Chi ángel Jeowaɗeba Ezequías karebaɗa

Chi Asiriaɗebenarãba chi reino Israelɗe 10 tribuɗebena adaukuapeɗaaɗa baɗa. Senaquerib chi rey Asiriaɗebena, mau biɗa adau kʉ̃ria ɓooɗa baɗa reino Judaɗe ome tribuɗebena. Mauɗéburu ichia chi puuru Judaɗebena ichi kuendaɗaa aɓaaɓaa adauɗa baɗa. Puuru aude adau kʉ̃ria ɓoosii Jerusalendu basii. Senaqueriba adua baɗa Jeowaba jãu puuru kareba uru ɓoosii.

Chi rey Ezequías Judaɗebenaba, chi nejarra ãrĩã paaɗa baɗa Senaqueribmaa Jerusalén adaubiimaaba. Senaqueriba chi nejarra adau ɓosmina, ichi soldaorã ãrĩã bʉekasii chĩoɗe wãbiyua. Chi ẽbẽrarã Jerusalenɗebena ãrĩã pera duanasii chi Asiriaɗebenarã waaburu ara kaita kaaɗe basiɗauɗeeba. Maabae Ezequiasba ãchimaa naka jaraɗa baɗa: “Pera nurearã́baɗa. Asiriorã chaarea nuremina, Jeowaba dachi ãchi aude chaarea nibabiayua”.

Senaqueriba aɓa mukĩra bʉeɗa baɗa, chi ẽbẽrarã Jerusalenɗebenamaa atua jarabiyua. Cha nii mukĩra puuruɗeeba awara aka noɓeeɗa basia maabae ɓiasii: “Jeowaba machi poyaa karebaabai ɓua. Ezequiasmaa ida engañabirã́baɗa. Dios aɓa biɗa machi karibai baita wãʼãema dai ome chĩoɗe neebudauɗe”.

Ezequiasba Jeowamaa wiɗiɗa baɗa kãare aseiɗebena. Maabae Jeowaba naka panausia: “Jãu mukĩraba jaraburuuɗeeba pera nibarã́ba. Senaqueriba Jerusalén adaubayua”. Maaɗakare, Ezequiasba karta Senaqueriba ɓʉkuaɗa baɗa adausii. Mama eɗa naka jara koɓoosia: “Jãabae choroarã́baɗa. Jeowaba machi poyaa karebaabai ɓua”. Mauɗeeba Ezequiasba naka ʉtaa wiɗisia: “Jeowa muchuburia, dai karebaba, jomaurãba kuitaaɗayua bichidu chi Dios ariɗe nii”. Maabae Jeowaba naka panausia: “Chi rey Asiriaɗebena Jerusalenɗaa neebayua. Mʉa mʉ puuru karebayua”.

Senaqueriba kʉ̃risiaɗa baɗa ichia Jerusalén adaui baɗa. Día aɓa ɓuuɗe, ẽsebuɗaa, Jeowaba ángel bʉesia Asiriaɗebenarã kãi duanuumare, jãu Jerusalenɗeebiɗa awara ɓooɗa. ¡Chi angelba 185.000 soldaorã beakuaɗa baɗa! Chi soldaorã chaarea ãrĩã nureapeɗaaɗa baɗa Senaqueribɗe biupeɗaaɗa basia. Mauɗéburu waya ichi deeɗa wãɗa baɗa choroawẽa. Makaburu Jeowaba Ezequías mauɗe chi puuru Jerusalén siɗa karebakuaɗa baɗa, ara jari ichia jaraɗa baɗa kĩraka. ¿Bichi Jerusalenɗe nibaɗa basirã, Jeowaɗe ijãa nibai basẽe?