Jehoiadá kĩra ʉɓʉa nibasia

Jezabel kau aɓa inibasii chi trʉ̃ Atalía, mau ichi kĩraka kachirua nibaɗa. Atalía kimabaraaɗa chi rey Judaɗebena ome. Ichi biusiiɗe, chi warrba goberna koɓeeɗa. Mauɗe chi warr biusiiɗe, Ataliaba Judaɗe goberna koɓeeɗaa. Aɓaumaa gobernabiimaaba, bea kʉ̃riaɗa baɗa chi rey warrarã mauɗe joma chi ẽbẽrarã ichi kuenda gobernaɗai baɗa. ¡Ichi ãi chekerã siɗa beakuaɗa! Mauɗeeba, joma perabachiɗau ichiɗebena.

Chi sacerdote choroma Jehoiadá mauɗe chi wẽra Jehoseba omeeba kuitaa panasii chi Ataliaba kachirua ãrĩã ɓuu ase kuɓuu. Ãchi beraa biusiɗau chi Atalía ãi cheke merataɗai baita, mau warra cheke chi trʉ̃ Jehoás basii. Ichi temploɗe waribipeɗaaɗa.

Jehoás siete año nibasiiɗe, Jehoiadaba joma chi guardiarã ua koɓoobadaurã mauɗe chi levitarã siɗa chibʉrʉbiaɗa baɗa. Ãchimaa naka jaraɗa: “Biʼia ochiábaɗa chi poroa temploɗebena. Aɓa biɗa ida neebirã́baɗa”. Maabae Jehoiadaba Jehoasmaa chi corona jʉ̃bisii chi rey Judaɗebena babiyua. Maabae chi ẽbẽrarã Judaɗebena naka ɓiapeɗaaɗa: “¡Bichíturu chi rey!”.

Chi reina Ataliaba chi ẽbẽrarã ɓiabudau ũripeɗa temploɗaa pira wãsia. Chi rey chiwiɗi unusiiɗe, naka ɓiasii: “¡Mʉ awara jirata kʉ̃ria panua! ¡Mʉ awara jirata kʉ̃ria panua!”. Chi guardiarã ua koɓoobadaurãba chi reina kachirua nii jidauɗapeɗa, odoeɗapeɗa beatasiɗaa. Ichia kachirua ãrĩã ɓuu ẽbẽrarãmaa unubiaɗa baɗa. ¿Maabae kãare pasai ɓoosaa?

Jehoiadaba ẽbẽrarã aiɗasii ãchia Jeowamaa jaraɗai baita ichíturu aɓaburu kʉ̃riaɗayua. Jehoiadaba chi templo Baalɗe baɗa mauɗe imagen ɓee ãrikuatasii. Sacerdoterã mauɗe levitarã siɗa kuɓuɗa baɗa temploɗe trajaɗai baita chi ẽbẽrarã wãuriɗayua waya Jeowa kʉ̃riaɗai baita. Mauɗe guardiarã siɗa kuɓuɗa baɗa chi templo ochia duanaɗai baita mauɗe ẽbẽrarã Jeowa ũriɗakaurã neebiɗaamaaba. Maabae, Jehoiadá mauɗe chi guardiarã ua koɓoobadaurã baarauba Jehoás de reyɗebenaɗaa odoepeɗaaɗa maabea ichi aka ɓusiɗau chi rey ãkauɗe. Chi ẽbẽrarã Judaɗebena ãrĩã kĩrajʉʉsiɗaa. Jãabaera trajaɗai ɓoosii Jeowa baita, chi kachirua nii Atalía mauɗe imagen Baalɗe baɗa wãʼãe basii baerã. ¿Bʉʉmaa Jehoiadá kĩra ʉɓʉa nibasẽe? ¿Kawasẽe Jehoiadá kĩra ʉɓʉa nibasiiɗeeba ẽbẽrarã ãrĩãrã aiɗaɗa baɗa?