Na ‘Cawnpiak Thiamnak’ Kha I Ralring
‘Phung kha chim hna, al hna, chimhring hna, [‘cawnpiak thiamnak in,’ Nw] le lungsau thinfual in cawnpiak hna.’—2 Tim. 4:2.
1. Jesuh nih a zultu pawl kha zei rian dah a pek hna, zei zohchunh awk dah a chiah tak?
Jesuh cu vawlei cung i Pathian rian a ṭuan lioah khuaruahharnak in mizaw a damter ko hna nain khuaruahharnak tuahtu si loin cawnpiaktu saya in mi tam nih an hngalh. (Mar. 12:19; 13:1) A biapi bik a rian cu Pathian Pennak thawng ṭha bia chim a si i tuchan a zultu hna zong cu bantuk cun a si ve. A kan fialmi vialte mi nih an zulh nakhnga cawnpiak in zultu siternak rian kha ṭuan peng awkah Khrihfa hna nih ṭuanvo kan ngei.—Matt. 28:19, 20.
2. Phungchimnak rian lim awkah zeidah kan tuah a herh?
2 Zultu siternak rian lim awkah cawnpiak thiamnak kha ṭhanchoter zungzal ding kan i zuam lai. Lamkaltu Paul nih a rian ṭuanṭi hawi Timote sin ca a ṭial tikah cawnpiak thiamnak a biapit kha a langhter khun. Hitin a ṭial: “Nangmah kha ṭha tein i ralring law na cawnpiaknak zong kha i ralring fawn. Cun nangmah naa khamh hlei ah na bia a theimi kha na khamh khawh hna nakhnga hi thil hi ngol lo in tuah lengmang ko hna.” (1 Tim. 4:16) Paul a chim duhmi cawnpiaknak cu hngalhmi chim menmen lawng a si lo. Hmual ngeimi Khrihfa phungchimtu nih mi lungthin a tongh i an nunning thlen awkah a forh. Cucu thiamnak pakhat a si. Cucaah Pathian Pennak thawng ṭha bia midang chimh tikah zeitindah ‘cawnpiak thiamnak’ kha kan ṭhanchoter khawh?—2 Tim. 4:2, Nw.
‘Cawnpiak Thiamnak’ kha Ṭhanchoternak
3, 4. (a) Zeitindah ‘cawnpiak thiamnak’ kha kan ṭhanchoter khawh? (b) Theocratic Rianṭuannak Sianginn nih hmual ngeimi cawnpiaktu si awkah zeitindah a kan bawmh?
3 Dictionary pakhat nih ‘thiamnak’ kha “hlathlainak, tuahnak asiloah zohnak in hmuhmi thiamnak” tiah a leh. Thawng ṭha bia kha hmual ngei in cawnpiak khawh awkah mah pathum kha lungthin pek a herh. A kong pakhat kha thlacam in kan hlathlai lawng ah hmaan tein kan hngalhthiam khawh lai. (Salm 119:27, 34 rel.) Hmual ngeimi phung-chimtu hna cawnpiaknak kha zohnak in an phungchim ning kha kan i cawn khawh. Cun kan cawnmi kha tuah awkah hmaan tein i zuamnak nih kan thiamnak kha a ṭhanchoter lai.—Luka 6:40; 1 Tim. 4:13-15.
4 Jehovah cu Cawnpiaktu Ngan bik a si. Phungchimnak rian zeitindah lim khawh a si kha a salle nih an hngalh nakhnga mit hmuhmi a bupi hmang in a cawnpiak hna. (Isa. 30:20, 21) Cucaah Khrihfabu dihlak nih Theocratic Rianṭuannak Sianginn kha zarh fete in an tuah i aa pummi dihlak kha hmual ngeimi Pathian Pennak kong thanhtu si awkah a bawmh hna. Mah singinn ah a bik in cawnmi cauk cu Baibal a si. Jehovah Bia nih zeidah cawnpiak ding kha a kan chimh. Cun zei cawnpiak ningcang dah hmual a ngei bik le aa tlak bik a si zong a langhter. Pathian Bia hrambunh in kan cawnpiak hna, biahalnak hmual ngei in kan hman, hngalh fawi tein kan cawnpiak hna le midang kha biatak tein kan siaherh hna ahcun cawnpiak a thiammi kan si kho ti kha Theocratic Rianṭuannak Sianginn nih a kan theihter zungzal. Mah pakhat cio kong kha zoh u sih. Cu hnu ah Baibal a cawngmi lung lut lak in zeitindah cawnpiak khawh a si kha kan i ruah lai.
Pathian Bia Hrambunh In Cawnpiak hna
5. Zei hrambunh in dah kan cawnpiak hna awk a si, zeiruang ah?
5 A liannganmi saya Jesuh nih Baibal hrambunh in a cawnpiak hna. (Matt. 21:13; Johan 6:45; 8:17) Amah dunnak in a cawnpiak hna lo i a Thlahtu min in a cawnpiak hna. (Johan 7:16-18) Cucu kan zulhmi zohchunh awk a si. Cucaah innkhat hnu innkhat ah siseh, Baibal cawnpiaknak ah siseh Pathian Bia in kan cawnpiak hna awk a si. (2 Tim. 3:16, 17) Kan khuaruahnak cu zeitlukhmanh in hmual ngei hmanh sehlaw Cathiang hmual ngeihnak le ṭhawnnak cu kan tluk kho lai lo. Baibal cu a ṭhawng. Baibal a cawngmi nih a hngalhthiam nakhnga zeitluk in kan i zuam hmanh ah a ṭha bikmi cu Baibal chimmi relter kha a si.—Hebru 4:12 rel.
6. I ruah liomi kong kha Baibal a cawngmi nih a lung a fian nakhnga cawnpiaktu nih zeidah a tuah khawh?
6 Cucu Khrihfa cawnpiaktu nih Baibal cawnpiaknak caah i timh a hau lo tinak a si lo. Khrihfa cawnpiaktu nih Baibal cawnpiaknak tuah lio ah zei Baibal cang dah amah asiloah a cawngmi nih a rel lai kha ṭha tein a thimcia awk a si. A tam deuh cu kan zumhnak a dirpimi Baibal cang hna rel hi aa tlak. A relmi Baibal cang a sullam kha a lungfian awkah bawmh zong a herh.—1 Kor. 14:8, 9.
Biahalnak kha Hmual Ngei in Hmang
7. Biahalnak hman hi zeicah hmual ngeimi cawnpiak ning pakhat a si?
7 Biahalnak kha hmual ngei in hmannak nih a khuaruahnak kha hliphlauter in a lungthin a tongh khawh. Cucaah Baibal cang kha nangmah nih fianter loin amah kha fianter. A caancaan ahcun a lungfian nakhnga biahalnak tuah chap asiloah biahalnak tuah thluahmah zong a herh men ko lai. Cu ti cawnpiak ahcun a kong pakhat i a hrampi kha a hngalhthiam lengah amah theng nih a zumh nakhnga na bawmh a si.—Matt. 17:24-26; Luka 10:36, 37
8. Baibal a cawngmi lungthin ah a ummi kha zeitindah kan hngalh khawh?
8 Kan cauk pawl ah hmanmi hlathlai ningcang pakhat cu biahal le phitnak in a si. Baibal na cawnpiakmi a tam deuh nih cauk chung i biahalnak a phi kha catlangbu chung i a ummi in a phi an pek khawh colh lai cu a fiang ko. Asinain an lung lut lakin cawnpiak a duhtu nih cun a phi hmaan an pekmi lawng ah khan a lungsi awk a si lo. Tahchunhnak ah, nu le pa sualnak kong Baibal chimmi kha fiang tein a chim khawh lai. (1 Kor. 6:18) Asinain hmuhning biahalnak kha fim ngai in halnak nih a cawnmi kong zeitindah a ruah kha hngalh khawh a si. Cucaah cawnpiaktu nih hitin hal khawh a si: “Innchung hawi a si lomi he nupa sualnak tuah kha Baibal nih zeicah a duh lo? Pathian nih cu ti a thlauh cu zeitindah na ruah? Pathian pekmi ziaza phunglam ningin kan nun caah ṭhathnemnak kan hmu lai tiah na ruat maw?” A phi a pekmi in a lungchung ah a ummi kha a lang kho.—Matthai 16:13-17 rel.
Hngalh Fawi tein Chim
9. Baibal konglam fianter tikah zeidah i cinken awk a si?
9 Baibal chung i a ummi biatak tam deuh cu hngalh fawi ngaimi an si. Asinain Baibal a cawngmi hna cu a hmaan lomi biaknak cawnpiakmi ruangah an lung aa tuai men lai. Cawnpiaktu hna kan rian cu Baibal kha fawi tein an hngalhthiam khawh nakhnga fianter kha a si. Hmual ngeimi cawnpiaktu hna nih a konglam kha hngalh fawimi, a fiangmi le a hmaanmi in an cawnpiak hna. Cu ti kan tuah ahcun biatak kha a herh loin hngalh a harmi kan siter lai lo. A herh lomi a neknok tete kong kha chim hlah. Kan relmi Baibal cang khat kha a phuhphun in fianter a hau lo. I ruah liomi kong a biapimi a langh nakhnga a herhmi lawng fianter. Baibal a hngalhnak a ṭhancho tlukin a thukmi Baibal biatak kha duhsah tein a hngalhthiam lai.—Heb. 5:13, 14.
10. Cawnpiaknak voikhat ah zeizat dah cawn ding kha zei zoh in dah khiah awk a si?
10 Cawnpiaknak voikhat ah zeizat dah cawn awk a si? Biakhiahnak tuah tikah thleidan thiam a hau. A cawngmi le cawnpiaktu cu an thil ti khawhnak le an sining cu aa dang ko lai. Asinain cawnpiaktu hna nih kan i tinhmi cu a fekmi zumhnak ngeih awk bawmh a si kha kan i cinken zungzal awk a si. Cucaah Pa-thian Bia biatak kha a rel, a hngalhthiam i a cohlan nakhnga a caan a za in kan pek. A hngalhthiam khawh ti lo tiangin cawnpiak hlah. Caankhatte ah cawnnak kha hmaan tein tuah peng in a biapimi kong an lungfian hnu ah a dang kong kha kan cawnpiak hna.—Kol. 2:6, 7.
11. Cawnpiaknak he aa tlai in lamkaltu Paul sin in zeidah kan i cawn khawh?
11 Lamkaltu Paul nih mithar pawl phung a chimh tik hna ah thawngṭha kha hngalh fawi tein a chimh hna. Amah cu cathiam pakhat a si ko nain bia thukthuk kha a hmang lo. (1 Korin 2:1, 2 rel.) Baibal biatak hngalh a fawimi nih lungthin ṭha a ngeimi kha a hnuh hna i lungsinak a ngeihter hna. Cucu hngalhthiam khawh awkah catang sang ngeih a hau lo.—Matt. 11:25; Lam. 4:13; 1 Kor. 1:26, 27.
A Cawnmi kha Mansung Ah A Chiah Nakhnga Bawm
12, 13. Baibal a cawngmi kha a cawnmi ningin tuah awkah zeinihdah a forh khawh? Tahchunhnak in chim.
12 Kan cawnpiaknak kha hmual ngeihter kan duh ah cun a cawngmi lung tonghter a herh. A konglam kha amah he zeitindah aa pehtlaih, zei ṭhathnemnak dah a ngeih, Baibal lamhruainak a zulh ahcun a nunnak zeitindah a ṭhancho lai kha a hngalhthiam a hau.—Isa. 48:17, 18.
13 Tahchunhnak ah, Baibal thapeknak hmuh awk le dawtnak in i hawikomh awkah zumtu hawi pawl he hmunkhat ah pumh ṭi awk tha a pemi Hebru 10:24, 25 kha kan i ruah men lai. Aa pum bal rih lomi a si ahcun zeitindah pumhnak tuah a si le zei kong dah i ruah a si kha a tawinak in na chimh khawh. Pumhnak hi Pathian biaknak ah aa telmi a si le ṭhathnemnak kan hmuh kha chimh khawh a si. Cun pumh kan sawm khawh. Baibal chimmi a zulh cu a cawnpiaktu lungnuamhter awkah si loin Jehovah nawl ngaih duhnak forhfialnak ruangah a si awk a si.—Gal. 6:4, 5.
14, 15. (a) Baibal a cawngmi nih Jehovah he aa tlai in zeidah a cawn khawh? (b) Baibal a cawngmi nih Pathian sining hngalhnak in zei ṭhatnak dah a hmuh khawh?
14 Baibal cawnnak le phunglam hna an zulhnak in an hmuhmi ṭhathnemnak ngan bik cu Jehovah kha a um taktakmi pakhat in hngalh le dawt kha a si. (Isa. 42:8) Jehovah cu dawtnak a ngeimi Pa, Sertu le universe nawlngeitu a si lengah a daw i a biami hna kha a sining le a ziaza a hngalhtertu zong a si. (Exodus 34:6, 7 rel.) Israel mi Izipt saltannak in chuah awk Moses nih a hruai hna lio ah ‘ka siter laimi kha ka siter lai’ tiah Jehovah nih a sining kha a rak chim. (Ex. 3:13-15, Nw) Mah nih Jehovah cu a thimmi miphun he aa tlai in aa timhmi tlinter awkah a herhmi ningin a si khawh kha a chim duhmi a si. Cucaah Israel mi nih Jehovah kha Khamhtu, Ralbawi, Bawmtu, a biakam a Tlintertu le lam phunphun in a kan bawmtu ti in an hngalh.—Ex. 15:2, 3; 16:2-5; Josh. 23:14.
15 Baibal a cawngmi hna nih khuaruahharnak in Jehovah bawmhnak kha Moses bantuk-in an hmu men lai lo. Zei ti a si hmanh ah an zumhnak a ṭhancho, an cawnmi mansung ah an chiah i an nunnak ah an hman tluk in ralṭhatnak, fimnak le lamhruainak caah Jehovah bochan a herh kha an hngalh lai. Cu ti an tuah tikah Jehovah kha a fimmi le bochan awk tlak Ruahnak cheutu, Hupphengtu le an herhmi paoh siang ngai in a Petu a si kha an hngalh lai.—Salm 55:22; 63:7; Ptb. 3:5, 6.
Dawtnak In Siaherhnak Langhter
16. Hmual ngeimi cawnpiaktu sinak ah nu hrinnak in ngeihmi thiamnak hi zeicah biapi bik a si lo?
16 Cawnpiak ka thiam lo tiah na ruah ahcun na lungdong hlah. Jehovah le Jesuh cu nihin vawlei cung pumpi ṭuanmi Baibal fimchimnak rian ah hruaitu an si. (Lam. 1:7, 8; Biat. 14:6) Kan bia cu thinlung ṭha a ngeimi pa-khat caah ṭhathemnak a ngeih nakhnga an kan bawmh khawh. (Johan 6:44) Baibal a cawngmi lungtak in dawtnak nih cawnpiaktu i nu hrinnak in ngeihmi thiamnak a baumi kha a rulh khawh. Lamkaltu Paul nih a cawnpiakmi hna dawt a biapit a hngalhthiam kha a rak langhter.—1 Thesalon 2:7, 8 rel.
17. Baibal a cawngmi pakhat cio kan siaherh taktak hna kha zeitindah kan langhter khawh?
17 Cu bantukin Baibal a cawngmi pakhat cio he ṭha tein i theihhngalh awkah a caan peknak thawngin kan siaherh taktak hna kha kan langhter khawh. Baibal phunglam i ruah tikah a sining kha ṭha tein kan hngalh ko lai. Baibal a hngalhmi cheukhat kha a nunnak ah a hman cang kha kan hmuh men ko lai. A cheukhat ah cun thlen a herhnak a um rih men lai. Cucaah Baibal cawn liomi a kong kha amah he zeitindah pehtlaihnak a ngeih kha hngalh awkah bawm. Cuticun Khrih zultu taktak si awkah dawtnak in kan bawmh khawh.
18. Zeicah Baibal a cawng liomi he thlacam ṭi le a ca thlacampiak hi a biapit?
18 A biapi bik cu thlacam ṭi le amah ca thlacampiak a si. Sertu he i hawikomh deuh awk, naih deuh awk le a lamhruainak in ṭhathnemnak hmuh awkah kan bawmh a si kha ṭha tein a hngalhthiam awk a si. (Salm 25:4, 5 rel.) A cawnmi tuah awk aa zuamnak cungah Jehovah nih thluachuah a pek nakhnga thla kan campiak tikah ‘a bia a tuahtu’ si a biapitnak kha a hmuh khawh lai. (Jeim 1:22) Cun lungtak tein thla kan cammi a theih tikah zeitindah thlacam awk a si zong a hngalh lai. Baibal a cawngmi hna kha Jehovah he pehtlaihnak ṭha ngeih awk bawmh hi lunglawmh awk a va si dah!
19. A hnu capar ah zei kong dah kan i ruah lai?
19 Vawlei cung pumpi ah Hngaltu nuai ruk le a cheu leng nih Jesuh nawl pekmi vialte kha thinlung ṭha a ngeimi hna nih an zulh nak-hnga kan bawmh hna lai ti tinhnak he ‘cawnpiak thiamnak’ an ṭhanchotermi hi thathawh awk ngai a si. Phungchimnak ah zei a phichuak dah an hmuh? A phi cu a hnu capar ah kan i ruah lai.
Naa Cinken Maw?
• Khrihfa hna nih ‘cawnpiak thiamnak’ ṭhanchoter kha zeicah an herh?
• Zei cawnpiak ningcang nih dah cawnpiak-nak kha hmual a ngeihter deuh khawh?
• Cawnpiaknak ah nu hrinnak in ngeihmi thiamnak a baumi kha zeinihdah a rulh khawh?
[Cahmai 9nak i hmanthlak]
Theocratic Rianṭuannak Siang-inn ah min na pe cang maw?
[Cahmai 10nak i hmanthlak]
Baibal cang kha Baibal a cawngmi relter cu zeicah a biapit?
[Cahmai 12nak i hmanthlak]
Baibal a cawngmi he thlacamṭi in a caah thlacampiak