1 JUAN

Chi Chokae Nibabiabarii Beɗea

1 Araɓaeɗeeɗe chi Chokae Nibabiabarii Beɗea abadau ɓuasii, mauɗe wabiɗa ɓuu. Mauba jaradeaɗa daiba ũrisiɗau. Mau dai dauba unusiɗau mauɗe juaba wausiɗau. Mauba wauɗa kauwa ichiasiɗau. Mau ʉ̃rʉbena daiba nau kartaɗe ɓʉmaa panuu. 2 Mau chokae nibabiabarii Dachi Akõreba nau iujãaɗe unubiasii. Daiba mau unusiɗauɗeeba mau ʉ̃rʉbena biawãra berrea panuu. Daiba machimaa jara panuu mau chi ewaricha chokae nibabiabarii. Araɓaeɗeeɗe ichi Akõre ome bajãaɗe ɓuabachii. Mau bajãaɗe ɓuaɗa Dachi Akõreba daimaa nau iujãaɗe unubiasii. 3 Daiba unupeɗaaɗa mauɗe ũripeɗaaɗa machimaa jara panuu machi siɗa dai ome ãbuacha Dachi Bajãaɗebena Akõre ome mauɗe ichi Warr Jesucristo ome biꞌia panaɗamera. 4 Joma mau daiba ɓʉmaa panuu dachi ãrea kĩrajʉʉɗai baita.*

Dachi Akõre kachiruaswãe nii

5 Daiba Jesucristoɗeeba ũripeɗaaɗa machimaa jara panuu naubʉ: Dachi Akõre ʉ̃ɗaa kĩra nii ne jomaɗe jipa niiɗeeba. Mauba ichiɗe pãriu aɓa biɗa wãꞌãe. 6 Ichi ome ãbua biꞌia panuu aaduubʉrã, maamina pãriuɗe nibaaduubʉrã, setaa jara panuu. Biawãra beɗea ijãaɗawẽa panuu. 7 Maamina ichi ʉ̃ɗaaɗe ɓuu kĩra dachi siɗa ʉ̃ɗaaɗe nibaaduubʉrã, ãbarã ome ãbua biꞌia panaɗai. Mauɗe ichi Warr Jesucristo oa cheɗaba dachi kachirua joma jeraabarii.

8 Dachi kachiruaswãe panuu a panuubʉrã, ara dachi du aɓa setaa jara panuu mauɗe biawãra beɗea adua panuu. 9 Dachi Akõreba jara ɓuu kĩra ara ichiba waubariiɗeeba, mauɗe jipa waubariiɗeeba, dachiba kachirua waupeɗaaɗa ichimaa jaraaduubʉrã, mau kachirua perdonai. Joma kachirua waupeɗaaɗa jeraai. 10 Kachirua wauɗakau aaduubʉrã, Dachi Akõre chi seta nii a panuu mauɗe ichi beɗea ijãaɗawẽa panuu.*

Dachi baita Dachi Akõremaa chi chuburia iɗibarii

2 Ãbarã, machi mʉ warrarã kĩra nuree. Mʉʉba mau ɓʉmaa ɓuu machiba kachirua waurãaɗamera. Maamina aɓaba kachirua wauruubʉrã, aɓa uru panuu Dachi Bajãaɗebena Akõremaa dachi baita chi chuburia iɗimera. Mau chi chuburia iɗibarii Jesucristobʉ. Ne joma jipa waubarii. 2 Ichi biusii Dachi Akõreba dachi kachirua perdonamera. Dachi kachirua báitaburu biubasii, maumaarã biusii joma nau iujãaɗe panuurã kachirua baita biɗa.

3 Dachi Akõreba waubi ɓuu beɗea dachiba mau wau panuubʉrã, unubiaɗai panuu ichi biawãra unu panuu. 4 Aɓauba jaraaruubʉrã: «Mʉʉba ichi unu ɓuu», mauɗe ichiba waubi ɓuu beɗea wauwẽa ɓuubʉrã, mauba setaa jara ɓuu. Chi biawãra beɗea adua ɓuu. 5 Maamina chi Dachi Akõre beɗea wau ɓuuba Dachi Akõre biawãra kʉ̃ria ɓuu. Chi Dachi Akõre ome ɓuu a ɓuu Jesucristo nibaɗa kĩra nibai ɓuu. Dachi maka nibaaduubʉrã, kuitaa panuu biawãra ichi ome panuu. 6 —.

Dachi Akõreba waubi ɓuu beɗea wiɗi

7 Ãbarã, mʉʉba machi baita ɓʉwẽa ɓuu chi Dachi Akõreba waubi ɓuu beɗea wiɗi, maumaarã ɓʉ ɓuu ichiba chi naeɗe waubi ɓuu beɗea jaraɗa.* Mau waubi ɓuu beɗea machiba Cristoɗe ijãapeɗaaɗaɗeeɗebena kuitaa panuu. Mau nabẽraeɗebena beɗea chi ichiɗebena ũripeɗaaɗabʉ. 8 Maamina chi mʉʉba ɓʉmaa ɓuu chiwiɗi kĩra ɓuu Cristoba wausiiɗeeba mauɗe machia biɗa biawãra wau panuuɗeeba. Chi nau wiɗi pãriu wãꞌãe kãrii kĩra ɓuu, mauɗe chi biawãra beɗea ʉ̃ɗaa kãrii kĩra ɓuu.

9 Aɓauba ʉ̃ɗaaɗe ɓuu aaruubʉrã, maamina ichi ãba kĩramaa ɓuubʉrã, wabiɗa pãriuɗe ɓuu. 10 Chi ichi ãba kʉ̃riabarii ʉ̃ɗaaɗe ɓuu mauɗe ichi sõɗe wãꞌãe kachiruaɗe ɓaebii baita. 11 Maamina chi ichi ãba kĩramaa ɓuu pãriuɗe ɓuu. Pãriuɗe niiɗeeba adua ɓuu samaa wãi, pãriuba ichi dau berrea ɓuuɗeeba.

15 Nau iujãaɗebena kʉ̃risia mauɗe ne joma nau iujãaɗebena kachirua kʉ̃riarã́sturu. Chi nau iujãaɗebena kachirua kʉ̃ria ɓuuba Dachi Bajãaɗebena Akõre kʉ̃riawẽa ɓuu. 16 Nau iujãaɗebena kachirua naubʉ: dachi kakuaba kachirua wau kʉ̃ria ɓuabarii, dachi dauba unu panuu kʉ̃ria panabadau, mauɗe dachiba uru panuu kakua maebʉrã wau panuu kakua ara dachi waabenarã audeara aude nuree kʉ̃risia panaɗai. Joma mau Dachi Bajãaɗebena Akõreɗebenawãe, maumaarã nau iujãaɗebenabʉ. 17 Nau iujãa kachirua mauɗe joma chi kachirua ẽbẽrarãba wau kʉ̃ria panuu wãꞌãe bai. Maamina chi Dachi Akõreba jara ɓuu beɗea wau ɓuu ewaricha ichi ome chokae ɓuai.

Cristo kĩramaabarii

18 Mʉ warrarã, nau kaaɗebena ewari wãꞌãeburuu. Machiba ũrisiɗau Cristo kĩramaabarii neei.* Cristo kĩramaabadaurã iɗibae barau. Mauɗeeba dachiba kuitaa panuu nau Dachi Akõre beɗea ewari wãꞌãeburuu. 19 Maarã dachi baara panaɗa wãsiɗau, maamina biawãra dachiɗebenawãe basii. Maarã biawãra dachiɗebena basirã, dachi baara wabiɗa ãbua panaɗai basii. Maamina mau makasii biꞌia kuitaaɗamera joma dachiɗebenawãe nuree.

20 Maumaarã machiba Dachi Akõre Jauri Cristoba deaɗa uru panuu. Ichiɗeeba joma chi biawãra beɗea kuitaa panuu. 21 Mʉʉba nau karta ɓʉwẽa ɓuu machiba chi biawãra beɗea adua panuuɗeeba maumaarã ɓʉ ɓuu kuitaa panuuɗeeba. Mauɗe kuitaa panuu chi seta biawãraɗebenawãe. 22 ¿Chi setaa jarabarii kaima? Chi Jesús Dachi Akõreba deai jaraɗa dachi karibabariiwãe a ɓuubʉ.* Mau chi Cristo kĩramaabariibʉ. Mauba Dachi Bajãaɗebena Akõre mauɗe Dachi Akõre Warr kʉ̃riawẽe. 23 Chi Dachi Akõre Warr kʉ̃riawẽa ɓuuba Dachi Bajãaɗebena Akõre uru ɓuuwãe. Chi Jesús Dachi Akõre Warr a ɓuuba Dachi Bajãaɗebena Akõre siɗa uru ɓuu. 24 Mauɗeeba machiba ijãasiɗauɗeeɗebena chi Cristo ʉ̃rʉbena ũri panuu machi sõɗe nu uru panásturu. Maka machi Dachi Bajãaɗebena Akõre ome mauɗe ichi Warr ome ãbua panaɗai. 25 Maka ãbua panuubʉrã, Cristoba dachimaa biawãra jarasii ewaricha Dachi Akõre ome chokae panaɗai.

26 Mʉʉba mau ɓʉsii waabenarãba machi setaa kʉ̃ria panuuɗeeba. 27 Maamina machiba Dachi Akõre Jauri Cristoba deaɗa uru panuu. Mauɗeeba jʉrʉɗaabai panuu waabenarãmaa machi jaradeabiayua. Dachi Akõre Jauriba machimaa ne joma jaradea ɓuu. Ichiba jaradea ɓuu setawãe, maumaarã biawãrabʉ. Mauɗeeba Cristo ome ãbua panásturu Dachi Akõre Jauriba machimaa jaradeaɗa kĩra.

28 Mʉ warrarã, Cristo ome ãbua panásturu. Maka ichi neeruuɗe wapeaɗawẽa mauɗe kĩra nejasiaɗawẽa nureaɗai ichi daaɗe. 29 Machiba kuitaa panuu Jesucristo jipa nii. Mauɗe kuitaa panuu chi joma jipa wau nuree, Dachi Akõre warrarãbʉ.

Dachi Akõre warrarã

3 Ichiásturu saka Dachi Akõreba* dachi ãrea kʉ̃ria ɓuu. Ichiba ãrea kʉ̃ria ɓuuɗeeba dachi ichi warrarã abarii. Biawãra dachi ichi warrarãbʉ.* Nau iujãaɗebenarãba mau adua panuu, ichi unuɗakauɗeeba. 2 Ãbarã, dachi Dachi Akõre warrarãbʉ. Dachi Akõreba wabiɗa unubiawẽa ɓuu dachi saka nureaɗai. Maamina kuitaa panuu Cristo neeruuɗe ichi kĩra nureaɗai, mau ewariɗe ichi saka nii unuɗaiɗeeba. 3 Chi Cristo kĩra ɓuai baita eseɗau ɓuu kachiruaswãe ɓuai baita nu ɓuabarii, Cristo kachiruaswãe nii kĩra.

4 Chi kachirua wau ɓuuba Dachi Akõre ley waukau. Mau kachirua wauruuɗe, Dachi Akõre mauɗe chi ley kʉ̃riakau. 5 Maamina machiba kuitaa panuu Jesucristo nau iujãaɗaa neesii dachi kachirua awara ɓui baita. Ichi chi kachirua ɓaꞌãra biɗa wãꞌãe nii. 6 Chi ichi ome ãbua ɓuuba kachirua waukau. Maamina chi kachirua wau ɓuuba Jesucristo unukau mauɗe saka nii adua ɓuu.

7 Mʉ warrarã, aɓaumaa ida setaa kũruabiarã́sturu. Chi jipa wau ɓuu Dachi Akõre daaɗe jipa nii, Cristo jipa nii kĩra. 8 Maamina chi kachirua wau ɓuu jʉbawãe niiɗebʉ, araɓaeɗeeɗe jʉbawãe nii kachirua wau ɓuabariiɗeeba. Dachi Akõre Warr nau iujãaɗaa neesii jʉbawãe niiba wau ɓuu poyaai baita.

9 Chi Dachi Akõre wãwa adauɗa kĩra niiba kachirua waukau, Dachi Akõre chokae nibabiabarii ichiɗe ɓeebariiɗeeba.* Dachi Akõreɗebena neesiiɗeeba kachirua poyaa wau ɓuakau. 10 Nauɗeeba dachiba kuitaa panuu kairã Dachi Akõre warrarã mauɗe kairã jʉbawãe nii warrarã. Chi jipa wauwẽa ɓuu Dachi Akõre warrwãe. Mauɗe chi ichi ãba kʉ̃riawẽa ɓuu Dachi Akõre warrwãe.

Chiya kʉ̃ria nureaɗai panuu

11 Chi machiba ijãasiɗauɗeeɗebena ũri panuu beɗea naubʉ: dachi chiya kʉ̃ria nureaɗai panuu. 12 Caín kĩra panaɗaabai panuu.* Jʉbawãe niiɗe basiiɗeeba chi ãba beasii. ¿Sakãe ichi ãba beasma? Beasii ichi ãbaba wau ɓuaɗa Dachi Akõre daaɗe biꞌia ɓuasiiɗeeba mauɗe ichiba wauɗa kachirua ɓuasiiɗeeba.

13 Ãbarã, nau iujãaɗebenarãba machi kĩramaaduubʉrã, ãrea kĩra nomaarã́sturu. 14 Dachiba ãbarã kʉ̃ria panuuɗeeba kuitaa panuu dachi biu panaɗa chokae paneesiɗau. Chi ichi ãba kʉ̃riawẽa ɓuu wabiɗa biu nuɓuu. 15 Chi ichi ãba kĩramaa ɓuu Dachi Akõre daaɗe mia beabarii. Machiba kuitaa panuu chi mia beabarii ewaricha Dachi Akõre ome chokae ɓuabai. 16 Nauɗeeba dachiba kuitaa panuu dachi ãbarã kʉ̃riabadau: Jesucristo dachi kakua biusii. Ara mau kĩra dachi siɗa kʉ̃riaɗeeba ãbarã baita biuɗai baita nureaɗai panuu. 17 Chi nau iujãaɗe chi nejarr barau niiba chi nejarr barauwãe nii ãba unu ɓuu aiɗawẽebʉrã, ¿Dachi Akõreba chi kʉ̃ria ichi sõɗe uru ɓuka? Uru ɓuuwãe. 18 Mʉ warrarã, dachi ãbarã kʉ̃riaɗai panuu. Beɗeaɗéburu maka wauɗaabai panuu, maumaarã dachiba wau panuuɗeeba biawãra kʉ̃riaɗai panuu.

19 Mauɗeeba kuitaa panuu dachi biawãra Dachi Akõreɗe. Mauɗe ara dachi sõɗe kachirua wau panuu a kʉ̃risiaduubʉrã, Dachi Akõre daaɗe poyaa jirukaraayuwãe panaɗai. Dachi Akõreba dachi ʉ̃rʉbena biꞌia kuitaa ɓuu chi dachi sõɗe kʉ̃risia panuu audeara. Ichiba joma kuitaa ɓuu. 20 —. 21 Ãbarã, dachi nebʉraswãe panuu a kʉ̃risia panuubʉrã, wapeawẽa Dachi Akõremaa poyaa ʉtaa iɗiɗai. 22 Mauɗe dachiba ʉtaa iɗiiduu ichiba deai, Dachi Akõreba waubi ɓuu beɗea mauɗe chi ichiba kʉ̃ria ɓuu wau panuuɗeeba. 23 Mau waubi ɓuu beɗea naubʉ: ichi Warr Jesucristoɗe ijãaɗai mauɗe chiya kʉ̃ria nureaɗai ichiba dachimaa jaraɗa kĩra. 24 Chi Dachi Akõreba waubi ɓuu beɗea wau ɓuu Dachi Akõre ome ɓuu, mauɗe Dachi Akõre ichi ome ɓuu. Dachiba kuitaa panuu Dachi Akõre dachi ome ɓuu, ichi Jauri dachimaa deasiiɗeeba.

Setaa jaradeabadaurã saka kuitaaɗai

4 Ãbarã, barikiurãba Dachi Akõre Jauriɗeeba berrea panuu abadaurã ijãarã́sturu, maumaarã kauwa ichiásturu ãchiba biawãra Dachi Akõre Jauriɗeeba maebʉrã waabenarãɗeeba berrea panuu kuitaaɗai baita. Mau makásturu ãreaba nau iujãaɗe setaɗeeba ãchiba Dachi Akõre Jauriɗeeba berrea panuu abadauɗeeba. 2 Naka machiba kuitaaɗai kai Dachi Akõre Jauriɗeeba berrea ɓuu: aɓaba Jesucristo nau kakuaɗe biawãra neesii aaruubʉrã, Dachi Akõre Jauriɗeeba berrea ɓuu. 3 Maamina aɓauba Jesucristo nau kakuaɗe neebasii aaruubʉrã, Dachi Akõre Jauriɗeeba berrea ɓuuwãe. Chi Cristo kĩramaabariiɗeeba berrea ɓuu.* Machiba ũrisiɗau Cristo kĩramaabarii neei ɓuu. Biawãra mau nau iujãaɗe ɓuu.

4 Mʉ warrarã, machi Dachi Akõreɗebʉ. Machiba maarãmaa ida setaa kũruabiaɗaabasii, chi machi sõɗe ɓuu chi nau iujãaɗe ɓuu audeara poyaabarii ɓuuɗeeba. 5 Maarã nau iujãa kachiruaɗebenarãbʉ. Mauɗeeba nau iujãaɗebena kʉ̃risia jaradeabadau mauɗe ãchiba jaradea panuu nau iujãaɗe Dachi Akõreɗe ijãaɗakaurãba ijãabadau. 6 Maamina Dachi Akõreɗebʉ. Chi Dachi Akõre unu ɓuuba dachiba jaradea panuu ijãabarii. Chi Dachi Akõre unukauba dachiba jaradea panuu ijãakau. Mauɗeeba dachiba kuitaa panuu kaiba Dachi Akõre Jauriɗeeba biawãra beɗea jaradea ɓuu mauɗe kaiba setaɗebena jauriɗeeba setaa jaradea ɓuu.

Dachi Akõreba ẽbẽrarã kʉ̃ria ɓuu

7 Ãbarã, dachi chiya kʉ̃ria nureaɗai panuu, Dachi Akõreba dachimaa dachi ãbarã biawãra kʉ̃riabiabariiɗeeba. Joma chi kʉ̃ria uru nuree Dachi Akõre warrarãbʉ mauɗe Dachi Akõre unubadau. 8 Dachi Akõreba ne jomaɗe kʉ̃riakua ɓuuɗeeba chi aɓau kʉ̃riawẽa ɓuuba Dachi Akõre unukau. 9 Dachi Akõreba dachi kʉ̃ria ɓuu unubiasii ichi Warr aɓa nii nau iujãaɗaa bʉisiiɗe ichiɗeeba ewaricha chokae nureaɗamera. 10 Chi biawãra kʉ̃ria naka ɓuu: chi kʉ̃riaɗeeba Dachi Akõreba ichi Warr bʉisii biumera dachi kachirua perdonai baita. Dachi Akõreba maka waubasii dachiba ichi kʉ̃ria panasiiɗeeba, maumaarã maka wausii ichiba dachi kʉ̃riasiiɗeeba.

11 Ãbarã, Dachi Akõreba dachi maka kʉ̃riasiiɗeeba dachi siɗa chiya kʉ̃ria nureaɗai panuu. 12 Aɓau biɗa Dachi Akõre dauba unukau. Maamina dachi chiya kʉ̃ria panuubʉrã, Dachi Akõre dachi ome ɓuu mauɗe ichi kʉ̃riaɗeeba dachiba biawãra joma kʉ̃ria panuu. 13 Dachi Akõreba ichi Jauri dachimaa deasiiɗeeba kuitaa panuu dachi Dachi Akõre ome panuu mauɗe ichi dachi ome ɓuu. 14 Daiba ichi Warr unusiɗauɗeeba jara panuu Dachi Bajãaɗebena Akõreba mau biawãra bʉisii nau iujãaɗebenarã karibamera. 15 Barikiuba Jesús biawãra Dachi Akõre Warr aaruubʉrã, Dachi Akõre ichi ome ɓuu mauɗe ichi Dachi Akõre ome ɓuu.

16 Dachiba kuitaa panuu mauɗe ijãa panuu Dachi Akõreba dachi kʉ̃riakua ɓuu. Dachi Akõreba ne jomaɗe kʉ̃ria ɓuu. Biawãra kʉ̃ria uru ɓuu Dachi Akõre ome ɓuu mauɗe Dachi Akõre ichi ome ɓuu. 17 Maka dachiba Dachi Akõre mauɗe joma ẽbẽrarã biawãra kʉ̃ria panuu. Dachi Akõreba dachi nebʉra kastikai ewariɗe dachi ne wapeawẽa nureaɗai, nau iujãaɗe Jesucristo nibaɗa kĩra nibapeɗaaɗaɗeeba. 18 Dachiba Dachi Akõre mauɗe joma ẽbẽrarã kʉ̃ria panuubʉrã, Dachi Akõreba kastikaiɗebena wapeaɗaabai panuu, chi biawãra kʉ̃riaba mau wapeaɗai wãꞌãebibariiɗeeba. Chi Dachi Akõreba dachi nebʉra kastikai wapea ɓuuba kuitaa ɓuu Dachi Akõreba ichi nebʉra kastikai. Ichiba Dachi Akõre mauɗe joma ẽbẽrarã wabiɗa biawãra kʉ̃ria ɓuuwãe.

19 Dachiba Dachi Akõre kʉ̃ria panuu ichiba dachi naa kʉ̃riasiiɗeeba. 20 Aɓauba Dachi Akõre kʉ̃ria ɓuu aaruubʉrã, mauɗe ichi ãba kĩramaa ɓuaruubʉrã, setaa jara ɓuu. Chi ãba unu ɓuu kʉ̃riawẽa ɓuubʉrã, ¿saka Dachi Akõre unuwẽa nii kʉ̃ria ɓuaima? 21 Jesucristoba dachimaa waubi ɓuu beɗea naubʉ: chi Dachi Akõre kʉ̃ria ɓuuba ichi ãba kʉ̃ria ɓuai ɓuu.

Dachi Akõre Warr ijãaɗai panuu ʉ̃rʉbena

5 Jesús Dachi Akõreba Dachi Karibabarii deai jaraɗa aɓauba ijãaruubʉrã, mau ẽbẽra Dachi Akõre warrbʉ.* Dachi Bajãaɗebena Akõre kʉ̃ria ɓuuba ichi warrarã siɗa kʉ̃ria ɓuu. 2 Dachiba Dachi Akõre kʉ̃ria panuubʉrã mauɗe ichiba waubi ɓuu beɗea wau panuubʉrã, kuitaa panuu ichi warrarã siɗa kʉ̃ria panuu. 3 Dachi Akõre biawãra kʉ̃ria panuubʉrã, ichiba waubi ɓuu beɗea joma wauɗai. Ichiba waubi ɓuu beɗea chaareawẽa ɓuu. 4 Joma Dachi Akõre warrarãba nau iujãaɗebena kachirua ida ɓubadau. Biawãra dachiba Jesucristoɗe ijãa panuuɗeeba mau poyaa ida ɓuɗai. 5 ¿Kaiba nau iujãaɗebena kachirua poyaa ida ɓuima? Aɓauba Jesús biawãra Dachi Akõre Warr ijãaɗe ɓuubʉrã, mau ẽbẽraba mau poyaa ida ɓui.

Jesús biawãra Dachi Akõre Warrbʉ

6 Mau ara ichi Jesucristo, chi nau iujãaɗaa neepeɗa baniaɗe boro eabiɗa mauɗe ichi oa cruzɗe cheɗabʉ. Nau iujãaɗaa neepeɗa baniaɗéburu boro eabasii, maumaarã ichi oa siɗa cruzɗe chesii. Dachi Akõre Jauriba kuitaabia ɓuu mau biawãra, ichiba chi biawãra beɗea kuitaabiabariiɗeeba. 7 Mauɗe bajãaɗe õbea panuuba mau biawãra araɓauɗe jara panuu; Dachi Bajãaɗebena Akõreba maka jara ɓuu, chi «Beɗea» abadauba maka jara ɓuu mauɗe ichi Jauriba maka jara ɓuu. Mau õbea panuu aɓaburubʉ.* 8 Naka chi õbea panuuba kuitaabiabadau chi beɗea biawãra Jesús ʉ̃rʉbena: Jesús boro easiiɗeeba, ichi oa cruzɗe chesiiɗeeba, mauɗe Dachi Akõre Jauriba kuitaabia ɓuuɗeeba. Mau õbea jara panuuba araɓauɗe kuitaabia panuu. 9 Ẽbẽraba unuɗa biawãra aaruubʉrã dachiba mau ijãabadau. Maamina Dachi Akõreba jara ɓuu aude ijãaɗai panuu, ichi Warr ʉ̃rʉbena biawãra jara ɓuuɗeeba. 10 Chi Dachi Akõre Warr ijãa ɓuuba ichi sõɗe kuitaa ɓuu Dachi Akõreba jara ɓuu biawãra. Maamina chi Dachi Akõreba jara ɓuu ijãawẽa ɓuuba chi mauba setaa jara ɓuu a kʉ̃risia ɓuu, ichi Warr ʉ̃rʉbena jara ɓuu ijãawẽa ɓuuɗeeba. 11 Dachi Akõreba jara ɓuu naubʉ: ichi Warrɗeeba dachi ewaricha mau ome chokae nibabiai. 12 Biawãra chi Dachi Akõre Warrɗe ijãa ɓuu mau ome ewaricha chokae ɓuai. Maamina chi Dachi Akõre Warrɗe ijãawẽa ɓuu mau ome ewaricha chokae ɓuabai.

Juanba nau kartaɗe aanama ɓʉɗa

13 Mʉʉba nau karta machi chi Dachi Akõre Warrɗe ijãabadaurã baita ɓʉʉruu kuitaaɗamera ewaricha Dachi Akõre ome chokae nureaɗai.

14 Dachi Akõreba kʉ̃ria ɓuu kĩra dachiba ʉtaa iɗiiduubʉrã, kuitaa panuu ichiba ũribarii. Mauɗeeba ne wapeawẽa ichimaa ʉtaa iɗiɗai panuu. 15 Dachiba ʉtaa iɗiiduu Dachi Akõreba ũribarii kuitaa panuuɗeeba, kuitaa panuu mau ʉtaa iɗiiduu ichiba deai.

16 Machiɗebena aɓauba bichi ãba kachirua dachi biubikau wauruu unuuruubʉrã, ʉtaa iɗii ɓuu. Maka Dachi Akõreba mau perdonapeɗa, chokae nibabii. Maamina dachi biubibarii kachirua baraubʉ. Mʉʉba jarawẽa ɓuu chi mau kachirua waubadaurã kakua ʉtaa iɗimera. 17 Joma Dachi Akõre daaɗe biꞌiwãe wauɗa kachiruabʉ. Maamina kachirua barau dachi biubikau.

18 Dachiba kuitaa panuu Dachi Akõre warrarãba kachirua wau panaɗakau,* Dachi Akõre Warr Jesucristoba ãchi nu ua ɓuuɗeeba. Mauba jʉbawãe niiba ãchi kachirua poyaa waukau. 19 Dachiba kuitaa panuu dachi Dachi Akõreɗe. Mauɗe kuitaa panuu joma nau iujãaɗe Dachi Akõreɗe ijãaɗakaurã jʉbawãe nii juaɗe duanuu. 20 Kuitaa panuu Dachi Akõre Warr neesii mauɗe kʉ̃risia kuitaa dachimaa deasii Dachi Akõre biawãra unuɗamera. Ichi Warr Jesucristo ome panuuɗeeba dachi biawãra Dachi Akõre ome panuu. Mau biawãra Dachi Akõrebʉ. Mauba ẽbẽrarãmaa ichi ome ewaricha chokae nureaɗai deabarii. 21 Mʉ warrarã, Dachi Akõre kuenda juaba ne kapeɗaaɗaɗe ijãarã́sturu.