Josiasba chi Jeowa Ley ãrĩã kʉ̃riaɗa

Josiasba Judaɗe goberna koɓeesii ichi ocho año nibasiiɗe. Makaeɗe, ẽbẽrarãba jauri kachirua ɓeeɗebena aseɗapeɗa imagendu ãrĩã kʉ̃ria nureasiɗaa Jeowa kʉ̃riaɗai baɗamaarã. Josías 16 año nibasiiɗe, ariɗe kawa kʉ̃ria nibasia Jeowadu kʉ̃ria nibai baita. Maaɗakare ichi 20 año nibasiiɗe, joma chi puuruɗebenarã baɗa imagen ɓee mauɗe mo pe nuɓuu ʉ̃rʉ baabʉebadau baɗa ãrikuaɗa basia. Mauɗe ichi 26 año nibasiiɗe, ẽbẽrarã bʉekasii chi templo waya karaa adaubii baita.

Chi sacerdote aude mechia nii, Hilquías abadauba, temploɗe chi Ley Dachi Akõreɗe bʉra kuɓuu unuɗa baɗa. Chi jari bʉra kuɓuu Moisesba ɓʉɗa baɗa kĩra ɓoosii. Chi secretario reyɗebena, Safán abadauba, jãu bʉra kuɓuu Josiasmaa odoeɗa baɗa maabae jĩwa lea koɓeesia. Josiasba ũripeɗa kawa koɓeesii chi ẽbẽrarãba yataɗeeɗabena Jeowa ũriwẽa paneesia. Maabae chi rey Josiasba Hilquiasmaa naka aɗa: “Jeowa ãrĩã kĩru kuɓuu dachi kakua. Ichi ome beɗeaba dachimaa jarayua kãare aseɗaiɗebena”. Jeowaba nau jarabiɗa baɗa wẽra profeta nii Huldá abadaumaa: “Ẽbẽrarã Judaɗebenarãba mʉ ɓuipeɗaaɗa. Mauɗéburu mʉa kastikakuaburua, abiɗa Josiasba gobernamaa ɓuumisa mʉa machi kastikaabai, ichi juakayaswẽa niiɗeeba”.

Josiasba jãu ũrisiiɗe, temploɗaa wãpeɗa maabea joma ẽbẽrarã Judaɗebenarã chibʉrʉbiasia. Maabae joma ẽbẽrarã daaɗe chi Jeowa Ley jĩwa lea koɓoosia. Josías chi ẽbẽrarã baarauba Dachi Akõredu corazonɗeeba ũriɗayu apeɗaaɗa basia.

Yataɗeeɗa chi ẽbẽrarã Judaɗebenarã chibʉrʉɗaweã kopaneeɗaa acordaɗayua israelitarã Egiptoɗebena bʉekapeɗaaɗa ʉ̃rʉbena. Josiasba chi Leyɗe leaɗa basii jãka añocha chibʉrʉɗaiɗebena, mauɗéburu ẽbẽrarãmaa naka jaraɗa baɗa: “Chibʉrʉɗapeɗa acordaɗayua Jeowaba israelitarã Egiptoɗebena bʉekaɗa baɗa ʉ̃rʉbena”. Mauɗeeba Josiasba jarasii ãnimara eneekuaɗapeɗa baa bʉeɗai baita mauɗe ẽbẽrarã siɗa jʉrʉyu chi temploɗe kariɗai baita. Maabae chibʉrʉsiɗau acordaɗayua israelitarã Egiptoɗebena bʉekapeɗaaɗa ʉ̃rʉbena mauɗe chi pan levaduraswãe ɓee siɗa chiya kosiɗau, mau siete días baɗa. Jãka aseɗawẽa panaɗa Samuel chokae niiɗeeɗa. Josiasba kʉ̃ria nibaɗa basia chi Ley Jeowaɗe. ¿Bichia biɗa kawa kʉ̃ria nika Jeowaɗebena?