Jeowaba Jehosafat karebasia

Jehosafat, rey Judaɗebena basii, ichia chi imagen mauɗe chi altar Baalɗe baɗa joma ãrikuataɗa baɗa. Ichia kʉ̃ria ɓoosii ẽbẽrarãba chi Jeowa Ley kawaɗayua. Mauɗéburu, chi gobernanterã chi levitarã baara Judaɗaa bʉekaɗa baɗa, jomaurã ẽbẽramaa chi Jeowa Ley kawabiayua.

Ẽbẽrarã puuru kaita nureeɗebenarã pera duanaɗa baɗa Judá ome chĩoɗayu, ãchia kuitaa panaɗa baerã Jeowaba ichi ẽbẽrarã aiɗai ɓuu. Mauɗeeba regalo siɗa chi rey Jehosafatmaa odoebachiɗau. Maka ɓumina, chi ẽbẽrarã Ammón, Moab mauɗe chi puuru Seirɗebenarã chĩoɗe wãuchiɗau Judá ome. Jehosafatba kuitaa ɓoosii Jeowaba ãchi aiɗai ɓuu nesitayu. Mauɗéburu mukĩrarã, wẽrarã warra chekerã baara Jerusalenɗe chibʉrʉbiasii. Ãchi daaɗe naka ʉtaa wiɗisii: “Jeowa, bichia dai aiɗawẽebʉrã, chĩobudauɗe daiba poyaa choroaɗaabayua. Muchuburia jaraba kãare aseɗayu”.

Jeowaba Jehosafat ũripeɗa, maabae naka panausia: “Perarã́baɗa. Mʉa aiɗayua. Machi chĩoɗe wãbudauɗaa wã́sturu, apii duanayua, ochiábaɗa saka mʉa karebayu”. ¿Saka karebai basaa Jeowaba?

Mau norema dapeɗeɗa, Jehosafatba karibadaurã jʉrʉɗa baɗa maabae jarasia soldaorã naa ãda wãuríbaɗa. Ãchi Jerusalenɗebena chĩobudauɗaa wãsiɗau, jãu chi iujãa Tecoa abadauɗe ɓee ɓoosii.

Chi karibadaurã kĩrajʉʉ jĩwa kari panasii Jeowa baita. Mau misa, Jeowa chĩomaa ɓoosii ichi baara nureerã kakua. Chi ammonitarã mauɗe chi moabitarã Jeowaba kawayuswãe bara ɓeebisii, maabae ãchi chiya chĩo bara ɓeeɗa baɗa. Joma biusiɗau. Maka ɓumina Jeowaba karebaɗa basia chi ẽbẽrarã Judaɗebena, chi soldaorã mauɗe sacerdoterã siɗa. Joma chi ẽbẽrarã puuru aɗu duanuuɗebenarãba kawasiɗau chi Jeowaba aseɗa baɗa mauɗe ichia waaburu aiɗasii ichi ẽbẽrarã chi iadaa nureerã juaɗebenarã. ¿Jeowaba saka karebabaraa ichi ẽbẽrarã? Ichia aiɗabarii barikia ɓeeɗe. Ichia nesitakaa ẽbẽraba aiɗaɗayu.