɗiiruu: ¿Kairãba machi kachirua waubadama? Chi maka waubadaurã ¿chi nejarra barau nureewãeka? ¿Maarãba machi juezrãmaa erta adoebadauwãeka? 7 Machi Jesucristoɗerãbʉ. Maamina ¿maarãba ichi trʉ̃ bia ʉ̃rʉbena kachirua jarabadauwãeka?

8 Machiba Moisesba ɓʉɗaɗebena chi mechiu ɓuu biawãra wau panuubʉrã, biꞌia wau panuu. Dachi Akõre beɗeaɗe mau Moisesba ɓʉɗaɗe naka jara ɓuu: «Waabenarã kʉ̃riáse ara bichi kʉ̃ria ɓuu kĩra».* 9 Maamina machiba waabenarãmaa kĩra awara wau panuubʉrã, kachirua wau panuu. Moisesba ɓʉɗaɗe jara ɓuu machi mauɗeeba nebʉra bara panuu. 10 Aɓauba Moisesba ɓʉɗaɗebena aɓa biɗa wauwẽebʉrã, mau joma wauwẽa ɓuuɗeeba nebʉra bara ɓuai. 11 Nau kĩra ɓuu. Dachi Akõreba jarasii «junebena miakãiɗa ome kãi ɓeerã́se» mauɗe «mia bearã́se». Junebena wẽra ome kãi ɓeewẽa ɓumina maamina mia bearuubʉrã, Moisesba ɓʉɗa wauwẽa ɓuu. 12 Kauwa berreásturu mauɗe jipa wáusturu, Dachi Akõreba chi dachi enabarii leyba dachi nebʉra ichiaiɗeeba. 13 Chi waabenarã kĩra chuburiakau Dachi Akõreba ichiaruuɗe kĩra chuburiabai. Mauɗe chi waabenarã kĩra chuburiabadau biꞌia nureaɗai.

Cristoɗe biawãra ijãa ɓuuba biꞌia waubarii

14 Ãbarã, aɓauba Jesucristoɗe biawãra ijãa ɓuu aaruubʉrã, maamina biꞌia wauwẽa ɓuubʉrã, ¿mau aiɗai ɓuka? ¿Mau biawãra karibai ɓuka? 15 Nau kĩra ɓuu. Ãbaba maebʉrã neekauba paru jʉ̃i baita mauɗe koi baita wãꞌãe ɓuubʉrã, 16 mauɗe aɓa machiɗebenaba ichimaa jaraaruubʉrã, «mʉʉba kʉ̃ria ɓuu bichi biꞌia wãi, paru jʉ̃i baita uru ɓuai mauɗe ãrea ko ɓuai», maamina ne aɓa biɗa deawẽebʉrã, ¿mau jaraɗa aiɗaika? Aiɗakau. 17 Ara mau kĩra chi Jesucristoɗe ijãa ɓuu a ɓuuba biꞌia wauwẽebʉrã, biawãra ijãawẽa ɓuu. Mauba ijãa ɓuu a ɓuu, ẽbẽra biuɗa kĩra nii.

18 Maamina aɓauba naka jaraaruu: «Bichiba Jesucristoɗe ijãa ɓuu abarii mauɗe mʉʉba biꞌia waubarii». Mʉʉba nau jaraaruu: bichiba biꞌia wauwẽa unubise, Jesucristoɗe biawãra ijãa ɓuu. Mauɗe biꞌia wau ɓuuɗeeba mʉʉba unubii Jesucristoɗe biawãra ijãa ɓuu. 19 Bichiba ijãa ɓuu Dachi Akõre aɓaburu nii. ¡Ãrea biꞌia ɓuu! Jai kachiruarã biɗa maka ijãa panuu, maamina Dachi Akõre wapeaba uribadau.

20 ¡Bichi kʉ̃risiaswãe nii! Chi Jesucristoɗe ijãa ɓuu a ɓuuba biꞌia wauwẽebʉrã biawãra ijãawẽa ɓuu. ¿Mʉʉba bichimaa kuitaabii ɓuka?* 21 ¿Dachi chi judiorã akõre Abrahamba wauɗa Dachi Akõreba mau jipa unuubaska? Dachi Akõreba Abrahammaa ichi warr Isaac baa deábaɗe asiiɗe Abrahamba makaɗe wãsii.* ¿Dachi Akõreba ichi mau kakua jipa nii unuubaska? 22 Bichiba kuitaa ɓuu Abrahamba maka wausii, biawãra Dachi Akõreɗe ijãasiiɗeeba. Mauɗe maka wausiiɗeeba unubisii Dachi Akõreɗe biawãra ijãa ɓuu. 23 Abrahamba wauɗaba kuitaabi ɓuu Dachi Akõre beɗeaɗe ɓʉ kuɓuu biawãrabʉ. Naka ɓʉ kuɓuu: «Abrahamba Dachi Akõreɗe ijãasii. Mauɗeeba Dachi Akõreba mau nebʉraswãe nii unusii».* Mauɗe Abraham Dachi Akõre ome kõpaero abachiɗau.

24 Mauɗeeba machiba kuitaa panuu Dachi Akõreba dachi jipa unukau, bari dachiba ichiɗe ijãa panuu a panuuɗeeba, maumaarã jipa unu ɓuu ichiɗe ijãapeɗaaɗa biꞌia wau panuuɗeeba.

25 Ara mau kĩra wẽra auɗua nii Rahaba wauɗa kakua Dachi Akõreba ichi jipa nii unusii. Josueba bʉiɗarã orrõodaɗamera ichi deɗe biꞌia irsibisii mauɗe o ãyare waya wãbiasii.* 26 Biuɗa jauri wãꞌãe nii. Ara mau kĩra Dachi Akõreɗe ijãa ɓuu a ɓuuba biꞌia wauwẽebʉrã, biawãra ijãawẽa ɓuu. Ichiba ijãa ɓuu a ɓuu ẽbẽra biuɗa kĩra nii.

Kauwa berreaɗai panuu

3 Ãbarã, machiba kuitaa panuu Dachi Akõreba dachi chi Ichi beɗea jaradeabadaurã aude ichiai. Mauɗeeba ãrea machiɗebenaba jʉrʉɗaabai panuu jaradeabadaurã nureaɗai baita. 2 Joma dachiba ãrea biꞌiwãe waubadau. Aɓauba berrearuuɗe aɓa sõ puꞌuabikaubʉrã, ne jomaɗe jipa nii mauɗe ichi kakua joma jipa ɓuu.

3 Dachiba mura itaeɗe jiorr kaabibadau dachi ijãamera. Maka mauba dachi wã kʉ̃ria panuumaa adoebadau. 4 Mauɗe jãba ʉ̃rʉbena kʉ̃risiásturu. Jãba mechiu nimina mauɗe pũatu ãrea puaruuba adoebarimina, chi ũubibariiba chi timón ɓistĩika ɓuu purrabarii ichi wã kʉ̃ria ɓuumaa wãi baita. 5 Ara mau kĩra chi kẽrame ɓistĩika ɓumina ara ichi ʉ̃rʉbena ãrea berreabarii. Kʉ̃risiásturu saka tʉbʉchia ɓaꞌãra koaruuba mode mechiu joma baabibarii. 6 Dachi kẽrame tʉbʉchia kĩra niiɗeeba joma kachirua jarabarii. Aɓa mau dachi kakuaɗebenaɗeeba dachi kakua joma pobibarii aɓa biuduuɗaa. Mauɗe jʉbawãe niiba kachirua berreabiabarii tʉbʉchia koabiiruu kĩra.*

7 Barikiu ãnimara modeɗebena, ibanarã, ɓi jãaba nureabadau mauɗe marɗebena ẽbẽrarãba jidauɗapeɗa ʉmʉmʉrʉabibadau. 8 Maamina dachi kẽrame ome aɓau biɗa poyaaɗakau. Dachi kẽrameba joma kachirua berreabarii. Nearãa kachiruaba waabiru ɓuu kĩra ɓuu. 9 Dachi kẽrameba Dachi Bajãaɗebena Mechiumaa biꞌia berreabadau mauɗe ara mau kẽrameba ẽbẽrarãmaa kachirua jarabadau, Dachi Akõreba mau ẽbẽra ara ichi kĩra wauɗamina. 10 Ara mauɗebena okarrba beɗea bia mauɗe beɗea kachirua berreabarii. Ãbarã, mau makaɗaabai ɓuu. 11 Mieɗebena bania, ¿bania kũaa mauɗe bania kuyaa chebarika? 12 ¿Higo bakuruba olivo jõ chaubarika? ¿Uvaba higo jõ chaubarika? Chaukau. Ara mau kĩra mieɗebena bania kũaa mauɗe bania kuyaa chekau.

Chi biawãra kʉ̃risia kuitaa nii

13 Machi kʉ̃risia kuitaa nuree mauɗe ne kuitaa nuree kʉ̃risia panuubʉrã, unubiásturu biawãra maka nuree, machi biꞌia nibabadauɗeeba. Chi mechiu nuree kʉ̃risiaɗawẽa kʉ̃risia kuitaaɗeeba biꞌia wauɗai panuu. 14 Maamina aɓauba chi uru ɓuu kakua maebʉrã chi wau ɓuu kakua jiwaa duanuubʉrã, mauɗe waabenarã aude biꞌia nureaɗai baita jʉrʉduubʉrã, jararã́sturu machi ne kuitaa nuree. Maka jaraaduubʉrã, chi biawãra beɗea ida ɓu panuu. 15 Machi kʉ̃risia kuitaaɗeeba maka kʉ̃risia panuubʉrã, mau kʉ̃risia kuitaa Dachi Akõreɗebena neekau, maumaarã nau iujãaɗebena, ẽbẽrarãɗebena mauɗe jʉbawãe niiɗebena neebarii. 16 Chi waabenarãba uru panuu kakua maebʉrã wau panuu kakua jiwaa nuree, mauɗe chi waabenarã aude biꞌia nureaɗai baita jʉrʉ nureerãba kʉ̃risia kachirua barikia kʉ̃risiabadau mauɗe ne joma kachirua waubadau. 17 Maamina chi Dachi Akõreba dea ɓuu kʉ̃risia kuitaa uru nureerãba ne jomaɗe jipa waubadau, jomaurã ome jirukaraayuwãe nureaɗai baita jʉrʉbadau, jomaurã ome biꞌia panabadau, aɓauba jara ɓuu ũriɗai baita panabadau, waabenarã kĩra chuburiabadau mauɗe ne joma biꞌia waubadau. Aɓa waabenarã audeara biꞌia wauɗakau. Ichiba jara ɓuu kĩra biawãra waubarii. 18 Jirukaraayuwãe ɓuabariiɗeeba, waabenarã jirukaraayuwãe panabiabarii, ne uuruu kĩra. Mau ẽbẽraba unui chi waabenarãba jipa wau panuu, ne jõ bakuru biꞌia chaubarii kĩra.

Dachi Akõreba jara ɓuu joma wau panásturu

4 ¿Machi sakãe chĩobadama mauɗe oa kachirua berreabadama? Machiba kachirua wau kʉ̃ria panuu machi sõɗe chĩo ɓuu maka wauɗamera. 2 Machiba ne adauɗai ãrea kʉ̃riabadamina poyaa adauɗakau. Mauɗeeba mia beabadau. Waabenarãɗe ne kaebea adauɗai kʉ̃riabadau. Maamina poyaa adauɗakauɗeeba oa kachirua berreabadau mauɗe chĩobadau. Machiba chi kʉ̃ria panuu adauɗakau, Dachi Akõremaa ʉtaa iɗiɗakauɗeeba. 3 Mauɗe machiba Dachi Akõremaa ʉtaa iɗiiduuɗe ne poyaa adauɗakau kʉ̃risia kachiruaɗeeba ʉtaa iɗibadauɗeeba. Machiba ʉtaa iɗibadau, ara machiaburu kʉ̃ria panuu kĩra wauɗai baita. 4 Junebena wẽra ome kãiduu kĩra machiba Dachi Akõre ida ɓuu panuu nau iujãaɗebenarãba waubadau kĩra wauɗai baita. ¿Machiba wabiɗa adua panuka chi nau iujãaɗebena kʉ̃ria ɓuu Dachi Akõre ome chi kĩramaa? Biawãra barikiuba nau iujãaɗebena kʉ̃ria ɓuubʉrã, Dachi Akõre ome chi kĩramaa ɓeei. 5 Dachi Akõreba dachi sõɗe ɓuɗa Jauriba kʉ̃ria ɓuu Dachi Akõréturu kʉ̃ria panaɗamera. ¿Machiba kʉ̃risia panuka Dachi Akõre beɗeaɗe bari ara jãka ɓʉbisii? 6 Maamina Dachi Akõreba ichi sõbiaɗeeba dachi ãrea aiɗa ɓuu. Mauɗeeba Ichi Beɗeaɗe naka ɓʉ kuɓuu:

7 Mauɗeeba Dachi Akõre juaɗe panásturu. Jʉbawãe nii ijãarã́sturu. Maka ichi machiɗebena ãyaa wãi. 8 Dachi Akõre kaita nésturu, makarã ichi machi kaita neei. Machi chi kachirua waubadaurã, ¡machi jua jeraaduu kĩra waa kachirua waurã́sturu! Machi kʉ̃risia ome uru nuree, ¡kʉ̃risia kachirua ida ɓuɗapeɗa Dachi Akõréturu kʉ̃risiásturu! 9 Machiba kachirua waupeɗaaɗa kakua kĩra nomaa panásturu, jẽásturu, biuchaa jẽásturu. Waa kĩrajʉʉ ʉirã́sturu, maumaarã machiba kachirua waupeɗaaɗa kakua ãrea jirukaraa panásturu. 10 Chi waabenarã audeara mechiuwãe nuree, Dachi Mechiu daaɗe nésturu. Maka mauba machi chi mechiurã ɓui.

Waabena ʉ̃rʉbena kachirua jararã́sturu

11 Ãbarã, waabenarã ʉ̃rʉbena kachirua jararã́sturu. Aɓauba ichi ãba ʉ̃rʉbena kachirua jaraaruubʉrã maebʉrã jidearuubʉrã, Moisesba ɓʉɗa ʉ̃rʉbena kachirua jara ɓuu, mauɗe mau Moisesba ɓʉɗa jidea ɓuu.* Aɓauba Moisesba ɓʉɗa maka jideai kʉ̃risia ɓuubʉrã, mau Moisesba ɓʉɗaɗe jara ɓuu wauwẽa ɓuu. Moisesba ɓʉɗaɗe jara ɓuu audeara ichi waabenarã nebʉra ichiabarii ɓeesii. 12 Maamina mau Moisesba ɓʉɗa Dachi Akõréburu deasii. Jãuburu dachi nebʉra ichiabarii. Aɓa jãuburu ẽbẽrarã poyaa karibai mauɗe poyaa dachi nebʉra ichiai. Mauɗeeba ¿bichi kaima, bichi ãba nebʉra ichiai baita?

Ara machi ʉ̃rʉbena arakʉɗe kʉ̃risiásturu

13 ¡Mʉ beɗea ũrísturu! Waabenarãba naka jarabadau: «Iɗi maebʉrã nu dachi junebena puuruɗaa wãɗai. Aria año aɓa paneeɗai. Mauɗe ne wauɗai chi nejarra adauɗai baita». 14 Maamina machiba adua panuu nubena ewariɗe kãare sãai. ¿Machiba kuitaa panuka nubena ewariɗe chokae nureaɗai? Adua panuu. Machi jʉ̃rʉara kĩra nuree. Jʉ̃rʉara neepeɗa isa wãꞌãebarii kĩra, machi siɗa kãꞌãabariwãe nureaɗai. 15 Mauɗeeba biꞌia ɓuu machiba naka jaraɗayu: «Dachi Mechiuba kʉ̃riaruubʉrã, dachi chokae nureaɗai. Maabae ne waukuaɗai». 16 Maamina machiba maka wauɗakau. Maumaarã chi mechiu nuree kʉ̃risia panuuɗeeba jarabadau machiba wau kʉ̃ria panuu poyaa wauɗai. Biawãra mau kachirua ɓuu. 17 Chi biꞌia waui kuitaa ɓuuba maka wauwẽebʉrã, kachirua wau ɓuu.

Dachi Akõreba barau nuree iadaai ʉ̃rʉbena

5 Chi nejarra barau nuree, ¡mʉ beɗea ũrísturu! ¡Kĩra nomaa jẽásturu, kãꞌãabariwãeɗe machi nebʉraɗe paneeɗaiɗeeba! 2 Joma machiba uru panuu ɓeraaɗa kĩra ɓuu. Machi paru simiaba koɗa kĩra ɓuu. 3 Nau kaaɗebena ewariɗe machiba chi nejarra aribia ʉyaa panuu. Maamina machi nee mauɗe parata mokokoro chau ɓuu. Dachi Akõreba ichiaruuɗe machi parata araɓauɗe mokokoro chau ɓuuba kuitaabii machiba kachirua waupeɗaaɗa. Mauɗeeba tʉbʉchiaba ãrea biꞌiwãe panaɗai. 4 Machi ne uu nuɓuuɗe trajabadaurãmaa chi nejarra deaɗawẽa panuu ãchi traju bare. Mauɗeeba ãchiba Dachi Akõremaa ʉtaa iɗi panuu kastikamera. ¡Ũrísturu! Dachi Mechiu chi joma poyaa wau ɓuuba ũrisii maarãba ʉtaa iɗipeɗaaɗa. 5 Nau iujãaɗe machiba ne joma uru panuu mauɗe machiba wau kʉ̃ria panuu waubadau. Maka machi sõ boreabi panabachiɗau, paka boreabibadau kĩra. Maamina paka beaduu kĩra kãꞌãabariwãeɗe Dachi Akõreba machi kastikai. 6 Machiba chi ẽbẽra jipa nii nebʉra barau aɗapeɗa beasiɗau. Mauɗe mauba ne waubasii bearãaɗamera.

Joma dauchia jãadua panásturu

7 Mauɗeeba ãbarã, joma dauchia jãadua panásturu aɓa Dachi Mechiu neeruuɗaa. Ne uu nuɓuuɗe ẽbẽraba wau ɓuu ʉ̃rʉbena kʉ̃risiásturu. Ichi peaɗe uuruuɗe, apii eseɗaubarii kui cheeruuɗe chi uuɗa tonomera mauɗe warimera. Ara maka nubarii kui maucha cheeruuɗe, mau uuɗa biꞌia chaumera. 8 Ara mau kĩra joma dauchia jãadua panuuɗeeba eseɗau panásturu mauɗe sõɗeeba ijãa panásturu, Dachi Mechiu Jesucristo kãꞌãabariwãeɗe neeiɗeeba. 9 Ãbarã, waabena ʉ̃rʉbena kachirua jararã́sturu, Jesucristoba machi ichiarãamera. Jesucristo dachi nebʉra ichiabarii kãꞌãabariwãeɗe neei.*

10 Ãbarã, kʉ̃risiásturu saka Dachi Akõre baita berreabadaurãba dauchia jãaduapeɗaaɗa ʉ̃rʉbena. Dachi Mechiu trʉ̃ɗeeba berreasiɗau kakua ãrea biꞌiwãe panaɗa joma dauchia jãaduasiɗau. Ara mau kĩra machia biɗa joma dauchia jãaduaɗai panuu. 11 Dachimaarã, chi ãrea biꞌiwãe panuuɗe dauchia jãadua nuree ãrea biꞌia nuree. Machiba ũribadau Job ichi ewariɗe ãrea biꞌiwãe ɓuaɗa joma dauchia jãaduasii. Mau ewari ãrea nebʉraɗe ɓuapeɗa, kuitaa panuu Dachi Mechiuba ichi biꞌia ɓusii. Mauba kĩra chuburia ɓuu mauɗe kʉ̃riaɗeeba aiɗai ɓuu.

Dachi Akõremaa ʉtaa iɗísturu

12 Mau awara ãbarã, aɓau trʉ̃ɗe biawãra ne wauɗai arã́sturu. Bajãa trʉ̃ɗeeba, nau iujãa trʉ̃ɗeeba maebʉrã barikiaɗe biawãra wauɗai arã́sturu. Wauɗai aaduubʉrã, biawãra wáusturu. Mauɗe wauɗawẽe aaduubʉrã, biawãra waurã́sturu. Maka Dachi Akõreba machi nebʉra ichiabai.

13 Machiɗebena aɓa ãrea biꞌiwãe ɓuubʉrã, Dachi Akõremaa ʉtaa iɗi ɓuu. Aɓa kĩrajʉʉ ɓuubʉrã, kariɗeeba Dachi Akõremaa biꞌia berreai ɓuu. 14 Machiɗebena aɓa ẽpermo ɓuubʉrã, chi ijãabadaurã nubadaurã iui ɓuu mau baita Dachi Akõremaa ʉtaa iɗiɗamera.* Ãchiba ʉtaa iɗiiduuɗe Dachi Mechiu Jesús trʉ̃ɗe olivo draaba ɓaꞌãra puruɗai panuu. 15 Mauɗe ijãa panaɗai panuu Dachi Akõreba mau aribiabii. Maka ʉtaa iɗiiduubʉrã Dachi Mechiuba aribiabii. Chi ẽpermo ɓuaɗaba kachirua wauɗabʉrã, Dachi Mechiuba mau perdonai. 16 Mau baita machiba kachirua waupeɗaaɗa chiya jarásturu. Mauɗe ãbua Dachi Akõremaa ʉtaa iɗísturu biꞌia duanaɗai baita. Ẽbẽra jipa ɓuuba Dachi Akõremaa ʉtaa iɗiiruubʉrã Dachi Akõre poyaabariiɗeeba ne aribia waubarii. 17 Elías dachi kĩra ẽbẽra basii. Mauba sõɗeeba Dachi Akõremaa ʉtaa iɗisii kui cherãamera. Maabae Israel druaɗe año õbea y medio kui cheebasii. 18 Mau maaɗakare ichiba Dachi Akõremaa ʉtaa iɗisii kui chemera. Ara makʉɗe kui chesii.* Mauba ne uu nuɓuu tonopeɗa chausii.

19 Ãbarã, nau kuitásturu: chi biawãra beɗeaɗebena aɓa ãyaa wãaruubʉrã, mauɗe aɓauba ichimaa kachirua ida ɓubipeɗa waya neebiiruubʉrã, mau ẽbẽraba kachirua ãrea wau ɓuaɗa Dachi Akõreba perdonapeɗa, ewaricha Dachi Akõre awara ɓuai baɗaɗebena karibai.* 20 —.