Jehovah Bupi Ah Ka Rian A Tam Peng

Vernon Zubko Nih A Chim

CANADA ram, Saskatchewan peng, Stenen khua pawng lo ah a ṭhangmi ka si. Ka pa le ka nu min cu Fred le Adella an si. Ka unu Aurellia le keimah le ka naule Alvin, Allegra le Daryl thlaraulei le pumsalei zohkhenhnak caah ka nu le ka pa cu fakpi in rian an ṭuan. Ka nu le ka pa nih biatak a kan cawnpiak caah atu tiang an cungah kan i lawm.

Ka pa cu ralṭha tein thawngṭha a chimmi chiti thuhmi Khrihfa a si. Pawcawmnak caah fakpi in rian a ṭuan buin mi nih Jehovah Tehte a si an hngalh dih nakhnga zong aa zuam. Baibal biatak a chim zungzalmi a si. A teimaknak le a ralṭhatnak kha ka philh kho lo. Hitin a ka chimh tawn: “Jehovah bupi ah na rian tam peng law harnak tampi na hrial khawh lai.”

Stenen le a pawngkam khua hna lam cungah phung kan chim lengmang. Cuti tuah cu khua caan ah kaa harh. Khuakip ah ngakchia a nekmi le a nihsawhmi miṭhalo an um. Kum riat ka si lioah Vennak Innsang le I Hlau! i put in lamkam i ka dir lioah ngakchia rual nih an rak ka kulh. Ka luchin tharte kha an ka chuh i ka pawng tung cungah an bah. Unaupa pakhat nih ṭha tein a ka zoh i zeidah a cang ti a hngalh caah kaa lawm tuk. Ka sinah a ra i “Vern, zei thil dah a cang?” tiah a ka hal tikah ngakchia pawl cu an zam dih. Mah thil a can cu ka lung a ṭha lo nain lam cung phungchim tikah dir loin kal ding a si kha ka hun hngalh. Ka ṭhan lio i ka hmuhtonmi nih innkhat hnu innkhat phungchim ngam ding a ka bawmh.

Kum 13 ka si, 1951, May thla ah Alvin he tipil kan ing. Unaupa Jack Nathan nih tipil innak phung a chim i thlakhat te hmanh Jehovah kong chim loin um awk a si lo tiah a kan forhmi kha kaa cinken peng.a Kan innchungkhar nih hmaikal ṭuan cu pawcawmnak caah a ṭha bik rian in kan hmuh zungzal. Sianginn kai kaa lim hnu 1958 ah Manitoba peng Winnipeg khua ah hmaikal ṭuan ah kaa ṭhial. Ka pa nih chungkhar pawcawmnak rian a simi zipawthutnak rian ṭuan ve seh ti a ka duh nain ka nu he an pahnih in caantling rian ṭuan awkah Winnipeg ah i ṭial ding an ka forh.

Innthar le Hawithar

1959 ah zung ṭengnge nih thawngṭha chimtu a herh tuknak hmun Quebec peng ah a kal kho dingmi paoh an kan sawm. Hmaikal ṭuan ah Montreal khua ah kaa ṭhial. France holh ka cawng i nunphung thar zong ka cawn caah ka nunnak ah thlennak taktak a si. Khualtlawng rianṭuantu nih “‘hlan zongah hitin ka tuah tawn ko’ tiah zeitikhmanh ah chim hlah” tiah a ka ti. Mah cu ruahnak cheuhnak ṭha a si.—1 Kor. 9:22, 23.

Quebec i kaa ṭhial lioah hmaikal ṭuanṭi hawi ka ngei lo. Asinain Winnipeg ah ka rak hmuhmi unaunu Shirley Turcotte he 1961, February ah kan i um i zungzal ka hawi a hung si. Amah zong Jehovah a dawmi innchungkhar in a ṭhangmi a si. Amah cu ka caah mansungmi thazang petu a si lai hi ka rak hngal lo.

Gaspe ah Phungchimnak

Kan i um hnu kum hnih ah Quebec peng, Rimouski khua ah special hmaikal an kan ṭuanter. Mah kum ṭhal chuahka ah zung ṭengnge nih Canada nichuahlei rilikam ah a ummi Gaspe Rili fonghlei ah phungchim ding an kan fial. Kan rian cu a si khawh chung in biatak thlaici tuh a si. (Pct. 11:6) Kan mawṭaw in mekazin 1,000 leng, cauk 400 hrawng, ei awk le thilpuan tlawmpal kan i phorh i thlakhat chung phung va chim ah kan kal. Gaspe Rili fonghlei i khuate vialte ah kan chim. Cuka hmun i radio thawngthanhnak nih Jehovah Tehte pawl an ra i an cauk cohlang hna hlah u tiah thawng an thanh. Mi tam deuh nih mah kha an i theih palh i kan cauk thawngthanhnak ah an ruah caah cauk cu an cohlan.

Cu lio caan ah zalong tein chimnak nawl hmuhnak a sau rihlo caah Quebec peng hmun cheukhat ah khenkhamnak a um. Khua pakhat ah innkip i cauk kan pek hna lioah khenkhamnak kan tong. Palek bawi pakhat nih palek zung i a kan kalpi tikah cuka khua sihni nih phungchim lo ding nawl a chuah kha ka hngalh. Zung palek bawi a umlo caah Toronto zung ṭengnge pekmi, zalong tein chimnak nawl kan hmuhnak kong ṭialmi catlap kha sihni cu ka hmuhsak. Sihni nih a rel dih hnuah hitin a chim colh: “Keimah nih buainak ka chuahtermi a si lo. Mahka peng i siangbawi nih nawl a ka chuahter caah a si.” Kan phungchimnak rian cu cozah awnhmi a si kha khuami hngalhter kan duh hna caah palek nih an kan thlauhnak hmun ah kan kal colh i phung kan chim ṭhan.

A thaizing ah zung palek bawi kha kan va ton. Kan rian thlauh kan si ti thawng a theih tikah a lung a ṭhalo i sihni kha thinhung ngai in phone a chawnh. Zung palek bawi nih buainak pakhatkhat a chuah a si ahcun ka chim u law keimah nih kan bawmh hna lai tiah a kan ti. Khual kan si lengah France holh zong kan thiam tuk lo nain mi cu kan cungah an ṭha i an siang. Asinain ‘biatak an cohlang lai maw?’ tiah khua kan ruat. Kum tampi a rauh hnu Gaspe Rili fonghlei ah Kingdom Hall sak i kan kal ṭhan tikah a phi kan hmuh. Phung kan rak chimhmi tampi cu atu ah unau an si cang kha kan hmuh. A ṭhantertu cu Jehovah a si taktak.—1 Kor. 3:6, 7.

Rosung kan Hmu

Kan fanute Lisa cu 1970 ah a chuak. Jehovah sinin kan hmuhmi mah rosung nih a kan lawmhter chin. Ka nupi Shirley le Lisa he Kingdom Hall tampi saknak rian kan ṭuanṭi. Lisa nih sianginn kai a dih hnuah hitin a chim: “Ka nu le ka pa, keimah ruangah chikkhat hmaikal nan i dinh caah mah kha hmaikal ṭuan in ka cham lai.” Cu hnu kum 20 leng tiang Lisa cu hmaikal a ṭuan i atu cu an pa Sylvain he an ṭuanṭi cang. An pahnih in vawlei pumpi innsaknak rian tampi ah an i tel. Kan innchungkhar kan i tinhmi cu nunning sawhsawh tein nun le Jehovah rian ṭuan awkah timhcia in um a si. Lisa nih hmaikal a ṭuanka i a chimmi bia kha ka philh kho lo. A bia nih hmaikal ṭuan ṭhan awk a ka forh i 2001 ah caantling hmaikal ka ṭuan ṭhan. Hmaikal ka ṭuanmi nih ka tuahmi kipah Jehovah i bochan awk le thilri tlawmte lawng ngeih bu in lungtlinnak le nuamhnak hmuh khawh a si kha a ka cawnpiak.

Innsaknak Rian ah Dawtnak, Zumhfehnak le Zumhawktlakmi Si a Herh

Jehovah pekmi zei rian paoh ṭuan awk timhcia in kan um i kan cohlan ahcun thluachuah tampi hmuh khawh a si kha Jehovah nih a ka cawnpiak. Innsaknak Kawmiṭi i aa telmi, Quebec peng le hmun dangdang i unau pawl he innsaknak rian ṭuanṭi cu tinvo sung a si.

Innsaknak ah aa telmi cheukhat cu pulpit cung phungchim an thiam tuk lo nain Kingdom Hall sak cu an thiam ngaingai. Mah duhnungmi unau pawl nih an rian kha lungtak in an ṭuan i an thiamnak a lang. Cucaah Jehovah biaknak caah aa dawhmi inn an sak khawh.

“Kingdom Hall saknak ah aa telmi hna nih ngeih a herh bikmi ziaza cu zeidah a si?” tiah an ka hal tawn. Ka hmuhtonnak ahcun pakhatnak ah Jehovah le a Fapa dawt, cun unau pawl dawt a si. (1 Kor. 16:14) Pahnihnak ah, zumhfekmi le zumhawktlakmi si a herh. Kan duhning in thil a kal lo tikah zumhfekmi nih cun theocratic lamhruainak kha a zulh zungzal lai. Zumhawktlak a simi cu innsaknak rian ah a dongh tiang aa tel lai.

Jehovah Cungah Kaa Lawm

Ka pa cu 1985 ah a thi i Jehovah bupi ah na rian tam peng tiah ruahnak a ka cheuhmi kha ka lungthin ah a cam peng. Jehovah bupi i vancunglei rian ah rian a hmu cangmi hna bantukin ka pa zong a rian a tam hrimhrim ko lai. (Biat. 14:13) Ka nu cu kum 97 a si cang i a zen caah a holh kho ti lo nain Baibal cu ṭha tein a hngalh rih. Ca a kan kuat tikah Jehovah rian zumhawktlak in ṭuan peng awk a kan forh i Baibal cang a ṭial chih. Cu bantuk dawtnak a ngeimi nulepa kan ngeih caah kan i lawm tuk.

Zumhawktlakmi ka nupi Shirley ca zongah Jehovah cungah kaa lawm. A nu nih ruahnak a cheuhmi mah bia hi aa cinken peng, “Vern cu Pathian rian ah a rian a tam lai i midang caah caan a pek lai kha philh hlah.” A luancia kum 49 i kan rak i um lioah kan tar tiang Jehovah rian kan ṭuanṭi lai, caan dongh tikah kan luat a si ahcun kan no ṭhan lai i Pathian rian kan ṭuanṭi zungzal lai tiah bia kan rak i kam. ‘Bawipa rian ṭuannak ah i manh lo ngai in’ kan um. (1 Kor. 15:58) Jehovah nih a kan zohkhenh taktak i kan herhmi paoh a kan pek dih.

[A Tanglei Fianternak]

[Cahmai 31 Hmanthlak]

“Kan innchungkhar kan i tinhmi cu nunning sawhsawh tein nun le Jehovah rian ṭuan awkah timhcia in um a si”