David Saúl ome

Davidba Goliat beataɗakare, rey Saulba ichi chi soldaorã ua koɓooi baita kuɓuɗa baɗa. Davidba ãrĩã choroaɗa baɗa ichi chĩoɗe wãburuu, mauɗéburu chi kuitaa ɓuu nibaɗe wãsii. Chĩoɗe wãɗa baɗa neeruucha, wẽrarãba ichi irsibibachiɗau baeraɗapeɗa naka kariiduuba: “Saulba ichi kĩramaa nureerã ãrĩã choroaɗa basia, maka ɓumina Davidba audeara choroaɗa basia”. Mauɗeeba, Saulba envidia ãrĩã ɓeeɗa basia mauɗe ichi bea kʉ̃ria ɓoosii.

Davidba chi arpa chaa kuitaa nibasia. Día aɓa ɓuuɗe, Davidba Saúl baita chaaruumisa, chi reyba chi miasuba ichimaa ɓataɗa basia. Maka ɓumina, David naeɗe barru diɗisii, chi miasu baɗa pareemaa su noɓooɗe wãsii. Mauɗéburu, Saulba ãrĩã beayua jʉrʉ ɓeeɗa. Maka ɓoapeɗa, David miru wãɗa baɗa iujãa põesãa ɓuuɗaa.

Saul 3.000 soldaorã baarauba David kaaɗe jʉrʉɗe wãpeɗaaɗa baɗa. Saúl ara aɓa ɓuu iujãa choɓea nuɓuuɗaa wãɗa baɗa David ichi soldaorã baara miru duanuumaa. Chi mukĩrarãba chõpea jarasiɗau Davidmaa: “Ara nauɗe Saúl beatai kuɓua”. David Saúl kaita neeɗa baɗa maabae Saulba kawawẽeɗe Davidba ichi paru ɓiɗĩika tõosii. Maka ɓumina, ichi kachirua ãrĩã sentiɗa baɗa respetawẽeɗeeba chi rey Jeowaba jʉrʉ adauɗa baɗa. Mauɗéburu ichi soldaorãmaa Saúl ida beabiibasii. Saúl iujãa choɓea nuɓuuɗebena awara neeɗakare, Davidba jĩwa naka jaraɗa: “Mʉa bichi beai ɓosmina, beabasia”. ¿Bichimaa Saulba David biʼia ua nibai ɓoosaaka?

Makawẽma. Saulba ara maka beayua jʉrʉ ɓeeɗa. Día aɓa ɓuuɗe, ẽsebuɗaa, David ichi sobrino Abisái abadau baara miru neepeɗaaɗa Saúl ichi baara nureerã kãi duanabariimaa. Abner, ichia Saúl ochia unibabarii baɗa, ichi siɗa kãi noɓoosia. Abisaiba Davidmaa naka asia: “¡Ara nakʉɗe beataɗai kuɓua! Mʉʉmaa Saúl ida beatabis”. Maka ɓumina, Davidba naka asia: “Jeowaburu ichi beayua. Bari adaus chi miasu mauɗe chi ʉɗe bania kuɓuu baara, maabae wãɗa”.

David mode ara kaita nuɓuuɗe ʉtaa wãsii. Ʉtʉʉba unui ɓoosii Saúl kãi ɓoobariimaa. Davidba ɓiaɗa basia: “¡Abner! ¿Sakayua bichia chi rey poyaa karibawẽa? ¿Sama nuɓua ichi miasu chi ʉ baara?”. Saulba kawaɗa basii David ɓiaburuu maabae naka asia: “Bichia mʉ beatai basmina, beawẽe basme. Kawaaruuma bichidu chi rey Israelɗebena bayua”. Saúl ichi deeɗaa wãɗa basia. Joma Saúl deɗabenarãba David iadaaɗakabachii.