Baibal Cawnpiakmi Zulh Awkah Midang Kha Bawm Hna
“Vawlei ṭha ah a tlami thlaici cu bia kha lungtho tein a thei i an lung chungah ṭha tein aa cinken i a thei a tlai tiangin aa zuammi cu an si.”—LUKA 8:15.
1, 2. (a) Baibal Cawnpiakmi Taktak Cu Zeidah A Si? timi cauk cu zeica timhnak in dah an chuah? (b) Kan hnu lei kum hrawng ah Jehovah nih a miphun hna zultu siternak rian kha zeitindah thluachuah a pek?
“MAH cauk cu a tliang i a ṭha tuk. Keimah le Baibal ka cawnpiakmi nih kan duh tuk. Hi cauk in mi hna he innka hram ah Baibal cawnpiaknak ka thawk khawh colh.” Baibal Cawnpiakmi Taktak Cu Zeidah A Si?a timi cauk kongah Jehovah Hngaltu hna i caan tling hmaikal a ṭuanmi unau nu pakhat nih cuticun a chim. Kum upa thawngthanhtu unau pa pakhat nih mah cauk kongah hitin a chim: “Kum 50 chung phungchim rianṭuannak i lungtho tein kaa tel lioah mi tampi kha Jehovah kong hngalh awk ka bawmh khawh hna. Asinain hi cauk cu aa thleidang ngai. Mah chung i aa telmi hmanthlak le tahchunhnak biafang hna cu hmual a ngei ngai.” Baibal Cawnpiakmi cauk kongah cuticun na ruat ve maw? “Cucaah khuazakip ah va kal u law miphun vialte kha ka zultu ah va ser hna u; . . . kan fialmi vilate hna hi an zulh nakhnga va cawnpiak hna u” timi Jesuh fialmi rian tling tein ṭuan khawh awkah hi cauk cu bawmtu a si.—Matthai 28:19, 20.
2 Hngaltu 6.6 nuai leng kai nih zultu ah va ser hna u timi Jesuh fialmi rian kha lungtho tein an zulh hmuhmi nih Jehovah lung a lawmhter lai cu a fiang ko. (Phungthlukbia 27:11) An i zuamnak kha Jehovah nih thluachuah a pek ti a lang. Tahchunhnak ah, 2005 kum chungah ram 235 ah thawng ṭha bia chim a si cang i buaktlak in Baibal cawnpiaknak 6,061,500 leng tuah a si cang. A phichuak cu mi tampi nih ‘Pathian bia kha minung bia bantukin si lo in Pathian bia taktak’ in an cohlan. (1 Thesalon 2:13) Kan hnulei kum hnih chungah zultu thar thong za nga leng cu Jehovah nunphung ningin an nung i Pathian sinah an pum an i pe.
3. Baibal Cawnpiakmi cauk hmannak he aa tlai in zei biahalnak hna dah hi capar ah kan i ruah lai?
3 Tunai te ah pakhatkhat he Baibal cawnnak na tuah khawh caah naa nuam maw? Vawlei pumpuluk ah Pathian bia a thei i a “lung chungah ṭha tein aa cinken i a thei a tlai tiangin aa zuammi” an um rih. (Luka 8:11-15) Zultu siternak rian ah Baibal Cawnpiakmi cauk zeitindah hman khawh a si kha zoh u sih. A tang lei biahalnak pathum hi kan i ruah lai: (1) Zeitindah Baibal cawnpiaknak pakhat thawk khawh a si? (2) Zei cawnpiaknak lam hna dah hmual a ngei bik? (3) Mi pakhat kha Baibal a cawngmi lawng si loin Pathian Bia, Baibal cawnpiaktu si awkah zeitindah bawmh khawh a si?
Baibal Cawnpiaknak Pakhat Thawk Khawh Ning
4. A cheukhat cu Baibal cawn dingah zeicah i cungcang in an um, kha ti an umnak kha tei khawh awkah zeitindah na bawmh khawh hna?
4 Tiva ngan pakhat kha kar khat in na per lai tiah in ti hna seh law na al ko lai. Sihmanhsehlaw tiva chungah ke lamhnak ding lung an phah a si ahcun ti varal kal kha na duh ko lai. Cu bantukin a rian a tammi pakhat cu Baibal cawn dingah aa cungcang men lai. Baibal cawnnak ah a caan le thazang tampi chuah a hau lai tiah a ruah men ko lai. Mah a ruahnak kha tei khawh awkah zeitindah na bawmh khawh? Baibal Cawnpiakmi cauk chung i hngalh awk tlakmi a kong hna kha a tawinak in chimnak nih Pathian Bia kha hmaan tein cawn ding tiang a siter khawh. Ṭha tein naa timh a si ahcun lennolh na tuah tik caan paoh cu Jehovah he hawikom si awk i lung na phahpiakmi he aa lo lai.
5. Baibal Cawnpiakmi cauk hi zeicah rel a hauh?
5 Asinain Baibal Cawnpiakmi cauk in midang nih ṭhathnemnak hmuh awk na bawmh hna hlan ah mah cauk kha nangmah theng nih ṭha tein na rel hmasa a hau lai. Mah cauk kha a hram thawk in a dongh tiang na rel dih cang maw? Nuva pakhat hna cu an i manh caan khual an tlawnnak ah mah cauk kha an i put i rilikam i an i dinh caan ah an rel. Khual pawl thil a zuarhtu hna cuka hmun i a ummi nu pakhat nih Baibal Cawnpiakmi Taktak Cu Zeidah A Si? timi cauk min kha a hei hmuh. Mah biahalnak he aa tlai in Pathian sinah naite ah khan thla ka cam tiah mah nuva hna cu a chimh hna. Nuva hna nih cun lunglawm ngai in mah minu cu cauk cu an pek. Mi he i ton awk i na hngah lio hna ah asiloah rianṭuannak le sianginn i chikkhat i dinh caan ah mah cauk kha rel awkah ‘a caan kha caw.’ (Efesa 5:15, 16, NW) Cuti na tuah ahcun mah cauk kong kha na hngalh deuh chin lai i cuka chung i a ummi kong kha midang chimh awkah caan ṭha na kawl khawh lai.
6, 7. Baibal cawnnak thawk tikah Baibal Cawnpiakmi cauk kha zeitindah hman khawh a si?
6 Phungchimnak i mah cauk pek-ṭhenh tikah tahchunhnak hna, Baibal cang hna le cahmai 4, 5, le 6 i biahalnak hna kha hmual ngei ngai in hmang. Tahchunhnak ah, hitin biahalnak in bia i ruahnak kha na thawk khawh men lai, “Atu minung nih kan tonmi harnak vialte caah a ṭha bikmi lamhruainak cu zeidah a si hnga?” A bialehnak kha ṭha tein na ngaih hnu ah 2 Timote 3:16, 17 kha rel law Baibal ah minung harnak vialte tei khawhnak lam taktak a um kha fianter. Cun cahmai 4 le 5 kha zohter law “hi hmanthlak chung i zei sining nih dah na lung an fahter bik?” tiah innngeitu kha hal. Pakhatkhat kha a sawh a si ahcun mah he aa pehtlaimi Baibal cang kha relpiak. A hnu cahmai 6 chung ta kha relpiak law “hi ka biahalnak paruk chungah zei kong hi dah hngalh na duh bik?” tiah hal. Pakhatkhat kong kha a sawh a si ahcun mah he aa pehtlaimi ṭhen kha hmuhsak law cauk kha pe ta. Cu hnu ah kal ṭhan law mah biahalnak hna i ruah ṭi awkah ṭha tein i tim.
7 Mah chimning cu minit panga lawng a rau lai. Asinain mah chungah khan innngeitu a lungretheihmi kong kha na hngalh khawh lai i mah he aa pehtlaimi Baibal cang pahnih kha rel law len ṭhan awk ca na timhtuah khawh. Innngeitu he bia i ruahnak ah na chimmi kakhat hnih cu a ca ah thapeknak le hnemhnak taktak a si kho. Cuticun a rian a tammi hmanh nih minit tlawmpal caan hman ṭi kha a duh lai i “nunnak a phanmi lam” phanh khawh awkah na bawmh khawh lai. (Matthai 7:14) A caan a rauh in innngeitu a lung a thawh tluk in cawnnak a caan kha sauter deuh awk a si. Cun a caan khiahmi caan ah hmunkhat ah ṭhut in cawn awkah sawn ding a si.
Hmual a Ngei Bikmi Cawnpiak Ningcang
8, 9. (a) Baibal na cawnpiakmi nih a ton khawhmi dawntu kha tei awkah zeitindah na timh khawh? (b) Zumhnak a fehtermi mei nih a kangh khawh lomi kha khoika ah dah hmuh khawh a si?
8 Mi pakhat cu Baibal cawnpiakmi zulh hram aa thawk tikah a ṭhanchonak dawntu a hung chuak ko lai. Lamkaltu Paul nih hitin a ti: “Khrih Jesuh he i pehtlai i Pathian nunning in nun a duhmi paoh cu hremnak an ing ko lai.” (2 Timote 3:12) Paul nih mah hneksaknak kha mei he a tahchunh. Mei kangh a fawimi thil kha mei nih vutcam si lak in a kangh khawh ko nain sui, ngun le lungvar man sung tu cu a kanghter kho lo. (1 Korin 3:10-13; 1 Piter 1:6, 7) Baibal na cawnpiakmi nih a ton khawhmi hneksaknak hna kha in khawh awk na bawmhnak ah mei nih a kangh khawh lomi thil in na sak a hau.
9 Salm caṭialtu pa nih Jehovah “biakamnak” cu “somei chungah voi sarih tiang erletmi ngun” he a tahchunh. (Salm 12:6) A taktak ah Baibal chung i a man a sungmi kong hna nih kan zumhnak kha a fehter khawh. (Salm 19:7-11; Phungthlukbia 2:1-6) Baibal Cawnpiakmi cauk nih Cathiang kha zeitindah hmual ngei tein hman khawh a si kha a langhter.
10. Baibal a cawngmi kha Baibal cang i lungthin pek awkah zeitindah na bawmh khawh?
10 Baibal a cawngmi kha a cawn liomi ṭhen chung i Baibal cang hna ah lungthin pekter. A biapimi Baibal cang hna kha a lung a fian nakhnga le a nunnak i a hman khawh nakhnga biahalnak hna tuah. Zeidah tuah awk a si ti kha chim lo awkah i ralring. Cu nakcha cun Jesuh kha i zohchunh. Phungbia cawnpiaktu saya pakhat nih Jesuh kha bia a hal tikah “Cathiang nih zeitindah an chim i an chimmi cu zeitindah a sullam naa lak ning a si?” tiah a ti. Mipa nih cun Cathiang in a leh i Jesuh nih mah kha amah he zeitindah aa pehtlaih kha a hmuhthiam nakhnga a rak bawmh. Bianabia pakhat hmang in zeitindah tuah awk a si kha a hmuh thiam nakhnga a rak bawmh. (Luka 10:25-37) Baibal Cawnpiakmi cauk i hngalh a fawimi tahchunhnak tampi nih Baibal phunglam hna in khan Baibal a cawngmi kha a nunnak i hman awkah na bawmh khawh.
11. Cawn tikah a konglam zeizat dah i ruah awk a si?
11 Jesuh nih hngalh a harmi kong hna kha hngalh a fawimi biafang in a chim bantukin Baibal Cawnpiakmi cauk nih a tliang i dairek in hmanmi biafang hna in Pathian Bia kha a fianter. (Matthai 7:28, 29) Jesuh kha i zohchunh in a konglam hna kha tliangte le fiangte le hmaan tein fianter. Rang tukin tuah hlah. Cawn hngami catlangbu zeizat ti khiah tikah a cawngmi i a sining kha ruat chih. Jesuh nih a zultu hna ri an ngeihmi kha ruahpiak chih in an in khawh leng tiang in thilrit a khinh hna lo.—Johan 16:12.
12. Thlaihhlei kha zeitindah hman awk a si?
12 Baibal Cawnpiakmi cauk i thlaihhlei ah a konglam 14 aa tel. Baibal a cawngmi i a herhmi kha ruat chih in hi kong hi zeitindah hmual ngei ngai in ka chimh khawh lai tiah biakhiah awk a si. Tahchunhnak ah, Baibal a cawngmi nih a hlan i a rak zumhmi ruangah a kong pakhatkhat kha hngalh awkah aa harh asiloah biahalnak a tuah a si ahcun mah kong he aa pehtlaimi thlaihhlei kha sawhpiak law amah theng kha ruahter. Cu ti a si lole mah kong kha nangmah he i ruah ceih ṭi zong a hau kho men. Thlaihhlei ah “Minung Nih Mit In Hmuh Khawh Lomi A Thi Kho Lomi Kan Ngei Maw?” le “ ‘A Liannganmi Babilon’ Zei A Si Ti Hngalhnak” timi a biapimi kong hna aa tel. Mah bantuk kong hna cu nan i ruah ceih ṭi a hau men lai. Thlaihhlei i a ummi kong i ruah ceih ṭi awk caah biahalnak hna a um lo, sullam a ngeimi biahalnak hna tuah khawh awkah a konglam kha ṭha tein hngalhthiam a hau lai.
13. Zumhnak fehter awkah thlacamnak hi zeitluk in dah a biapit?
13 “BAWIPA nih inn cu a sak lo ahcun a satu rianṭuannak cu santlailo a si” tiah Salm 127:1 nih a ti. Cucaah Baibal cawnpiaknak ca naa timh tikah Jehovah sinin bawmhnak hmuh awkah thlacam. Baibal cawnnak a thawk le a donghnak i na thlacamnak ah Jehovah he pehtlaihnak ṭha na ngeih kha langhter. Baibal a cawngmi kha Jehovah sinah A Bia hngalhthiamnak ca fimnak le cawnpiaknak hna zulh khawh awkah thazang ka pe tiah thlacam dingah tha pe. (Jeim 1:5) Cu ti a tuah ahcun hneksaknak hna kha a tei khawh lai i a zumhnak a fek lai.
Cawnpiaktu si Awkah Baibal A Cawngmi kha Bawm
14. Baibal a cawngmi nih zei tiang dah a ṭhancho a herh?
14 Jesuh nih a zultu pawl a “fialmi vialte hna” kha Baibal na cawnpiakmi nih a zulh a si ahcun Pathian Bia, mi a cawnpiaktu si ding tiang a ṭhancho a hau. (Matthai 28:19, 20; Lamkaltu 1:6-8) Cu ti thlarau lei ṭhancho awkah zeitindah na bawmh khawh?
15. Baibal na cawnpiakmi kha Khrihfa pumhnak hna i pumh awkah zeicah thapek ding a si?
15 Hmasa bik Baibal nan cawn ka in Khrihfabu pumhnak i pumh awkah sawm. Khrihfabu pumhnak hna i na rak hmuhmi cawnpiaknak ruangah Pathian Bia cawnpiaktu pakhat na sinak kong kha chim. Baibal nan cawn dih fate a caan tlawmpal in la law pumhnak hna le civui i hmuhmi thlarau lei cawnpiaknak program kong kha chim. Mah pumhnak hna i na hmuhmi ṭhathnemnak hna kha lungtho thatho tein chim. (Hebru 10:24, 25) Hmaan tein aa pumh tikah Pathian Bia, mi a cawnpiaktu pakhat a hung si kho lai.
16, 17. Baibal a cawngmi nih zei hmuitinh cheukhat dah aa tinh khawh?
16 Baibal a cawngmi kha a phanh khawhmi hmuitinh ngeih awkah bawm. Tahchunhnak ah, a cawnmi kong hna kha a hawikom asiloah a rualchan pakhat chimh awkah tha pe. Cun Baibal a uk ningin rel khawh ding tinhnak ngeih awkah forh. Baibal hmaan tein a rel lengmang nakhnga na bawmh a si ahcun mah kha a zia ah a cang lai i tipil a in dih hnu tiang ṭhat-hnemnak a pek lai. Cun Baibal Cawnpiakmi cauk i ṭhen khat cio ah a biapi bik biahalnak he aa pehtlaimi a tlawm bik Baibal cang pakhat kha i cinken awkah tinhnak ngeih dingin ruahnak cheu. Cu ti tuahnak thawngin “a rian a zahpi lomi, Pathian biatak hmaan tein mi a cawnpiaktu” a hung si lai.—2 Timote 2:15.
17 A zumhnak kong a halmi hna a leh tik hna ah Baibal cang kha chim in a sullam fianter lawng si loin aa tlakmi Baibal cang hna i a biapimi kha a tawinak in a fianter khawh nakhnga tha pe. A zumhnak kong a halmi a chungkhat asiloah a rianṭuan hawi pakhat in nangmah kha ruahter law a tawinak in fianternak zong hi a ṭhahnem kho. “Nemnak le hmaizahnak in” zeitindah chim awk a si zong cawnpiak.—1 Piter 3:16.
18. Baibal a cawngmi pakhat cu tipil a ing rih lomi thawngthanhtu sining a tlinh tikah zei ahdah bawmh khawh a si rih?
18 A caan a phanh tikah lohmun rian-ṭuannak caah phungchimtu sining a hun tlinh lai. Hi rian ah i tel khawh hi tinvo sung a si kha langhter khun. (2 Korin 4:1, 7) Tipil a ing rih lomi thawngthanhtu sining a tlinh tiah Khrihfa upa nih bia an khiah hnu ah phungchimnak ah chimning a fawimi te pakhat kha timhpiak law amah he phungchim ah kal ṭi u. Chimning a phunphun in phungchimnak ah amah he ṭuan ṭi u. Lennolh tuahnak caah zeitindah i timh a si le hmual ngei tein chimning kha cawnpiak. Nangmah zohchunh awk ṭha cu ṭhatnak tampi a chuak kho.—Luka 6:40.
“Nangmah Naa Khamh Hlei ah na Bia A Theimi kha na Khamh Khawh Hna”
19, 20. Zei hmuitinh dah kan ngeih awk a si i zeiruangah a si?
19 Mi pakhat kha ‘biatak hngal’ seh ti kan duh i kan bawmh tikah fakpi in i zuam a hau lai ti cu a fiang ko. (1 Timote 2:4) Asinain mi pakhatkhat kha Baibal cawnpiakmi cohlan awk kan bawmhnak i kan hmuhmi lunglawmhnak cu zei he hmanh tahchunh khawh a si lo. (1 Thesalon 2:19, 20) Hi vawlei pumpi phungchimnak rian ah “Pathian ca i hmunkhat ah rian a ṭuan ṭimi kan si” hi tinvo sung taktak a si!—1 Korin 3:9.
20 Jesuh Khrih le a vancungmi mi-ṭhawng hna thawngin Jehovah nih “Pathian a hngal lomi hna le Bawipa Jesuh kong Thawng Ṭha a ngai duh lomi hna” kha a rauh hlan ah dan a tat hna lai. (2 Thesalon 1:6-8) Thihnak le nunnak kong a si. Baibal Cawnpiakmi Taktak Cu Zeidah A Si? timi cauk in a tlawm bik Baibal cawnnak pakhat tuah awkah hmuitinh na ngei kho lai maw? Hi rian i naa tel bantukin “nangmah naa khamh hlei ah na bia a theimi kha na khamh khawh hna” lai. (1 Timote 4:16) Atu hi Baibal cawnpiakmi kha midang nih zulh awk bawmh ding i a biapi bik caan a si.
[A Tanglei Fianternak]
a Jehovah Hngaltu Hna nih an chuah.
Zeidah Na Hngalh?
• Baibal Cawnpiakmi cauk cu zei tinhnak he dah chuah a si?
• Baibal Cawnpiakmi cauk hmang in Baibal cawnnak zeitindah thawk khawh a si?
• Zei cawnpiak ning dah hmual a ngei bik?
• Cawnpiaktu si awkah Baibal a cawngmi kha zeitindah bawmh khawh a si?