Pathian Pennak Thawngin Khamhnak A Nai!
“Na Pennak cu rung tlung ko seh, vancung khua ah na duhnak an tuah bangin vawlei cungah hin tuah si ve ko seh.”—Matt. 6:10.
1. Jesuh cawnpiaknak a biapi bik cu zeidah a si?
Jesuh Khrih Tlang Cung Cawnpiaknak ah biapi bik in a cawnpiakmi hna a tawinak in a langmi zohchunh awk thlacamnak pakhat aa tel. A zultu pawl kha Pathian sinah hitin thlacam awkah a cawnpiak hna: “Na Pennak cu rung tlung ko seh, vancung khua ah na duhnak an tuah bangin vawlei cungah hin tuah si ve ko seh.” (Matt. 6:9-13) Jesuh cu “khuapi he khuate he a tlawng duahmah hna i Pathian Pennak kong thawngṭha kha a chimh hna.” (Luka 8:1) Khrih nih a zultu kha “Pa-thian Pennak le zeidah tuah hna seh ti a kan duh timi kha biapi deuh in ruat u” tiah a forh hna. (Matt. 6:33) Hi capar cawn tikah na phungchim rian ah hman khawhnak lam kha kawl. Tahchunhnak ah, hi biahalnak zeitindah na leh lai kha ruat: Pennak thawngṭha cu zeitluk in dah a biapit? Minung cu zei in dah khamh a herh? Pathian Pennak nih khamh-nak kha zeitindah a tuah lai?
2. Pennak thawngṭha cu zeitluk in dah a biapit?
2 Jesuh nih hitin a chimchung: “Miphun vialte hna ca i tehte si awkah vancung Pennak kong thawng ṭha hi khuazakip ah chim a si lai — cun cu hnu lawngah cun donghnak cu a si lai!” (Matt. 24:14) Pathian Pennak kong thawng ṭha bia hi a biapi bik a si. Zeicahtiah vawlei cungah a biapi bik thawngpang a si caah a si! Vawlei cung pumpi ah Jehovah Hngaltu Khrihfabu 100,000 leng ah nuai sarih tluk a simi Pathian salle cu Pennak dirh a si cangmi kong chimnak a kau ngaimi rian ah an i tel. Pathian Pennak dirh a si cang timi thawng ṭha a si. A sullam cu Pathian nih vawlei kongkau tling tein a uk khomi cozah kha vancung ah a dirh cang tinak a si. Pennak uknak tangah Jehovah nih vancung bantukin vawlei ah a duhnak a tlinter lai.
3, 4. Vawlei ah Pathian duhnak a tlin tikah zeidah a cang lai?
3 Vawlei ah Pathian duhnak a tlin tikah minung caah zeidah a tuah lai? Jehovah nih “an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo.” (Biat. 21:4) Minung cu sualnak le tlinlonak ro comi ruangah an zaw asiloah an thi ti lai lo. Pathian nih a lungchung ah aa cinkenmi a thimi hna cu zungzal nunnak an hmu lai tiah Baibal nih hitin bia a kan kamh: ‘Minung hi miṭha he miṭhalo he thihnak in an tho ṭhan dih lai.’ (Lam. 24:15) Vawlei ah raldohnak, zawtnak, mangṭam a um ti lai lo, paradis ah aa thleng cang lai. Atu ah ṭih a nungmi saram pawl hmanh kha saram lak ah siseh, minung lak ah siseh ṭihnung an si ti lai lo.—Salm 46:9; 72:16; Isa. 11:6-9; 33:24; Luka 23:43.
4 Pennak uknak ah hmuh hngami a ṭha bik thluachuah lengah cu tikah hmuh laimi nunnak, hnangamnak bia kha Baibal nih hitin a chimchung cu khuaruahhar awk a si lo: “Mi toi ah aa dormi cu ram chungah hin him tein an um lai i daihnak kha tlamtling tein an hmuh lai.” Asinain buainak a chuahtertu hna tah zeitin? Baibal nih hitin a chimchung: “Luklak ah miṭhalo cu an lo ko lai.” Asinain ‘Jehovah aa bochanmi cu him tein ram chungah hin an um ko lai.’—Salm 37:9-11.
5. Atu a ummi vawlei cu zei ah dah a can lai?
5 Hi thil vialte hung um awkah, atu vawlei le a dotu cozah, biaknak le sipuazi vialte cu hrawh an si lai. Cucu vancung cozah nih tling tein a tuah lai. Profet Daniel nih thawchuah hnawhmi in hitin a chimchung: “Cu siangpahrang [atu uktu] hna chan ah cun vancung Pathian nih [vancung ah] pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi [atu a ummi] pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.” (Dan. 2:44) Cu hnu ah Pathian Pennak—vancung cozah thar nih vawlei mibu thar kha a uk hna lai. “Van thar le vawlei thar, dinnak a umnak hmun” kha a si lai.—2 Pit. 3:13.
Atu ah Khamhnak A Herh Khun
6. Hi vawlei ṭhatlonak kong kha Baibal nih zeitindah a chim?
6 Satan, Adam le Evi nih zeidah a hmaan, zeidah a palh kha anmah tein biakhiah an duh i Pathian an ralchan ni in minung chungkhar ah rawhralnak an chuahter. Cun kum 1,600 leng a rauh hnu, Buanchukcho a tlun hlan ah ‘minung cu khuazakip ah an ṭhatlo tuk hringhran le an lungchung cu ruahnak ṭhalo lawnglawng in a khat.’ (Gen. 6:5) Mah hnu kum 1,300 hrawng a rauh hnuah ṭhatlonak a tam chin kha Solomon nih a hmuh i hitin a ṭial: “A thi i a lomi kha ka hngar deuh hna; a nung rihmi nakin an caah a ṭha deuh. Sihmanhsehlaw cu hna pahnih nakin a ṭha deuh chinchinmi cu a nun in a nung bal lomi kha an si, hi vawlei cung i a um lengmangmi dinlonak a hmuh in a hmu bal lomi kha an si.” (Pct. 4:2, 3) Mah hnu in kum 3,000 tluk a rau cangmi kan chan ah ṭhatlonak cu tam chinchin in a karh.
7. Zeicah Pathian khamhnak kha atu ah a herh khun?
7 Ṭhatlonak a umnak caan hi a sau cang nain a hlan nakin atu ah Pathian Pennak thawng in khamhnak kan herh khun. A luan cia kum 100 lio thil umtuning cu mah hlan thil umtuning nakin a chia deuh i a ṭha lo thluahmah. Tahchunhnak ah, Vawlei sining Zohtu Bu nih hitin a chim: “Kum zabu [20] chung ah raltuk ruangah a thimi cu Ad kum zabu pakhat in 1899 chung ah a thimi dihlak nakin a let thum an tam deuh.” 1914 in raltuknak ruang ah minung nuai 100 leng an thi. Encyclopedia pakhat tuakmi ah Ralpi Ii ah a thimi hi nuai 60 leng an si men lai. Ram cheukhat nih atu ah nuclear hriamnam an ser i minung nih vawlei mi tampi a that khomi an ngei cang. Science le sii lei fimthiamnak a ṭhangcho nain kum fate mangṭam le zawtnak nih ngakchia nuai nga tluk an nunnak a lak rih ko.—Baibal Cawnpiakmi Taktak Cu Zeidah A Si? cauk ṭhen 9 zoh.
8. Kum thong tampi chung a ummi minung uknak nih zeidah fiang tein a langhter?
8 Ṭhatlonak um lo awkah minung nih fakpi in an i zuam. Hi vawlei uknak, sipuazi le biaknak nih minung herhmi daihnak, hlawhtlinnak le ngandamnak caah voikhat hmanh tling tein an tuah kho bal lo. Atu minung nih harnak nganpi kan tonmi hi an tei khawh lo leng ah an zualter chin. Kum thong tampi chung a ummi minung uknak nih hi bia a hmaan hi fiang tein a langhter: “Minung nih a zulhmi a lam hi amah nih aa thimmi an si lo i a nun chung i a kalnak lam zong hi amah nih aa ser khawhmi an si lo.” (Jer. 10:23) A si, ‘minung nih minung cu harnak pek in a uk.’ (Pct. 8:9, Nw) Cun “sermi thil vialte cu nau nganfah bantukin an hrum an ai.”—Rom 8:22.
9. ‘Ni hmanung bik caan’ ah zei thil sining hmuh ding dah Khrihfa nih an i ruahchan?
9 Kan chan he aa tlai in Baibal nih hitin a chimchung: “Ni hmanung bik kha an phak tikah harnak caan a si lai.” Minung uknak tang, ni hmanung bik minung umtuning kong a chim dih hnuah hitin a chim ṭhan: “Miṭha lo le chungthu lengnal pawl cu a ṭha lo chin lengmang khan an um lai.” (2 Timote 3:1-5, 13 rel) Khrihfa nih mah kha zeicah an i ruahchan ti ahcun “vawlei hi a pumpi in Mi-ṭhalopa kut tangah a um” caah a si. (1 Johan 5:19) Asinain thawngṭha a simi cu a rauh hlan ah Pathian nih amah a dawmi cu a khamh hna lai. Annih cu ṭhatlonak khulrang in a karh thluahmahmi hi vawlei in khamh an si lai.
Khamhnak ah Bochan awk Tlakmi Hrampi Pakhat
10. Khamhnak caah Jehovah cu zeicah bochan awk tlakmi hrampi a si?
10 Thawngṭha bia na chim lio ah khamhnak caah bochan awk tlakmi hrampi pakhat lawng a simi Jehovah kha langhter. Amah lawnglawng a ṭha lomi thil umtuning zeibantuk chung hmanh in a salle khamh awkah ṭhawnnak a ngei i khamh zong a duh. (Lam. 4:24, 31; Biat. 4:11) Jehovah nih a miphun kha a khamh zungzal hna i aa tinhmi a tlinter zungzal lai kha kan zumh khawh. Zeicahtiah “siseh tiah ka khanmi cu a si ko lai” tiah chiatser in bia aa kam. A bia cu ‘a lawngin a sin ah a kir ṭhan lai lo.’—Isaiah 14:24, 25; 55:10, 11 rel.
11, 12. Pathian nih a salle kha zei bia dah a kamh hna?
11 Jehovah nih miṭhalo a hrawh hna tikah a salle kha kan khamh hna lai tiah bia a kamh hna. Profet Jeremiah kha sualnak nganpi a tuahmi hna ralrin pek awk Pathian nih a thlah tikah hitin a ti: “Ahohmanh ṭih hna hlah. Zeicahtiah na sinah ka um i kan huhphenh lai.” (Jer. 1:8) Cu bantukin Jehovah nih a sualmi Sodom le Gomorrah a hrawh lai ah cuka hmun in him tein Lot le a chungkhar chuah awkah vancungmi pa-hnih a thlah hna. ‘Jehovah nih Sodom le Gomorrah cungah cun kat mei kha a surter.’—Gen. 19:15, 24, 25.
12 Vawlei cung pumpi a si hmanh ah Jehovah nih amah duhnak a tuahmi cu a khamh khawh hna. Hlan lio vawlei ṭhalo Buanchukcho in a hrawh tikah “a nungmi cu, dinnak kong a chimtu Noah le mi dang pasarih lawng kha an si.” (2 Pit. 2:5) Jehovah nih hi vawlei a hrawh tikah miding cu a khamh ṭhan hna lai. Cucaah A Bia ah hitin a chim: ‘Ram chungah toidor tein a phung kha a zul i khua a sami vialte hna, Jehovah cu kawl tuah u; Dinnak cu kawl u, toidornak lungthin cu kawl u; Jehovah thinhun ni ah cun dornak nan hmu kho lai lo dahkaw.’ (Zef. 2:3) ‘Miding mi hna cu hi ram chungah hin khua an sa kho lai i miṭhalo hna cu ram chung khan hlonh an si lai.’—Ptb. 2:21, 22.
13. Jehovah salle a thimi hna cu zeitindah khamh an si lai?
13 Asinain Pathian salle tampi cu zawtnak, hremnak le a dang thil ruangah an thi. (Matt. 24:9) Cu a si ah annih cu zeitindah a khamh hna lai? A hmasa i kan hngalh bantukin ‘miṭha cu. . . thihnak in an tho ṭhan lai.’ (Lam. 24:15) Jehovah cu a salle khamh awkah zeihmanh nih a kham kho lo ti hngalh cu zeitluk hnangamnak dah a si!
A Dingmi Cozah
14. Pathian Pennak cu a dingmi cozah a si zeicah kan zumh khawh?
14 Na phungchimnak ah Jehovah vancung Pennak a dingmi cozah kong na fianter khawh. Mah nih dinnak le dawtnak ti bantuk Pathian sining ṭha kha a langhter lai caah a si. (Deut. 32:4; 1 Johan 4:8) Pathian nih vawlei uk awkah sining a tlinh bikmi Jesuh Khrih kha Pennak a pek. Jehovah nih chiti thuhmi Khrihfa 144,000 kha vawlei in a thim hna i vancung nunnak ah a thawhter hna. Khrih he uktu ṭuan ding le vawlei he aa tlaimi kong vialte tonghtham ding zong in a timh hna.—Biat. 14:1-5.
15. Pathian Pennak uknak le minung uknak an i dannak langhter?
15 Jesuh le 144,000 uknak cu a tlinglomi minung uknak he aa thleidang tuk lai! Hi vawlei uktu hna cu an puarhrang, an kut tangmi hna kha nuai tampi nunnak a hlomi raltuknak ah an kalter hna. “Nanmah an khamh kho ṭung hna lomi” minung i bochan hna hlah u timi Baibal ruahnak ceuhmi cu khuaruahhar awk a si lo. (Salm 146:3) Asinain Khrih nih cun dawtnak in a uk lai! Jesuh nih “re a theimi le thil a ritmi vialte hna, ka sinah ra tuah u, dinhnak kha kan pek hna lai. Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai. Ka seihnam cu a bei a nuam i ka thil cu a zaang,” tiah a ti.—Matt. 11:28-30.
A Rauhhlan ah Caan A Dong Lai!
16. Ni hmanung bik caan cu zeitindah a dongh lai?
16 1914 kum in hi vawlei cu ni hmanung bik caan asiloah “atu chan donghnak ding” caan ah a phan cang. (Matt. 24:3) A rauhhlan ah Jesuh nih ‘harnak nganpi’ tiah a timi kha a ra cang lai. (Matthai 24:21 rel.) Tahchunh awk a ṭha lomi harnak Satan vawlei dihlak cu a ningpi in a dong cang lai. Asinain harnak nganpi cu zeitindah aa thawk lai? Cun zeitindah a dongh lai?
17. Harnak nganpi aa thawk kongah Baibal nih zeitindah a langhter?
17 Harnak nganpi cu ruah lopi in a tlung lai? Asi, ‘Jehovah Ni’ cu “mi nih, ‘zeizong vialte a dai dih ko i a him dih ko,’ an ti lio te ah” ruah lopi in a tlung lai. (1 Thesalon 5:2, 3 rel.) Ram tampi nih a nganmi buaibainak cheukhat kan tei khawh dih deng cang ti an ruah lio ah chimchungmi harnak cu aa thawk lai. Vawlei uktu hna nih a hmaan lomi biaknak “a Lian-nganmi Babilon” kha ruah lopi in a hrawh lai i vawlei mi cu an khuaruah a har lai. Siangpahrang le midang cu a Liannganmi Babilon cung i a tlungmi biaceihnak kha an khuaruah a har lai.—Biat. 17:1-6, 18; 18:9, 10, 15, 16, 19.
18. Jehovah nih a miphun Satan nih a doh hna kha zeitindah a leh lai?
18 A biapimi mah caan ah, “ni le thlapa le arfi ah khin hmelchunhnak an lang lai” i “Mi Fapa hmelchunhnak kha van ah a lang lai.” Khi tikah “dir u law cunglei kha zoh tuah u, zeicahtiah nan luatnak cu a nai cang” timi kha kan tuah khawh lai. (Luka 21:25-28; Matt. 24:29, 30) Satan asiloah Gog nih Pathian mi kha doh awkah a mer hnawh hna lai. Asinain Jehovah nih zumh awk tlak a salle kha Satan dohnak kong ah hitin a ti hna, ‘nanmah an tawngtu hna cu ka mit falai a tawngmi an si.’ (Zek. 2:8, Nw) Cucaah Satan nih hrawh aa zuamnak cu thlam a tling lai lo. Zeicah? Lianngan Bik Bawipa Jehovah nih a salle khamhnak caah khulrang in a tuah lai.—Ezek. 38:9, 18.
19. Pathian nawlpekmi ralkapbu nih Satan vawlei an hrawh lai kha zeicah kan zumh khawh?
19 Miphun hna kha Pathian nih dan a tat hna tikah ‘Jehovah a si kha an hngalh lai.’ (Ezek. 36:23) Satan vawlei a tang rihmi hrawh awkah Pathian nawlpekmi ralkapbu—Khrih Jesuh lamhruainak tang i rel cawk lomi vancungmi cu a thlah hna lai. (Biat. 19:11-19) Vancungmi pakhat lawng nih zan khat te ah Pathian ral “sang riat le thong nga a va thah hna” kha kan hngalh ṭhan ahcun Armageddon i harnak ngapi a sannak bik a phanh tikah vancung ralkapbu nih Satan vawlei a tangmi vialte kha fawi tein an hrawh khawh lai ti kan zumh khawh. (2 Si. 19:35; Biat. 16:14, 16) Satan le a khuachia cu dong hngal lo khor thukpi ah kum thongkhat chung hren an si lai. A donghnak ah hrawh an si lai.—Biat. 20:1-3.
20. Pennak thawngin Jehovah nih zeidah a tlin-ter lai?
20 Vawlei ah ṭhatlonak vialte thianh a si lai i miding cu vawlei ah zungzal in an nung lai. Jehovah nih Lianngan bik Khamhtu a si a langhter lai. (Salm 145:20) Pennak nih Jehovah nawlngeihnak kha a fianter lai i a min thiang a thianter lai, vawlei caah aa tinhmi a tlinter lai. Phungchimnak ah ṭhawngṭha bia na chim i “zungzal nunnak hmu dingah thim a simi hna” kha a phan cang laimi Pathian Pennak thawngin khamh an si lainak kong hngalh awk na bawmh hna lio ah lunglawmhnak nganpi hmu ko!—Lam. 13:48.
Naa Cinken Maw?
• Jesuh nih Pennak a biapitnak kha zeitindah a langhter khun?
• Atu ah a hlan nakin zeicah khamh kan herh khun?
• Harnak nganpi ah zeidah kan i ruahchan khawh?
• Jehovah nih Lianngan bik Khamhtu a si zeitindah a langhter?
[Cahmai 12nak i hmanthlak]
Kan chan ah a ngan ngaimi phungchimnak rian a um lai tiah Pathian Bia nih a chimchung
[Cahmai 15nak i hmanthlak]
Jehovah nih Noah le a chungkhar a khamh hna bantukin a kan khamh khawh
[Cahmai 16nak i hmanthlak]
Jehovah nih “an mitthli vialte kha a hnawh dih hna lai. Thihnak a um ti lai lo”—Biat. 21:4