Donghnak A Naih Chin Caah Jehovah Kha I Bochan

“[Jehovah] kha i bochan zungzal ko u.”—ISA. 26:4.

1. Pathian salle cu vawlei mi hna he zeitindah an i thleidan?

TUCHAN ah mi tampi cu ahodah asiloah zeidah kan i bochan lai ti an hngal ti lo, mah cu lungfahnak le sunghralhnak an ton lengmang caah a si men lai. Jehovah salle he cun an va i thleidang dah! Annih cu Pathian fimnak lamhruainak thawng in hi vawlei le uktu “bawi” nakin a ṭha deuhmi bochan awk an hngalh. (Salm 146:3) Jehovah nih a dawt hna le a biakam a tlinter zungzal kha an hngalh caah an nunnak le hmailei ruahchannak kha Jehovah kut ah an chiah.—Rom 3:4; 8:38, 39.

2. Joshua nih Pathian zumhawktlak a sinak kha zeitindah a rak chim?

² Joshua nih Pathian bochan awktlak a sinak kong a rak chim. A thih lai ah Israel mi kha hitin a chimh hna: “BAWIPA nan Pathian nih nanmah kong ah biakamnak a tuahmi thilṭha vialte lakah pakhat hmanh pakpalawng a can lo kha nan lungthin le nan ruahnak in nan hngalh, nannih caah a dihlak in a tlung dih.”—Josh. 23:14.

3. Pathian min nih Pathian kong zeidah a langhter?

³ Jehovah nih a biakam a tlinter cu a miphun a dawt hna ca lawng ah si loin a min ca zongah a si. (Ex. 3:14; 1 Sam. 12:22) The Emphasized Bible biahmaiṭhi ah J. B. Rotherham nih hitin a ṭial. Pathian min sullam nih Pathian cu a biakam tlinter awkah zei bantuk paoh ah aa canter khawh ti a langhter. A min kan theih tikah a chimmi paoh a tlinter zungzal kha kan hun hngalh ṭhan. Tuah a duhmi kha khoika hmun le zeitik caan paoh ah a tuah khawh. Zeihmanh a ca ah a harmi a um lo. Pathian cu a min sullam ning in a nung zungzal ko lai.

4. (a) Isaiah 26:4 nih zei tuah awk dah a kan forh? (b) Hi capar ah zei kong dah kan i ruah lai?

⁴ Hitin i hal: ‘Lungtak in Jehovah i bochan khawh awkah a kong ṭha tein ka hngal maw? Pathian nih hmailei ah tuah aa timhmi vialte a tuah taktak lai tiah ka zum maw?’ Isaiah 26:4 (NW) nih ‘Jehovah cu a zungzal a hmunmi Lungpi a si caah amah cu i bochan zungzal ko u’ tiah a ti. Pathian nih Baibal chan lioah a rak tuah lengmang bantukin atu ah a miphun hna nunnak ah khuaruahhar in rian a ṭuan ti lo. Asinain ‘zungzal a hmunmi Lungpi’ a si caah bochan awktlak a si ‘zungzal.’ Bochan awktlak a simi Pathian nih tuchan ah zumhfekmi a miphun kha zeitindah a bawmh hna? Lam phun thum i ruah u sih: Tukforhnak tei khawh awk bawmhnak kan hal tikah ṭhawnnak a kan pek, zeirellonak le ralchanhnak kan ton tikah a kan bawmh i lungretheihnak nih a kan nenh tikah thazang a kan pek. Mah kong kan i ruah lioah Jehovah naa bochannak zeitin na fehter khawh kha ṭha tein ruat.

Thil Ṭhalo Tuah awk Tukforh Na si tikah Pathian i Bochan

5. Zei kong ah dah Pathian i bochan a har men lai?

⁵ Pathian nih a kan kamhmi Paradis le thawhṭhannak kong ahcun Jehovah kan i bochan. Asinain ziazalei Pathian phunglam zulh cu a ṭha ti le lunglawmhnak taktak a kan pek khawh ti lungtak in zumh cu a har kho men. Solomon siangpahrang nih hitin a kan forh: “[Jehovah] kha na lung chung dihlak in i bochan law nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.” (Ptb. 3:5, 6) “Kalnak lam kip” le “lam” timi bia hi i cinken. Kan i ruahchanmi lawng ah si loin kan nunnak lam kip ah Pathian kan i bochan langhter a hau. Tukforhnak kan ton tikah Pathian kan i bochan zeitindah kan langhter khawh?

6. Ruahnak ṭhalo hrial awk kan biakhiahnak zeitindah fehter khawh a si?

⁶ Ṭhatlonak hrial ti tikah lung chung in ruah lo zong aa tel. (Rom 8:5; Efesa 2:3 rel.) Cu a si ahcun thil ṭhalo ruah lo awk na biakhiahnak zeitindah na fehter khawh? Hi lam panga hi ruathmanh: 1. Thlacam in Pathian kha bawmhnak hal. (Matt. 6:9, 13) 2. Baibal chung Jehovah bia a ngaimi le a ngai lomi hna kong le an tonmi thil kong kha ruat law i cinken.a (1 Kor. 10:8-11) 3. Sualnak tuahnak nih nangmah le na dawtmi zei lungfahnak dah an pek khawh hna kha ruat. 4. Jehovah nih a salle pakhatkhat sualnak an tuah tikah zeitin a intuar lai kha ruat. (Salm 78:40, 41 rel.) 5. Zumhfekmi pakhat nih mi hmai ah le amah lawng a um lioah thil ṭhalo a hrial i thil ṭha a tuahmi Jehovah nih a hmuh tikah zeitlukin dah aa lawmh lai kha ruat. (Salm 15:1, 2; Ptb. 27:11) Nang zong Jehovah naa bochan na langhter khawh.

Zeirellonak le Ralchanhnak Ton tikah Pathian I Bochan

7. Jeremiah nih zei hneksaknak dah a rak ton i a caan ah zeitindah a um?

⁷ Unau tampi cu harnak a tamnak lohmun ah Pathian rian an ṭuan. Profet Jeremiah zong Judah pennak a rawh lai a buaituk lioah rian a rak ṭuan ve. Pathian nih a fial bang in biaceihnak kong a thanh caah Jehovah aa bochannak nifate hneksak a rak si. Voikhat cu zumhawktlakmi a caṭialtu Baruk cu a rak phunzai. (Jer. 45:2, 3) Cu tikah Jeremiah cu a lung a rawk maw? A lung a rawh caan zong a um tawn. Hitin a au: “Ka rak chuah ni kha chiatserh si ko seh! . . . Zeicahdah ngaihchiatnak le retheihnak lawng hmuh awkah le ka chan cu ningzahnak lawngin hman awkah ka nu paw chungin ka rak chuah hnga?”—Jer. 20:14, 15, 18.

8, 9. Jeremiah 17:7, 8 le Salm 1:1-3 ning in thei ṭha tlai zungzal awkah zeidah tuah awk a si?

⁸ Asinain Jeremiah cu a lung a dong lo. Jehovah kha aa bochan zungzal. Cucaah Jeremiah 17:7, 8 ah ṭialmi Jehovah chimmi hi bia a tlin hi zumhfekmi profet nih a hmuh: “Keimah kha a ka bochan i a ka hngatchanmi cu thluachuahnak ka pek lai. Amah cu tikam phunmi thingkung bantuk, tiva kam i hram a zammi bantuk a si. Vaupi ni a chuah tikah, ṭih awk zeihmanh a ngei lo, a hnah cu hring dildel in an um zungzal ko. Khuakhen kum a tlun tikah a zei a poi lo i a thei zong a dong lo.”

⁹ “Tikam phunmi thingkung” asiloah kahcham ti lakmi dum ah cinmi thingkung bantukin Jeremiah cu ‘a thei a dong bal lo.’ A pawngkam ummi nihsawhtu mi ṭhalo hna ruangah a lung a dong lo. Cu nakcha cun nunnak petu “ti” kha a dawp i Jehovah nih a chimhmi paoh kha ṭha tein a ngaih. (Salm 1:1-3 rel; Jer. 20:9) A hlei in harnak a tamnak lohmun ah Pathian rian a ṭuanmi kan caah Jeremiah cu zohchunhawk ṭha a si. Harnak a tamnak hmun i a ṭuanmi na si ahcun ‘Pathian min phuannak’ ah inkhawhnak a kan pe khotu Jehovah kha fakpi in i bochan zungzal.—Heb. 13:15.

10. Zei thluachuah dah kan hmuh, zei bia dah kan i hal awk a si?

¹⁰ Jehovah nih ni hmanung bik caan ah kan tonmi harnak inkhawh awk bawmtu tampi a kan pek. Mah lakah holh phun tampi in le dik hmaan te’n lehmi Baibal tling aa tel. Cun zumhawk a tlakmi le a fimmi sal hmang in a caan hmaan tein thlarau rawl tampi zong a kan pek. Pumhnak le civui ah zumtu khat pawl he thazang a pemi hawikomhnak zong kan hmu. Mah a kan pekmi in ṭhatnak naa lak maw? Aa lakmi hna cu “lunglawm in hla an sa lai.” Asinain Pathian bia a ngai lomi hna cu ‘lungkuai in an ṭap lai.’—Isa. 65:13, 14.

Lungretheihnak Ton tikah Pathian I Bochan

11, 12. Vawleicung harnak zoh tikah zeidah fimnak lam taktak cu a si?

¹¹ Chimchung bia bantukin minung cu harnak tilet nih a kan den chin lengmang. (Matt. 24:6-8; Biat. 12:12) Tilian a tlun tikah mi cu tlang asiloah inncung tibantuk a sannak kip ah an kai. Cu bantukin vawlei ah harnak a tam chin tikah mi tampi nih hmun sang tiah an ruahmi tangka, nainganzi, biaknak, science le fimthiamnak ah himnak an kawl. Asinain cu thil hna nih himnak taktak a pe kho hna lo. (Jer. 17:5, 6) Jehovah salle tu cu ‘zungzal a hmunmi Lungpi’ ah himnak taktak an hmu. (Isa. 26:4) Salm caṭialtu nih hitin a chim: “Khamhnak ka hmuhmi le upatnak ka hmuhmi cu [Jehovah] thawng lawnglawng in a si; amah cu a ṭhawngmi lungpi ka himnak a si.” (Salm 62:6-9 rel.) Mah Lungpi kha kan himnak zeitindah kan siter?

¹² Minung fimnak he aa ralchan tawnmi Jehovah Bia kan zulh tikah a sin kan i bek a si. (Salm 73:23, 24) Tahchunhnak ah, minung fimnak aa bochanmi nih hitin an chim tawn: ‘Na nunnak caan tawite ah nuam tein nung.’ ‘Rian ṭha hmuh i zuam.’ ‘Tangka tampi’n khong.’ ‘Hihi caw, mah zong khi caw.’ ‘Khual tlawng law nuam tein nung.’ Asinain Pathian fimnak a zulmi nih hi ruahnak cheuhnak hi an zulh: “Vawleicung thil a tawngthammi hna nih khan vawleicung thil hi tlamtling in kan tawngtham manh hna lai lo ti bantuk in um hna seh. Zeicahtiah vawlei hi atu bang hin cun saupi a um ti lai lo.” (1 Kor. 7:31) Cu bantukin Jehovah biaknak kha biapi bik chiahnak thawng in a him taktaknak ‘vancung khua ah chaw khon’ awk Jesuh nih a kan forh.—Matt. 6:19, 20.

13. 1 Johan 2:15-17 kha i cinken in zei bia dah kan i hal awk a si?

¹³ “Vawlei” le “a chung thilri” pawl na hmuhning nih Pathian naa bochan taktak a langhter maw? (1 Johan 2:15-17) Vawlei pekmi thil nakin thlaraulei thil le Pennak rian tam deuh ṭuannak kha biapi deuh ah na chia maw? (Fil. 3:8) ‘Mit fim’ tein chiah naa zuam maw? (Matt. 6:22) A hleiin chungkhar zohkhenh ding rian na ngeih ahcun Pathian nih a daithlang lomi le ṭuanvo a lami siseh ti an duh. (1 Tim. 5:8) Asinain a salle nih a rawk dengmi Satan vawlei si loin amah kha lungthin dihlak in rak ka bochan hna seh ti a duh.—Heb. 13:5.

14-16. ‘Mit fim’ tein chiahnak le Pennak hmasa bik chiahnak in cheukhat cu zei ṭhatnak dah an hmuh?

¹⁴ Fa pathum a ngeimi Richard le Ruth kong hi ruathmanh. Richard nih hitin a chim: “Jehovah rian kha mahnak tam deuh in ṭuan kho ding ka si. Kan khuasak a ṭha nain Pathian caah caan tlawmpal lawng ka pek caah ka lung a ṭha lo. Mah kong ah thla kan cam i tangka lut chuak kan tuak dih hnu ah ka rian ṭuan caan ṭhumh awk bia kan khiak. Kan ram chung caan a har liopi a si nain ka rian bawi sinah zarh khat ah nili lawng rianṭuannak nawl ka hal. Kan zung bawi cu a hna a tla i mah thla chung ah cutin rian ṭuan ka thawk colh.” Atu ah Richard cu zeitindah a um?

¹⁵ Hitin a chim: “Ka hmuhmi tangka cu hlan nakin 20% a tlawm deuh nain chungkhar he umṭinak le fale cawnpiaknak caan kum khat ah ni 50 ka hmu cang. Phungchimnak ah let hnih in kaa tel kho, Baibal cawnpiaknak let thum ka tuah khawh i Khrihfabu caah caan tam deuh ka pek khawh. Cun ka fale ka zohkhenh khawh deuh hna caah Ruth cu manhcaan hmaikal a ṭuan kho lengmang. A si khawh chung paoh hitin um ding bia ka khiak.”

¹⁶ An fanute he a ummi Roy le Petina cu caantling rian ṭuan khawh awkah vawlei rian an ṭuanmi kha an ṭhumh. Roy nih hitin a chim: “Kei cu zarh khat ah nithum ka ṭuan i ka nupi cu nihnih a ṭuan. Cun inn zohkhenh a fawi deuh nakhnga ṭaihkhaan ah kan i ṭhial. Fapa le fanu kan ngeih hlan ah hmaikal kan rak ṭuan i hmaikal ṭuan duhnak lungthin kan ngei peng. Cucaah kan fale an cutzat tikah caantling rian kan ṭuan ṭhan. Kan hmuhmi thluachuah cu tangka zeizat he hmanh tahchunh khawh a si lo.”

“Pathian Daihnak” nih Na Lungthin Veng ko seh

17. Ton laimi hngalh khawh a si lonak he aa tlaiin Baibal nih zeitindah an hnemh?

¹⁷ ‘A caan le hmuh chung khawh lomi’ thil ruangah thaizing ah zei kan ton lai ahohmanh nih kan hngal kho lo. (Pct. 9:11) Asinain thaizing kong hngalh khawh lo ruangah Pathian he pehtlaihnak ṭha a ngei lomi hna bantukin lungrethei in kan um awk a si lo. (Matt. 6:34) Lamkaltu Paul nih hitin a ṭial: “Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. Cun Pathian daihnak, minung hngalhnak a lonhtu nih cun, . . . nan lungthin le nan ruahnak cu him tein a chiah lai.”—Fil. 4:6, 7.

18, 19. Pathian nih zei lam hna in dah a kan hnemh? Tahchunhnak chim.

¹⁸ Harnak a tongmi unau tampi cu Jehovah sinin a rami chunglei daihnak an ngei. Unaunu pakhat nih hitin a chim: “Pumhlaitu nih thi rawnh cohlan awkah a ka hnek lengmang. A ka chawnh fate ‘thi rawnh duh lo cu hruh a si’ a ti lengmang. Cuti a ka ti tik le caan dang ah Jehovah sinah a thli tein thla ka cam i Pathian nih lung daihnak a ka pek. Lung bantukin a ṭhawngmi ah kaa hmu. Ka thi a tlawm i ka tha a der nain ka dirhmun kong Baibal in fiang tein ka chim khawh.”

¹⁹ Pathian nih kan herhmi bawmhnak kha zumtu khat hna hnemhnak le a caan hmaan tein pekmi thlarau rawl in a kan pek tawn. Unau pakhatkhat nih “mah capar hi ka herhmi bak a si. Keimah ca hrim ah an ṭialmi a si!” tiah an chim kha na theih bal ko lai. Kan sining le kan herhmi zei a si zong ah Jehovah kan i bochan ahcun kan cungah a dawtnak a langhter lai. Zeicahtiah kannih cu a “tuu” kan si i a min putu ah a kan thimmi kan si.—Salm 100:3; Johan 10:16; Lam. 15:14, 17.

20. Satan vawlei hrawh a si tikah Jehovah salle cu zeicah himnak an hmuh lai?

²⁰ A rannak in a ra liomi ‘Jehovah thinhunnak ni’ ah Satan vawlei nih aa bochanmi thil vialte cu hrawh an si lai. Sui, ngun le a dang thil mansung nih zei himnak hmanh a pe kho hna lai lo. (Zef. 1:18; Ptb. 11:4) ‘A zungzal a hmunmi Lungpi’ lawng himnak pe khotu a si lai. (Isa. 26:4) Cucaah Jehovah dinnak lam zulhnak, zei rellonak le ralchanhnak ton buin Pennak kong thanhnak le kan lungretheihnak vialte a sinah chiahnak thawng in lungtak in Jehovah kan i bochan langhter u sih. Cutin kan tuah ahcun ‘him tein kan um lai i vanchiatnak zeihmanh ṭih loin, zalong tein kan um lai.’—Ptb. 1:33.

[A Tanglei Fianternak]

Na Fianter Kho Maw?

• Thil ṭhalo tuah awk tukforh kan si tikah

• Zei rellonak le ralchanhnak ton tikah

• Kan lungre a theih tikah

• zeitindah Pathian kan i bochan khawh?

[Cahmai 13nak i hmanthlak]

Pathian phunglam zulhnak nih lawmhnak a hmuhter

[Cahmai 15nak i hmanthlak]

‘Jehovah cu a zungzal a hmunmi Lungpi a si’