Jeowa kĩrukaraawẽa kiɗibasia Jonás ome

Chi puuru Asiriaɗebena Nínive abadauɗe chi ẽbẽra kachirua ãrĩã nureaɗa. Jeowaba chi profeta Jonás Niniveɗaa bʉeɗa baɗa ẽbẽrarãmaa jarabii baita kachirua nureaɗa ida ɓubiyua. Jonás Niniveɗaa wãi baɗa, Tarsisɗaaburu barcoɗe miru wãɗa baɗa.

Chi barco marɗe baɗakare, che koɓeepeɗa mauɗe mechibena pũatu koɓeesia. Chi barcoɗe eɗa duanaɗa baɗa mechibena perasiɗaa. Ãchi diosnamaa ʉtaa wiɗiɗapeɗa maabae ãchi chiya wiɗi bara ɓeesii sakayua naka pasamaa ɓua. Jonasba naka jaraɗa baɗa: “Mʉʉɗéburu cha naka pasamaa ɓuu. Mʉ miru wãmaa ɓuu Jeowaba jaraɗa baɗa aseemaaba. Mʉ do eɗa jiratásturu chi kue ãrĩã chepeɗa pũatu koɓooɗa poabii baita”. Barcoɗe duanuurãba Jonás do eɗa jirata kʉ̃riaɗaabasia. Maka ɓumina ichiaburu jara koɓeeɗa maka asebii baita. Mauɗeeba Jonás do eɗa jiratapeɗaaɗakareburu chi kue ãrĩã chepeɗa pũatu koɓooɗa poasia.

Jonasba ichi biuyu kʉ̃risia ɓoosii. Ichi eɗa marɗe taa wãburuuɗe, Jeowamaa wiɗiɗa baɗa. Maabae Jeowaba bʉesii ɓeda choroma, jãuba Jonás mitaɗa basmina, beataabasia. Ɓeda ɓiɗe ɓuuba Jonasba Jeowamaa naka wiɗiɗa baɗa: “Iɗi tõpe waa bichia jara ɓuu kĩraka aseyua”. Jeowaba Jonás ɓeda ɓiɗe eɗa õbea diaɗe chokae uru ɓoosia maabae Jeowaba iujãa põesãa ʉ̃rʉ iɗutabisii.

Jeowaba Jonás karebasia, maka ɓumina, ¿jãabera Niniveɗaa wãabai ɓoosẽe? Makawẽma. Jeowaba ichi maucha bʉesii mauɗe jãabaera Jonasba ũrisia. Niniveɗaa wãpeɗa chi ẽbẽra kachiruarãmaa naka jarasii: “Jeowaba chi puuru baɗa ãritaburuu 40 diaɗe”. Maabae ichia pasaabai kʉ̃risia koɓooɗa baɗa pasasia. Chi Niniveɗebenarãba ũriɗapeɗa maabae ida ɓusiɗaa chi kachirua ase duanaɗa baɗa. Chi rey Niniveɗebenaba ẽbẽrarãmaa naka jaraɗa basia: “Diosmaa wiɗiɗapeɗa, maabae kachirua ase duanuu ida ɓúbaɗa makaburu dachi kenakuabai ɓua”. Jeowaba chi ẽbẽrarãba kachirua ase duanaɗa ida ɓusiɗau unuɗakare, maabera kenakuabasia.

Jonás mechibena kĩru koɓeesia Jeowaba jãu puuru ãritaabasiiɗeeba. Kʉ̃risiaba nauɗe: Jeowa Jonás ome kĩrukaraawẽe basia mauɗe ichi miachuburi unuɗa basia. Maka ɓumina, Jonasbara kĩra chuburiabasia chi ẽbẽrarã Niniveɗebenarã kakua. Mau kãyabãra puuruɗeeba ichi awara kĩra kachirua aka ɓeeɗa basia zapalla kiɗuaa ekare. Maabae, chi kiɗua baɗa põesãasia mauɗéburu Jonás mechibena kĩrusia. Jeowaba naka jaraɗa basii: “Chi kiɗua baɗa põesãasiiɗeeba bichi nomaa koɓeesia. ¿Mʉ saka kĩra chuburiabaiba chi ẽbẽrarã Niniveɗebenarã kakua? Mʉa kĩra chuburiaɗa basia jãarãɗebena mauɗéburu kenakuabasia”. ¿Kãare jaradea kʉ̃ria ɓoosaa Dachi Akõreba Jonasmaa? Chi ẽbẽrarã Niniveɗebenarãdu importante ãrĩã ɓoosii barikiau kiɗua kãyabãra.