Jehovah Ta Si Cu A Velngeihnak Ruang Ah A Si

“[Jehovah] ta kan si.”—ROM 14:8.

1, 2. (a) Zei tinvo sung dah kan ngeih? (b) Zei biahalnak dah kan ruah awk a si?

JEHOVAH nih Israel mi kha “ka mi hrimhrim nan si lai, . . ka thimmi miphun cu nanmah hi nan si lai” tiah a ti hna tikah an caah tinvo sung a si. (Ex. 19:5) Tuchan ah Khrihfabu chungmi hna cu Jehovah ta sinak nawl an hmu. (1 Pit. 2:9; Biat. 7:9, 14, 15) Mah cu zungzal ṭhatnak a kan pe khomi tinvo sung a si.

² Jehovah ta si cu tinvo sung a si bantukin ṭuanvo zong a um. Acheu nih hitin an ruah men lai: ‘Jehovah nih aa ruahchanmi ning in ka tuah kho lai maw? Sualnak ka tuah sual ahcun a ka hlaw lai maw? Jehovah ta sinak nih ka zalonnak a chut lai maw?’ Mah biahalnak hna cu kan ruah awk a si. Asinain hi biahalnak hi ruah hmasa awk a si: Jehovah ta sinak in hmuhmi ṭhatnak cu zeidah an si?

Jehovah Ta Sinak Nih Lung A Lawmhter

3. Rahab nih Jehovah biak ding bia a khiah tikah zei ṭhatnak dah a hmuh?

³ Jehovah ta a simi hna cu ṭhatnak an hmu maw? Hlan lio Jeriko khua ah a ummi hlawhhlangnu Rahab kong zoh hmanh. Kanaan pathian biak awkah cawnpiak a si lai cu a fiang ko. Asinain Jehovah bawmhnak in Israel mi nih ral teinak an hmuh a theih tikah Jehovah cu a hmaanmi Pathian a si a hngalh. Cucaah Pathian thimmi miphun huhphenh awkah a nunnak pek in a tuah i a hmailei nunnak kha an kut chung ah a chiah. Baibal nih hitin a chim: “Hlawhhlangnu Rahab . . . Pathian he i remnak a hmuhnak cu a tuahnak thawngin a si; Judah mi mi ngiatu pawl kha a rak luhter hna i lam dang in a chuahter hna.” (Jeim 2:25) Pathian caah a thiangmi miphun a simi, Pathian Nawlbia in dawtnak le dinnak cawnpiakmi miphun chung ah aa telmi a si tikah a hmuhmi ṭhatnak kha ruat hmanh. A hlan a nunning a hlawt dih tikah zeitluk in dah aa lawmh lai! Israel mi pakhat he an i um i a fapa Boaz cu Pathian a daw taktakmi si awkah a cawnpiak.—Josh. 6:25; Ruth 2:4-12; Matt. 1:5, 6. 

4. Ruth nih Jehovah biak awkah bia a khiah caah zei ṭhatnak dah a hmuh?

⁴ Moab mi Ruth zong Jehovah biak awkah bia a khiak. Mino pakhat in Chemosh le a dang Moab pathian hna a rak biami a lo. Asinain Jehovah kha a hmaanmi Pathian in a hngalh i an khua ah a rak pemmi Israel mi pakhat he an i um. (Ruth 1:1-6 rel.) A hnuah Ruth le a va unau nupi Orpah cu Naomi he Bethlehem khua lei an kal lioah Naomi nih an khua lei kir awkah a forh hna. Israel ram ah um ding cu an caah a fawi lo. Orpah cu “amah miphun le a pathian hna sinah a kir” nain Ruth cu a kir duh lo. Ruth nih aho ta si a duh kha a hngalh i a zumhnak ning in a tuah. Naomi kha hitin a ti: “Nangmah he i ṭhen awk le nangmah zulh loin kir ṭhan awkah ka lem len hlah; zeitintiah na kalnak ah ka kal ve lai i na riahnak ah ka riak ve lai; na miphun cu ka miphun an si ve lai i na Pathian cu ka Pathian a si ve lai.” (Ruth 1:16) Ruth nih Jehovah sal si awk aa thim caah nuhmei, sifak le lo ngei lomi hna caah a hlei in tuahmi Pathian Nawlbia in ṭhathnemnak a hmu. Jehovah thla tang ah lunglawmhnak, huhphenhnak le himnak a hmu.

5. Jehovah zumhawktlak in a biami hna kongah zeidah na hngalh?

⁵ Jehovah sin an i pumpek hnuah kum hra bu tampi chung zumhawktlak in a ummi cheukhat na hngalhmi an um men lai. Pathian an biakmi in zei ṭhatnak dah an hmuh hal hna. Harnak a tong lomi ahohmanh kan um lo nain salm caṭialtu chimmi bia a hmaan ti fiang tein a lang: “An Pathian ah [Jehovah] a simi hna cu, lunglawmmi an si.”—Salm 144:15.

Jehovah nih A Tlari in Aa Ruahchan

6. Jehovah aa ruahchanmi ning in tuah khawh lai lo kha zeicah ṭih awk a si lo?

⁶ Jehovah nih na sinin aa ruahchanmi na tuah khawh lai le tuah khawh lai lo hngalh na duh ko lai. Pathian sal pakhat si awk, a nawlbia ning in nun awk, a minthiang thanh awk na ruah tikah a har tuk tiah ruah a fawi te. Tahchunhnak ah, Moses cu Ezipt siangpahrang le Israel mi sin biachimtu in thlah a si tikah kaa tlak lo tiah a ruah. Asinain Pathian nih Moses sin in tampi aa ruahchan lo. Jehovah nih ‘chim awk kha a bawmh.’ (Exodus 3:11; 4:1, 10, 13-15 rel.) Moses nih bawmhnak a cohlan caah Pathian duhnak limnak ah lunglawmhnak a hmu. Kan sin zongah Jehovah nih a tlari in aa ruahchan. Mitling lo kan si a hngalh i bawmh a kan duh. (Salm 103:14) Jesuh zultu in Jehovah biak tikah thilrit si lo in hrimhnak a kan hmuhter. Zeicahtiah mah nih midang ṭhatnak a pek lengah Jehovah lung a lawmhter caah a si. Jesuh nih hitin a chim: “Ka sinah ra tuah u, dinhnak kha kan pek hna lai. Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u.”— Matt. 11:28, 29.

7. Jehovah nih na sin in aa ruahchanmi tuah khawh awkah an bawmh lai kha zeicah na zumh khawh?

⁷ Thazang ngeih awkah Jehovah kan i bochan chung paoh kan herhmi thazang a kan pek lengmang lai. Tahchunhnak ah, Jeremiah cu ralṭha in biachim thiammi a si lo. Jehovah nih profet rian a pek tikah Jeremiah nih hitin a chim: ‘Aa, Bawipa Jehovah! Zohhmanh, ngakchiate men ka si i biachim ka thiam lo.’ A hnu ah “a min zongin bia ka chim ti lai lo” ti tiang in a ti. (Jer. 1:6; 20:9) Asinain Jeremiah cu Jehovah bawmhnak in mi nih an duhlomi thawngpang kha kum 40 chung a chim khawh. Jehovah nih mah bia in atu le atu thazang a pek: “Nangmah kha huhphenh awk le khamh awkah keimah cu na sinah ka um.”—Jer. 1:8, 19; 15:20.

8. Jehovah kan i bochan zeitindah kan langhter?

⁸ Jehovah nih Moses le Jeremiah thazang a pek hna bantukin tuchan zongah Khrihfa hna sinin aa ruahchanmi tuah khawh awkah a kan bawmh lai. Pathian i bochan kha a biapi bik a si. Baibal nih hitin a chim: “[Jehovah] kha na lung chung dihlak in i bochan law nangmah fimnak kha i rinh hlah. Na kalnak lam kip ah amah kha hngal law amah nih na lam kha a tluanter hna lai.” (Ptb. 3:5, 6) Baibal le Khrihfabu in bawmhnak a kan pekmi hmannak thawngin Jehovah kan i bochan kan langhter. Kan nunnak ah Jehovah lamhruainak kan zulh ahcun zumhawktlak in um awkah zeihmanh nih a kan dawn lai lo.

Jehovah nih Pakhat Cio in A Kan Zohkhenh

9, 10. Salm a ngan 91 nih zei huhphenhnak phun dah bia a kan kamh?

⁹ Jehovah sin pumpeknak tuah ding an ruah tikah a cheu cu a hnu ah sualnak tuah sual in Jehovah hlawtmi si lai an phang men lai. Lunglawmh awk cu Jehovah nih amah he kan i pehtlaihnak ṭha hmunhter awkah a herhmi huhphenhnak vialte a kan pek. Mah cu Salm 91 ah zeitindah a chim zoh u sih.

¹⁰ Mah salm ah hitin aa thawk: “Himnak hmuh duh ah Cung Nung Bik kha a fuhmi le Lian Ngan Bik huhphenhnak chungah aa dormi nih cun, ‘[Jehovah] nangmah cu a ka chanhtu le a ka hupphengtu na si! Nangmah cu ka Pathian na si; nangmah cu kan bochan’ an ti lai. [‘Vatlaitu rap,’ NW] chungin him tein an huhphenh hrimhrim lai.” (Salm 91:1-3) Pathian nih amah a dawmi le aa bochanmi cu ka huhphenh hna lai tiah bia a kamh hna kha philh hlah. (Salm 91:9, 14 rel.) Zei bantuk huhphenhnak dah a chim duhmi a si? Biakammi Messiah hrinsor him tein umter awkah thil cheukhat kongah Jehovah nih hlan lio a salle kha pumsa lei in a huhphenh hna. Asinain zumhawktlakmi tampi cu Satan rianṭuannak a simi thongtlaknak, hremnak le thahnak an tong. (Heb. 11:34-39) An zumhfehnak a rawhtermi thil ṭihnung in Jehovah nih a huhphenh hna caah inkhawh awkah a herhmi ralṭhatnak an ngei. Cucaah Salm a ngan 91 cu thlaraulei huhphenhnak a biakam a si kan hngalhthiam.

11. “Lian Ngan Bik huhphenhnak” cu zeidah a si, Pathian nih ahotedah a huhphenh hna?

¹¹ Cucaah salm caṭialtu nih a chimmi “Lian Ngan Bik huhphenhnak” cu langhternak in thlarailei huhphenhnak kha a si. Mah ah Pathian khualtlung in a sinah aa ṭhummi dihlak cu an zumhnak le Pathian an dawtnak harnak a pemi ahopaoh le zei thilpaoh in huhphenh an si. (Salm 15:1, 2; 121:5) A zum lomi nih cun mah huhphenhnak kong kha an hngalhthiam lo. Jehovah nih “nangmah cu ka Pathian na si; nangmah cu kan bochan” tiah a timi kha a huhphenh hna. Mah langhternak hmun ah kan um ahcun ‘vatlaitu’ Satan rap ah kan tla lai i Pathian mithmai ṭha kan sung sual lai ti kan phang tuk lai lo.

12. Zeidah Pathian he kan i pehtlaihnak caah ṭihnung a si?

¹² Zeidah Pathian he kan i pehtlaihnak ṭha caah ṭihnung a si? Salm caṭialtu nih ṭihnungmi thil phunphun kha a ṭial, cu chung ah “mui lak i a ummi rai . . . chun ceu i mi a that cuahmah mi ngal-eu” zong aa tel. (Salm 91:5, 6) ‘Vatlaitu’ nih mi tampi kha mah zawnlawng aa ruatmi zalon duhnak chungah a thlak hna. (2 Kor. 11:3) Hakkauhnak, porhlawtnak le thilri lawng duhnak kha a hlorh i mi kha a tlaih hna. Minung ruahnak a simi phun ṭanhnak, thlennawnnak le biaknak hmaan lo in mi tampi lam a pialter hna. (Kol. 2:8) Mi tampi cu nu le pa sualnak rap chungah an tla. Mah bantuk ziaza cu chawnh khawhmi zawtnak bantukin mi nuai tampi kha Pathian an dawtnak a tlauter tawn.—Salm 91:7-10 rel; Matt. 24:12.

Pathian Na Dawtnak Huppheng

13. Thlaraulei ca ṭihnungmi thil in Jehovah nih zeitindah a kan huhphenh?

¹³ Jehovah nih a miphun kha thlaraulei thil ṭihnung in zeitindah a huhphenh hna? Salm nih hitin a chim: “Na kalnak kip i nangmah zohkhenhtu dingah Pathian nih a vancungmi kha a chiah hna lai.” (Salm 91:11) Thawngṭha bia chimnak ah vangcungmi nih lamhruai in a kan huhphenh. (Biat. 14:6) Vancungmi bawmhnak leng ah Baibal fek te’n aa tlaihmi Khrihfa upa pawl cawnpiaknak zong nih a hmaanlomi ruahnak hlennak in a kan huhphenh. Vawlei lungput doh aa zuammi ahopaoh kha Khrihfa upa nih an bawmh khawh hna. (Titas 1:9; 1 Pit. 5:2) Cun thlennawnnak cawnpiaknak, nu le pa sualnak tuah ding lemnak, thilri kawl le minthan i zuamnak, mi a hrawk khomi thil duhnak hna in a kan hupphengmi thlarau rawl kha “zumh awk a tlakmi le a fimmi sal” nih a kan pek. (Matt. 24:45) Mah ṭihnungmi cheukhat doh awkah zeinihdah an bawmh khawh?

14. Pathian huhphenhnak pekmi in zei ṭhathnemnak dah kan hmuh?

¹⁴ Pathian “huhphenhnak” chungah um peng awkah zeidah kan tuah lai? Eksident, sual tuahnak le zawtnak ṭhalo ti bantuk ah pumsalei ṭinnungmi in i huhphenhnak kan tuah lengmang bantukin thlaraulei ca ṭihnungmi thil zongah huhphenhnak kan tuah lengmang awk a si. Cucaah bupi cauk, pumhnak le civui hna in Jehovah pekmi lamhruainak khan ṭhathnemnak kan i lak lengmang awk a si. Khrihfa upa zong ruahnak kan hal hna lai. Khrihfa unau hna langhtermi ziaza ṭha tampi zong in ṭhathnemnak kan hmu. Khrihfabu he i komh cu fimnak a si.—Ptb. 13:20; 1 Piter 4:10 rel.

15. Jehovah nih amah mithmai ṭha a sunghtermi zei thil paoh in a kan huhphenh khawh kha zeicah kan zumh khawh?

¹⁵ Jehovah nih a mithmai ṭha a sunghtermi zei thil paoh in a kan huhphenh khawh kha zumh lo awk a um lo. (Rom 8:38, 39) Kan ral a simi a ṭhawngmi biaknak le cozah hna nih thah cu an kan tim lo nain a thiangmi Pathian he hlatter an kan duhnak in khan Khrihfabu kha a huhphenh. “Sermi hriamnam zeihmanh nih khan nangmah cu an pem kho lai lo” timi Jehovah biakam a hmaan a lang.—Isa. 54:17.

Zalonnak Ahonihdah a kan Pek?

16. Vawlei nih zeicah zalonnak a kan pek khawh lo?

¹⁶ Jehovah ta sinak nih kan zalonnak a chut lai maw? A chut lai lo, vawlei ta sinak tu nih kan zalonnak a kan chuh. Hi vawlei cu Jehovah he aa hlat i minung sal ah a cantertu zaangfahnak ngei lomi pathian nih a uk. (Johan 14:30) Tahchunhnak ah, Satan vawlei nih pawcawmnak kong lungretheih in minung zalonnak kha a chuh. (Biathlam 13:16, 17 tahchunh.) Sualnak zong nih minung kha a hlen hna i sal ah a canter hna. (Johan 8:34; Heb. 3:13) Zumlotu hna nih mi kha Jehovah cawnpiaknak he aa ralchanmi nunnak lam zulh awk an forh hna tikah zalonnak nan hmu lai tiah bia an kamh hna, asinain an bia a ngaimi hna nih a ṭhalomi nunning sal ah an can kha an hmuh colh.—Rom 1:24-32.

17. Jehovah nih zei bantuk zalonnak dah a kan pek?

¹⁷ Asinain Jehovah sin kan i pumpek ahcun a kan hrawk khomi zeithil paoh in a kan luatter lai. Kan sining cu thihnak tiang a phan khomi sining in a luatter khotu pum hlai a thiammi sibawi sinah a pum a pemi he kan i lo. Kan dihlak in sualnak ro kan co caah thihnak tiang a phanmi sining ah kan nung. Khrih raithawinak hrambunh in Jehovah sin i pumpek lawng ah sualnak nih a chuahtermi khan kan luat lai i zungzal nunnak kan i ruahchan khawh lai. (Johan 3:36) Pum hlai thiam sibawi an thangṭhatnak kong kan hngalh tluk in kan i bochan lai bantukin Jehovah kong kan cawn peng ahcun kan i bochan chinchin lai. Cucaah Baibal kha ṭha tein kan hlathlai peng, zeicahtiah Pathian sin i pumpek awk kan ṭihnak a tlautermi dawtnak a kan ngeihter lai caah a si.—1 Johan 4:18

18. Jehovah ta a simi hna nih zeidah an hmuh lai?

¹⁸ Jehovah nih mi vialte kha zalong in thimnak nawl a pek hna. Hitin a chim: “Nunnak kha i thim tuah u, nanmah le nan tefa hna nih nan nun nakhnga [Jehovah] nan Pathian kha daw u.” (Deut. 30:19, 20) Pathian biak awk biakhiahnak tuah in kan dawt langhter kha a duhmi a si. Kan dawtmi Pathian ta sinak nih kan zalonnak chut lo in a zungzal lunglawmhnak a kan pek lai cu a fiang.

19. Jehovah ta si cu zeicah a velngeihnak ruang ah a si?

¹⁹ Misual a simi kannih cu a tlingmi Pathian ta si awk aa tlakmi kan si lo. Pathian nih vel a kan ngeih ruang tu ah a si. (2 Tim. 1:9) Cucaah Paul nih hitin a ṭial: “Kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si.” (Rom 14:8) Jehovah ta si ding kan i thim caah zeitikhmanh ah kan i ngaichiah lai lo.

Zeitindah Na Leh Lai?

• Jehovah ta kan si caah zei ṭhatnak dah kan hmuh?

• Jehovah nih kan sin in aa ruahchanmi kha zeicah kan tuah khawh?

• Jehovah nih a salle kha zeitindah a huhphenh hna?

[Cahmai 8 hmanthlak]

Jehovah ta sinak in zeitindah ṭhatnak an hmuh kha midang hal hna

[Cahmai 10 hmanthlak]

Jehovah nih a kan huhphenhnak lam cheukhat cu zeidah an si?