Na Zumhnak Cu Zeitluk Dah A Fek?
“Zumhnak ahkhan fekte in nan dir ko.”—2 KORIN 1:24.
1, 2. Zeiruangah zumhnak kan ngeih awk a si i, zeitindah a ṭhawng khawh chin lai?
JEHOVAH sal le hna nih zumhnak ngeih awk a si ti kha an hngalh. Angaitein, “zumhnak loin Pathian lungton khawh a si lo.” (Hebru 11:6) Cucaah thiang thlarau le duhnungmi thlarau theitlai pakhat a simi zumhnak caah fim ngaiin thla kan cam. (Luka 11:13; Galati 5:22, 23) Zumtu hawi hna i zumhnak kha i zohchunhnak nih kan ngeihmi zumhnak zong kha a fekter khawh.—2 Timote 1:5; Hebru 13:7.
2 Khrihfa vialte caah Pathian Bia ah chiahpiakmi nunphung zulhnak ah kan teima ahcun kan zumhnak cu a fek chinchin lai. Baibal kha nifate relnak le ‘zumh awk a tlakmi sal’ in timhpiakmi cauk hna bawmhnak in nifate Baibal relnak le teima in Baibal cawnnak thawngin kannih zumhnak cu a ṭhangcho khawh. (Luka 12:42-44; Joshua 1:7, 8) Khrihfa pumhnak hna, civui hna le civui pi hna kha hmaan tein kan kai tikah pakhat le pakhat zumhnak in thazang pek kan si. (Rom 1:11, 12; Hebru 10:24, 25) Cun phungchim rianṭuannak ah midang sinah phung kan chim tikah kan zumhnak a ṭhawnter.—Salm 145:10-13; Rom 10:11-15.
3. Zumhnak he pehtlaihin dawtnak a ngeimi Khrihfa upa hna sinin zeibantuk bawmhnak dah kan hmuh?
3 Baibal cawnpiaknak le thazang peknak thawngin Khrihfa upa hna nih kan zumhnak a fek awkah a kan bawmh. “Zeicah tiah zumhnak ahkhan fekte in nan dir ko. Kannih nih tuah kan duhmi cu nanmah lawmhnak tu kha a si deuh,” tiah Korin khuami hna sinah a chimmi lamkaltu Paul i lungputning kha an ngei. (2 Korin 1:23, 24) Lehnak dang ah hitin kan rel: “Nan zumhnak cu a fek caah nannih lawmhter awkah nannih he kan ṭuanmi a si.” (Chanthar Mirang Lehnak) A dingmi nih cun zumhnak in a nung. Angaitein, ahohmanh nih kannih caah zumhnak a kan ngeihpiak kho lo, zumhfekmi ah a kanser khawh lo. Mah kong ah ‘kanmah le kan thil cio cu kanmah te nih kan i phorh lai.’—Galati 3:11; 6:5.
4. Pathian i zumhfekmi sal le hna he pehtlaihin Baibal konglam hna nih zeitindah kan zumhnak fekter awkah a kan bawmh khawh?
4 Baibal chungah zumhnak a ngeimi hna kong tampi a um. A lang ngaimi an tuahsernak tampi kha kan hngalh men lai, asinain an nuncan ah nifate an langhtermi zumhnak tah kan hngalh maw? Kan sining aa khatmi ah zumhnak an langhterning kha atu ruahṭhannak thawngin kan zumhnak kha kan fekter khawh.
Zumhnak Nih Ralṭhatnak a Kan Ngeihter
5. Zumhnak nih Pathian Bia kha ralṭha ngaiin a kan thanhter khawh timi zeibantuk Baibal kong dah a um?
5 Zumhnak nih Pathian Bia kha ralṭha ngaiin thanh awkah thazang a kan pek. Enoch cu Pathian biaceihnak kha ralṭha ngaiin a rak chim chung. Hitin a ti: “Zohhmanh, mi vialte kha an bia ceih awk le Pathian zei i a rel lomi misual vialte kha Pathian zeirelloin an um ruang i an tuahmi sualnak vialte le Pathian kha zeirelloin an thangchiatnak vialte ruang i sualphawt awkah, Bawipa cu a vancungmi mithiang rel cawk lo hna he an ra lai.” (Judas 14, 15) Cubantuk bia hna an theih tikah pathian zei i a rel lomi a ral hna nih Enoch kha thah awk an rak duh. Asinain zumhnak in ralṭha ngaiin a rak chim, cun Pathian nih thihnak ah hngilhternak thawngin “a lak,” cuticun thihnak fahnak kha a inter lo. (Genesis 5:24; Hebru 11:5) Cubantuk khuaruahhar thil hna kha kan ton lo nain kan thlacamnak hna kha Jehovah nih a kan leh caah Pathian Bia kha zumhnak le ralṭhatnak in kan thanh khawh.—Lamkaltu 4:24-31.
6. Pathian pekmi zumhnak le ralṭhatnak nih Noah kha zeitindah a rak bawmh?
6 Noah nih Zumhnak in “lawng pakhat a ser i cu chungah cun amah le a innchungkhar kha himte in an um.” (Hebru 11:7; Genesis 6:13-22) Noah cu amah chan lioah Pathian ralring peknak kha ralṭha ngaiin “dinnak kong a chimtu” zong a rak si. (2 Piter 2:5) Atu thil hna ningcang cu a rauh hlan ah hrawh a si cang lai tiah Baibal langhternak in kan chim tikah mi cheukhat nih zeirelloin an um bantukin a ra laimi buanchukcho kong a chim tikah zeirelloin an rak um ve ko lai. (2 Piter 3:3-12) Asinain, Enoch le Noah bantukin Pathian nih a kan pekmi zumhnak le ralṭhatnak in cubantuk thawngpang kha kan chim khawh ko.
Zumhnak Nih Kan Lung A Kan Sauter
7. Abraham le midang hna nih zumhnak le lungsaunak kha zeitindah an rak langhter?
7 A hleikhunin hi ningcang ṭhalo donghnak kha kan hngah lioah zumhnak le lungsaunak kan herh. “Zumhnak le lungsaunak thawngin Pathian nih bia a kamhmi hna a hmumi hna” lakah Pathian a ṭihzahmi Abraham aa tel ve. (Hebru 6:11, 12) Zumhnak thawngin Ur khua le a ngeihmi vialte kha a kaltak i Pathian nih bia a kamhmi ram ah khual pakhat in a rak um. Isaac le Jakob zong mah biakamnak kha an rak co ve. Asinain “hi mi vialte hna hi zumhnak ngei in an thi. Pathian nih a kamhmi hna cu an hmu lo.” Zumhnak in “an ngaihmi ram cu, ram ṭha deuh vancung ram tu kha a si.” Cuticun Pathian nih “an caah khua pakhat a timh piak hna.” (Hebru 11:8-16) Ahmaan ko, Abraham, Isaac le Jakob—cun Pathian a ṭihzahmi an nupi le hna—cu Pathian vancung Pennak kha lungsau ngaiin an rak hngah i mah tang vawlei ah um awkah an thoṭhan lai.
8. Abrahma, Isaac le Jakob nih lungsaunak le zumhnak kha zeibantuk thil hna lakah dah an rak langhter?
8 Abraham, Isaac le Jakob nih zumhnak kha an thlau lo. Biakammi ram cu an kuttang ah a rak phan lo, cun Abraham tefa thawngin mi vialte thluachuah an hmuhmi zong kha an rak hmu fawn lo. (Genesis 15:5-7; 22:15-18) Kum tampi a luan hnuah ‘Pathian nih a sakmi khua’ cu a rak um taktak lai nain annih cu an nunchung ah zumhnak le lungsaunak kha an rak langhter peng ko. Atu Messiah Pennak cu vancung ah dirh a si taktak cang caah kannih zong cutin kan langhter ve awk a si—Salm 42:5, 11; 43:5.
Zumhnak Nih A Sangbikmi Tinhnak A Kan Ngeihter
9. Zumhnak cu tinhnak hna cungah zeitindah huham a ngeih?
9 Zumhfekmi pupa hna nih Kanaanmi hna i nuncan ṭhalo kha zeitikhmanh ah an rak cohlan lo, zeicahtiah an tinhnak hna cu a sang deuh caah a si. Cubantukin zumhnak nih miṭhalopa, Satan kuttang i vawlei sersiamnak kha a kan alter khotu thlarau tinhnak hna kha a kan ngeihter.—1 Johan 2:15-17; 5:19.
10. Josef cu vawlei ah a minthangmi sinak nakin a sangdeuhmi tinhnak a ngei tikha zeitindah kan hngalh?
10 Pathian timhpiaknak thawngin Jakob fapa Josef cu Ezipt ram i rawl zohkhenhtu a rak si nain hi vawlei ah a liannganmi pakhat si awk tinhnak a rak ngei lo. Jehovah biakamnak hna cu a tling lai tiah a zumh caah kum 110 a simi Josef nih a u le hna sinah hitin a rak chim: “Atu cu ka thihnak a nai cang, sihmanhsehlaw Pathian nih an zohkhenh hrimhrim hna lai i hi ram hin an chuahpi hna lai i Abraham le Isak le Jokob a kamhmi hna ram ah khan an kalpi hna lai.” Josef nih biakammi ram ah vui awkah a rak hal hna. An thih tikah a ruak kha rimhmui an thuh i ruakkuang in Ezipt ram ah an chiah. Sihmanhsehlaw Izipt sal in luatter an si tikah, profet Moses nih Josef i a ruh kha Biakammi ram ah vui awkah a kalpi. (Genesis 50:22-26; Exodas 13:19) Josef bantuk zumhnak nih hi vawlei ah a minthangmi sinak nakin a sangdeuhmi tinhnak ngeih awkah a kan forh.—1 Korin 7:29-31.
11. Moses cu thlarau tinhnak a ngei tikha zeitindah a langhter?
11 Izipt ram i siangpahang innchungkhar in Moses cu fimnak vialte kha a cawn dih ko nain “Pathian mi hna he sifak in kha aa thim deuh.” (Hebru 11:23-26; Lamkaltu 7:20-22) Mah ruangah amah cu vawlei ah a minthangmi sinak le Izipt ram ah minthang ngaiin vuinak kha a duh lo. Sihmanhsehlaw, [“a hmaanmi,” NW] Pathian mi, Nawlbia a remtertu, Jehovah i profet, Baibal ṭialtu a sinak tinvo le mah minthangnak kha tahchunh ahcun zeidah a sang deuh lai? (Ezra 3:2) Vawlei i minthangmi rian pakhat maw na duh, asilole zumhnak nih a sangdeuhmi thlarau tinhnak hna an ngeihter maw?
Zumhnak Nih A Ṭhahnemmi Nuncan A Ngeihter
12. Zumhnak nih Rahab nuncan kha zeitindah a thlen?
12 Zumhnak nih mi hna kha a sangbikmi tinhnak hna a ngeihter lawng siloin a ṭhahnemmi nuncan zong a ngeihter. Jeriko khuami hlawhhlangnu Rahab i a nuncan cu sullam ngei loin a um men lai. Asinain, zumhnak a langhter tikah a nuncan cu a rak thleng! “Pathin he i remnak a hmuhnak cu a tuahnak thawngin a si, Judahmi ngiatu pawl kha a rak luhter hna i lam dang in a chuahter hna,” cutin a tuah caah Kanaanmi hna ral in an rak luat. (Jeim 2:24-26) Jehovah kha a hmaanmi Pathian in a rak hngalh caah Rahab nih hlawhhlangnu a sinak nuncan kha a kaltaknak zongin zumhnak kha a rak langhter. (Joshua 2:9-11; Hebru 11:30, 31) Zumhnak a ngei lomi Kanaanmi siloin Jehovah i sal pakhat kha a ṭhit. (Deuteronomi 7:3, 4; 1 Korin 7:39) Rahab cu Messiah i pi sinak tinvo ṭha a rak hmu. (1 Chanrelnak 2:3-15; Ruth 4:20-22; Matthai 1:5, 6) Ziaza ṭha lomi nuncan a kaltakmi midang hna bantukin laksawng dang a hmuh rih lai, mah laksawng cu vawlei paradis ah thawhṭhannak a si.
13. David nih Bethsheba he zeitindah a rak sual, sihmanhsehlaw zeibantuk lungputning dah a rak langhter?
13 Rahab nih a ṭha lomi nuncan kha a kaltak hnuah a dingmi nuncan kha a zulh ti cu a fiang. Asinain, Pathian sinah kum saupi chung pum aa pe cangmi cheukhat nih sualnak nganpi an rak tuah. Siangpahrang David nih Bathsheba kha a sualpi hnuah raldohnak ah a vapa kha a thihter i a nupi ah a lak. (2 Samuel 11:1-27) Ngaichiat ngaiin aa ngaichih caah Jehovah sinah hitin a rak nawl: “Na thiangthlarau kha ka lak kanh hlah.” David nih Pathian thlarau kha a thlau lo. Jehovah cu zangfah a hmangmi a si caah sualnak ruangah “toidornak lungthin le nawlngaimi lungthin” a ngeimi hna kha a hlawt lo. (Salm 51:11, 17; 103:10-14) An zumhnak ruangah David le Bathsheba cu Messiah chuahkehnak pupa sinak laksawng an rak hmuh.—1 Chanrelnak 3:5; Matthai 1:6, 16; Luka 3:23, 31.
Hnangamternak In a Fekchinmi Zumhnak
14. Gideon cu zeibantuk hnangamternak dah a rak hmuh i mah nihcun kan zumhnak kha zeitindah a hnorsuang?
14 Kan zumh ningin kan tuahser ko nain a caancaan ah Pathian bawmhnak hmuh le hmuh lo fiangtein hngalh kan duh men lai. ‘Zumhnak in ram ngan pipi kha a tuk i a teimi’ Biacheihtu Gideon zong cuticun a si. (Hebru 11:32, 33) Midianmi hna le an hawi hna nih Israel an tuk tikah Pathian thlarau cu Gideon cungah a tlung. Jehovah nih a umpi maw ti fianter awkah phuhri ah tuu hmul kha zan khuadei a chiah i a rak hneksak. Voikhatnak hneksaknak ah vawlei cu a ro ko ṭung nain tuu hmul cungah dap a tla. Voihnihnak hneksaknak ah vawlei ah dap a tla i tuu hmul cu a ro. Gideon nih mah hnangamternak hna a hmuh hnuah zumhnak in ralring ngaiin a rak tuah caah Israelmi hna i ral hna kha a rak tei. (Biacheihtu 6:33-40; 7:19-25) Biakhiahnak pakhat kan tuah tikah hnangamternak kan hmuh duh ahcun zumhnak kan ngei lo tiah kan ruah awk a si lo. Biakhiahnak kan tuah tikah Baibal le Khrihfa cauk hna cawnnak thawngin le thiang thlarau lamhruainak hmuh awk thlacamnak thawngin zumhnak kha kan langhter taktak ko.—Rom 8:26, 27.
15. Barak zumhnak kha ruahṭhannak thawngin zeitindah bawmh kan si khawh?
15 Biaceihtu Barak cu thazang pek a si caah a zumhnak a rak fek. Israelmi hna kha Kanaan siangpahrang Jabin i hremnak in luatter awkah rak tuah hmasa awkah profetnu Deborah nih a rak forh. Zumhnak a ngeih lawng siloin Pathian bawmhnak ka hmuh lai tiah a rak hngalh caah Barak nih ralthuam tawmpal lawng a simi minung 10,000 he Sisera nih a ukmi a tamdeuhmi ralkap kha an rak tei. Deborah le Barak cu mah teinak kong kha lunglawmh ngaiin hla an rak sak. (Biacheihtu 4:1–5:31) Deborah nih Barak kha Israelmi hna i Pathian rianpekmi hruaitu in ṭuan awkah tha a pek caah Jehovah sal hna lakah zumhnak in ‘ram dangmi ralkap a teimi’ pakhat a rak si. (Hebru 11:34) Jehovah rianṭuannak ah zuamcawhnak a simi ṭuanvo pakhat kha hlawhtlinternak kong he pehtlaihin cawngor in kan um ahcun zumhnak in Barak nih a rak tuah caah Pathian nih thluachuah a rak pekning kha kan ruahṭhannak nih a kan forh khawh.
Zumhnak Nih Daihnak A Karhter
16. Lot he dai tein um awkah Abraham nih zeibantuk zohchunh awk ṭha dah a chiahtak?
16 Zumhnak nih Pathian rianṭuannak ah a harmi ṭuanvo hna kha hlawh a kan tlinter khawh bantukin lungdaihnak zong kha a karhter. Tar a simi Abraham le mino deuh a simi a tupa Lot i saṭil congtu hna an i sik caah i ṭhen awk a rak si tikah Lot nih a ṭhabikmi hmun kha a rak i thim. (Genesis 13:7-12) Mah harnak kha remhchunh awkah Pathian bawmhnak caah zumhnak in Abraham nih thla a rak cam ko lai. Amah pumpak ṭhathnemnak kha hmasa chiah loin zeizong vialte kha dai tein a rak remhchunh. Kan Khrihfa unau hna he kan i si ahcun Abraham i dawtnak zawnrauhnak kha i cinken in zumhnak in thla cam in ‘daihnak kha kawl’ u sih.—1 Piter 3:10-12.
17. Paul, Barnabas le Marka lakah a chuakmi i alnak kha an daihter khawh tiah zeiruangah chim khawh a si?
17 Zumhnak in Khrihfa phunglam hna zulhnak nih daihnak kha zeitindah a karhter khawh ti kha ruat hmanh. Paul cu voihnihnak khawltlawng rianṭuannak aa thawk dengmang lio ah Barnabas nih Saipras tikulh le Asia Minor i Khrihfa hna sinah kal ṭhan awkah a hna a rak tla. Asinain Banabas nih a nau Marka kha a hrawi duh. Marka nih Pamfilia in a rak kirtak hna caah Paul nih a kalpi duh lo. Cu tikah “fakpi in an i al” i, an rak i ṭhen. Barnabas nih Marka kha Saipras tikulh ah a kalpi, Paul nih cun Silas kha a hawi ah a thim i “Siria le Silisia ram kha an ṭol hna i khrihfabu kha an thazang an fehter hna.” (Lamkaltu 15:36-41) A rauhhlan ah an lung a dai ṭhan, zeicahtiah Marka cu Paul he Rom ah a rak um i Lamkaltu nih amah kong thangṭhatnak a rak chim. (Kolosa 4:10; Fillimon 23, 24) C.E. 65 kum hrawngah Rom khua ah Paul thong a rak tla lioah Timote sinah hitin a rak chim: “Marka kha rian a ka bawm khotu a si caah rak i ratpi.” (2 Timote 4:11) Paul nih Banabas le Marka he an i pehtlaihnak kong kha a zumhnak thlacamnak hna ah a rak cam chih kho, mah ruangah “Pathian daihnak” he pehtlaihmi lung daihnak kha a rak hmumi a si.—Fillipi 4:6, 7.
18. Euodia le Sintekhe kong ah zeidah a rak cang?
18 Kannih cu mi tling lomi kan si caah “palhnak kan tuah cio tawn.” (Jeim 3:2) Khrihfa nu pahnih zong an rak i rem ve lo, annih kong kha Paul nih hitin a ṭial: “Euodia le Sintekhe, zangfahnak in kan nawl hna . . . Ka ṭuanhawi, nangmah zong, kha nu hna kha rak bawm hna ti kan duh.” (Filipi 4:1-3) Pathian a ṭihmi hi nu hna cu Matthai 5:23, 24 i chimhrinnak bantukin an i remlonak kha an remhchunh. Zumhnak in Baibal phunglam hna zulhnak nih nihin ah daihnak kha a karhter lai.
Zumhnak Nih Inkhawhnak A Kan Ngeihter
19. A har ngaimi zeibantuk thil umtuning nih dah Isaac le Rebekah hna an zumhnak kha a hrawk khawh lo?
19 Zumhnak thawngin harnak zong kha kan inkhawh. Kan innchungkhar i tipil a ing ciami pakhatkhat nih zumtu a si lomi pakhat he i ṭhitnak thawngin Pathian bia a ngaih lo caah kan ngaih a chia khawh. (1 Korin 7:39) Isaac le Rebekah cu an fapa Esau nih an bia a ngai lo caah an lung a rak fak. A nupi Hit mi nu hna ruangah Rebekah nih hitin a ti: “Esau nih a ṭhitmi hna ram dangmi a nupile nih hin an ka nor tuk hringhran. Jakob zong nih Hit mi hi a ṭhit ve sual ahcun, ka caah thih hmanh a ṭha deuh.” (Genesis 26:34, 35; 27:46) Asinain, hi thil umtuning nih Isaac le Rebekah an zumhnak kha zeitikhmanhah a hrawh lo. Cubantuk in a har ngaimi sining hna kan ton tikah a fekmi zumhnak kha ngei peng kho hna u sih.
20. Ruth le Naomi sinin zeibantuk zumhnak zohchunh awk dah kan hmuh?
20 Tar a simi nu hmeinu Naomi cu Judahmi pakhat a si i Messiah pupa hna a si laimi fa le hna kha Judahmi nu cheukhat nih an hrin lai tikha a hngalh. Asinain a fa le hna cu fa ngeih loin an thi hlei ah amah zong fa a ngei khawh ti lo caah a innchung in Messiah phun hrin awkah a si khawh ti lo. Zeitin a si ah, nu hmeinu a simi a fanu Ruth cu tar a simi Boaz i nupi ah a rak cang i fapa pakhat a hrin caah Messiah i pi a rak si! (Genesis 49:10, 33; Ruth 1:3-5; 4:13-22; Matthai 1:1, 5) Naomi le Ruth an zumhnak nih harnak phunphun kha inkhawhnak a ngeihter hna i donghnak ah lunglawmhnak an rak hmuh. Kannih zong harnak nganpi kan ton tikah zumhnak kan ngeih peng ahcun lunglawmhnak nganpi kan hmuh ve lai.
21. Zumhnak nih zeidah a kan tuah piak i, kan biakhiahnak cu zeitindah a si awk a si?
21 Ni khat hnu nikhat zeidah kan ton lai tikha ahohmanh nih kan chimh khawh lonain zumhnak thawngin zeibantuk zuamcawhnak hmanh siseh kan tei khawh. Zumhnak nih ralṭhatnak a kan ngeihter i kan lung a sauter. A sangbikmi tinhnak hna le a ṭhahnemmi nuncan kha a kan ngeihter. Zumhnak nih midang hna he kan i pehtlaihnak cungah ṭhathnemnak a chuahter i harnak hna kha a kan inter khawh. Cucaah ‘zumhnak a ngei i khamhnak a hmumi tu si kho u sih. (Hebru 10:39) Dawtnak a ngeimi kan Pathian Jehovah i ṭhawnnak in siseh, amah thangṭhat awkah siseh a fekmi zumhnak kha langhter peng u sih.
Zeitindah Na Leh Lai?
• Zumhnak nih ralṭhatnak a kan ngeihter khawh timi zeibantuk Baibal langhternak dah a um?
• Zumhnak nih a ṭhahnemmi nuncan a kan ngeihter khawh tiah zeiruangah kan chim khawh?
• Zumhnak nih daihnak kha zeitindah a karhter?
• Zumhnak nih harnak nganpi kha inkhawhnak a kan ngeihter khawh timi zeibantuk langternak dah a um?
[Cahmai 23nak i Hmanthlak]