ṬHEN KUL

Chapter Twenty

Jehovah Ni Kha Hngak Peng U

1. Hi ningcang hlun i lungfahnak hna in khamhnak a nai cang ti na hngalh hmasa ter ah, zeitindah na um?

BAIBAL na rak hngalh hmasami kong hna lakah pakhat cu vawlei pumpuluk cu paradis ah a cang lai timi Jehovah timhnak a si. Mah vawlei thar ah, raldohnak, sualnak, sifahnak, retheihnak le thihnak a um ti lai lo. Mithi hna hmanh an rak nung ṭhan lai. Khuaruahhar awk ngai a simi ruahchannak a si! Mah vialte a tlin lainak a nai cang ti kha 1914 kum ah Khrih cu Siangpahrang in mithmuh khawh loin a phanhnak le cu caan thawkin hi vawlei ṭhatlonak donghnak i ni hmanung bik caan ah kan nunnak nih fakkhun in a langhter. Hi ni hmanung bik ni hna donghnak ah Jehovah nih hi ningcang hi a hrawh lai i biakammi vawlei thar ah a canter lai!

2. “Jehovah ni” cu zeidah a si?

² A ra laimi mah rawhnak caan kha “Jehovah ni” tiah Baibal nih a auh. (2 Piter 3:10, NW) Mah ni cu Satan a vawlei pumpi a hrawk hnga dingmi ‘Jehovah thinhun ni’ a si. (Zefaniah 2:3) Mahcucu “Lian Ngan Bik Pathian ni lianngan ni . . . , Hebru holh in Har–Magedon [Armageddon],” ah a sannak bik a phan lai. Mah ni ah cun “vawlei cung siangpahrang vialte” cu thah an si lai. (Biathlam 16:14, 16) ‘Jehovah ni’ a nai cang ti na zumhfehnak kha na nuncan nih a langhter maw?—Zefaniah 1:14-18; Jeremiah 25:33.

3. (a) Jehovah ni cu zeitik ah a rat lai? (b) “Cu ni le suimilam caan” kha Jehovah nih a langhter lonak thawngin zeiṭhatnak dah a um?

³ Satan vawlei a hrawk hngami Jehovah nih hrawktu caah a thimmi Jesuh Khrih a rat lai ni kha Baibal nih fiangte in a chim lo. Jesuh nih “cu ni le suimilam caan cu ahohmanh nih an hngal lo, vancung i a ummi van mi zong nih an hngal lo, Fapa zong nih ka hngal lo, Pa lawnglawng nih a hngalh” tiah a rak ti. (Marka 13:32) Jehovah a daw taktak lomi nih cun an lung chungah Pathian ni kha an thawn i hi vawlei duhnak tuah kha dawi le zulh an duh thliahmah lai. Sihmanhsehlaw Jehovah a daw taktak mi pawl nih cun hi ningcang ṭhalo hi zeitik caan ah a dongh zong ah thinlung dihlak in an biak ko lai.—Salm 37:4; 1 Johan 5:3.

4. Ralrin peknak caah Jesuh nih zeidah a rak chim?

⁴ Jehovah a dawmi hna ralrin peknak caah Jesuh nih hitin a ti: “Cu caan cu zeitik ah a si lai kha nan hngalh lo caah ralringte le fimhringte in um ko u.” (Marka 13:33-37) Ei le din le “khuasak tintuk harnak lawng kha kan ruah” tuk nak ruangah hi caan a biapitnak kha kan thlau lo nakhnga a kan forh.—Luka 21:34-36; Matthai 24:37-42.

5. Piter nih a fianter bantukin, Jehovah ni nih zeidah a chuahpi lai?

⁵ Cubantuk ṭhiamṭhiam in Piter zong nih ‘Bawipa ni’ kha hngah peng awk a kan chimh. “Cu Ni ah cun van cu awn cukmak in an lo lai i vancung arfi nika le thlapa hna cu an kang lai i an rawk dih lai.” “Vancung” a simi minung cozah dihlak cu hrawh an si lai bantukin “vawlei” le “a cung i a ummi vialte” a simi vantlang minung bupi le Pathian bochan a duh lomi lungput le ziaza ṭhalo le chawva a tlaihchanmi nuncan bantuk a simi vawlei ṭhalo ruahnak le tuahsernak hna zong hrawh an si lai. Mah hna cu “van thar [Pathian vancung Pennak] le vawlei thar [vawlei minungbu thar] dinnak a umnak hmun” ah thlen a si lai (2 Piter 3:10-13) Vawlei a hrawk cikcek hngami hi thil hna cu ruahlomi ni le caan ah duak tiin a tlung lai.—Matthai 24:44.

Hmelchunhnak Kha Ralrin In Hngak Peng

6. (a) Zultu hna biahalmi caah Jesuh lehnak cu Judah ningcang donghnak he zeitluk tiang dah aa pehtlaih? (b) Jesuh lehnak i zei kap hna nih dah 1914 kum hnu a cangmi thil hna le lungput hna kha a langhter?

⁶ Kan nunnak caan kha kan zoh tikah, ni hmanung bik ni a simi “chan donghnak” kong kha hngalhter khawhmi he fonhin hmelchunhnak a dikthlir kong hna kha ṭhate in kan hngalh awk a si. Matthai 24:3 ah ṭialmi zultu hna i biahalnak kha Jesuh nih a leh tikah, ahme 4 in 22 tiang a rak chimmi cheukhat cu C.E 33 le 70 kum hna ah Judah ningcang ah ahme deuh in a rak tling. Sihmanhsehlaw mah chimchungbia cu Khrih ‘a phaknak le hi ningcang donghnak’ caan a simi 1914 kum in anganmi in tlin hram aa thawk. Matthai 24:23-28 nih C.E. 70 kum in Khrih a phanhnak caan tiang a cang hngami thil hna kha a chim. Matthai 24:29–25:46 ah langhtermi thil hna cu donghnak caan ah a tlin lio a si.

7. (a) Atu lio ningcang hna nih hmelchunhnak kha zeitindah a tlinter ti kha zeiruangah kanmah theng nih kan zoh awk a si? (b) 1914 kum in hmelchunhnak a tling ti kha langhter in hi catlangbu donghnak i biahalnak hna kha let.

⁷ Hi hmelchunhnak a tlintermi thil hna le lungput hna kha kannih pumpak nih ṭhate in zoh awk a si. Mah hna kha Baibal chimchungbia he pehtlai in ruahnak nih Jehovah ni kha hngah peng awkah a kan bawmh lai. Cun mah ni a nai cang ti kha midang ralrin kan pek tik hna zong ah ṭhate in kan chim khawh nakhnga a kan bawmh lai. (Isaiah 61:1, 2) Mah hna kha ruah in Matthai 24:7 le Luka 21:10, 11 ah ṭialmi mah hmelchunhnak kong a langhtermi tanglei i biahalnak hna kha ruat ṭhan hmanh u sih.

“Ram khat le ram khat an i do lai. Peng khat le peng khat an i tu lai” tiah chimchungnak cu 1914 kum in zeitindah tlin hram aa thawk? Raldohnak he pehtlaiin, kha caan khan zeithil dah a rak cang?

1918 kum ah, zei rai nih dah Vawlei Ralpi I nak nakin minung tamdeuh a thah hna? Sii lei kong minung hngalhnak cu a ṭhangcho ngai ko nain, zeibantuk zawtfahnak nih dah minung nuai tampi kha a thah hna?

A luan ciami kum zabu i fimthiamnak (science) cu a ṭhangcho ngai ko nain, mangṭam nih vawlei kha zeitluk dah a rak hnorsuan?

2 Timote 3:1-5, 13 nih a um tawnmi minung nunning kha si loin, ni hmanung bik ni a donghnak kan naih thluahmah buntukin thil umtuning a ṭhalo chin lengmang ti a langhter ti kha zeinih dah an zumhter?

Minung Ṭhencheunak

8. (a) Matthai 13:24-30, 36-43 ah langhtermi zei thil hna kong dah Jesuh nih hi ningcang donghnak he a pehtlaihter? (b) Jesuh bianabia nih zei sullam dah a ngeih?

⁸ Jesuh nih hi thil ningcang donghnak he a pehtlaihtermi a biapimi ṭhanchonak hna zong a um. Mah hna lakah pakhat cu “pennak chung i a ummi” kha “miṭhalopa minung” in ṭhennak a si. Ral nih belhci a vorhmi lo kong bianabia ah Jesuh nih mah kong kha a chim. Bianabia chung i “thlaici ṭha” nih cun chiti thuhmi Khrifa taktak hna kha a aiawh. “Belh” cu Khrihfa kan si aa ti ko nain Khuachia nih a ukmi vawlei an tlaihchih ruangah “miṭhalopa minung” an sinak a langhtermi pawl an si. Annih cu “[Pathian] Pennak chung i a ummi” hna sinin ṭhen an si i hrawh awkah hmelchunhnak khenh an si cang. (Matthai 13:24-30, 36-43) Mah cu a um taktak maw?

9. (a) Vawlei Ralpi I hnuah, Khrihfa ka si aa timi paoh he pehtlaiin zeibantuk ṭhencheunnak nganpi dah a cang? (b) Chiti thuhmi Khrihfa hna cu Pennak salle taktak an si ti kha zeitindah an rak langhter?

⁹ Vawlei Ralpi I hnuah, Khrihfa ka si aa timi paoh cu phun hnih ah ṭhen an si: (1) A miphun cungah zumhfehnak kha aa tlaihchih i Ram Fonhmi Bupi (atu United Nations) kha mizapi hmaiah fekte in a ṭanhpimi Khrihfaram biaknak lamhruaitu hna le (2) hi vawlei ram hna hi si loin Pathian Messiah Pennak kha tlamtling in a ṭanhmi mah raldohnak a thian hnu i Khrihfa taktak asimi hna. (Johan 17:16) Annih cu vawlei pumpuluk ah “Pennak kong thawng ṭha” chimnak thawngin Pathian Pennak salle taktak an sikha an rak langhter. (Matthai 24:14) Zeithildah a rak chuak?

10. Pennak phungchim rianṭuannak i hmasa bik a chuakmi thil cu zeidah a si?

¹⁰ Hmasa bik ah, vancung Pennak ah Khrih he ukṭi awk ruahchannak a ngeimi Pathian thlarau in chiti thuh asimi a tangrihmi pawl kha pumhkhawmh an rak si. Annih cu ram kip ah an i ṭhek dih ko nain bu pakhat cungah pumh an rak si. Hi chiti thuhmi pawl hmelchunhnak khenhnak cu a dih dengmang cang.—Biathlam 7:3, 4.

11. (a) Zeibantuk pumhnak rian dah ṭuan peng a si? Zeibantuk chimchungbia he dah aa rual? (b) Hi chimchungbia a tlinnak nih zeidah a langhter duh?

¹¹ Cun, Khrih lamhruainak tangah, “mibu nganpi . . . phun kip, ram kip, holh kip le hrin kip chung in a rami” pawl pumhnak hram aa thawk. Annih cu “hremnak nganpi” in a luatmi Pathian vawlei thar ah a lut hngami “tuu dang” ah an rak cang. (Biathlam 7:9, 14; Johan 10:16) A dongh hlanah, Pathian Pennak kong phungchimnak rian kha atu tiang an rak ṭuan peng. Atu nuai tampi a si cangmi tuu dang chung i mibu nganpi nih a biapi mi pennak kong thanhnak ah chiti thuhmi pawl kha zumhfekte in an rak bawmh hna. Hi thawng cu ram kip ah theih a si cang.

Hmailei Ah Zeithil Dah a Cang Lai?

12. Jehovah ni a phanh hlanah zeitluk tiang dah phungchim rian ṭuan rih awk a si?

¹² Cunglei i tahchunhnak dihlak nih kannih cu ni hmanung bik caan donghnak kan naih cang ti le Jehovah ni cu a nai tuk cang ti a langhter. Sihmanhsehlaw mah ṭih a nungmi ni aa thawk hlanah a tling hngami chimchungbia hna a um rih maw? A um rih ko. Pakhat cu Pennak kong he pehtlaiin minung ṭhennak cu a dih rih lo. Kum tampi chung fakpi in ralchannak a rak ummi ram cheukhat ah atu ah zultu thar an tam chin lengmang. Thawng ṭha an cohlan duh lo nak hmun hna hmanh ah, tehte khannak thawngin Jehovah zangfahnak cu a lang. Cucaah, mah rian kha ṭuan zungzal ko! Mah rian a dih tikah donghnak a ra lai tiah Jesuh nih aamah a khan.

13. 1 Thesalon 5:2, 3 ah ṭialmi bantukin, chingchiah awk tlakmi zeibantuk thil dah a cang lai? Mahcucu kannih caah zei sullam dah a ngeih?

¹³ A biapi ngaimi Baibal chimchungbia pakhat nih hitin a ti: “Mi nih, ‘zeizong vialte a dai dih ko i a him dih ko,’ an ti liote ah khin rawhnak nih cun a den hna lai. An luat kho lai lo—nu cungah a tlung mi nau nganfah bantuk khi a si lai.” (1 Thesalon 5:2, 3) “A dai dih ko i a him dih ko” timi thanhnak cu zeitindah an thanh lai ti kha kan zoh hna lai. Sihmanhsehlaw minung buainak hna kha vawlei lamhruaitu pawl nih an tei dih taktak lai tinak a si lo. Jehovah ni a hngak pengmi pawl cu cubantuk thanhnak in hlen an si lai lo. Mah thanhnak a chuah leh cangka in, rawhnak cu duak tiah a ra lai ti kha an hngalh.

14. Harnak nganpi chungah zeibantuk thil hna dah a cang lai i, zeitindah a si lai?

¹⁴ Harnak nganpi aa thawk caan ah, vawlei uktu hna nih cun biaknak deu a simi a Liannganmi Babilon kha a tuk lai i a hrawh dih cikcek lai. (Matthai 24:21; Biathlam 17:15, 16) Cu hnuah, ram hna nih Jehovah nawlngeihnak a ṭanhmi pawl kha an doh hna lai caah, vawlei cozah hna le cozah a ṭanhmi pawl cungah Pathian thinhunnak a tlung lai i, a hrawh dih cikcek hna lai. Mah cu harnak nganpi i a sang bikmi Armageddon a si lai. Cun, Satan le a khuachia hna cu khorthuk chungah thlak an si lai i minung cungah nawl le huham an ngei kho ti lai lo. Cuticun Jehovah min cu hlorh a si lai i Bawipa ni cu a dong lai.—Ezekiel 38:18, 22, 23; Biathlam 19:11–20:3.

15. Jehovah ni cu a hlat rih ko tiah ruah cu zeiruangah hruh a si?

¹⁵ Hi ningcang donghnak cu Pathian khiahmi caan ah hmaante in a rak phan lai. A tlai lai lo. (Habakkuk 2:3) Judah miphun hna nih an i ruahchan lo caan, thil ṭihnung in kan luat cang tiah an ruah caan C.E. 70 kum ah Jerusalem khua rawhnak cu khulrang in a rak tlung ti kha philh hlah. Hlanlio Babilon khua tah zeitindah a si? A ngan ngaimi haukulh hna in fekte in kulh a simi a ṭhawngmi le zumh awk a simi Khuapi pakhat a rak si. Sihmanhsehlaw zan khatte ah a rawk. Cubantuk cun, atu ningcang ṭhalo cungah duak tiah rawhnak a tlung lai. Cutin a tlun tikah, Jehovah ni kha a hngak peng i a hmaanmi biaknak ah lungrualte in a ummi si kho u sih.

Ceihṭi Ṭhannak

• Jehovah ni kha hngah peng awkah zeiruangah a biapit? Zeitindah kan hngah peng khawh lai?

• A cang liomi minung ṭhennak rian nih zeitindah a kan ṭhathnem?

• Jehovah ni aa thawk hlanah, zeithil hna dah a cang rih lai? Cucaah, kanmah theng nih zeidah kan tuah awk a si?

[Cahmai 180, 181nak i Hmanthlak]

A rauh hlanah Satan ningcang hrawh in ni hmanung bik ni hna cu a dong lai