Jeowaba reina miadaa ãrĩã nii kastikasia

Rey Acaba Jezreelɗe ventana ichi deɗeeba ochia ɓoosia drua uva uu nuɓuu mukĩraɗe baɗa mau chi trʉ̃ Nabot. Acaba jãu iujãa ichi baita kʉ̃ria ɓoosii mauɗeeba nedoi bereka ɓooɗa. Maka ɓumina, Nabotba nedobʉi kʉ̃riabasia Jeowa Leyba jaraɗa baɗaɗeeba chi iujãa akõrerãɗe baɗa poyaa nedobʉeɗaabai ɓoosii. Nabotba ariɗe ase ɓoosia. ¿Acab kãare asesaama? Ichi ãrĩã́turu kĩru koɓooɗaa. Mauɗeeba ichi piezaɗebena awara wã kʉ̃riabapeɗa mauɗe chiko siɗa ko kʉ̃riabasia.

Acab wẽra mau reina Jezabel kachirua ãrĩã nibaɗa. Ichia chi kimamaa naka jarasii: “Bichi chi rey Israelɗebena baerã, adaui ɓua joma bichia kʉ̃riaburuu. Mʉa jãu iujãa adaupeɗa maabae bichimaa deayua”. Ichia karta ɓʉkuasii chi dawaraurã puuruɗebenarãmaa deayua. Jãu kartaɗe naka a ɓoosia, jarábaɗa Nabotba kachirua jaraɗa baɗa Dios ʉ̃rʉbena mauɗe mooba beatábaɗa. Dawaraurãba joma Jezabelba jaraɗa baɗa asesiɗau. Maaɗakare, ichia Acabmaa naka jarasii: “Nabot biusia. Jãabaera ichi iujãa baɗa bichia adaui ɓua”.

Jezabelba Nabotdu beabasii. Ãrĩã ẽbẽrarã Jeowa kʉ̃ria nureaɗa siɗa beakuaɗa basii. Ichiara imagénturu kʉ̃ria nibasia mauɗe kachirua ɓee ãrĩã ase nibaɗaa. Mau Jeowaba joma ochia koɓooɗaa ichi kachirua ase niiɗebena. ¿Kãare asei basaa Jeowaba Jezabel?

Acab biuɗakare, chi warr Jehoramba goberna koɓeesii. Maabae Jeowaba bʉesii mukĩra chi trʉ̃ Jehú Jezabel mauɗe ichi deɗabenarã baara kastikai baita.

Jehú ichi carroɗe ʉtʉ wãpeɗa maabae Jezreelɗaa wãsia, Jezabel ɓoobariimaa. Jehoram siɗa ichi carroɗe wãɗa basia Jehú ome unui baita. Jehoramba ichi unusiiɗe naka wiɗisia: “¿Dachi ome biʼia panuẽ?”. Jehuba naka panausia: “Bichi nawe ara jãka kachirua ase ɓuubʉrã, dachi ome biʼiwãe panua”. Jehoram akarrnaa wãaruu basmina, Jehuba ʉkiɗaba drʉtapeɗa maabae beasia.

Maabae Jehú Jezabel deemaa wãsia. Jezabelba kawaɗa basia ichi neeruu, mauɗeeba kapipiapeɗa, buɗa biʼia iruɗapeɗa, ventana jʉ̃kaa de ʉ̃rʉbenaɗe espera ɓeesia. Ichi neesiiɗe, Jezabelba kachirua jaraɗa basia. Jehuba chi traja nureerã ichi jʉ̃kaa duanuumaa naka ɓiasii: “¡Jãmareeba jiratábaɗa!”. Ãchia ventanaɗe waa sĩatasiɗauɗe ichi ɓae wãpeɗa maabae biusia.

Maaɗakare, Jehuba 70 warrarã Acabɗe beakuasii mauɗe chi imagen Baalɗe baɗa joma ãrikuatasii. ¿Kawasẽe? Jeowaba joma unu kuɓuu mauɗe ichia kuitaa ɓuu sakaeɗe kastikakuai chi kachirua ase nureerã.