Jonatán kĩra ʉɓʉa nibasii

Chi rey Saúl warr dawarau nii Jonatán abachiɗau, ichi chĩobarii chaarea nibaɗa basia. Davidba jaraɗa baɗa Jonatán aude pira nibasii papari kãyabãra mauɗe imama aude chaarea nibaɗa. Día aɓa ɓuuɗe, Jonatanba unuɗa baɗa soldao filisteorã ea ʉ̃rʉɗe duanuu. Mauɗeeba jaraɗa baɗa chi ɓatabadau ataubariimaa: “Chĩoɗe wãuriɗai ɓuu Jeowaba kawabiburuuɗéburu. Chi filisteorãba ʉtaa wãɗayua jarabudaubʉrã, makarã chĩoɗe wãuriɗai ɓua”. Chi filisteorãba naka ɓiasiɗau: “¡Ʉtaa chĩoɗe urústuru!”. Mauɗeeba Jonatán chi ɓatabadau ataubarii baara ʉtʉ eaɗaa wãɗapeɗa maabea 20 soldaorã beatasiɗau.

Jonatán Saúl warr dawarau nibaɗa baerã, Ichíturu rey bai basii chi akõre biuɗakare. Maka ɓumina Jonatanba kuitaa ɓoosii Jeowaba Davídturu jʉrʉ adauɗa baɗa chi kaaɗebena rey Israelɗebena babii baita, ichiɗebena envidiawẽe basia. Mau kãyabãra Jonatán David ome biʼia ãrĩã meraa nibasiɗaa. Ãchia jarapeɗaaɗa ãchi chiya kareba nibaɗai baita. Jonatanba Davidmaa unubiyua ãchi amiko nuree, ichia Davidmaa ichia anaɓari jʉ̃barii deapeɗa, ichi neko, ichi eneɓata, ichi kʉrrɗe jʉ̃barii baara.

David Saúl kakua miru niiɗe, Jonatanba ichi ochiaɗe wãpeɗa naka asia: “Bichi chaarea nibapeɗa kĩra ʉɓʉa nibayua. Jeowaba bichidu jʉrʉ adauɗa baɗa rey bai baita. Mʉ akõre biɗa jãu biʼia kuitaa ɓua”. ¿Bustai ɓuẽ bichi ome biʼia meraa nibai unibayu Jonatán kĩra?

Jonatán beraa biukauɗa baɗa ichi amiko karebaaruu kakua. Ichia kuitaa ɓoosia ichi akõre chi rey Saulba David bea kʉ̃ria nibaɗa, mauɗéburu naka asia: “Bichia David beaburuubʉrã, jãra pekao mechibena ɓooyua. Ichiara kachirua asewẽa nii”. Saúl kĩru koɓeesii Jonatán ome. Año ãrĩã baɗakare, Saúl Jonatán baara ãbua biupeɗaaɗa baɗa chĩoɗe wãurisiɗauɗe.

Jonatán biuɗakare, Davidba Jonatán warr Mefibóset abadau jʉrʉɗa baɗa. Unusiiɗe, naka asia: “Mʉa bichi ochia ua ɓooyua bichi biuruuɗaa bichi akõre mʉ ome biʼia meraa nibasiiɗeeba. Bichi mʉ deɗe nibayua mauɗe mʉ baara ãbua ko nibayua”. Davidba ichi baara nibabarii Jonatán akawa adua nibaabasia.