Jeowaba Jesús karebaɗa basia

Puuru Israelɗeeba kaitawẽe kuɓuuɗe chi ẽbẽraba estrella ʉ̃ɗaa jiranuu ochiaɗapeɗa maabea kuitaa duanasii kãare pasayu. Ẽsebuɗaa, chi nuree mukĩrarã ariabenarãba bajãaɗe estrella ʉ̃ɗaa jiranuu unupeɗaaɗa maabea mau estrella kaaɗe wãsiɗau. Chi “estrellaba” ãchi odoesii Jerusalenɗaa. Chi mukĩrarãba ẽbẽrarãmaa naka wiɗi kãribasiɗau: “Nau druaɗe chi warr judiorã rey bai ɓuu, ¿sama ɓuma? Dai neesiɗau ichi kĩraiɗe õdarrɗe kopaneeɗayua”.

Chi rey Jerusalenɗebena, Herodes abadauba, ũriɗa basii chi rey bayu ʉ̃rʉbena jaramaa duanuu. Chi Herodes kĩra kachiruaɗa basii maabae chi sacerdote mechia nureerãmaa naka wiɗiɗa basia: “¿Sama nacei basaa mau rey?”. Ãchia panausiɗaa: “Chi profetarãba jarasiɗau Belenɗeburu naceyu”. Herodesba iubisii chi mukĩrarã estrella ochiamaa panuurã maabae naka jarasia: “Belenɗaa wãɗapeɗa warr cheke jʉrʉ́baɗa. Maabae, nébaɗa mʉʉmaa jaraɗaika sama ɓuu, mʉ siɗa ichi kĩraiɗe õdarrɗe koɓeeyua”. Maka ɓumina, mau setaa basia.

Chi “estrella” waya dodomia koɓeesiaa. Chi mukĩrarã estrella kaaɗe wãsiɗau Belenɗaa. Chi “estrella” apii koɓeesii de kuɓuu ʉ̃rʉ, aria Jesús ichi nawe María baara unusiɗau. Ãchi chi warr cheke ãchi kĩraiɗe õdarrare ɓaeɗapeɗa, maabae regalo deasiɗaa: nee, ne tuwaa, mauɗe kera mirra deasiɗau. ¿Jeowaba bʉiɗa basaaka naarã mukĩrarã chi Jesús ɓuumaa? Makawãema.

Jãu ẽsabuɗe, Jeowaba Josemaa komakaraaɗe naka jaraɗa basia: “Herodesba Jesús bea kʉ̃ria ɓuu. Namabena bichi wẽra bichi warr odoebáɗe maabae Egiptoɗaa miru wã́sturu. Aria panésturu mauɗe neerã́baɗa aɓa mʉʉba jaraaruuɗaa”. Mauɗéburu ara makʉɗe José María mauɗe chi warr baara Egiptoɗaa wãsiɗau.

Jeowaba chi mukĩra estrella ochiabadaurãmaa jaraɗa baɗa, Herodesmaa wãɗaabayua. Herodesba kuitaasiiɗe ãchi ichimaa waya neeɗaabai, kĩru ãrĩã koɓeesia. Ichia Jesús poyaa unuubasiiɗeeba, beakuabisii chi mukĩra warrarã chekerã Belenɗebenarã Jesús ɗauchia ɓeerã. Maka ɓumina, Jesús akawa pasaabasia Egiptoɗe kaitawẽe ɓoosiiɗeeba.

Maaɗakare, Herodes biuɗa basia. Mauɗeeba Jeowaba Josemaa naka jaraɗa basia: “Jãabaera waya wãɗai ɓua”. José, María, Jesús baara waya Israelɗaa neesiɗau, mauɗe puuru Nazaret abadauɗe panaɗe neesiɗau.