Carmelo eaɗe pasaɗa baɗa

Chi reino 10 tribu Israelɗebena reyrã kachirua ãrĩã nureasia, maka ɓumina Acabdu chi aude kachirua nibasia. Ichi wẽra kachirua ãrĩã nii ome kimabaraaɗa, mau wẽraba chi dios Baaldu kʉ̃ria nibaɗa. Ichi chi trʉ̃ Jezabel basia. Acab Jezabel omeeba chi ẽbẽra ãrĩãrãmaa Baaldu kʉ̃riabisiɗau. Mauɗe profetarã ãrĩã Jeowaɗe beapeɗaaɗa. ¿Kãare asesaa Jeowaba? Profeta Elías bʉesii Acab ome beɗeayua.

Eliasba jaraɗa Acabmaa Israelɗe kue cheebayu ichi rey kachirua ãrĩã niiɗeeba. Tres añoɗe akawa kue chewẽe basia chi iujãaɗe, ẽbẽrarã jarrba ãrĩã baraasia. Maaɗakare, Jeowaba Elías bʉesii waya Acab ome beɗeayua. Chi rey Acaba Eliasmaa naka jarasia: “Nau joma kue chewẽa bichiɗéburu”. Eliasba panausia: “Mʉɗéburuwãema. Bichia Baaldu kʉ̃ria niiɗeeba naka kue chewẽe. Joma ẽbẽrarã mauɗe chi profetarã Baalɗebena siɗa chibʉrʉbiba ʉtʉ eaɗe chi mode Carmeloɗe. Maabae ochiaɗaika kaidu chi Dios ariɗe nii”.

Chi ẽbẽrarã joma eaɗe chibʉrʉsiɗau. Maabae Eliasba naka jaraɗa: “Machi kʉ̃risiábaɗa. Chi Jeowáturu Dios ariɗe niibʉrã, mau kaaɗe wã́sturu. Maka ɓumina chi Baaldu chi Dios ariɗe niibʉrã, mau kaaɗeburu wã́baɗa. Nau aseɗaika: chi 450 profetarã Baalɗebenaba ãnimara eneeɗayua, maabae ãchi dios iuɗayua. Mʉa biɗa ãnimara eneeyua baa bʉiyua maabae Jeowa iuyu. Chi diosba panauburuu aoko ɓaebiburuuba, madu chi Dios ariɗe nii”. Chi ẽbẽraba ijãasiɗaa.

Chi profetarã Baalɗebena chi ãnimara eneeɗapeɗa tõokuasiɗau. Ãchi dios iu paneesii chi día joma, maabae jarasiɗau: “¡Baal panause!”. Mau Baalba panauwẽe basii baerã, Eliasba naka atua jarasia: “Aribia chaarea ɓiásturu. Ichi kãi noɓeesiibʉrã, chi niiba ʉ̃rʉmatayua”. Kiusiiɗe profeta Baalɗebenaba iu paneesia. Maka ɓumina, akawa panauwẽe basia.

Eliasba chi ãnimara mokara ãbua pe kuɓuu ʉ̃rʉ kuɓusia maabae mau ʉ̃rʉ bania ãrĩã ea bʉisia. Maabae ʉtaa wiɗisia: “Jeowa, chi ẽbẽraba unuɗayua bichíturu chi Dios ariɗe nii”. Ara mauɗe Jeowaba ʉtʉʉba aokotasia chi ãnimara baatayua. Chi ẽbẽrarã naka ɓiasiɗaa: “¡Jeowáturu chi Dios ariɗe nia!”. Maabae Eliasba naka jarasia: “Chi profeta aɓa biɗa miru wãyua ida ɓuirã́baɗa”. Mau diaɗe, 450 profeta Baalɗebena kenasiɗaa.

Maaɗakare, jʉ̃rʉara cheke mar ʉ̃rʉ unusiɗaa, maabae Eliasba Acabmaa jarasia: “Kue mechibena cheburua. Bichi carroɗaa ʉtʉ wãpeɗa, maabae deeɗaa wãs”. Chi bajãa ãrĩã paimaa koɓeesia, ãrĩã pũa koɓeepeɗa, mechibena kue che koɓeesia. Acab isa wãɗa basia ichi carroɗe. Jeowaba Elías aiɗaɗa carro aude pirai baita. Maka ɓumina, ¿mama acabasaaka chi problema Eliasɗe? Kawaɗaika.