A Fekmi Lung He Jehovah A Rian Kha Ṭuan
“Ka lung a hmun ko, maw Pathian, ka lung a fek ko.”—SALM 57:7.
1. Zeiruang ahdah David bantuk in zumhfehnak kan ngeih khawh?
JEHOVAH nih a pum aa pemi a salle in a hmaanmi Khrihfa sinak kha fek tein kan i tlaih khawh nakhnga Khrihfa zumhnak chungah fek tein a kan umter khawh. (Rom 14:4) Cucaah, “maw Pathian, ka lung a fek ko,” ti in hlasak awkah a lung a rak thomi Salm ca ṭialtu bantuk in zumhfehnak kan ngei kho. (Salm 108:1) Kan lung a feh a si ahcun, Pathian sinah kan pum kan i peknak kha a tlam tlinter awkah kan lung a tho lai. Cun lamhruainak le thazang hmuh awkah amah kha kan i bochannak thawngin, ‘Bawipa rian teimak tein kan ṭuannak ah i manh lo ngai in a um zungzalmi,’ zumhfehnak aa tlaih mi in, aa thawn kho lomi, a fekmi biakhiahnak le zumhfehnak a ngeimi kan si kho lai.—1 Korin 15:58.
2, 3. 1 Korin 16:13 ah aa ṭialmi Paul forhnak bia nih a chim duh hnawh chanmi cu zeidah a si?
2 Hlanlio Korin khua i Jesuh zultu hna sinah cherhchan in ṭialmi a si ko nain, nihin Khrihfa hna he zong aa pehtlai taktakmi forhnak bia ah lamkaltu Paul nih hitin a rak ti: “Lungfimte in um u, nan zumhnak ah khan fek tein dir u, ralṭha in [pasal bantuk in ṭuan NW] um u law thazang ṭhawng in um u.” (1 Korin 16:13) Hi nawl pekmi bia pakhat cio cu Krik biafang ah atu a cang liomi kha a chimmi a si i, cu caah hun tuah peng dingin a forhmi a si. Hi chimhhrinhnak nih a chim duh hnawh chanmi cu zeidah a si?
3 Khuachia kha doh in Pathian he naih tein umnak thawngin kannih cu thlarau lei in “lung fim” tein kan um kho. (Jeim 4:7, 8) Jehovah i bochannak nih kan lungrualnak kha a hmunhter peng kho i ‘Khrihfa zumhnak ah fek tein a kan dir’ ter. Kanmah lak i nu tampi zong i tel in kannih cu—Pennak thawng a thanhtu in Pathian rian kha ralṭha tein kan ṭuannak thawngin ‘pasal bantuk in kan ṭuan.’ (Salm 68:11) Vancung kan Pa a duhnak tuah awkah thazang kan hmuh nakhnga amah kan i ngaih pengnak thawngin kan ‘tha a ṭhawng.’—Filipi 4:13.
4. Khrihfa in tipil kan innak ah zeinihdah a kan hruai?
4 Jehovah sinah a dihumnak in pumpeknak kan tuahmi kha ti chungah i hnimnak in kan langhter tikah a hmaanmi zumhnak ah kan rak dir. Sihmanhsehlaw tipil in awkah zeinihdah a rak kan hruai? A hmasa bik ah Pathian Bia i a hmaanmi hngalhnak kha kan rak i lak. (Johan 17:3) Mah nih khan zumhnak kha a ṭhawnter i, i ngaihchih in a luan ciami caan i palhnak kan rak tuahmi caah a hmaanmi ngaihchihnak kha langhter awkah a kan forh. (Lamkaltu 3:19; Hebru 11:6) Pathian duhnak ningin kan nun nakhnga palhnak kan tuahmi kha kan hun mer tak i citicun kan hun i thleng. (Rom 12:2; Efesa 4:23, 24) Mah hnu in thlacamnak in Jehovah sinah thinlung dihlak in kan pum kan rak i pe. (Matthai 16:24; 1 Piter 2:21) Pathian kha a thiangmi chia le ṭha thleidannak lungthin kha kan hal i amah sinah kan pum kan i peknak kha tipilnak in kan langhter. (1 Piter 3:21) Hi tuahsernak hna kan ruah ṭhannak nih kan i pumpeknak ningin nun awkah zuamnak ngeih a herh peng ti kha ruah peng awkah le Jehovah a rian kha a fekmi lung he ṭuan peng awkah a kan bawmh lai.
A Hmaanmi Hngalhnak kha Kawl Peng Ko
5. Zeiruang ahdah Baibal hngalhnak kan i lak peng awk a si?
5 Pathian sinah kan pum kan i peknak ningin nun awkah, zumhnak a ṭhawn termi Baibal hngalhnak kha hmuh awkah kan i zuam awk a si. Pathian biatak kan hun theih ka lioah thlarau rawl ei kha zeitluk indah a rak nuamh! (Matthai 24:45-47) Mah “rawl” hna cu an thaw—i thlarau lei ngandamnak ca zongah thazang a pek. Atu ah a pum aa pemi Jehovah a salle in a fekmi lung kha kan ngeih peng nakhnga thazang a pemi thlarau rawl ei cu a herh tukmi a si.
6. Baibal biatak kha lungthin tak tein a man sunternak cu ṭhanchoter awkah zeitindah bawmh na rak si?
6 Baibal hngalhnak tam deuhin kawlnak ah i zuamnak a herh. Mah cu thuhmi ro sung kawl bantuk in—thazang chuahnak kha a herh. Sihmanhsehlaw “Pathian hngalhnak” hmuh cu zeitluk laksawng sung dah a si! (Phungthlukbia 2:1-6) Hmasabik ah Pennak thawngthanhtu pakhat nih nangmah he Baibal cawnnak a tuah tikah, Zungzal Nunnak ah A Hruaimi Hngalhnak cauk kha a hman khawh men. Ṭhenkhat cio kha i ruah tikah a chelchel ah voikhat nakin tam deuh zong i ruah awkah a caan tam nawnpi a dih kho men. Lakmi Baibal cang hna kha rel le i ruahnak in ṭhathnemnak na rak hmu. A chim duhmi kha hngalh awkah a harmi a si ahcun, fianter a rak si. Baibal an cawnpiaktu cu ṭha tein a rak i tim chung i, Pathian thiangthlarau kha hal in thla a rak cam i, biatak kha lungthin tak tein na lawmhnak hnga an rak bawmh.
7. Pathian biatak midang cawnpiak awkah zeinihdah mi pakhat cu thiamnak a pek?
7 Hi thazang chuahnak cu aa tlak ngaimi a si, zeitintiah Paul nih hitin a rak ti: “Khrihfa phung cawnpiak a simi pa nih khan, thil ṭha a hmuhmi vialte cu a saya kha a hrawm awk a si.” (Galati 6:6) Hika ah Krik biafang nih Pathian Bia cawnpiaknak hna kha “cawnpiak a simi pa” a ruahnak le a lungthin chungah khumhnak kha a chim duhmi a si. Nangmah cu cu bantuk in cawnpiak na rak sinak nih midang a cawnpiak tu ah aa tlakmi an can ter. (Lamkaltu 18:25) Naa pumpeknak ningin zumh awk tlak tein um awkah, Pathian Bia cawn chinnak in na thlarau lei ngandamnak le fektein hmunhnak kha na zohkhenh awk a si.—1 Timote 4:13; Titus 1:13; 2:2.
Naa Ngaihchihnak le Naa Thlennak kha Philh Hlah
8. Pathian lei ziaza kha zeitindah kilven khawh a si?
8 Biatak na hun hngalh i na hun i ngaihchih lio i na rak hmuhmi luatnak le Pathian ngaihthiamnak cu Jesuh tlanhnak man thawinak zumhnak cungah aa hngatmi a si ti na hun hngalh lio kha naa cinken ti maw? (Salm 32:1-5; Rom 5:8; 1 Piter 3:18) Sualnak lam ah kir ṭhan cu na duh lo ti cu a fiang ko. (2 Piter 2:20-22) Thil dang hna lengah, Jehovah sinah a hmaan tein thlacamnak nih Pathian ziaza kha ngeih awkah, na pum na peknak ning tein nun awkah le, Jehovah kha zumh awk tlak tein biak awkah an bawmh lai.—2 Piter 3:11, 12.
9. Sualnak tuahsernak in kan rak i mer cang i, zeilam dah kan zulh awk a si?
9 Sualnak tuahsernak hna kha mertak in thlennak na tuah cang caah, na lung kha fehter peng awkah Pathian bawmhnak kha kawl rih ko. A ngaingai ti ah cun, sualnak lam kaupi ah na rak tla cang ko nain bochan awk a tlakmi khuaram hmanthlak kha ṭha tein na rak zoh i lam hmaan ah kal kha na rak i thawk ṭhan. Atu cu na lam hi thlau ti hlah. Pathian lamhruainak kha i bochan law nunnak lam cungah um awkin rikhiahnak kha tuah.—Isaiah 30:20, 21; Matthai 7:13, 14.
Na Pumpeknak le Tipil Innak kha Zeitikhmanhah Philh Hlah
10. Pathian sinah kan pum kan i peknak kong he aa tlai in a biapi mi zei kha dah kan lung chungah kan i chiah awk a si?
10 A zungzal in zumh awk tlak tein a rian ṭuan awkah timhnak ngei law, thlacamnak in Jehovah sinah pumpeknak na rak tuahmi kha na lung chungah chia peng. (Judas 20, 21) Pumpeknak nih a thiangmi timhnak caah a dang tein umnak, asiloah i ṭhennak kha a langhter. (Levitikas 15:31; 22:2) Naa pumpeknak cu chikkhat hnatlaknak le mi sinah bia i kam cang ruangah an si lo. Universe pumpi Nawlngeitu sinah a zungzal ca in pumpeknak na tuahmi a si i, mah ningte in nun awkah Pathian hmaiah kan nunnak chung pumpi zumh awk tlak tein um a herh. Asi, “kan nun ah siseh, kan thih ah siseh, Bawipa [“Jehovah,” NW] ta kan si.” (Rom 14:7, 8) Kan i lawmhnak cu a duhnak zulhnak ah le a fekmi lung he kan biak pengnak ah khan aa hngat.
11. Tipil na innak le mah a sullam kha zeiruang ahdah naa cinken awk a si?
11 Pathian sinah lungthin dihlak tein na pum na peknak langhternak ca in tipil na inmi kha a zungzal in i cinken. Hramhram in hnek ruangah tipil na inmi a si lo, zeitintiah nangmah tein na rak tuahmi rikhiahnak a si. Atu ah a tangmi na nunnak dihlak caah na duhnak cu Pathian duhnak he aa tlakmi siter awkah rikhiahnak na tuah maw? A thiangmi chiaṭha thleidannak lungthin kha Pathian na rak hal i amah sinah na pum naa peknak kha tipil innak in na rak langhter cang. A thiangmi chiaṭha thleidannak lungthin kha na pum naa peknak na tlinternak thawngin kilveng law, Jehovah thluachuahnak ngan cu na sinah a phan ko lai.—Phungthlukbia 10:22.
Na Duhnak Aa Tel
12, 13. Zeitindah kan pum kan i peknak le tipil kan innak cu kanmah duhnak theng he aa pehtlaih?
12 A ngai tein, pumpeknak le tipil innak nih vawlei cung pumpi minung nuai tampi sinah thluachuahnak nganpi a chuahter cang. Ti chungah kan pilnak thawngin Pathian sinah kan pumpeknak kha kan langhter lioah, a luan ciami caan i kan nunnak lam cu a thi cang, asinain kanmah pumpak duhnak kha cu a thi lo. Aa tlak ning tein cawnpiak a simi zumtu in, kannih cu Pathian sinah thlacamnak in pumpeknak kan tuah i tipil kan rak in tikah kanmah pumpak theng i duhnak in kan rak tuah. Pumpeknak le tipil kan innak lam nih Pathian duhnak cu zeidah a si ti kha rikhiah in mah kha tuah awkah thim hrimhrim dingin a kan hal. (Efesa 5:17) Cu ti cun a lehtama rian kha kaltak in, tipil a rak ing i vancung a Pa duhnak tlamtling tein tuah awkah amah le amah lung tho tein a rak i pemi, Jesuh cu kan i zohchunh.—Salm 40:7, 8; Johan 6:38-40.
13 Jehovah Pathian nih a Fapa kha “harnak innak in mitling ah” ser awkah a rak timh. Cucaah Jesuh nih zumh awk tlak tein cu bantuk sifah harnak kha in awkah a duhnak kha a rak langhter. Cucaah, “thihnak in a khamh khotu Pathian sinah aihramnak le mitthli he thlacamnak le nawlnak kha a tuah. Amah cu a lung a nemmi le Pathian sinah aa pemi [“Pathian a ṭihmi,” NW] a si caah Pathian nih a theih.” (Hebru 2:10, 18; 5:7, 8) Cu bantuk Pathian ṭihnak kha kan langhter a si ahcun, kannih zong kan thlacamnak cu “theih” piak kan si ve hrimhrim lai i Jehovah nih a pum aa pemi amah a Hngaltu in a kan hmunhter lai ti cu kan zumh khawh.—Isaiah 43:10.
A Fekmi Lungthin kha Na Kilven Khawh
14. Zeiruang ahdah nifate Baibal kan rel awk a si?
14 A fekmi lungthin kilven awkah le Pathian sinah naa pumpeknak ningin nun awkah zeinihdah an bawmh lai? A zungzal in a ṭhangchomi Pathian Bia hngalhnak kha i lak awk timhnak he, Baibal kha nifate in rel. Mah cu “zumh awk a tlakmi le a fimmi sal” nih tuah awkah a zungzal in a kan forhmi a si. Kan pumpeknak ningin nun awkah Pathian biatak ah kal lengmang a herh caah cu bantuk in ruahnak a kan cheuh cu a si. Jehovah a bupi nih a hmaan lomi cawnpiaknak kha an hngalh bu tein an hna tlakpi a si ahcun, Jehovah Hngaltu hna le phung an va chimhmi hna kha Baibal rel awkah zeitikhmanh ah ruahnak an pe hna lai lo.
15. (a) Rikhiahnak kan tuah tikah zeidah kan ruah awk a si? (b) Zeiruang ahdah vawlei pawcawmnak rian cu Khrihfa i a pahnihnak rian a si tiah kan ti khawh?
15 Rikhiahnak tuah a si tikah, Jehovah sinah naa pumpeknak a tlamtlin ternak kha zeitindah a hnorsuan khawh ti kha a zungzal in ruat. Mah cu vawlei rian na ṭuannak he aa pehtlai kho men. A hmaanmi biaknak ṭhancho ternak ah mah nih khan an bawmh nakhnga naa zuam maw? Rian ngeitu tampi nih aa pum pemi Khrihfa hna cu hngatchan awk a tlakmi le a felmi an si ti kha an hmuh ko hna nain, Jehovah Hngaltu hna cu vawlei cungah nawl a ngei ngaimi an si nakhnga cung kai duhnak a ngeimi an si lo ti le tangka tambik hmuhnak rian kha hmuh awkah midang he aa cuhmi an si lo ti zong kha an hngalh hna. Jehovah Hngaltu hna i timhnak cu rumnak, minthannak, rumra ngeih, asiloah huham ngeih kha a rak si lo caah a si. Pathian sinah an pumpeknak ningin a nungmi hna caah, a biapi bik cu Pathian duhnak tuah kha a si. Nunnak caah a herhmi thil hna a pemi, vawlei pawcawmnak rian cu an caah a pahnihnak a biapimi rian a si. Lamkaltu Paul bantuk in, a biapi in an ṭuanmi rian cu, Khrihfa phungchimnak rian a si. (Lamkaltu 18:3, 4; 2 Thessalon 3:7, 8; 1 Timote 5:8) Na nunnak ah a hmasa bikah Pennak ṭhathnemnak kha na chia maw?—Matthai 6:25-33.
16. A luan tuk in lungretheihnak nih Pathian sinah kan pum kan i peknak ningin nun awkah a har ter a si ahcun zeidah kan tuah khawh?
16 A cheukhat cu biatak an rak cawn hlan ah lungretheihnak a phunphun nih a rak kulh ko hna lai. Sihmanhsehlaw Pennak ruahchannak an hun ngeih tikah lunglawmhnak, nuamhnak le Pathian dawtnak hna cu an lungthin ah a hun pawt thluahmah! Cu caan thawkin an hun hmuhmi thluachuahnak hna ruahṭhannak nih Jehovah sinah an pum an i pek ningin nun awkah a bawmh ngai ko hna lai. Khatte lei in cun, hling nih thlaici kha a thei ṭha tein a tlainak kha a donh bantuk in atu ah hi ningcang nunnak ah hmuhton lengmang mi hnahnawhnak cungah a luantuk in kan lungretheihnak nih “Pathian bia” a ṭhannak kha a donh a si ahcun zeitindah a si lai? (Luka 8:7, 11, 14; Matthai 13:22; Marka 4:18, 19) Mah cu nangmah asiloah na innchungkhar ah a cangmi a si ti na hmuh a si ahcun, na lungretheihnak kha Jehovah cungah chia law dawtnak le lunglawmhnak ah ṭhan awkah an bawmh nakhnga thla va cam. Na thilrit kha amah sinah na ṭhumh a si ahcun, an bawmh lai i a fekmi lungthin he a rian kha lunglawm tein ṭuan awkah thazang an pek lai.—Salm 55:22; Filipi 4:6, 7; Biathlam 2:4.
17. A fakmi hneksaknak kha zeitindah kan tei khawh lai?
17 Amah sin i pumpeknak na tuah lioah thla na rak cam bantuk khan Jehovah Pathian sinah a hmaan tein thlacam peng ko. (Salm 65:2) Ṭhatlonak tuah awkah lemsawi na si tikah asilole a fakmi hneksaknak na ton tikah, Pathian lamhruainak kha kawl law mah kha zulh khawh awkah a sinin bawmhnak kha hal. Zumhnak a herhnak kha na lung chungah chia, zeitintiah zultu Jeim nih hitin a rak ṭial: “Fimnak a baumi [hneksaknak in khawh awk] nan um ahcun, Pathian sinah thlacam sehlaw Pathian nih a pek ko lai; Pathian nih cun ahopaoh kha zangfah ngai lei siang ngai in a pek ko hna. Asinain thla nan cam tikah lung aw ṭawm lo tein nan zumh hrimhrim lai. Lung aw ṭawm in a ummi cu thlichia nih a choihmi rili tilet bantuk a si. Cu bantuk mi nih cun, ka halmi kha Pathian nih a ka pek lai, tiah a ruah awk a si lo; lung aw ṭawm in a ummi cu an i tinhmi ah khan an kal ciahmah kho bal lo.” (Jeim 1:5-8) Hneksaknak pakhat cu tei khawh dawh a si lo ahcun, hihi kan zumh khawh: “Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan inkhawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazang an pek hna lai i chuah khawhnak lam zong an ser piak hna lai.”—1 Korin 10:13.
18. Thuhmi sualnak nganpi nih Jehovah sinah kan pum kan i peknak ningin nun awkah kan rikhiahnak kha tha a derter a si ahcun zeidah kan tuah khawh?
18 Thuhmi sualnak nganpi pakhat cu na chiaṭha thleidannak lungthin kha hnahnawh a pek i Pathian sinah naa pumpeknak ningin nun awkah na biakhiahnak kha a derter a si ahcun zeitindah a si lai? Naa ngaihchih a si ahcun, Jehovah nih ‘toidornak lungthin le nawl ngaimi lungthin cu a hlaw lai lo’ ti hngalhnak in hnemhnak naa lak khawh. (Salm 51:17) Dawtnak a ngeimi Khrihfa upa hna bawmhnak kha kawl law, annih cu—Jehovah kha aa zohchunhmi an si i— vancung na Pa he a ṭhami pehtlaihnak ngeih ṭhan awkah duhnak na ngeihmi kha zei rel loin an um lai lo. (Salm 103:10-14; Jeim 5:13-15) Cu ti cun thlarau lei ah na tha a ṭhawng ṭhan lai i na lungthin a feh ṭhan lai, na ke caah na lam a tluang lai i Pathian sinah na pum naa pek ningin na nung kho ṭhan lai.—Hebru 12:12, 13.
A Fekmi Lung He Ṭuan Peng Ko
19, 20. Kan pumpeknak ningin nun peng cu zeiruang ahdah biapi a si?
19 Hi ṭhatlonak caan chungah, kan pumpeknak ningin nun awkah le a fekmi lung he Pathian rian ṭuan peng awkah kan i zuam awk a si. Jesuh nih hitin a rak ti: “A dongh tiangin a fekmi cu khamh an si lai.” (Matthai 24:13) “Ni hmanung bik” ah kan nun caah, a donghnak cu zeitik caan paoh ah a rak phan kho. (2 Timote 3:1) Mah lengah, ahohmanh nih thaizing ah ka nung rih lai maw ti kha fiang tein kan hngal kho lo. (Jeim 4:13, 14) Cucaah nihin ah kan pumpeknak ningin nun peng cu a biapi tukmi a si!
20 Mah kha kha lamkaltu Piter nih a voihnihnak a cakuat nakah a fianter. Buanchukcho lioah Pathian a ṭih lomi hna an rak rawh bantuk in, langhternak vawlei zong hi, asiloah a ṭha lomi minung bu, cu ‘Jehovah ni’ ah hrawh a si ve te lai. Cucah Piter nih hitin a rak thanh: “Zeibantuk mi dah kan si awk a si ti cu ruat tuah u. Nan nunning cu a thiangmi le Pathian sin i pekmi an si awk a si.” Hitin a rak forh rih hna: “Ka hawile hna, nannih nih cun hihi cu nan hngalh cang. Cucaah cun nawlbia zeihmanh ah a rel lomi pawl an palhnak nih khan a ping ah an hruai sual hna nak hnga lo le him tein nan umnak hmun ah khan nan um i nan tlak sual nak hnga lo, ralring tein um ko u.” (2 Piter 3:5-17) Tipil a rak ing cangmi pakhat cu lam a pial i a fekmi lung a ngei lomi pakhat in a nunnak a dih a si ahcun zeitluk indah ngaihchia a si hnga!
21, 22. Salm 57:7 i biafang hna hi David kong ah le a hmaanmi Khrihfa hna kong ah a hmaan ti cu zeitindah a langh?
21 Tipil na in ni i naa lawmhning kha na lungthin chungah chia law na bia le na tuahsernak nih Pathian lung a lawmhter nakhnga Pathian bawmhnak kha na kawl a si ahcun Pathian sinah na pum na peknak ningin nun awkah na rikhiahnak cu a ṭhawng chin lai. (Phungthlukbia 27:11) Jehovah nih a salle kha zeitikhmanh ah an lung a rawhter hna lai lo, cu a si caah amah sinah zumh awk tlak tein kan um awk hrimhrim a si. (Salm 94:14) A ral hna an khuakhannak a doh i David kha a khamhnak thawngin Pathian nih a velngeihnak le zangfahnak kha a rak langhter. Mah cungah aa rak i lawmh ruangah David nih amah a khamhtu cung i a dawtnak a fehnak, thawn khawh a si lonak hna kha a rak thanh. Lungthin taktak he, hitin hla a rak sak: “Ka lung a hmun ko, maw Pathian, ka lung a fek ko; nangmah thangṭhatnak hla ka sa lai.”—Salm 57:7.
22 David bantuk in, a hmaanmi Khrihfa hna cu Pathian sin i an i pumpeknak in khan an i thawn lo. An luatnak le kilven an sinak cu Jehovah nih a chuahtermi a si tiah a fekmi lung he an zumh i a sinah thangṭhatnak hla kha lunglawm tein an sa. Na lung a feh a si ahcun, Pathian kha na bochan lai i, amah bawmhnak thawngin na pumpeknak kha a tlam na tlin ter khawh lai. A si, salm caṭial tu nih a kong hla in a rak sakmi “mi ṭha” he naa lo kho lai: “Thawngchia theih kha a ṭih lo, a zumhnak a ṭhawng i BAWIPA kha aa bochan.” (Salm 112:6, 7) Pathian kha zumh in amah kha tlamtling tein i bochannak he, na pumpeknak ning tein na nung kho lai i a fekmi lung he Jehovah a rian kha na ṭuan khawh peng ko lai.
Na Cinken Maw?
• Zeiruang ahdah Baibal he aa tlaimi a hmaanmi hngalhnak kha kan i lak peng awk a si?
• Zeiruang ahdah ngaihchihnak le i thlennak kha kan lung chungah kan i chiah peng awk a si?
• Kan pumpeknak le kan tipil innak kan philh lonak thawngin zeitindah ṭhathnemnak kan hmuh?
• Jehovah kha a fekmi lung he biak peng awkah zeinihdah a kan bawmh?
[Cahmai 12nak i Hmanthlak]
Pathian Bia nifate relnak thawngin thlarau lei na ngandamnak kha na kilveng maw?
Khrihfa phungchimnak rian kha a biapi in kan ṭuanmi rian ah kan chiahnak nih Jehovah kha a fekmi lung he biak peng awkah a kan bawmh