2 PEDRO

Pedroba nau kartaɗe naa ɓʉɗa

1 Mʉ Simón Pedrobʉ, Jesucristo baita bari trajabariibʉ mauɗe ichiba bʉiɗabʉ. Mʉʉba nau karta ɓʉʉruu chi Dachi Akõreɗe mauɗe Dachi Karibabarii Jesucristoɗe ijãabadaurã baita. Ichi jipa niiɗeeba, dai ome araɓauɗe biꞌia ijãa panuu. 2 Machiba Dachi Akõre mauɗe Dachi Mechiu Jesús kuitaa panuuɗeeba, mʉʉba kʉ̃ria ɓuu ãchi sõbiaɗeeba machi ãrea aiɗa panaɗamera mauɗe ãrea jirukaraayuwãe panabiaɗamera.

Dachi Akõreba iukuaɗarã saka nureaɗai panuu

3 Dachi Akõre kuitaa panuuɗeeba, ichi poyaabariiɗeeba dachimaa ne joma deasii ichiba kʉ̃ria ɓuu kĩra nibaɗamera mauɗe ewaricha ichi ome chokae nureaɗamera. Ichi chi mechiuɗeeba mauɗe jipa niiɗeeba dachi iupeɗa ne mechiu mauɗe ne bia dachi baita waui asii. Maka wau ɓuuɗeeba nau iujãaɗebenarãba kachirua wau kʉ̃ria panuu machiba ida ɓuɗapeɗa poyaa ichi kĩra jipa nureaɗai. 4 —. 5 Mauɗeeba Cristoɗe ijãa panuuɗeeba ãrea jʉrʉ́sturu jipa nibaɗai baita; jipa niɗauɗe jʉrʉ́sturu kʉ̃risia kuitaa nureaɗai baita; 6 kʉ̃risia kuitaa panuuɗe jʉrʉ́sturu machi kakua kĩra jipa nureaɗai baita; machi kakua kĩra jipa panuuɗe jʉrʉ́sturu joma jãaduaɗai baita; joma jãadua panuuɗe jʉrʉ́sturu Dachi Akõreba kʉ̃ria ɓuu kĩra nureaɗai baita; 7 Dachi Akõreba kʉ̃ria ɓuu kĩra panuuɗe jʉrʉ́sturu ãbarã kʉ̃riaɗai baita; ãbarã kʉ̃ria panuuɗe jʉrʉ́sturu jomaurã kʉ̃riaɗai baita.

8 Machiba mau joma biꞌia wauduubʉrã, Dachi Mechiu Jesucristo aude kuitaabiaɗai mauɗe ne biꞌia wauɗai baita chokekea nureabiaɗai. 9 Maamina chi maka wauwẽa ɓuu dau tõroroa ɓuu kĩra ɓuu, maebʉrã dau pãriu ɓuu kĩra ɓuu. Ichiba kĩrabaabasii chi naeɗe kachirua wau ɓuaɗa Dachi Akõreba joma jeraasii. 10 Ãbarã, Dachi Akõreba machi iupeɗa jʉrʉ adausii. Biawãra maka nuree unubiɗai baita chokekea panásturu. Maka wauduubʉrã ɓaeɗaabai. 11 Mauɗe Dachi Mechiu Jesucristoba machi ida wãbiai ichi puuruɗaa, de poraa ewa nuɓuu kĩra. Dachi Karibabariiba dachi ewaricha biꞌia uru ɓuai.

12 Joma mau kuitaa panumina mauɗe chi biawãra beɗea ãrea ijãa panumina, mʉʉba joma mau machimaa kĩrababia ɓuai. 13 Mʉʉmaarã jipa ɓuu wabiɗa chokae ɓuuɗe* mau machimaa kĩrababia ɓuai. 14 Dachi Mechiu Jesucristoba mʉʉmaa biꞌia kuitaabisii kãꞌãabariwãeɗe mʉ biui. 15 Mauɗeeba mʉʉba joma waui, mʉ biuɗakare, machiba joma mau ewaricha kĩrabaɗamera.

Jesús ʉ̃rʉbena jarapeɗaaɗa biawãrabʉ

16 Dachi Mechiu Jesucristo poyaabarii ʉ̃rʉbena mauɗe ichi waya neei ʉ̃rʉbena daiba machimaa jaradeasiɗauɗe ara dai kʉ̃risiaɗeeba jarapeɗaaɗa jaradeaɗaabasii. Maumaarã Dachi Mechiu Jesús kĩrawãrea teɗechoa unupeɗaaɗaɗeeba maka jaradeasiɗau. 17 Dachi Bajãaɗebena Akõreba ichi ʉ̃rʉbena biꞌia jarasiiɗe mauɗe chi mechiu nii unubiasiiɗe dai aria panasiɗau. Dachi Akõre chi mechiu ãrea kĩrawãrea niiba naka jarasii: «Nau mʉ Warrbʉ. Mʉʉba mau ãrea kʉ̃ria ɓuu mauɗe mau kakua kĩrajʉʉ ɓuu. Mauba jara ɓuu ũrísturu».* 18 Daiba mau beɗea biawãra bajãaɗe ũrisiɗau Jesús ome, Dachi Akõre eaɗe panasiɗauɗe.

19 Mau awara kuitaa panuu Dachi Akõre baita berreabadaurãba jarapeɗaaɗa biawãrabʉ. Mau beɗea ʉ̃ɗaa koabarii pãriuɗe urua ɓuu kĩra ɓuuɗeeba machiba ãrea kauwa ũriɗai panuu. Ʉ̃ɗaa koabarii urua ɓuabarii aɓa ewariiruuɗaa, aɓa chi dapeɗeeɗebena pusterrea neeruuɗaa. Ara mau kĩra dachi nau iujãa kachiruaɗe panuuɗe mau beɗeaba dachi sõɗe kuitaabia ɓuu saka nibaɗai panuu aɓa Cristo neeruuɗaa. 20 Nau ãrea kuitásturu: Dachi Akõre baita berreabadaurãba Ichi Beɗeaɗe ɓʉpeɗaaɗa ara ãchi kʉ̃risiaɗeeba ɓistĩika biɗa ɓʉɗaabasii. 21 Maarãba kʉ̃ria panaɗa kĩra jaraɗaabasii, maumaarã Dachi Akõre baita panasiiɗeeba, Ichi Jauriɗeeba berreasiɗau.*

Setaa jaradeabadaurã

2 Israel puuruɗebenarã tãeɗe Dachi Akõre baita berreabadaurã setaa jaradeabadaurã basii. Machi tãeɗe biɗa setaa jaradeabadaurã baraai. Setaɗeeba ãchiba dachi o ãyaa wãbiabarii kʉ̃risia, Dachi Akõre beɗea kĩra jaradeaɗai. Dachi Mechiu Jesusba ãchi kariba ɓuaɗa unuɗakau aɗai. Mauɗeeba Dachi Akõreba isa kastikai. 2 Maarãba waabenarã daaɗe ãrea mianejasia waubadau, ẽbẽrarã ãreaba ara mau kĩra wauɗai. Maarã ʉ̃rʉbena ẽbẽrarãba chi biawãra beɗea* kakua kachirua berreaɗai. 3 Chi nejarra kʉ̃ria panuuɗeeba, machi chi nejarra adauɗai baita ara ãchi kʉ̃risiaɗeeba setaa jaradeaɗai. Ãrea basii Dachi Akõreba maarã nebʉra ichiai baita ɓuu, mauɗe kãꞌãabariwãeɗe biawãra maarã kastikai.

4 Angelerãba kachirua wausiɗauɗe Dachi Akõreba kĩra chuburiabasii. Maumaarã choɓea pãriu ɓuuɗe jirakuasii.* Mama kaenaba jʉ̃ panuu aɓa Dachi Akõreba ãchi nebʉra ichiai ewariɗaa. 5 Mauɗe nabẽraeɗebenarãba Dachi Akõre ida ɓusiɗauɗe ichiba kĩra chuburiabasii. Maumaarã bania ãrea birubisii mau ẽbẽrarã joma kiniɗamera. Maamina Noeba dachi jipa nibaɗai ʉ̃rʉbena jaradeabachii. Ichi, ichi deɗebenarã 7 panuu siɗa Dachi Akõreba karibasii.* 6 Mauɗe Dachi Akõreba Sodoma puuru mauɗe Gomorra puuru kastikasiiɗe joma baa bʉisii. Mau joma etaɓarr babisii. Mauba kuitaabiasii chi ichi kʉ̃riaɗakaurãmaa ãchi sãaɗai. 7 Maamina ẽbẽra jipa nii Lot abadau Dachi Akõreba Sodoma baaiɗebena karibasii.* Lot kĩra nomaa ɓuabachii mau puuruɗebenarãba ne joma kachirua wau panuuɗeeba. 8 Mau ẽbẽra jipa nii maarã tãeɗe ɓuabachii. Jipa niiɗeeba maarãba kachirua wau panuu unuuruuɗe mauɗe ũriiruuɗe ewaricha kĩra nomaa ɓuabachii. 9 Mauba unubi ɓuu Dachi Mechiuba chi jipa wau nuree ãrea biꞌiwãe panuuɗebena kariba kuitaa ɓuu. Mauɗe kuitaa ɓuu chi jipa wauwẽa nuree saka uru ɓuai aɓa ichiba kastikai ewariɗaa. 10 Chi nau kakuaba kachirua wau kʉ̃ria ɓuu waubadaurã mauɗe chi Dachi Akõre mʉ Mechiu aɗai kʉ̃riaɗakaurã aude kastikai.

Setaa jaradeabadaurã kachirua wauɗai baita peraɗakau. Ãrea kuitaa nuree kĩra panabadau. Jauri kachiruarã chi mechiu nuree ʉ̃rʉbena kachirua jaraɗai baita wapeaɗakau. 11 Angelerã ãchi audeara ãrea meserãa mauɗe poyaabarii nuremina, Dachi Mechiu daaɗe jai kachiruarã chi mechiu nuree ʉ̃rʉbena kachirua jaraɗakau. 12 Maamina setaa jaradeabadaurãba ãchiba adua panuuɗebena kachirua berreabadau. Ãnimara kĩra kʉ̃risiaswãe nuree. Aɓa ãchi kakuaba kʉ̃ria ɓuu waubadau. Ãnimara tobadau ẽbẽrarãba jidauɗapeɗa beaɗamera. Ara mau kĩra setaa jaradeabadaurã joma biuɗai. 13 Dachi Akõreba ãchi ãrea ichiai ara ãchiba waupeɗaaɗa kĩra. Ãchi ko ãrea nuree mauɗe itua do ãrea nuree. Mau ãchi baita kĩrajʉʉbadau. Ẽsabuɗe mauɗe ãsaeɗe maka waubadau. Ãbarã ome ãbua komaa panuuɗe maka waubadau. Maka machi tãeɗe paru jayoa miadaa kĩra nuree. 14 Ãibena wẽra ome kãi paneebadau. Ne joma kachirua wau ɓuuba kĩraseɗakau. Chi ãrea ijãawẽa nuree setaa kũruabadau. Ne joma kʉ̃riabadau. Mau kakua Dachi Akõreba ãchi nebʉra ichiai. 15 Dachi Akõre o jipa ɓuu ida ɓuɗapeɗa o ãyaa wãsiɗau. Beor warr Balán abadauba wauɗa kĩra waubadau.* Balán chi nejarra kʉ̃ria ɓuasiiɗeeba chi nejarra baita kachirua waui kʉ̃risiasii. 16 Maamina kachirua oɗe wãaruuɗe burroba ichi kastikasii. Mau ãnimara berreakau ẽbẽra kĩra berreasii. Dachi Akõre baita berreabarii Balán kʉ̃risiaswãe ɓuu kĩra kachirua oɗe wãi kʉ̃risia ɓumina burroba ida wãbiibasii.

17 Setaa jaradeabadaurã mieɗe baniaswãe ɓuu kĩra nuree. Ãchi jʉ̃rʉara pũaturãba ãyaa adoeruu kĩra nuree. Pũaturãba jʉ̃rʉara ãyaa adoeruuɗe kui chekau. Ara mau kĩra ãchiba jaradea panuuba aiɗakau. Dachi Akõreba choɓea ãrea pãriu ɓuuɗe ɓusii ãchi kastikakuai baita. 18 Ãchiba mipitaa berreaduuba jaradeabadau. Maamina mauba aiɗakau. Ãchiba jaradeabadau nau kakuaba kachirua wau kʉ̃ria ɓuu wauɗai panuu. Maka chi ara ea kachiruaɗebena wãpeɗaaɗa nuree ãchiba setaa kũruabadau waya kachirua wauɗamera. 19 Maarã jarabadau ijãaduubʉrã, biꞌia paneeɗai abadau, chi chibari baita bari trajabarii ichi chibari juakaa miru wãaruu kĩra. Maamina kachirua poyaa ida ɓuɗakauɗeeba biꞌia paneebai. Mauba ãchi kachirua baita bari trajabadaurã babiai. Biawãra barikia kachirua poyaa ida ɓuɗaabaibʉrã, dachi mau baita bari trajabadaurãbʉ. 20 Jesucristo Dachi Mechiu mauɗe Dachi Karibabarii kuitaa panuuɗeeba nau iujãaɗe ɓuu kachiruaɗebena karibasiɗau. Maamina jʉ̃karaɗe bʉra paneeduu kĩra waya kachirua wauduubʉrã, naa panaɗa audeara kachirua paneeɗai. 21 Mauɗeeba Dachi Akõre beɗea kuitaapeɗaaɗa ida ɓuɗai baɗamaarã, bibuara ɓuu Dachi Akõreba jipa wau ɓuu kuitaaɗaabai. 22 Ãchi ẽbẽraba naka jarabadau kĩra nuree: «Usa otomaapeɗa waya neebarii chi otomaaɗa koi baita».* Mauɗe naka jarabadau: «Sina kuipeɗa waya ioro susuaɗe bʉraa ɓeebarii».

Dachi Mechiuba kastikaɗe neei ʉ̃rʉbena

3 Ãbarã, nau chi ome karta mʉʉba machi baita ɓʉmaa ɓuu. Karta ome ɓʉɗaɗe mʉʉba chi biawãra beɗea kĩrababia ɓuu jipa kʉ̃risiaɗamera. 2 Mʉʉba kʉ̃ria ɓuu Dachi Akõre baita berreabadaurãba naa jarapeɗaaɗa machiba kĩrabaɗayu. Mauɗe kʉ̃ria ɓuu Jesucristo Dachi Mechiu, Dachi Karibabariiba jaraɗa kĩrabaɗayu. Mau ichiba bʉiɗarãba machimaa jaradeasiɗau.

3 Nau ãrea kuitásturu: kaaɗebena ewariɗe Dachi Akõre atua jarabadaurã baraai. Ãchi kakuaba kachirua wau kʉ̃ria ɓuu wau panaɗai. 4 Naka atua jaraɗai: «Cristo neei jaraɗa ¿kãare sãasma? Dachi nabẽraeɗebenarã joma biusiɗau. Maamina nau iujãa wausiiɗeeɗebena joma ara maka ɓuu». 5 Mau ẽbẽrarãba ijãa kʉ̃riaɗawẽa panuu nabẽraeɗe Dachi Akõre beɗeaba bajãa wausii, iujãa mar ekareɗebena neebisii mauɗe baniaɗebena maka wausii.* 6 Ara mau baniaba joma nau iujãaɗe chi mau ewariɗe panaɗa kinibisii mau bania ãrea chesiiɗeeba. 7 Ara mau kĩra Dachi Akõre beɗeaba nau iujãa mauɗe bajãa nu uru ɓuu mauɗe ichiba kastikai ewariɗe tʉbʉchiaɗe baai. Mau ewariɗe chi ichi kʉ̃riaɗakaurã nebʉra ichiapeɗa joma kastikai.

8 Maamina ãbarã, nau kĩraba panaɗa ida ɓurã́sturu: Dachi Mechiumaarã ewari aɓa 1.000 años kĩra ɓuu mauɗe 1.000 años ewari aɓa kĩra ɓuu. 9 Dachi Mechiu neei aɗa baɗa kãꞌãa ɓuuɗeeba waabenarãba kʉ̃risia panuu neebai. Maamina makawãema. Maumaarã machi kakua joma jãadua ɓuuɗeeba kãꞌãa ɓuu. Ichiba kʉ̃riawẽa ɓuu ẽbẽra aɓa biɗa ichiɗebena ãi ɓuai. Kʉ̃ria ɓuu jomaurãba kachirua ida ɓuɗapeɗa ichimaa neeɗai. 10 Dachi Mechiuba kastikai ewari bai nechiru neebarii kĩra.* Mau ewariɗe kachirua ãrea ʉrʉrʉapeɗa bajãa wãꞌãebii. Ne joma dachiba bajãaɗe unubadau baawãi. Mauɗe nau iujãa mauɗe ne joma nau iujãaɗe nuree baawãi.*

11 Ne joma wãꞌãe baiɗeeba machi Dachi Akõreba kʉ̃ria ɓuu kĩra jipa mauɗe kachiruaswãe nibaɗai panuu. 12 Dachi Akõreba kastikai ewari eseɗau panuumisa Dachi Akõreba kʉ̃ria ɓuu wau panásturu mau ewari isa bamera.* Mau ewariɗe Dachi Akõreba bajãa baai. Ne joma dachiba bajãaɗe unubadau mauɗe nau iujãaɗe unubadau wãsiaba dorraɓarii. 13 Maamina Dachi Akõreba bajãa wiɗi mauɗe iujãa wiɗi waui asii. Mau dachiba eseɗau panuu. Mama jomaurãba jipa wau nureaɗai.

14 Ãbarã, machiba joma mau eseɗau panuuɗeeba ne jomaɗe kĩra jipa nibásturu Dachi Akõreba machi biꞌia, kachiruaswãe, ichi ome jirukaraayuwãe panuu unumera. 15 Kĩrabásturu Dachi Mechiuba ẽbẽrarã karibai baita joma jãadua ɓuu. Ara mau kĩra dachiba kʉ̃ria panuu ãba Pablo biɗa kartaɗe machi baita ɓʉsii, Dachi Akõreba ichimaa deaɗa kʉ̃risia kuitaaɗeeba. 16 Mauba kartacha mau ʉ̃rʉbena ɓʉsii. Mau kartaɗebena kʉ̃risia ichiba ɓʉɗa chaarea ɓuu kuitaaɗai baita. Chi biawãra beɗea adua nureerãba mauɗe chi ãrea ijãaɗakaurãba mauba ɓʉɗa biꞌiwãe jaradeabadau, chi Dachi Akõre beɗea ɓʉpeɗaaɗa biꞌiwãe jaradeabadau kĩra. Mauɗeeba Dachi Akõreba ãchi nebʉra ichiai.

17 Ãbarã, machiba mau kuitaa panuuɗeeba kauwa panásturu ẽbẽra kachiruarãba biꞌiwãe jaradea panuuba setaa kũruarãaɗamera. Maka machiba ãrea ijãa panuu ida ɓuɗaabai. 18 Jesucristo Dachi Mechiu mauɗe Dachi Karibabarii ʉ̃rʉbena biꞌia kuitaa kãribásturu. Ichi sõbiaɗeeba warísturu. Iɗi mauɗe ewaricha ichimaa biꞌia berreaɗai panuu. Biꞌia ɓuu maka ɓuai.