AA TUAI URMI VAWLEI

1 | Na Ngandamnak Kha Kilveng

A BIAPITNAK A RUANG

Harnak le leiser ral nih mi pawl kha lam a phunphun in a hnorsuan hna.

Ṭih a nungmi thil ton tikah mi cu an lungre a thei. Caan saupi a lungre a theimi cu zawtnak an ngei tawn.
Harnak a tlun tikah ngandamnak lei zohkhenhnak cu a har kho i siilei thlopnak zong ri a ngei kho.
Thil ṭhalo a can tikah sii le eidin ti bantuk mi nih an herh taktakmi thil hna cawk awkah a har kho.

Na Hngalh Awk A Simi

A zualmi zawtnak le lungretheihnak nih a ṭha lomi biakhiahnak aan tuahter khawh i na ngandamnak caah a ṭhami thil kha tuah loin aan umter khawh. A phichuak cu mah nih na zawtnak kha a zualter chin khawh.
Na zawtnak kha naa thlop lo ahcun na zual chin kho i na nunnak ca hmanhah ṭih a nung kho.
Na ngan a dam ahcun buaibainak na ton tikah a ṭhami biakhiahnak na tuah khawh lai.
A rummi na si ah, sifakmi na si ah na ngandamnak kilven awkah na tuah khawhmi thil a um.

Atu Ah Na Tuah Khawhmi

A si khawh tik paohah mifim nih cun a cang khomi harnak hna kha a ruah i mah kha hrial khawh awkah aa zuam. Mah cu ngandamnak he zong aa pehtlai kho. Na pum le na inn thiang tein na chiahnak thawngin zawtnak asiloah mah nih a chuahtermi harnak hna a tlawm deuh nakhnga na tuah khawh. A hlankan in i kilven cu i thlopnak nak in a ṭha deuh.

“Kan pum le kan inn thiang tein kan chiahmi nih siibawi sin kalnak le siithlopnak caah a dihmi tangka kha a tlawmter deuh.”—Andreas.a

a Mah mekazin ah an min cheukhat thlen a si.

TAWNGHTHAM NING—Bawmtu A Simi Ruahnak Cheuhnak

Aa tuai urmi caan ah mah thil hna tuahnak thawngin na ngandamnak kha kilveng

PUM LE INN THIANHHLIMHNAK

Pum Le Inn Thianhhlimhnak

Baibal nih hitin a ti: “Mifim nih cun harnak a rat kha a hmuh tikah hrial khawhnak aa zuam.” (Phungthlukbia 22:3) Na ngandamnak a hnorsuang khomi thil kha ṭha tein ruat law hrial khawh i zuam.

Na kut kha chatpiat le ti in atu le atu i ṭawl, a hleiin rawl na ei hlan le zungput na kal hnuah i ṭawl.
Na inn, a hleiin atu le atu na tonghmi thilri le vanpang hna kha rungrul thahnak sii in kap law hmaan tein thianh peng.
A si khawh tik paohah zawtnak aa chawnmi hna he naih tein um kha hrial.

NGANDAMNAK A PEMI RAWL EINAK

Ngandamnak A Pemi Rawl Einak

Baibal nih hitin a ti: “Ahohmanh nih mah pum kha an hua bal lo, . . . a pum cu a zoh a khenh i a cawm.” (Efesa 5:29) Kan ei, kan dinmi kong ah ralring tein kan umnak thawngin kan pum kan dawt kha kan langhter khawh.

Ti tampi in ding.
Tisik anhnah le thingthei phun tampi kha ei.
Cite, cini le a thau tam tuk in ei hlah.
Khuhsii le ritnak sii hman asiloah zu tam tuk in din kha hrial.

“Kan zawt nakhnga lo ngandamnak a pemi rawl kha ei kan i zuam, cutin a si lo ahcun sii thlopnak le siibawi sin kalnak caah tangka tam tuk kan dih lai. Ngandamnak a pemi tirawl cawknak ah kan tangka hman kha kan duh deuh.”—Carlos.

PUM CAWLCANGHNAK TUAH LAW ṬHA TEIN I DIN

Pum Cawlcanghnak Tuahnak

Baibal nih hitin a ti: “Tlawmte lawng hmanh ngeih ko i lung dai tein um hi kut a pahnih hnih in rian ṭuan zungzal ko i thlitu tlaih i zuamnak nak cun a ṭha deuh.” (Phungchimtu 4:6) Rianṭuannak le i dinhnak ah a tlarimi kan si a hau.

Pum cawlcanghnak tuah peng. Hmaan tein lam i chawhnak in na thawk khawh. Pum cawlcanghnak nih a ngandam lomi, kum upami le caan saupi a zawmi na si hmanhah na ngandamnak kha a ṭhatter khawh deuh.
I Dinhnak

Ṭha tein i din. Ṭha tein naa dinh lo ahcun na lungretheihnak a zual chin lai i na khuaruah khawhnak zong a zor lai. Caan saupi chung i dinh lonak nih a zual tukmi zawtnak hmanh aan ngeihter khawh.
Zeitik ah dah ka ih lai ti kha ri khiak law mah ning tein tuah. Nifatin aa khatmi caan te ah ih ding le thawh dingin i zuam.
Na ih pah in electronic thilri hman asiloah TV zoh kha hrial.
Na ih hlanah rawl tam tuk ei, zu le caffeine dat aa telmi tam tuk din kha hrial.

“Ka ih caan nih ka ngandamnak tampi in a hnorsuan khawh ti kha ka hngalh. Ka mitkuh a vuai lo ahcun ka lu le ka tak a fak tiah ka ruah. Asinain ṭha tein kaa hngilh khawh ahcun ka dam i ka herhmi paoh tuah awkah timhcia ka si tiin ka ruah. Thazaang tampi ka ngei i ka zaw tuk lo.”—Justin.