Jesús kũudrãa nibasiiɗe

José, María, Jesús mauɗe waabena warrarã baara chi kaurã baara Nazaretɗe nureabachiɗau. José bakuru waukapeɗa traja nibasii chi deɗabena ochia ua nibayua. Ãchimaa jaradeɗeka ua nibaɗa Jeowaɗebena mauɗe chi Ley baara. Ãchi wãbachiɗau Jeowaɗebena kawaɗayua sinagoga abadauɗaa mauɗe Jerusalenɗaa biɗa añocha wãbachiɗau chibʉrʉɗayua Pascua aseɗai baita.

Jesús 12 año nibasiiɗe, chi deɗabena wãpeɗaaɗa baɗa Jerusalenɗaa, mau kaitawẽe ɓumina. Jãu puuruɗe ẽbẽra ãrĩã basii chibʉrʉɗapeɗa acordaɗayua judiorã Egiptoɗebena bʉekapeɗaaɗa. Jãu chibʉrʉ duanaɗa acabaɗakare, José María baara waya wãmaa panasii ãchi deeɗaa, ãchia kʉ̃risiapeɗaaɗa Jesús ãchi deɗabenarã baara kãrii. Maka ɓumina, ãchia ichi jʉrʉsiɗauɗe unuɗaabasii.

Maabae Jerusalenɗaa wãɗapeɗa tres día jʉrʉsiɗau ichi warr. Temploɗeburu unupeɗaaɗa. Jãma Jesús aka ɓooɗa baɗa chi jaradeabadaurã tãeɗe, kauwa ũripeɗa maabae biʼia ãrĩã wiɗi ɓoosii. Chi jaradeabadaurã Jesusba maka wiɗi nuɓuuba kawaɗayuwãe aka duanasii. Mauɗéburu ara ãchia biɗa ichimaa wiɗi panasii. Ãchi kawaɗayuwãe kopaneeɗa ichia panau kuɓuuba. Ãchia unusiɗau Jesusba biʼia kawa nii chi Jeowa Ley.

José María ome ãrĩã́turu preocupapeɗaaɗa. Mariaba jarasii: “Warr, daiba bichi joma warewarea jʉrʉ awa panasii, ¿sama ɓosma?”. Jesusba naka panausii: “¿Machiba sakayua mʉ jʉrʉ panuma, mʉ Akõre deɗe ɓuai ɓuu adua panuuka?”.

Jesús ichi akõrerã baara waya Nazaretɗaa wãɗa baɗa. Joseba Jesusmaa kawabiɗa bakuru ome traja nibai baita. ¿Bichi baita saka nibasaa Jesús kũudrãa nibasiiɗe? Jesús waaburu waripeɗa aude kuitaa kãribaɗe wãɗa basia. Mauɗeeba Dachi Akõreba mauɗe ẽbẽrarã biɗa ichi aude kʉ̃ria kãribaɗe wãsiɗaa.