Jehovah Cu Kan Dornak
“Jehovah cu kaa dornak tiah na chim . . . caah chiatnak zeihmanh nih an phan lai lo.”—SALM 91:9, 10, NW.
1. Zeiruang ahdah Jehovah cu kan dornak tiah kan chim khawh?
JEHOVAH cu a mi hna caah dornak taktak a si. Amah sinah tling tein aa pum pe mi kan si ahcun, kannih cu ‘khatte lei khatte lei in kan ral nih a kan rial dip lengmang, sihmanhsehlaw kan kek ngaingai bal lai lo; lung aw ṭawm in kan um tawn, sihmanhsehlaw kan hnabei a dong bal lai lo; ral tampi kan ngei, sihmanhsehlaw hawi pakhat loin kan um bal lai lo; cei tein an kan ṭhuat tawn, sihmanhsehlaw kan thi taktak bal lai lo.’ Zeiruangah? “A si tawnmi leng ṭhawnnak” kha Jehovah nih a kan pek caah a si. (2 Korin 4:7-9 NW) A si, vancung kan Pa nih Pathian upatnak in nunnak kha zulh awkah a kan bawmh i, cu ti cun salm caṭial tu i a biafang hna kha kan lungthin chungah kan i lak khawh: “Jehovah cu kaa dornak a si tiah na chim i Cung Nung Bik cu hupphengtu ah naa serh caah, chiatnak zeihmanh nih an tlun hnawh lai lo.”—Salm 91:9, 10, NW.
2. Salm 91 kong ah zeidah chim khawh a si i mah nih khan zei bia dah aa kam?
2 Salm 91 i mah biafang hna cu Moses nih a rak ṭial mi an si men lai. Salm 90 nak a cunglei aa ṭialnak ah hlaphuahtu in amah min kha khenh a si i a karlak ah a ṭial tu dang min zeihmanh chim mi um loin Salm 91 nih a hun zulh. Salm 91 cu hla remh bu nih a chang chang in sak ning phun in sak a si; mah cu mi pakhat nih a rak sak hmasa (91:1, 2), i hla remh bu nih an rak leh (91:3-8). Pakhat tein a sa mi aw kha theih a si hnu ah (91:9a) mibu nih khan an rak leh (91:9b-13) mi a si kho. Cu hnu ah pakhat tein a sa mi nih a donghnak biafang hna kha a rak sak men hna lai. (91:14-16). Zei ti lam hmanh in si ko seh law, Salm 91 nih bu pakhat in chiti thuh mi Krifa hna kha thlarau lei himnak a kamh hna i bu pakhat in Pathian sin i aa pe mi an hawi le zong kha cu bantuk hnangamnak cu a pek ve hna.a Cu bantuk Jehovah a sal le hna dihlak hmuhning in hi salm cu zoh hmanh hna u sih.
“Pathian Kilvennak Hmun” ah Himnak
3. (a) “Cung Nung Bik i huhphenhnak hmun,” cu zeidah a si? (b) “Lianngan Bik thladem tangah kan i dornak” thawngin zeidah kan hmuh?
3 Salm caṭial tu nih hitin a ti: “Cung Nung Bik kilvennak hmun ah a um mi nih cun Lian Ngan Bik a thladem tangah aa dor lai. Jehovah sinah hitin ka chim lai: ‘Nangmah cu kaa dornak le ka innsang na si, kaa bochan mi ka Pathian na si.’ ” (Salm 91:1, 2 NW) “Cung Nung Bik kilvennak hmun” cu kanmah caah, a biapi in Khuachia nih a hlei in aa tinh mi hna chiti thuh mi hna caah langhternak mi huhphenhnak hmun kha a si. (Biathlam 12:15-17) Pathian sinah a tlung mi thlarau lei khualtlung in huhphenhnak kha kan hmuh lo a si ahcun kan dihlak in a kan hrawh lai. ‘Lian Ngan Bik thladem tangah i dornak,’ thawngin Pathian huhphenhnak thla asilole thladem ah kan um. (Salm 15:1, 2; 121:5) Cungnungbik Bawipa, Jehovah nakin him tein dornak asiloah a fekmi innsang a kan pe kho deuh tu ahohmanh an um lo.—Phungthlukbia 18:10.
4. “Ram vai tu,” Satan nih zei thil dah a hman i zeitindah kan luat khawh lai?
4 Salm caṭial tu nih hitin a ti chap: “Amah theng [Jehovah] nih ram vai tu rap in, thihnak a chuahter mi zawtnak in an khamh lai.” (Salm 91:3 NW) Hlanlio Israel ram ah ramvaitu pakhat nih va a foih nakhnga rap asilole thang a rak hman tawn. “Ram vaitu,” Satan i a rap hna lakah a ṭhalo mi a bu le “hlenthawinak tuahsernak hna,” an i tel. (Efesa 6:11, NW footnote) Ṭhatlonak le kan thlarau lei rawhnak a chuahter mi ah kan tlak nakhnga kan lam ah thuh mi rap hna cu chiah an si. (Salm 142:3) Sihmanhsehlaw kannih cu dinlonak kha kan hlawt ruangah ‘kan nunnak cu rap in a luat mi va bantuk a si.’ (Salm 124:7, 8) Jehovah nih “ram vaitu” ṭhalo sinin a kan khamh cu zeitluk lawmh awk dah a si!—Matthai 6:13.
5, 6. Zei bantuk ‘zawtnak rai’ nihdah “thihnak” a chuah ter i, sihmanhsehlaw zei ruang ahdah Jehovah a miphun hna nih mah kha an i tei ter lo?
5 Salm caṭial tu nih “thihnak a chuahter mi zawtnak,” tiah a chim. Khulrang tein mi a chonh kho mi zawtnak bantuk in minung innchungkhar caah le Jehovah a nawlngeihnak aa tlaih mi hna caah “thihnak” a chuahter mi thil a um ve. Mah kong he aa tlai in, tuanbia thiammi Arnold Toynbee nih hitin a rak ṭial: “Vawlei Ralpi II a dongh ri in phunṭanhnak lungthin ruangah mah tein i pennak ram hna kha let hnih in a karh . . . Minung i atu lio lungput ning cu duhsah duhsah tein aa ṭhencheu chin lengmang.”
6 Kum zabu hna chungah, ram uktu cheukhat hna cu ramkhat le ramkhat i ṭhencheunak a hmual a fah nakhnga a tuah tu an si. Anmah thengte kha asiloah milem asilole hmelchunnak a phunphun hna kha upatnak pek awkah hramhram in an hal fawn hna. Sihmanhsehlaw Jehovah nih kha bantuk “thihnak” thil pakhat khat kha i tei ter awkah zumh awk tlak mi a sal le kha nawl a awnh hna lo. (Daniel 3:1, 2, 20-27; 6:7-10, 16-22) Dawtnak a ngeimi ramkip unau sinak pakhat in, Jehovah sinah zeihmanh ngaan lo mi pumpeknak, Baibal ca he aa tlak in khoika leihmanh ṭanlonak, le ‘mi zei miphun chung mi hmanh a si ah, [Pathian] a ṭih mi paoh le dinnak a tuah mi paoh cu amah sinah cohlan awk tlak an si,’ ti mi kha duhdanhnak ngei loin kan pom. (Lamkaltu 10:34, 35; Exodus 20:4-6; Johan 13:34, 35; 17:16; 1 Piter 5:8, 9) Krifa in kannih cu hremnak phun in “thih awk tlak” hna kha kan ton ko nain kannih cu “Cung Nung Bik kilvennak hmun chungah” aa nuam mi le thlarau lei in a him mi kan si.
7. Jehovah nih kanmah kha “a thla” in zeitindah a kan huhphenh?
7 Kan dornak bantuk in Jehovah kha kan ngei i hi biafang hna in kan hna a ngam: “A thla in an huh lai i himte in na um lai; zumh awk tlak a si nak nih khan an huhphenh lai i him te in an um ter lai.” (Salm 91:4) Va nih a fale cungah huhphenh awkah a hel lengmang bantuk in Pathian nih a kan huhphenh. (Isaiah 31:5) ‘A thla in a kan huh lai.’ Mah in khan va nih a fale kha a huh hna i sahrang sin khan a huhphenh hna. Zuan a cawng ka mi va fate bantuk in, a hmaan mi Krifa bupi ah dornak kan i lak caah kannih cu Jehovah i langhter mi a thla tangah kan him.—Ruth 2:12; Salm 5:1, 11.
8. Jehovah i “zumh awk tlak a si nak” cu zeitindah phaw ngan pi le ral hau a si?
8 “Zumhawktlak a si nak” kha kan i bochan. Cucu innka muisam bantuk khi a si tawn i mi pakhat kha a pum ning pi in a khup kho mi hlanlio chan i a ngan ngai mi phaw bantuk a si. (Salm 5:12) Cu bantuk huhphenhnak kan i bochannak nih ṭihnak in a kan luat ter. (Genesis 15:1; Salm 84:11) Kan zumhnak he aa lo in, Pathian zumhawktlak nak cu Satan mei cantiang kha a kham i ral nih a kan dohnak kha a kan kham piak mi a ngan ngai mi huhphenhnak phaw a si. (Efesa 6:16) Mah cu ralhau, runvennak vawlei bo a fek ngai mi zong a si i mah a hnu lei ahcun fek ngai in kan dir.
‘Kan Ṭih Lai Lo’
9. Zei ruang ahdah zan caan cu ṭih a nung mi caan a si, sihmanhsehlaw kan nih cu zeiruang ahdah kan ṭih lo?
9 Pathian huhphenhnak a kong ruangah, salm caṭial tu nih hitin a chim: “Zan i a chuak mi ṭihnung kha na ṭih hna lai lo, chun ah ruah phak loin a chuak mi cantiang [“thal,” NW] zong kha na ṭih lai lo; mui lak i a um mi rai zong kha na ṭih lai lo i chun ceu i mi a that cuahmah mi ngal-eu [“rawhralnak,” NW] zong kha na ṭih lai lo.” (Salm 91:5, 6) Ṭhatlonak tampi cu mui padap ah tuah an si caah zan cu ṭih a nung mi caan a si kho. Atu ah vawlei cu thlarau lei muihnak chungah aa phum, kan thlarau lei thil kha hrawh awkah le kan phungchim rianṭuannak kha ngol ter awkah kan ral hna nih hlenthawinak kha an hman tawn. Asinain Jehovah nih a kan ven caah ‘kannih cu zan i ṭih a nung mi thil a zei hmanh kha kan ṭih lo.’ —Salm 64:1, 2; 121:4; Isaiah 60:2.
10. (a) ‘Chun ceu i a zuang mi thal’ nih zeidah a langhter mi si dawh a si i, mah kha zeitindah kan lehrulh lai? (b) “Mui lak i a um mi rai” bantuk thil cu zeidah a si i zeiruang ahdah mah kha kan ṭih lo?
10 ‘Chun ah a zuang mi thal’ nih i tuknak kha langhter dawh a si. (Salm 64:3-5; 94:20) Biatak thawngpang thanhnak ah kan i teimak lioah cu bantuk a thiang mi kan rian zapi hngalh in dohnak cu santlai lo a si. Mah lengah, “mui lak i a um mi rai,” zong kha kan ṭih lo. Mah cu ziaza lei le biaknak lei in zawtnak a ngei mi Satan nawlngeihnak tang i a um mi langhternak rai nih a chuahter mi a si. (1 Johan 5:19) Mah nih cun ruahnak le lungthin thihnak kha a chuah ter i Jehovah kong, a timhnak hna le dawtnak he thil a timhning kong hna he aa tlai in mi hna kha mui lak ah a chiah hna. (1 Timote 6:4) Hi muihnak chungah, thlarau lei ceunak tampi kan hmuh caah kannih cu kan ṭih lo.—Salm 43:3.
11. ‘Chun ceu i rawhralnak’ a tong mi hna sinah zei thil dah a cang?
11 “Chun ceu i mi a that cuahmah mi ngal-eu [“rawhralnak,” NW]” zong nih a kan ṭhih kho lo. “Chunceu” nih vawlei ceuternak tiah an auh mi kha a langhter mi a si kho men. Pumsa lei hmuhning kha aa tei ter mi hna nih thlarau lei rawhnak kha an in lai. (1 Timote 6:20, 21) Ralṭha ngai in Pennak thawngṭha kan thanh lio ah Jehovah cu kan Hupphengtu a si caah kan ral ahohmanh kha kan ṭih hna lo.—Salm 64:1; Phungthlukbia 3:25, 26.
12. A ho a velchum ahdah mi thong tampi ‘an tlu’ i zei ti lam indah a si?
12 Salm caṭial tu nih hi tin a peh: “Na pawngkam ah mi thongkhat an thi ko lai, na orhlei kam ah thong hra zong an thi [“tlu,” NW] ko lai, sihmanhsehlaw nang cu zeihmanh nih an tong lai lo. Mi ṭhalo cu zeitindah dantatnak a in kha na zoh lai i na hmuh lai.” (Salm 91:7, 8 NW) Jehovah cu an dornak ah an ser lo caah mi tampi cu kan “pawngkam” ah thlarau lei thihnak ah an ‘tlu.’ A hmaan tein, nihin thlarau Israel mi hna i “orhlei kam” ah “thong hra” an tlu. (Galati 6:16) Sihmanhsehlaw kannih cu chiti thuh mi Krifa asilole aa pum pe mi an hawi le kan si ah, kannih cu Pathian “kilvennak hmun” ah kan him. Kannih cu chawlehnak, biaknak le lam dangdang ah harnak a zun mi hna, ‘miṭhalo mi hna cung i tei rul chamnak kha a zoh’ memmen mi kan si.—Galati 6:7.
‘Harnak Zeihmanh Nih A Kan Tlun Hnawh Lai Lo’
13. zeibantuk chiatnak dah kan cungah a tlung lo i zeiruang ah?
13 Hi vawlei himnak cu tlu hmanh sehlaw kannih cu Pathian kha hmasa bik ah kan chiah i salm caṭial tu bia in thazang kan i lak: “Bawipa cu chanhtu [“dornak,” NW] ah naa ser i Cung Nung Bik cu huppheng tu ah naa ser caah harnak zeihmanh nih an tlun hnawh kho lai lo i vanchiatnak zeihmanh na inn a phan lai lo.” (Salm 91:9, 10) Asi, Jehovah cu kan dornak a si. Zeitin a si hmanhah, Cung Nung Bik kha ‘kan dor hmun’ zongah ser in mah ka ah himnak kan hmu lai. Jehovah kha Universe pumpi i Siangpahrang Ngan Bik in kan thanh, kan himnak Hrampi in a sinah kan i ‘dor,’ i Pennak thawngṭha kha kan thanh. (Matthai 24:14) Cucaah hi salm a hmasa deuh chung i a langhter mi zei chiatnak hmanh nih—‘chiatnak zeihmanh nih a kan phan kho lai lo.’ Lihnin, harikin thlichia, tilian, mangṭam le raldohnak i rawhralnak ti mi a dang chiatnak hna kan ton hmanh ah, mah nih khan kan zumhnak asiloah kan thlarau lei himnak kha an hrawk kho lo.
14. Jehovah a sal le in kannih cu zeiruang ahdah thihnak rai nih a kan chonhh lo?
14 Chiti thuh mi Krifa hna cu hi thil ningcang ah thlam chungah a um mi khual bantuk an si. (1 Piter 2:11) ‘Zei bantuk rai hmanh nih khan an thlam kha a rak naih kho lo.’ Kan i ruahchannak cu vancung a si ah vawlei a si ah, kannih cu vawlei cheubang kan si lo i ziaza rawhnak, thilri le chawhlawn kawlnak, a hmaanlo mi biaknak le “sahrang” le a “milem,” United Nations biaknak ti mi thlarau lei thihnak a chuah ter mi rai nih a chonh mi kan si lo.—Biathlam 9:20, 21; 13:1-18; Johan 17:16.
15. Zeibantuk lam in dah vancung mi bawmhnak cu kan hmuh?
15 Kan hmuh mi huhphenhnak he aa tlai in, salm caṭial tu nih hitin a ti chap: “Na kalnak kip i nangmah zohkhenhtu ding ah Pathian nih a vancung mi kha a chiah hna lai. An kut in an in domh lai i lung ah na ke kha na khawng lai lo.” (Salm 91:11, 12) Vancung mi cu kanmah huhphenh awkah ṭhawnnak pek an si. (2 Siangpahrang 6:17; Salm 34:7-9; 104:4; Matthai 26:53; Luka 1:19) ‘Kan lam kip ah’ an kan ven. (Matthai 18:10) Pennak thanhtu in vancung mi lamhruainak le vennak kha kan hmuh i thlarau lei ah kan tlu lo. (Biathlam 14:6, 7) Kan rianṭuannak khamnak ti bantuk ‘lung hna’ hmanh nih khan, ‘lung’ tluk ter awkah le Pathian mithmai ṭha hmuhnak sungh awk kha an chuah ter kho lo.
16. Zeitindah “chiandeih” le “rul” i an mi tuknak cu an i dan i zeitindah kan lehrulh hna?
16 Salm caṭial tu nih hitin a peh: “Chiandeih le rul kha na lamh hna lai, chiandeih ṭihnungnung le rul sivai ṭhawngṭhawng kha na lamh chih len hna lai.” (Salm 91:13) Chiandeih no nih langhngan in hmaitonh tein mi a doh bantuk in kan ral cheukhat nih kan phungchim rianṭuannak kha ngol ter awkah phunglam an sernak in mi zapi hngalh in a kan doh. Sihmanhsehlaw aa thup mi hmun in mi a cu mi rul bantuk hna nih kan i ruahchan lo mi dohnak hna zong kha kan cung ah an tlun ter. A caan caan ah a thlithup in, biaknak lei upa hna nih upadi sertu, biaceihtu hna le mi dang dang hna kha hmangin a kan doh. Asinain Jehovah bawmhnak in, harnak in luat awkah biaceihnak zung ah dai tein kan nawl i, mah ti cun ‘thawngṭha kha kilven le phung ning tein fian ter’ a si.—Filipi 1:7; Salm 94:14, 20-22.
17. Zeitindah “chiandeih no” kha kan ke in kan lamh?
17 Salm caṭial tu nih “chiandeih le rul” kha ke in lamhnak kong kha a chim. Chiandeih no cu a hrang ngai mi a si kho i rul cu a lawn in a lawn mi a ngan ngai mi a si kho. (Isaiah 31:4) Chiandeih no nih hmaitonh in a kan doh tikah zeitluk hmanh in hrang ko seh chiandeih bantuk minung le bupi hna nakin Pathian nawl kan ngeih deuh nak in langhternak in kan lamh. (Lamkaltu 5:29) Cucaah mi a ṭhihphaih mi “chiandeih” nih kan thlarau lei rawhralnak a chuah ter kho lo.
18. “Rul nganpi” nih aho kha dah a kan hngalh ter ṭhan i a dohdalnak tang ah kan um ahcun zei dah kan tuah a herh?
18 Krik Septuagint ah, “rul nganpi” kha “limkeng” tiah a auh. Mah nih cun “limkeng nganpi . . . rulpi tar, Khuachia, asiloah, Satan ti mi,” kha ṭha tein a hun kan hngalh ter. (Biathlam 12:7-9; Genesis 3:15) Amah cu a sa seh mi kha man cikcek in a rial i a dolh kho mi a ngan ngai mi a lawn in a lawn mi saram he khan an i lo. (Jeremiah 51:34) Satan nih kanmah kha rap foih awkah, hi vawlei hneksaknak hna in a kan rial dip i, dolh awkah aa zuam tikah a kan ṭemtawnnak kha chat in hi “rul ngan” kha lam u sih. (1 Piter 5:8) Chiti thuh mi a tang rih mi nih Rom 16:20 tlinnak ah an i tel ahcun cu tin an tuah hrimhrim lai.
Jehovah—Kan Khamhnak Hrampi
19. Zeiruang ahdah Jehovah ah dornak kan i lak?
19 A hmaan mi biatu hna he aa tlai in, salm caṭial tu pa nih Pathian aiawh in hitin a chim: “A ka daw mi cu ka khamh lai i ka min a hngalh caah ka huhphenh lai.” (Salm 91:14 NW) “Ka huhphenh lai” tiah hmanmi bia cu a cafang ning in cun, “a sannak ah ka chiah lai,” phundang in chim ahcun, phak khawh lo nak ti nak a si. A hleikhun in ‘a cungah dawtnak kan ngeih’ caah amah a biatu in Jehovah sinah kan i dor. (Marka 12:29, 30; 1 Johan 4:19) Cun Pathian nih kan ral hna sinin ‘a kan khamh lai.’ Kannih cu zeitikhmanh ah vawlei in phawi kan si lai lo. Mah he aa ralchanh in, Pathian min kha kan hngalh i mah kha zumhnak he kan auh caah khamh kan si lai. (Rom 10:11-13) Cun kannih cu ‘Jehovah a min in kal zungzal’ awkah kan lung kan i thlek.—Mikah 4:5; Isaiah 43:10-12.
20. Salm 91 a donghnak ah, Jehovah nih zumh awk tlak mi a sal le kha zeidah a kamh hna?
20 Salm 91 a dongnak bantuk in, Jehovah nih zumh awk tlak mi a sal kong kha hitin a chim: “A ka auh tikah ka leh lai i harnak a in tikah ka umpi hna lai. Ka chuah lai i ka upat lai. Laksawng ah nun sau ka pek lai i ka khamh hrim hrim lai.” (Salm 91:15, 16) A duhning tein thla kan cam i Pathian kha kan auh tikah, a kan leh. (1 Johan 5:13-15) Satan nih a chuah ter mi dohdalnak thawngin harnak tampi cu kan rak tei thluahmah cang. Sihmanhsehlaw “harnak a in tikah ka um pi lai,” timi biafang nih hmailei hneksaknak hna caah a kan timhtuah i hi ningcang ṭhalo cu hrawh a si tikah Pathian nih a kan bawmh lai ti kha fek tein a kan zumh ter.
21. Zeitindah chiti thuh mi hna nih sunparnak ah an phak?
21 Satan nih puarhrang ngai in a kan ralchanh ko nain, kanmah lak i a um mi chiti thuh mi hna cu a tling tein Jehovah ri khiah mi caan ah—vawlei cung ah ‘sau pi an nun’ hnu ah vancung ah sunparnak an hmu te lai. Asinain, Pathian i khuaruah har awk tlak khamhnak hna nih chiti thuh mi hna caah thlarau lei sunparnak a chuah ter. Hi hmanung bik ni hna ah vawlei cungah Jehovah Hngaltu hna in anmah nih lam an hruai mi cu zeitluk hmaizah awk dah a si! (Isaiah 43:10-12) Armageddon i a lianngan mi a ral dohnak chung ah a nawl ngeihnak a fianter i a min thiang a langhter tikah Jehovah nih a mi hna a khamhnak hna a nganbik mi cu a hung chuah lai.—Salm 83:18; Ezekiel 38:23; Biathlam 16:14, 16.
22. A ho nihdah ‘Jehovah khamhnak kha an hmuh’ lai?
22 Kannih cu chiti thuh mi Krifa kan si ah asilole aa pum pe mi an hawi le kan si ah, khamhnak caah Pathian kha kan zoh. “A lian a ngan i ṭih a nung mi ni, BAWIPA ni,” chungah Pathian rian zumh awk tlak tein a ṭuan mi cu khamh an si lai. (Joel 2:30-32) Pathian vawlei thar ah a luat i a donghnak hneksaknak ah a tang mi kan nih lak i “mi bupi” a si hnga ding mi hna kha Pathian nih a dong kho lo mi nunnak a si mi ‘nun sau nak in an hna a ngam ter hna lai.’ Mi tampi zong kha a thawh ter ṭhan hna lai. (Biathlam 7:9; 20:7-15) Jehovah cu Jesuh kri hmangin ‘khamhnak a kan hmuh ter’ nak ah a lung aa lawm taktak lai. (Salm 3:8) Kan hmai ah ruahchannak ngan pi a um caah a sunparnak a langhnak hnga kan ni rel nak ah Pathian kha i bochan peng ko u sih. Kan bia le kan tuahsernak in Jehovah cu kan dornak a si ti kha langhter peng hna u sih.
[A Tanglei Fianternak]
a Krifa Krik Baibal a ṭial tu hna nih Messiah profet chimchung bia hmuhning in Salm 91 kha an i ruah ṭi hna lo. A si ko, hi “donghnak caan” ah Jehovah cu dornak a rak si i Jesuh Kri, Jesuh i chiti thuh mi zultu hna le bu pa khat in aa pum pe mi an hawi le hna ca tiang ah khan Amah cu himnak a si.—Daniel 12:4.
Zeitindah Na Leh Lai?
• “Cung Nung Bik i huhphenhnak hmun” cu zeidah a si?
• Zeiruang ahdah kan ṭih lo?
• ‘Zei chiatnak hmanh nih a kan phan lai lo’ ti mi cu zeitindah a si?
• Zeiruang ahdah Jehovah cu kan khamhnak hrampi a si tiah kan chim khawh?
[Cahmai 24nak i Hmanthlak]
Jehovah i zumh awk tlak a si nak cu zeitluk indah kan caah a ngan mi phaw a si ti kha na hngal maw?
Limkeng: A.N. Jagannatha Rao, Trustee, Madras Snake Park Trust
Jehovah nih a sal le kha an i ruahchan lo mi dohdalnak le langhngan in ralchanhnak tong hna hmah sehlaw an phungchim rianṭuannak an hlawh a tlin nakhnga a bawmh hna