Baibal Nih Ka Nunnak Kha Zeitindah A Ṭhanchoter Khawh?

Baibal cu cauk sawhsawh bantuk a si lo. Mah ah a kan Sertu kong aa tel. (2 Timote 3:​16) Mah nih kan nunnak ah ṭhatnak tampi a kan pek khawh. Baibal ah hitin a ti: “Pathian bia cu a nung i a ṭhawng.” (Hebru 4:​12) Baibal nih kan nunnak kha lamhnih in a ṭhanchoter khawh. Pakhatnak, nifatin kan nunnak ah lam a kan hruai. Pahnihnak, Pathian le a biakam kong kha hngalh awkah a kan bawmh.​—1 Timote 4:8; Jeim 4:8.

Atu ah kan nunnak kha a ṭhanchoter khawh. Baibal nih kan nunnak kip ah lam a kan hruai khawh. A tanglei i langhtermi kong hna ah a ṭha tukmi Baibal ruahnak cheuhnak hna aa tel.

• Midang he i pehtlaihnak.—Efesa 4:​31, 32; 5:​22, 25, 28, 33.

• Pumsalei le lungthinlei ngandamnak.—Salm 37:8; Phungthlukbia 17:22.

• Ziazalei.​—1 Korin 6:​9, 10.

• Chawlehnak.​—Phungthlukbia 10:4; 28:19; Efesa 4:​28.a

Asia ah a ummi nuva tuahkhat hna nih Baibal ruahnak cheuhnak kha an sunsak tuk. An i ṭhitumka ah a dang nuva hna bantukin thlennak tuah an herhmi an ziaza kong he aa tlaiin pakhat le pakhat bia i ruah kha an i harh. Asinain Baibal an rel tikah an relmi ningin tuah awkah an i zuam. A phichuak cu zeidah a si? A vapa Vicent nih hitin a ti: “Baibal ka rel i ka hngalhmi kong nih kan innchungkhar ah kan tonmi buaibainak hna kha dawtnak he tawnghtham awkah a ka bawmh. Baibal phunglam ningin nunnak nih kan pahnih in a kan nuamhter.” A nupi Annalou zong nih hitin a ti ve: “Baibal chung i an kong ṭialmi hna kong ka relmi nih a ka bawmh tuk. Atu ahcun kan chungkhar cu a nuam tuk cang i kan nunnak ah hmuitinh zong kan ngei cang.”

Pathian kong tam deuh in hngalhnak. Vicent nih innhcungkhar kong lawng si loin “Baibal ka rel caah Pathian he zong kan i naih deuh” ti zongin a ti. Mah a bia nih a biapimi a kong pakhat kha a langhter. Mah cu Baibal relnak nih Pathian he a kan naihter deuh timi kha a si. Baibal na rel tikah Baibal ruahnak cheuhnak in ṭhathnemhnak na hmuh lawng si loin Pathian kha na hawikom pakhat zongin aan hmuhter lai. Mah lawng si loin a ṭha tukmi hmailei kong he aa tlaiin Pathian nih a chimmi kong zong kha na hngalh lai. Cun hmailei caan ah zungzal nunnak a simi “nunnak taktak” zong na hmu lai. (1 Timote 6:​19) Cu bantuk hmailei kong kha a dang cauk chungah cun a um lo.

Baibal kha rel hram na thawk cang a si ahcun rel beh dingin i zuam. Mah nih na nunnak a ṭhanchoter lai lengah Pathian he zong aan naihter lai. Asinain Baibal na rel tikah biahalnak tampi na ngei kho men. Cutin na si ahcun a luancia kum 2,000 lio hrawngah a rak nungmi Ethiopia bawipa kong kha i cinken. Anih zong Baibal kong he aa tlaiin baihalnak tampi a ngei ve. Na relmi kong cu na theithiam maw tiah an hal tikah hitin a rak ti: “Aho tal nih a sullam chimh lo cun zeitindah ka hngalh khawh hnga?”b Cucaah Jesuh zultu a simi Baibal a cawnpiak khotu Filip bawmhnak kha lungtho tein a rak cohlan. (Lamkaltu 8:​30, 31, 34) Nang zong Baibal kong kha tam deuh in hngalh na duh ahcun www.pr2711.com ah Baibal hlathlainak form kha na phih khawh. Asiloah mah mekazin ah langhtermi nangmah he aa naih bikmi address pakhatkhat ah pehtlaihnak na tuah khawh hna. Na pawngah a ummi Jehovah Tehte Hna sinah pehtlaihnak tuah khawh a si bantukin an Biakinn zong ah kal khawh a si. Atu ah Baibal kha rel colh law mah nih a ṭha deuhmi nunnak hmuh awkah aan bawmh lai.