Nunning le Rianṭuannak Tuahchunhnak Cauk caah Cherhchanmi
MAY 4-10
BAIBAL AH THUHMI RO HNA | GENESIS 36-37
“Nahchuahnak A Tongmi Josef”
(Gen. 37:3, 4) Josef cu a tar hnu i a hrinmi a fa a si caah Israel nih khan a fale dang nakin a dawt khun i angki leng a saumi ban fual kha a serpiak. 4 An pa nih annih nakin Josef a dawt deuh kha a unau hna nih cun an hmuh tikah an huat ngaingai i a chawnh hmanh ṭhiṭha in an chawn duh lo.
w14 8/1 12-13
“Ka Mang Hi Ngai Hmanh U”
Baibal nih hitin a ti: “An pa nih annih nakin Josef a dawt deuh kha a unau hna nih cun an hmuh tikah an huat ngaingai i a chawnh hmanh ṭhiṭha in an chawn duh lo.” (Genesis 37:4) A ule nih an nahchuahmi cu hngalhthiam khawh a si ko nain mah lungput kha an hloh colh lomi cu hruh a si. (Phungthlukbia 14:30; 27:4) Hmuh na duhmi lungthin peknak asiloah thangṭhatnak kha midang nih an hmuh tikah nahchuahnak na ngei bal maw? Na ngeih ahcun Josef ule kha philh hna hlah. Annih cu nahchuahnak an ngeih ruangah sualnak ngan an tuah i a hnuah an i ngaichih. An hmuhtonnak nih “aa lawmmi sinah vaa lawm ve u” timi lamhruainak zulh cu fim a si ti kha a kan hngalhter.—Rom 12:15.
A ule nih an nahchuah i an huatmi kha Josef nih a hngalh ko lai. Cucaah a ule sin a kal tikah aa dawh tukmi a angki leng kha a phoihtak maw? Phoih a duh men ko lai. Asinain Jakob nih mithmai ṭha a peknak le a dawtnak langhternak caah hrukter a duh. A pa nih a zumh bantukin Josef zong nih um a duh, cucaah mah angki leng kha aa hruk peng. Josef kong in kan cawn khawhmi tampi a um. Vancung kan pa Jehovah cu thleidannak a ngei lo nain a caan ah amah a biami cheukhat kha a hleiin mithmai ṭha a pek hna. A ziaza a rawkralmi hi vawlei he i cawhkalh lo awkah amah a biami vialte kha a fial hna. Aa dawh tukmi Josef angki leng bantukin a hmaanmi Khrihfa hna i an ziaza cu an pawngkam mi hna he aa dang tuk ti a lang. A caan ah mah a ṭhami an ziaza ruangah huatnak an ton caan zong a um. (1 Peter 4:4) Mah tikah Khrihfa pakhat nih Pathian duhmi ziaza kha langhter ti loin an um awk a si maw? A si lo, Josef nih aa dawh tukmi a angki kha a thup lo. Cu bantukin kannih zong Pathian sal kan sinak a langhtermi ziaza hna kha kan thuh awk a si lo.—Luka 11:33.
(Gen. 37:5-9) Voikhat cu Josef nih cun mang a manh i a mang cu a unau pawl kha a chimh hna. Cucaah cun an huat chinchin. 6 A thawh hna i, “Ka mang hi ngai hmanh u. 7 Lo pakhat ah hin kan dihlak in kan um i faphal kan tom len ko. Cu lioah cun ka faphal cu a tho i ding tein a dir. Cun nannih nan faphal hna nih khan an kulh i a hmaiah an kun,” a ti. 8 A unau pawl nih cun, “Kan cungah siangpahrang ka si lai ti in dahra naa ruah? Nangmah nih cun maw na kan uk ko hnga?” an ti i a mang kong a chimhmi hna ruangah cun an huat chinchin. 9 Cun Josef nih cun mang dang pakhat a manh ṭhan i, “Mang dang pakhat ka manh ṭhan i cu ka mang ah cun nika le thlapa le arfi hleikhat nih ka hmaiah an kun,” tiah a unau pawl cu a chimh hna.
(Gen. 37:11) Josef cu a unau pawl nih khan cun an nahchuah ngaingai, sihmanhsehlaw a pa nih cun thil vialte kha a lung chungin a ruah lengmang.
w14 8/1 13 ¶2-4
“Ka Mang Hi Ngai Hmanh U”
Mah mang cu Jehovah Pathian sinin a rami a si. A mang i a hmuhmi a konglam hna cu chimchungbia an si i mah kong kha Pathian nih midang sinah chimter a duh. Profet pawl nih a lung a khongmi miphun hna sinah Pathian bia le biaceihnak kong hna an rak chim bantukin Josef zong nih a mang kong kha a chimh ve hna lai.
Josef nih a ule sinah fimkhur tein “ka mang hi ngai hmanh u” tiah a ti hna. A ule nih a mang a sullam kha an hngalh caah an cohlang duh lo. Cucaah hitin an leh: “Kan cungah siangpahrang ka si lai ti in dahra naa ruah? Nangmah nih cun maw na kan uk ko hnga?” Cun Baibal nih hitin a ti chap: “A mang kong a chimhmi hna ruangah cun an huat chinchin.” Josef nih a pa le a ule kha a voihnihnak a mang a chimh ṭhan hna tikah a ule nih an huat chinchin. Baibal nih hitin a ti: “A pa nih cun a sik i, ‘Zei bantuk mang dah na manh? Na nu le na unau pawl le keimah hi na sinah ra in na hmaiah kan kun lai ti in maw na ruah?’” Asinain Jakob nih mah kong kha a ruah lengmang. Jehovah nih Josef sinah pehtlaihnak a tuahmi a si hnga maw?—Genesis 37:6, 8, 10, 11.
Mi tampi nih an duh lomi chimchungbia hna thanh ruangah hremnak a tongmi hna lakah Josef cu a hmasa bik a si lo bantukin a hnu bik zong a si lo. Mah bantuk bia a chimmi hna lakah Jesuh cu a lianngan bikmi a si. Jesuh nih “keimah kha an ka hrem ahcun nannih zong an in hrem ve ko hna lai” tiah a zultu pawl kha a ti hna. (Johan 15:20) Upa kan si ah, mino kan si ah Khrihfa dihlak nih Josef zumhnak le ralṭhatnak in cawn awk tampi kan ngei.
(Gen. 37:23, 24) Josef nih a ule cu a hei phanh hna tikah a angki leng banfual kha an rak hlih i 24 tikhor rocar ah an thlak.
(Gen. 37:28) Cun Midian chawlet pawl cu an ra phak tikah Josef cu tikhor chung khan an va chuah i Ishmael mi sinah khan ngun tangka phar kul ah an zuarh i annih nih Izipt ram ah khan an kalpi.
Thlaraulei Lungvar Hna kha Hlathlai
(Gen. 36:1) Esau tefa cu hi hna hi an si, (Esau cu Edom ti zong ah ti a si).
it-1 678
Edom
(Eʹdom) [A sen], Edom mi (Eʹdom·ites).
Edom cu Jakob he faphir a simi Esau i a pahnihnak min a si. (Gen. 36:1) Esau nih a fater sinak kha sabuti sen in a zuar caah mah min kha pek a si. (Gen. 25:30-34) Esau cu mi sen a si (Gen. 25:25) i a hnuah amah le a tefa pawl an umnak hmun cu mi sen lawng te an hung si.
(Gen. 37:29-32) Reuben nih khan tikhor cu a va zoh ṭhan i Josef kha a rak um ti lo cu a hmuh tikah a ngaihchiatnak langhternak ah a thilpuan kha a thleh hna. 30 A unau pawl sinah khan a va kir i, “Ngakchiapa kha a um ti lo. Zeitindah ka tuah lai?” a ti. 31 Cun meheh pakhat an thah i Josef angki leng kha a thi ah cun an hnim. 32 A angki leng cu an pa sinah khan an hei kalpi i, “Hi hi kan hmuh ko. Na fapa ta a si maw, si lo zoh tuah” an ti.
it-1 561-562
Zohkhenhnak
Tuukhal pakhat asiloah saṭil cawngtu pakhat nih tuurun pakhat asiloah saṭil runkhat kha ka zohkhenh hna lai a ti tikah saram pawl zohkhenhnak he aa tlaimi rian kha phung ningin a cohlan tinak a si. Saram pawl kha rawl ka pek hna lai i mi ka firter hna lai lo, cutin ṭha tein ka zohkhenh hna lo ahcun ka liam lai tiah a ngeitu sinah aamah a khaan tinak zong a si. Asinain sahrang nih an seh hna ti bantuk minung nih tuah khawh lomi thil sining hna a can ahcun mah cu a rian a si lo caah a liam a hau lo. Asinain a liam nakhnga lo a thimi saram i a ruak asiloah a pum cheubang pakhatkhat kha a ngeitu sinah a hmuhsak a hau. Mah tikah a ngeitu nih a rak putmi kha a zoh lai i sualnak a ngei maw, ngei lo ti kha bia a khiah lai.
Mah phunglam cu innchungkhar i thilri zohkhenhnak rian a ngeitu he zong aa pehtlai. Tahchunhnak ah, fa upa bik cu phung ningin a naule zohkhenhnak rian a ngei. Cucaah Genesis 37:18-30 ah kan hmuh bantukin a ule dang nih Josef thah ding an ti tikah fa upa bik a simi Reuben cu Josef nunnak kong ah a lungre a theihmi kha kan hngalhthiam khawh. “‘A thah cu that hlah u sih.’ . . . ‘That hlah u. . . . a thah cu that hlah u,’ a ti hna. Hiti a ti hna cu a nunnak kha ka khamh lai i ka pa sinah ka kuat ṭhan lai ti a duh caah a si.” Reuben nih Josef a hmuh ti lo tikah a lungre a thei tuk i “a thilpuan kha a thleh hna.” Cun hitin a ti: “Ngakchiapa kha a um ti lo. Zeitindah ka tuah lai?” Josef a um ti lonak he aa tlaiin rian ka ngei ti kha a hngalh. Cucaah a rian in a luat nakhnga Josef cu sahrang nih a seh ti phun in a unau pawl he fimzer ngaiin thil an tuah. Josef angki leng kha meheh thi lakah an hnim. Mah kha an pa le an biaceihtu a simi Jakob sinah an hmuhsak. Mah ruangah Jakob nih Josef cu sahrang nih a thahmi a si tiah bia a khiah.—Gen. 37:31-33.
Baibal Relnak
(Gen. 36:1-19) Esau tefa cu hi hna hi an si, (Esau cu Edom ti zongah ti a si). 2 Esau nih Kanaan minu kha a ṭhit hna, cu hna cu Hit mi Elon fanu Adah, Hiv mi Zibeon fapa Ana i fanu Oholibamah, 3 le Ishmael fanu Basemath an si; Basemath cu Nebaioth far a si. 4 Adah nih Esau cu Elifaz a hrinpiak, Basemath nih Reuel a hrinpiak; 5 cun Oholibamah nih Jeush, Jalam le Korah a hrin hna. Hi hna hi Esau nih Kanaan ram chungah a hrinmi an si. 6 Cun Esau nih a nupi hna le a fapa hna le a fanu hna le a innchung i a ummi vialte hna le, a caw vialte hna le Kanaan ram chung i a ngeihmi thilri vialte hna he khan aa pong i a nau Jakob sinin ram hlapi ah a kal. 7 Zeicahdah a kal ti ahcun Jakob he an umnak ram nih khan a cawm kho ti hna lo; saṭil tam tuk an ngei i hmunkhat ah an um kho ti lo. 8 Cucaah Esau (Edom) cu Seir tlangram ah khan a va um. 9 Hi hna hi Seir tlangram i a um mi Edom mi hna an pa Esau i a tefa cu an si. 10 Esau fapa hna min cu hihi an si: Elifaz, amah cu Esau nupi Adah fapa a si, Reuel, amah cu Esau nupi Basemah fapa a si. 11 Elifaz fapa hna cu: Teman, Omar, Zefo, Gatam le Kenaz an si. 12 Tima cu Esau fapa Elifaz nupi hna lak i pakhat a si i amah nih cun Amalek a hrin. Hi hna hi Esau nupi Adah fapa cu an si. 13 Reuel fapa hna cu: Nahath, Zerah, Shammah le Mizzah an si. Hi hna hi Esau nupi Basemath fapa cu an si. 14 Esau nupi Oholibamah fapa hna cu Jeush, Jalam le Korah an si. Oholibamah cu Zibeon fapa Anah i a fanu a si. 15 Hi hna hi Esau tefa lakah bawi bik pawl cu an si. Esau fapa upa bik Elifaz fapa hna lak i bawi cu Teman, Omar, Zefo, Kenaz, 16 Korah, Gatam le Amalek an si. Hi hna hi Edom ram chung i a ummi Elifaz tefa hna lak i bawi cu an si. Annih cu Adah fapa kha an si. 17 Esau fapa Reuel fapa cu hi hna hi an si. Annih lak i bawi cu: Nahath, Zerah, Shamah le Mizzah an si. Hi hna hi Edom ram chung i a ummi Reuel tefa hna lak i bawi cu an si. Annih cu Esau nupi Basemah fapa kha an si. 18 Esau nupi Oholibamah fapa cu hi hna hi an si: an bawi cu Jeush, Jalam le Korah an si. Esau nupi Oholibamah, Anah fanu, nih a hrinmi bawi cu hi hna hi an si. 19 Esau (Edom) tefa cu hi hi an si i an bawi zong cu hi hna hi an si.
MAY 11-17
BAIBAL AH THUHMI RO HNA | GENESIS 38-39
“Jehovah Nih Josef Kha A Kaltak Bal Lo”
(Gen. 39:1) Josef cu Izipt ram ah khan an vun kalpi i Izipt mi a min Potifar a simi, Faraoh bawi pakhat, siangpahrang inn cawngtu hna bawi a simi nih khan Izipt ram i a vun kalpitu Ishmael mi hna sin khan a rak cawk.
w14 11/1 12 ¶4-5
“Cu Bantuk Thilṭhalo Cu Zeitindah Ka Tuah Khawh Lai?”
“Josef cu Izipt ram ah khan an vun kalpi i Izipt mi a min Potifar a simi, Faraoh bawi pakhat, siangpahrang inn cawngtu hna bawi a simi nih khan Izipt ram i a vun kalpitu Ishmael mi hna sin khan a rak cawk.” (Genesis 39:1) Voihnih tiang zuar a tongmi Josef cu zeitluk in dah a ning a zah lai i a ngaih a chiat lai. Thilri pakhat men in an hmuh. Izipt siangpahrang inn ah rian a ṭuanmi bawi pakhat hnu a zulmi Josef kha na mitthlam ah cuanter hmanh. Market le mi an tamnak khuachung lam hna kha tan in siangpahrang inn lei ah an kal.
Atu Josef a va phanhnak innthar cu a chungkhar an umnak inn he cun aa dang tuk. Hmunkhat ah ṭha tein khuasak si loin phanhnak hmun paohah thlam i sak in tuurun a cawngmi chungkhar lakah Josef cu a ṭhangmi a si. Potifar bantukin Izipt mirum pawl inn cu a ngan pipi an si i sii dawh tein thuhmi an si. Hlanlio thil kong hlathlaitu pawl nih hlanlio Izipt mi hna cu hau kulh ṭha tein a um i dum chungah thingkung ngan pipi le phaikung, lili par le a dang a kung pawl a ummi tikhor hna he um kha an duh tiah an ti. Dum chungah an sakmi inn cheukhat cu thli thiang dawpnak caah varenda le thlalang awng sang pipi an um i inn khaan zong tampi a um. Mah ah rawl einak khaan nganpi pakhat le sinum pawl umnak khaan zong aa tel.
(Gen. 39:12-14) Cucaah a angki leng khan a rak tlaih i, “Ka ihpi ko,” tiah a ti. Sihmanhsehlaw Josef nih cun a lektak i leng ah a chuak i a angki leng cu a kut chungah cun a kaltak. 13 A angki leng cu a kaltak i lengah a zaam ti kha a hmuh tikah, 14 a inn chung mi kha a auh hna i, “Mah hi zohhmanh u! Ka va nih hi Hebru mipa hi kan inn ah a ratpi i atu cu a kan serhsat ngaingai cang. Ka khaan chungah a ka luh hnawh i kan it lai a ka ti i asinain a than khawh chungin ka ai.
(Gen. 39:20) Josef cu a tlaihter hna i siangpahrang thongtla pawl an chiah hnanak hmun ah khan an chiah i cuka ah cun a um.
w14 11/1 14-15
“Cu Bantuk Thilṭhalo Cu Zeitindah Ka Tuah Khawh Lai?”
Mah lio chan i Izipt thonginn hna cu zeidah a lawh ti kha kan hngal lo. Asinain thonginn a khaan pawl le vawlei tang innkhaan pawl aa tel i ralhruang bantuk a simi, a rawkmi inn nganpi kha hlanlio thil kong hlathlaitu pawl nih an hmuh. Josef zong nih thonginn kha Hebru holh in khor tiah a langhter. Mah cu a mui i ruahchannak a um lomi hmun tinak a si. (Genesis 40:15) Josef nih thonginn chungah hremnak a tonmi kong he aa tlaiin Salm caṭialtu nih hitin a ti: “A ke ah hreng an khenh i a hngawng ah hngawngkual an bunh.” (Salm 105:17, 18) Izipt mi hna nih thongtla pawl an kut kha hnulei in hri an ṭem hna. Thongtla cheukhat i an hngawng ah thir kual an awih hna. A ding loin hremnak a ton tikah Josef caah zeitluk in dah a har lai. A tak ti ah cun Josef nih zei sualnak hmanh a tuah lo.
Josef nih a tonmi harnak hna cu chikkhat lawng a si lo. Baibal nih Josef cu “cuka [thonginn] ah cun a um” tiah a ti. Ṭih a nung tukmi thonginn ah kum tampi a um. Josef nih thonginn in ka luat lai maw, luat lai lo ti kha a hngal lo. Thonginn chungah lungrethei ngaiin le fahnak tuar buin a umnak hi zarh tampi, thla tampi a si cang. Mah tikah ngaihchiat le lungdongh loin zeitindah inkhawhnak a ngeih?
“BAWIPA nih khan Josef cu a umpi i a cungah zaangfahnak a ngei” tiah Baibal nih a ti. (Genesis 39:21) Jehovah dawtnak cu amah a biami hna sin a phanh nakhnga lo zei bantuk ralhruang, hrengkhenhnak le a muimi khaan hmanh nih an kham kho lo. (Rom 8:38, 39) Josef nih a tonmi lungretheihnak le hremnak hna kha “zeizong vialte ah a kan bawmtu Pathian” sin a phuan dih hnuah lungdaihnak a hmuhmi kha na mitthlam ah cuanter hmanh. (2 Korin 1:3, 4; Filipi 4:6, 7) Josef caah Jehovah nih a dang zei thil dah a tuahpiak? “Thongbawi” sinin mithmai ṭha a hmuh nakhnga Jehovah nih a tuahpiak.
(Gen. 39:21-23) Asinain BAWIPA nih khan Josef cu a umpi i a cungah zaangfahnak a ngei i cucaah thongbawi kha a lung a hmuh ngaingai. 22 Josef cu thongtla dang vialte uktu ah khan a chiah i thonginn chung i an tuahmi thil vialte kha amah nih a zoh dih hna. 23 BAWIPA nih khan Josef cu a umpi i a tuahmi paoh kha a tlam a tlinter caah Josef zohkhenhmi thil a simi paoh kha cu thongbawi nih zeihmanh a zoh a herh lo.
w14 11/1 15 ¶2
“Cu Bantuk Thilṭhalo Cu Zeitindah Ka Tuah Khawh Lai?”
“BAWIPA nih khan Josef cu a umpi i a cungah zaangfahnak a ngei” tiah Baibal nih a ti. (Genesis 39:21) Jehovah dawtnak cu amah a biami hna sin a phanh nakhnga lo zei bantuk ralhruang, hrengkhenhnak le a muimi khaan hmanh nih an kham kho lo. (Rom 8:38, 39) Josef nih a tonmi lungretheihnak le hremnak hna kha “zeizong vialte ah a kan bawmtu Pathian” sin a phuan dih hnuah lungdaihnak a hmuhmi kha na mitthlam ah cuanter hmanh. (2 Korin 1:3, 4; Filipi 4:6, 7) Josef caah Jehovah nih a dang zei thil dah a tuahpiak? “Thongbawi” sinin mithmai ṭha a hmuh nakhnga Jehovah nih a tuahpiak.
Thlaraulei Lungvar Hna kha Hlathlai
(Gen. 38:9, 10) Asinain Onan nih khan fa kan hrinmi cu keimah ta an si lai lo ti kha a hngalh i cucaah cun a u nupi ro cu a ihpi fate a ci kha a ping ah a chuahter i cucaah a u caah khan tefa a um kho lo. 10 A tuahmi nih khan BAWIPA cu a lawmhter lo caah amah zong cu a thah ve.
it-2 555
Onan
(Oʹnan) [a hrampi sullam “fa ngeih khawhnak ṭhawnnak; a ṭhawng tukmi”].
Onan cu Judah le Kanaan mi Shua fanu nih an hrinmi a pahnihnak fapa a si. (Gen. 38:2-4; 1 Chan. 2:3) Onan a upa Er cu Pathian mithmuh ah thilṭhalo a tuah caah fa ngei loin thah a si i Judah nih Er nupi Tamar kha ṭhit dingin Onan kha a fial. Fapa a ngeih ahcun mah a fa cu Onan phun tungtu si loin Er phun tungtu a si lai i Er a ro kha a co lai. Asinain ro cotu ahohmanh an um lo ahcun Er a ro kha Onan nih a co lai. Cucaah Onan nih Tamar kha a ihpi fatin “a ci kha a ping ah a chuahter.” Mah cu Onan nih amah tein diriamhnak a tuahmi a si lo, Baibal nih “a u nupi ro cu a ihpi fate” a ci kha a chuahter tiah a ti. Mah cu nupa sinak an hman lioah a ci kha a leng ah a chuahter tinak a si, zeicatiah Tamar pum chungah a ci a luh nakhnga lo tinhnak he hramhram in a tuahmi a si. A pa nawl a ngaih lo caah, a hak a kauh caah, ṭhitumnak he aa tlaimi Pathian timhtuahnak kha a ralchanh caah Onan cu fa ngei loin Jehovah nih a thah ve.—Gen. 38:6-10; 46:12; Nam. 26:19.
(Gen. 38:15-18) Judah nih a hmuh tikah a hmai aa khuh caah hlawhhlangnu a si rua tiah a ruah. 16 Lam pawngah cun a hei fuh i, “Ra tuah, it tuah u sih,” a ti. A fapa nupi ro a si kha a hngal lo. Tamar nih cun, “Zeidah na ka phalh lai?” a ti. 17 Anih nih, “Ka meheh run chungin meheh no pakhat in ka rak in kuat lai,” a ti. Cun Tamar nih cun, “A ṭha ko, na rak ka kuat hlan tiang biakamnak na ka pek paoh ahcun,” a ti. 18 Biakamnak caah cun zeidah kaan pek hnga? a ti. Tamar nih cun, “Na minkhenhnak kha a hri he, cun naa putmi na ṭhiangṭhunh kha,” a ti.
w04 1/15 30 ¶4-5
Careltu Hna Sinin Biahalnak
Judah nih a biakam ningin a fapa Shelah kha Tamar a ṭhitter hna lo caah palhnak a tuah. Mah lengah biakinn ah a ummi hlawhhlangnu tiah a ruahmi nu pakhat he an umṭi. Mah cu aa ṭhiummi hna lawng nih nupa sinak hman ding timi Pathian tinhnak he aa ralchanh. (Genesis 2:24) Asinain Judah cu hlawhhlangnu pakhat he sualnak a tuahmi a si lo. Mah canah a u nupi ro a la dingmi a fapa Shelah dirhmun kha a airolh caah phung ningin Tamar fale i an pa a hung si.
Tamar tuahsernak cu ziaza rawhralnak a si lo. A hrinmi faphir hna zong kha nupa sualnak tuahnak in hrinmi tiah ruah an si lo. Bethlehem khuami Boaz nih unau nupi ro kha la in Moab minu Ruth kha a ṭhit tikah Bethlehem i khua upa pawl nih Tamar fapa Perez kong kha a ṭhatnak in an chim i hitin an ti: “BAWIPA nih hi ngaknu sinin aan pek laimi tefa hna thawngin, na innchungkhar cu Tamar nih Judah a hrinpiakmi Perez innchungkhar bantuk kha si ko seh.” (Ruth 4:12) Perez zong Jesuh Khrih i hringsortu cazin ah telh ve a si.—Matthai 1:1-3; Luka 3:23-33.
Baibal Relnak
(Gen. 38:1-19) Cu canah cun Judah kha a unau pawl sin khan a chuak i Adullam khua mi Hirah sinah a va um. 2 Cuka ah cun Judah nih khan Kanaan mipa a min Shua a simi fanu pakhat a va hmuh. A ṭhit i a ihpi i 3 fa a pawi. Fapa a hrin i a min ah Er a sak. 4 Fa a pawi ṭhan i fapa a hrin ṭhan i a min ah Onan an sak. 5 Cun fapa a hrin ṭhan i a min ah Shelah an sak. Shelah a hrin ah cun Judah cu Khezib ah a um. 6 Judah nih a fapa upa bik Er kha nupi a ṭhitpiak i a nupi min cu Tamar a si. 7 Er cu a ziaza a ṭhatlo caah BAWIPA a cungah aa lawm lo i a thah. 8 Cucaah Judah nih Onan cu a thawh i, “Na u nupi rohmi kha va ihpi. Vale unau rian a simi na rian kha va tlinter law cuticun na u nih tefa a ngei kho lai,” a ti. 9 Asinain Onan nih khan fa kan hrinmi cu keimah ta an si lai lo ti kha a hngalh i cucaah cun a u nupi ro cu a ihpi fate a ci kha a ping ah a chuahter i cucaah a u caah khan tefa a um kho lo. 10 A tuahmi nih khan BAWIPA cu a lawmhter lo caah amah zong cu a thah ve. 11 Cun Judah nih khan a fapa nupi ro Tamar cu a thawh i, “Na pa inn ah va kir law ka fapa Shelah a upat hlan tiang cu khika ah nuhmei in va um ko kun,” a ti. Hiti a ti cu a ule bantukin Shelah zong kha a thi ve sual lai ti a phan caah a si. Cucaah Tamar cu a pa inn ah khan a kir i a um. 12 Cu hnu tlawmpal ah Judah nupi Shua fanu kha a thi. Judah nih a nupi zunngaih caan kha a liim tikah a hawipa Adullam khua mi Hirah he khan a tuu an hmul an meh hnanak khua Timnah ah khan an va kal. 13 Tamar kha, “Na va, pa Judah cu Timnah ah a tuu an hmul meh awkah a kal lai,” tiah mi nih an chimh. 14 Cucaah a nuhmei thilthuam aa hrukmi kha aa thleng i hmaikhuh puan aa khuh i Timnah lei kalnak lam i a ummi Enaim khua luhnak hauka ah khan a rak ṭhu. Shelah cu a upa cang nain an ṭhitter duh lo ti kha a hngalh. 15 Judah nih a hmuh tikah a hmai aa khuh caah hlawhlangnu a si rua tiah a ruah. 16 Lam pawngah cun a hei fuh i, “Ra tuah, it tuah u sih,” a ti. A fapa nupi ro a si kha a hngal lo. Tamar nih cun, “Zeidah na ka phalh lai?” a ti. 17 Anih nih, “Ka meheh run chungin meheh no pakhat in ka rak in kuat lai,” a ti. Cun Tamar nih cun, “A ṭha ko, na rak ka kuat hlan tiang biakamnak na ka pek paoh ahcun,” a ti. 18 Biakamnak caah cun zeidah kaan pek hnga? a ti. Tamar nih cun, “Na minkhenhnak kha a hri he, cun naa putmi na ṭhiangṭhunh kha,” a ti. 19 A pek hnu cun a hmaikhuh puan kha aa hawh i nuhmei thilpuan kha aa hruk ṭhan.
MAY 18-24
BAIBAL AH THUHMI RO HNA | GENESIS 40-41
“Jehovah Nih Josef A Luatter”
(Gen. 41:9-13) Cu tikah zubawi nih khan Faraoh cu, “nihin ah hin ka palh cang ti kha na sinah ka phuan a hau. 10 Na sal hna kan cung i na thin a rak hun ah khan changreu sertu upa bik le keimah kha inn cawngtu hna haotu bawi inn ah thong ah na rak kan thlak. 11 Zankhat cu mang kan manh veve i kan mang cu sullam an ngei veve. 12 Kan sinah cun Hebru tlangval note pakhat, inn cawngtu hna haotu bawi a simi sal kha a um ve i kan mang cu kan chimh. Amah nih cun kan mang cu a kan lehpiak i an sullam cu a kan chimh veve. 13 A chim ning bantuk tein thil cu an hung si taktak: kei kha ka umnak hmun ah chiah ka hung si ṭhan i changreu sertu kha thlai a hung si,” a ti.
“Mang Lehnak a Pe Khotu cu Pathian a Si”
Zubawi nih Josef cu a rak philh nain Jehovah nih cun a philh bal lo. Zankhat cu Jehovah nih Faraoh kha aa thleidang tukmi mang pahnih a manhter. A hmasa a mang ah Nail Tiva chungin a chuakmi caw thau pasarih kha a hmuh hna, mah hnuah caw der pasarih an hun chuahmi zong kha a hmuh. Caw der nih caw thau kha an ei hna. Mah hnuah Faraoh nih mang a manh ṭhan i rawl kung pakhat chungin favui pasarih an chuahmi kha a hmuh. Asinain a dang favui pasarih an chuak ṭhan i nichuahlei thli nih a chemmi bantukin thlep selsul in an um. Thlep selsul in a ummi favui nih khan a ngan i a khimmi favui kha an dolh hna. Faraoh cu zingka i a hun i ṭhangh tikah a mang ruangah lungrethei in a um, cucaah Izipt ram i mifim pawl le camhthiam pawl vialte kha a kawh dih hna. Asinain ahohmanh nih a sullam an lehpiak kho lo. (Genesis 41:1-8) Faraoh mang kong an theih tikah an ar dih maw asiloah an ruahnak cio in maw an chim ti cu kan hngal lo. Zeitin a si hmanhah Faraoh cu an chimmi kha a lung a tling lo i a sullam kha hngalh a duh tuk.
A donghnak ah zubawi nih Josef kha a hun hngalh ṭhan. Mah tikah Josef kong kha chim loin a um kho ti lo. A luancia kum 2 i thong a rak tlak lioah amah le changreu sertu an mang a sullam a rak lettu minopa kong kha a chimh. Mah tikah Faraoh nih thonginn ah a ummi Josef kha a auhter colh hna.—Genesis 41:9-13.
(Gen. 41:16) Josef nih cun, “Keimah leh khawh bia a si lo, Pathian nih Faraoh cu a ṭhami lehnak a pek lai,” tiah a leh.
(Gen. 41:29-32) Izipt ram chungah hin ngeihpi kum, kum sarih a tlung lai. 30 Cu hnuah cun pam kum sarih a tlung lai i pam nih khan Izipt ram cu a hrawh dih lai caah kum ṭha kum vialte kha an philh dih hna lai. 31 A hun zultu hna mangṭam cu a fah tuk hringhran lai caah thil tampi a rak um lio caan kha philh rumro in philh a si ko lai. 32 Faraoh nih voihnih tiangtiang in na manh cu, hi thil hi Pathian nih a ruah cang i a rauhhlan ah a tlunter lai tinak caah a si.
“Mang Lehnak a Pe Khotu cu Pathian a Si”
Jehovah nih aa toidormi le zumhfekmi kha a dawt hna. Cucaah mifim le camhthiam pawl nih an hngalh khawh lomi mang a sullam leh khawh awkah Jehovah nih Josef kha a bawmh. Josef nih Faraoh kha na mang pahnih i an sullam cu aa khat tiah a ti. Jehovah nih thil sining pakhat kha fehternak caah voihnih tiang a chim tawn. A chim cangmi cu a tling hrimhrim lai. Caw thau le favui ṭha hna nih Izipt ram ah ngeihpi kum, kum sarih a tlun lainak kha a langhter. Caw der le favui chia nih ngeihpi kum dih in pam kum, kum sarih a tlun lainak kha a langhter. Pam nih Izipt ram vialte cu a hrawh dih lai.—Genesis 41:25-32.
(Gen. 41:38-40) Annih cu a thawh hna i, “Hi bantuk mi hi a dang khuazei ah dah kan hmuh khawh ti hna lai, Pathian thlarau nih a umpimi hi?” a ti. 39 Cucaah Faraoh nih Josef cu, “Pathian nih hi vialte cu nangmah kha aan hmuhsak caah nangmah nakin hngalhnak a ngei deuhmi le a fim deuhmi an um ti lo. 40 Ka ram zohkhenhtu ah hin nangmah cu kaan chiah lai i na bia kha a mikip nih an ngaih lai. Nangmah nakin ka ngan deuhnak cu siangpahrang ṭhutdan cung ṭhutnak kong lawngah hin a si lai,” a ti.
“Mang Lehnak a Pe Khotu cu Pathian a Si”
Faraoh nih a bia ningin a tuah. Josef kha la hmang ṭhia puan dawh ngaingai kha a aihter. Cun Faraoh nih sui ṭhi kha a awih i a minkhenhmi kutdong hrolh kha a hrolh. Siangpahrang rangleng kha i cit in Izipt ram chungah amah duh ningin zeipaoh tuah awkah nawl a pek. (Genesis 41:42-44) Josef cu thonginn in siangpahrang inn ah a phan colh. Thongtla pakhat in Siangpahrang changtu a hung si. Jehovah Pathian a zumhnak cu thir bantukin a fek ti cu a fiang ko. Josef nih kum tampi chung a rak tonmi dinlonak hna kha Jehovah nih a hmuh dih. Josef nih a tonmi thil hna kha aa tlakmi caan ah aa tlakmi lam in Jehovah nih a tawnghtham. Josef nih a tonmi dinlonak kha tawnghtham awk le Israel miphun i an hmailei ca huhphenh awkah Jehovah nih a ruah peng. Mah kong kha a hnu capar nih a fianter te lai.
Thlaraulei Lungvar Hna kha Hlathlai
(Gen. 41:14) Faraoh nih cun Josef cu a auhter hna i khulrang in thong chung cun an chuah. A kha hmul aa meh dih le a thil aa thlen dih in Faraoh hmaiah cun a rung lut.
Na Hngal Maw?
Josef nih Faraoh a ton hlanah zeicah a khahmul le a sam aa meh?
Genesis Baibal cauk ah Faraoh nih a mang sullam lehter awkah thongtlami, Hebru mi Josef kha rak ratpi colh dingin nawl a pek hna. Josef thong a tlaknak cu kum tam nawn a si cang. Faraoh nih Josef kha khulrang in a auhter ko hna nain siangpahrang hmai luh ding a si caah a sam le a khahmul kha aa met. (Genesis 39:20-23; 41:1, 14) A biapimi a lo lomi a kong a neknok pawl a langhter caah Genesis cauk ṭialtu cu Izipt phungphai ṭha tein a hngalmi a si lai ti a fiang.
Hebru mi i telin hlanlio mi tampi cu an khahmul an i zuah tawn. Asinain “nichuahlei miphun hna lakah khahmul aa zuah lomi cu hlanlio Izipt miphun lawng an si” tiah cauk pakhat (McClintock and Strong’s Cyclopedia of Biblical, Theological, and Ecclesiastical Literature) nih a langhter.
An khahmul lawng maw an i meh? Izipt mi hna i phungphai cheukhat ah mi pakhat cu Faraoh hmai i a luh tikah Pathian biak dingin biakinn i a luh bantukin tuah ve awkah nawl pek an si tiah mekazin pakhat (Biblical Archaeology Review) nih a ti. Mah ruangah Josef cu Faraoh hmai a luh hlanah a khahmul le a sam aa mehnak a si.
(Gen. 41:33) “Cucaah nangmah nih mi pakhat a fim i a thiammi, Izipt ram zohkhenhtu dingah hin na thim a hau.
w09 11/15 28 ¶14
Pathian Rianṭuantu In Umtu Ziazaṭha Langhter
14 Nulepa nih inn ah fale kha umtu ziazaṭha a hrampi cawnpiak ding a si. Genesis 22:7 ah Abraham le a fapa cu pakhat le pakhat ṭha tein an i chawnh kha ruathmanh. Josef kong ṭialmi ah a nu le a pa nih ṭha tein an cawnpiak kha a lang. Thong a tlak tikah thongtla dang zong ṭha tein a pehtlaih hna. (Gen. 40:8, 14) Josef nih cunglei Bawi zeitindah chawnh ding a si ṭha tein a cawn kha Faraoh sin a chimmi bia ah a lang.—Gen. 41:16, 33, 34.
Baibal Relnak
(Gen. 40:1-23) Cu hnu tlawmpal ah Izipt siangpahrang cu din awk lei khuakhangtu bawi le changreu sertu bawi upa bik nih khan a lung an tong lo. 2 Faraoh cu a bawi pahnih hna cungah cun a thin a hung i 3 Josef an chiahnak hmun, inn cawngtu hna haotu bawi inn ah khan thong ah an thlak ve hna. 4 Inn cawngtu hna haotu bawi nih khan an rian ṭuanpiaktu ding ah Josef cu an sinah khan a chiah. Thong chungah cun saupi an um. 5 Zankhat cu Izipt siangpahrang din awk lei khuakhangtu bawi le changreu sertu nih cun thong chungah cun mang an manh veve i sullam an ngei veve. 6 Zinglei i Josef cu an sin i a rat tikah khan an lungre a thei ti kha a hmuh hna. 7 “Zeicahdah nihin cu nan ngaih a chiat ko?” tiah a ti hna. 8 Annih nih, “Mang pakhat veve kan ngei i a kan lehpiaktu ahohmanh an um lo,” tiah an leh. Josef nih cun, “Mang lehnak a pe khotu cu Pathian a si. Nan mang cu ka chim tuah u,” a ti hna. 9 Cucaah din awk lei khuakhangtu nih a mang cu a vun chim i, “Ka mang ah hin ka hmai ah mitsur ruang ruangkhat a um i 10 nge pathum a ngei. A hnah an corh cangka khin a par kha an hung chuak colh i a thei cu an hung hmin colh. 11 Faraoh hrai kha kaa put i mitsur thei cu ka lawh hna i hrai chungah cun ka sur hna i Faraoh cu ka pek,” a ti. 12 Josef nih cun, “Hihi a sullam cu a si: a nge ngethum cu nithum tinak an si. 13 Nithum chungah Faraoh nih aan chuahter lai i aan ngaihthiam lai i na hmun ah aan chiah ṭhan lai; Faraoh cu a zubawi na rak si lio i na rak pek tawn bang khan a hrai cu na pek ṭhan lai. 14 Cu bantukin na caah thil kalning a tluan tikah ka philh hlah law ka kong kha Faraoh sinah chimpiak va ka philh hlah. Hi thong chung hin ka luatter ve te. 15 A ngaingai ti ahcun kei cu Hebru ram hin hramhram in an rak ka tlaih i hika zong ah hin thongtlaknak ding tlak zeihmanh ka tuahmi a um lo,” a ti. 16 changreu sertu upa bik nih zubawi mang sullam kha a ṭha lei a si ti a hmuh tikah Josef cu a thawh i, “Kei zong mang ka ngei ve; ka mang ah cun ka lu ah changreu bawm pathum kaa khinh i 17 a cung bik bawm ah cun Faraoh ca changreu a phunphun a um; asinain va nih khan an rung ei hna,” a ti. 18 Josef nih cun, “Hihi a sullam cu a si: bawm pathum cu nithum tinak a si; 19 nithum chungah Faraoh nih an chuah lai i na lu aan tan lai. Cun na ruak kha thingkung ah a thlai lai i va nih na sa kha an ei lai,” a ti. 20 A nithum ni ah cun Faraoh chuah ni kha a hung si, a bawi vialte hna caah rawldanghnak pakhat a ser i a zubawi le a changreu sertu upa bik kha a bawi vialte hna hmaiah cun a chuahter hna. 21 Zubawi kha hmasa a rianṭuannak hmun ah khan a chiah ṭhan i 22 changreu sertu upa bik kha a thlai. Josef nih an mang a sullam a chim ning bantuk te khan a si taktak. 23 Asinain zubawi nih khan Josef kha cu a ruat ti lo, a philh diam ko.
MAY 25-31
BAIBAL AH THUHMI RO HNA | GENESIS 42-43
“Josef Nih Mahle Mah I Uk Khawhnak A Langhter”
(Gen. 42:5-7) Kanaan ram i mangṭam a tlun caah cun Israel fapa hna cu midang he khan rawl cawk ah cun an ra ve. 6 Josef nih cun Izipt ram uktu a si bantukin rawl cu vawleicung mi vialte kha a zuarh hna. Cucaah Josef ule zong cu an ra i a hmai ah cun an kun. 7 Josef nih a ule kha a hmuh hna tikah a rak hngalh hna, asinain a hngal lo bantukin aa umter. Biahrang ngaiin a chawnh hna i, “Khuazei in dah nan rat?” a ti hna. Annih nih, “Rawl cawk ah Kanaan ram in kan ra,” tiah an leh.
‘Pathian Hmun ah Kaa Chia kho lai Lo’
Josef tah zeitin? A ule an si kha a hngalh colh hna. Mah lengah a ule a hmaiah an kunmi a hmuh tikah a ngakchiat lio kong kha a lung ah a hung chuak. Mah tikah a ngakchiat lioah Jehovah nih a pekmi ‘mang kha a hun hngalh’ tiah Baibal nih a ti. Mah a mang ah a ule cu Josef hmaiah an kun lai tiah a chimchung. A ule cu atu a hmaiah an kun taktak. (Genesis 37:2, 5-9; 42:7, 9) Josef nih zeidah a tuah lai? A ule kha a cohlang hna lai maw? Teirul dah a cham hna lai?
‘Pathian Hmun ah Kaa Chia kho lai Lo’
Nang cu Josef tonmi bantuk cu na tong theng lai lo. Asinain tuchan chungkhar tampi ah buaibainak, lung i khahlonak le huatnak hna a ummi cu khuaruahhar awk a si lo. Cu bantuk thil ton tikah lungfah in a sining paohin va si cang ko seh ti phunin khuaruat loin thil kan tuah khawh. Cucaah Josef kha i zohchunh in thil sining hna kha Jehovah nih zeitindah tawngtham hna seh ti a kan duh tiah hngalh i zuam cu fim a si. (Phungthlukbia 14:12) Chungkharmi he rem tein um cu a biapi ko nain Jehovah le a Fapa Jesuh he rem tein um cu a biapi bikmi a si ti kha i cinken.—Matthai 10:37.
(Gen. 42:14-17) Josef nih cun, “Ka chim ningte cu nan si ko. Mi ngiatu nan si ko. 15 Nan si, si lo hngalhnak ah kaan hneksak hna lai: Faraoh min chalh in chiat ka ser, nan nau hniang bik hika i a rat hlan cu nan kir kho lo. 16 Cucaah cun mi pakhat i thlah u law amah cu va ko u. Nan chimmi bia hi a hmaan le hmaan lo aa hliah hlan cu a dang cu thong ah nan um lai. Cuti a si lo ahcun, Faraoh min chalh in, mi ngiatu nan si hrimhrim ko,” a ti. 17 Cuticun thong ah nithum a thlak hna.
‘Pathian Hmun ah Kaa Chia kho lai Lo’
Josef nih a ule lungput hngalhnak caah hneksaknak pakhat hnu pakhat a tuah. Holhlettu hmangin biahrang ngaiin a chawnh hna i mi ngiatu nan si tiah a ti hna. I runvennak caah a ule nih an chungkhar kong vialte kha an chimh dih. Mah ah Josef nih hngalh a duh tukmi a nau Benjamin cu inn ah a taangta timi kong zong aa tel. Mah tikah Josef nih a intuarnak langhter lo awkah zeitluk in dah aa sum lai khi ruathmanh. A naupa cu a nung rih ko. Atu zeidah ka tuah lai ti kha Josef nih a hun hngalh. Cucaah a ule kha biatak nan chim le chim lo hngalhnak ah nan nau hniang bik cu hmuh ka duh tiah a ti hna. Nan lak i pakhat cu thong ah a taangta lai i a dang tu cu nan nau hniang bik va auh awkah inn ah nan tlung kho tiah a ti hna.—Genesis 42:9-20.
(Gen. 42:21, 22) Pakhat le pakhat kha, “Kan nau cung i ṭhatlonak kan rak tuah kha kan rak palh taktak; ka bawm ko sawh u tiah a rak kan nawl i a harnak kan hmu ko na i a bia kan rak theih duh lo kha! Kha ruangah khan atu harnak kan phak hi a si,” tiah an i ceih. 22 Reuben nih khan, “Ngakchiapa kha harnak pe hlah u kaan ti hna in nan rak ngai duh lo. Atu cu amah thih ruangah khan hi ton kan tong,” a ti hna.
it-2 108 ¶4
Josef
Josef a ule nih mah thil sining hna an hmuh tikah a luancia kum tampi lioah an naupa kha sal i an rak zuar ruangah Pathian nih dan a kan tatmi a si tiah an ruah. An hmaiah a ummi an naupa kha an i cinken ti lo i an sualnak kong kha an i ceih. I ngaihchihnak bia an chimmi kha Josef nih a theih tikah a ngaih a chia tuk, cucaah an sinin a chuak i a ṭap. A rak kir i an nau hniang bik an ratpi hlan tiang Simeon kha a tlaih.—Gen. 42:21-24.
Thlaraulei Lungvar Hna kha Hlathlai
(Gen. 42:22) Reuben nih khan, “Ngakchiapa kha harnak pe hlah u kaan ti hna in nan rak ngai duh lo. Atu cu amah thih ruangah khan hi ton kan tong,” a ti hna.
(Gen. 42:37) Reuben nih a pa cu a thawh i, “Benjamin kha na sin i ka kirpi ṭhan lo ahcun ka fapa pahnih kha na thah khawh hna. Keimah tavuan ah chia ko ka rak kirpi hrimhrim lai,” a ti.
it-2 795
Reuben
Reuben i a sining ṭha cheukhat cu Josef kha thah canah a rocarmi tikhor chung tu ah thlak dingin a naule pakua kha a forh hna lioah a lang. Reuben nih a thli tein ka rak kir ṭhan lai i tikhor chungin Josef kha ka khamh lai timi tinhnak a ngei. (Gen. 37:18-30) Kum 20 leng a rauh hnuah a ule cu Izipt ram ngiat awkah a rami nan si tiah sualpuh an si tikah mah thil hi Josef a ding loin kan rak pehtlaih caah kan tonmi a si tiah an i ceih. Mah tikah Reuben nih Josef thah dingin khua an rak khan lioah aa tel lonak kha a hngalhter ṭhan hna. (Gen. 42:9-14, 21, 22) Jakob nih Benjamin kha Izipt ram ah a ule he kalter a duh lo tikah Reuben nih amah fale pahnih nunnak thap in hitin a ti: “Benjamin kha na sin i ka kirpi ṭhan lo ahcun ka fapa pahnih kha na thah khawh hna.”—Gen. 42:37.
(Gen. 43:32) Josef cu amah dang tein an pek, cun a unau pawl cu cabuai a dang pakhat ah an pek hna i Josef sinah rawl a eimi Izipt mi cu anmah dang tein an pek ve hna, zeicahtiah Izipt mi nih cun Hebru mi he rawl eiṭi cu ningzak ah an rel.
w04 1/15 29 ¶1
Genesis Cauk Chungin Hrilhfiah—II
43:32—Izipt mi nih Hebru mi hna he rawl eiṭi kha zeicah ningzak ah an rel? Mah cu biaknaklei thleidannak le miphun ṭanhnak ruangah a si. Cun Izipt mi nih tuukhal kha an fih hna. (Genesis 46:34) Zeicah? Tuukhal pawl cu Izipt mi nih a nauta bikmi in an hmuh hna caah a si men lai. Asiloah cinthlaknak hmun cu a tam tuk lo i tuurun pawl caah tlawnlennak a kawlmi hna kha Izipt mi nih an nautat hna ca zongah a si kho men.
Baibal Relnak
(Gen. 42:1-20) Jakob nih Izipt ram ah rawl a um ti kha a theih tikah a fapale kha a thawh hna i, “Zeicahdah zeihmanh tuah loin hika ah hin nan dir ko. 2 Izipt ram ah rawl a um ti kha ka theih; cuka ah cun vung kal u law mangṭam in kan thih nakhnga lo vung kan cawkpiak u,” a ti. 3 Cucaah Josef ule pahra kha Izipt ram i rawl vung cawk awkah khan an kal. 4 Jakob nih Josef chuahpi Benjamin kha cu a kalter lo, a thi sual lai ti a phang. 5 Kanaan ram i mangṭam a tlun caah cun Israel fapa hna cu midang he khan rawl cawk ah cun an ra ve. 6 Josef nih cun Izipt ram uktu a si bantukin rawl cu vawleicung mi vialte kha a zuarh hna. Cucaah Josef ule zong cu an ra i a hmaiah cun an kun. 7 Josef nih a ule kha a hmuh hna tikah a rak hngalh hna, asinain a hngal lo bantukin aa umter. Biahrang ngaiin a chawnh hna i, “Khuazei in dah nan rat?” a ti hna. Annih nih, “Rawl cawk ah Kanaan ram in kan ra,” tiah an leh. 8 Josef nih khan a ule cu a rak theih ko hna, sihmanhsehlaw annih nih cun an hngal lo. 9 Anmah kong i mang a manhmi kha a hun hngalh i, “Mi ngiatu nan si; kan ram a dernak zawn kawl awkah nan ra,” a ti hna. 10 Annih nih, “A si lo, bawipa, na salle hi rawl cawk ah kan ra ko. 11 Kan dihlak hin unau chuakkhat kan si. Mi ngiatu kan si lo, bia hmaan a chimmi kan si, bawipa,” tiah an leh. 12 Josef nih cun, “A si lai lo! Kan ram hi khuazeika zawn dah a der ti ngiat duh ah nan ra ko,” a ti hna. 13 Annih nih, “Bawipa, kannih hi unau hleihnih chuak kan si, pakhat hrin kan si i kan pa cu Kanaan ram i a ummi a si. A ngakchia bik cu atu hi kan pa sinah a um i pakhat cu a thi cang,” an ti. 14 Josef nih cun, “Ka chim ningte cu nan si ko. Mi ngiatu nan si ko. 15 Nan si, si lo hngalhnak ah kaan hneksak hna lai: Faraoh min chalh in chiat ka ser, nan nau hniang bik hika i a rat hlan cu nan kir kho lo. 16 Cucaah cun mi pakhat i thlah u law amah cu va ko u. Nan chimmi bia hi a hmaan le hmaan lo aa hliah hlan cu a dang cu thong ah nan um lai. Cuti a si lo ahcun, Faraoh min chalh in, mi ngiatu nan si hrimhrim ko,” a ti. 17 Cuticun thong ah nithum a thlak hna. 18 A nithumnak ni ah Josef nih a thawh hna i, “Kei cu Pathian biami ka si caah hi ka chimmi nan tuah ahcun nan nunnak cu nan luat lai: 19 Nannih cu lihchim lomi nan si ahcun, thong i an in thlak hnanak inn ah khan pakhat lawng nan taang lai i a dang cu rawl ei awk a ngei lomi nan innchungkhar hna sinah khan nan rawl cawkmi cu nan hei phor lai. 20 Nan nau hniang bik kha biatak nan ka chim maw, chim lo ti fiannak ah nan ratpi hrimhrim lai i cutin nan tuah ahcun thah nan si lai lo,” a ti. Annih zong, cu bantukin tuah awk cu an hna a tla.