Pathian Dinhnak Chung Ah Na Lut Cang Maw?

“Pathian bia cu a nung i a ṭhawng.”—HEB. 4:12.

1. Tuchan ah Pathian dinhnak chung luh khawhnak lam khat cu zeidah a si, asinain zeicah cuti tuah cu a har men lai?

JEHOVAH nawl kan ngaih le a bupi he rian kan ṭuanṭi ahcun Pathian dinhnak ah kan lut kho ti kha a hmasa capar ah kan i ruah cang. Chim cu a fawi nain tuah tu cu a har. Tahchunhnak ah, tuah kan duhmi thil pakhatkhat cu Jehovah duh lomi a si ti kan hngalh tikah a hmasa ahcun a nawl ngaih cu kan i harh ko lai. Cuti kan si ahcun ‘nawl ngaih’ kan cawn a hau. (Lam. 5:29) Hi capar ah zeitik caan paoh ah nawl a ngaimi kan si langhter khawhnak thil sining cheukhat kan i ruah lai.

2, 3. Jehovah mithmuh ah duhnungmi kan si nakhnga zeidah tuah a herh?

² Baibal na rel i thlen na herhnak zawn na hmuh tikah na tuah maw? Pathian nih a bupi chung ah ‘miphun vialte chung in duhnungmi thil’ a pumh hna lai tiah Baibal nih a chim. (Hag. 2:7, NW) Kan lak i tam deuh cu biatak kan rak theihka ah thil ṭhalo a tuahmi kan si i duhnungmi kan rak si lo. Asinain Pathian le a Fapa kan dawt hna i Pathian lungton kan duh caah kan lungput le kan ziaza kan i thleng. A herhmi thlennak tuah khawh awkah Jehovah sinah bawmhnak kan hal i fakpi in kan i zuam caah a donghnak ah tipil kan ing i Jehovah mithmai ṭha kan hmu.—Kolose 1:9, 10 rel.

³ Asinain tipil kan in hnu zong ah mitling lo kan si rih ko. Cucaah thlennak tuah le thil ṭha tuah awkah fakpi in i zuam a herh. Asinain Pathian mithmuh ah duhnungmi si kan i zuam zungzal ahcun kan bawmh hna lai tiah Jehovah nih bia a kan kamh.

Chimhhrin Kan Herh Tikah

4. Thlen kan herhnak zawn hngalh awkah Jehovah nih zei lam phunthum dah a hman?

⁴ Kan nunnak ah thlennak kan tuah hlan ah zei zawn ah dah thlen ka herh ti kan hngalh hmasa a hau. Kan hngalh khawh nakhnga Jehovah nih lam phunphun in a kan bawmh. Pumhnak i phungchimmi le kan cauk i capar hmang in kan lungthin le kan ruahnak thlen a herhmi hngalh awk a kan bawmh. Asinain phungchimmi kan ngaih le cauk kan rel hmanh ah i thlen ding kan hngalh lo ahcun Jehovah nih zumtu khat hmang in a kan chimh khawh men.—Galati 6:1 rel.

5. Chimhhrin kan si tikah zeitindah kan leh khawh men? Khrihfa upa pawl nih zeicah a kan chimhhrinh awk a si?

⁵ Mitling lo a si vemi pakhat nih a kan chimhhrin tikah fim ngai le dawtnak he a si hmanh ah cohlan a har. Asinain Galati 6:1 ah kan hmuh bang in kanmah kha “nemnak” he chimhhrin awkah Khrihfa upa pawl kha Jehovah nih nawl a pek hna. Mah kha ṭha tein kan cohlan ahcun Pathian mithmuh ah duh a nung deuhmi kan hung si lai. Jehovah sin thla kan cam tikah mitling lo kan si tiah kan chim tawn. Asinain Khrihfa upa nih kan palhnak a kan chimh tikah kan i silhnalh, thiam kan i coter, a kan rem lo caah a si kan ti i a kan chimhhrin ning zong sual kan phawt. (2 Si. 5:11) Cun in awk a harmi kong a kan chimh tikah kan thin a hung men lai. Tahchunhnak ah, kan chungkhar mi an palhnak, kan thil hruk ning, thianhlimhnak kong le nuamhsaihnak kan tuahmi kong hna ah a kan chimhhrin men lai. Cutik ah kan thin a hun ahcun chim lo awk zong kan chim sual khawh, mah nih kanmah theng lung ṭhat lo in a kan umter khawh i a kan chimtu zong a ngaih a chiatter khawh. Asinain a hnu kan lung a dam ṭhan tikah a kan chimhmi cu kanmah ṭhatnak ca a si kha kan hun hngalh ṭhan.

6. Pathian Bia nih “minung lungthin duhnak le ruahnak vialte” zeitindah a hngalh dih?

⁶ Hi capar i a tlangpi Baibal cang nih Pathian Bia cu “a ṭhawng” tiah a ti. Pathian bia cu minung nunning thlen khawhnak ṭhawnnak a ngei. Tipil kan in hlan ah kan nunning a kan thlen khawh bantukin kan in hnu zong ah a kan thlen khawh. Paul nih Hebru Khrihfa hna sin a cakuat ah Pathian bia nih “nunnak le thlarau an i tonnak tiang, hliahcang le thlek an i tonnak tiang a cheu khawh. Minung lungthin duhnak le ruahnak vialte kha a hngalh dih” tiah a ṭial. (Heb. 4:12) “Nunnak” timi cu lenglei kan umtu a si i “thlarau” timi cu kan lungchung ummi a si. Baibal in Pathian nih tuahter a kan duhmi kan hngalh tikah kan lungchung ummi kha kan tuahsernak ah a lang. Asinain a caan ah kan tuahsernak le kan lungchung ummi aa dang tawn maw? (Matthai 23:27, 28 rel.) A tanglei thil sining hna zeitindah na leh lai ruathmanh.

Jehovah Bupi he Siangrual tein Um

7, 8. (a) Judah mi Khrihfa cheukhat nih zeiruangah dah Moses Nawlbia cheukhat an zulh? (b) Annih cu Jehovah duhmi ning in an nung lo tiah zeicah kan chim khawh?

⁷ Phungthlukbia 4:18 bia hi ṭha tein kan hngalhmi a si: “Miding mi hna lam cu zingka ceunak, chun laicer tiangin a ceu chin lengmangmi bantuk a si.” Mah nih kan tuahsernak le Pathian nih tuahter a kan duhmi kong kan theihhngalhnak cu a ṭhangcho chin lengmang lai ti a langhter.

⁸ A hmasa capar ah kan i ruah cang bantuk in, Judah mi tampi nih Jesuh thih hnu cun Moses Nawlbia zulh a hau ti lo timi kha cohlan an i harh. (Lam. 21:20) Paul nih Khrihfa pawl cu Nawlbia tang ah kan um ti lo ti kha fim ngai in a chimh hna nain cheukhat nih an cohlang lo. (Kol. 2:13-15) Annih nih Nawlbia cheukhat kan zulh ahcun Judah phung a zulmi hna hremnak kan tong lai lo tiah an ruah caah a si men lai. Paul nih Hebru Khrihfa hna kha Pathian duhmi ning in nan nun lo chung paoh cu Pathian dinhnak chung ah nan lut kho lai lo tiah fiangte in a chimh hna.a (Heb. 4:1, 2, 6; Hebru 4:11 rel.) Jehovah mithmai ṭha hmuh awkah amah kha lam dang in biak awk a si kha an cohlan a hau.

9. Baibal fianternak an thlen tikah zei bantuk lungput dah kan ngeih awk a si?

⁹ Tuchan ah, zumhawk a tlakmi le a fimmi sal nih Baibal fianternak cheukhat kha an thlen. Mah kha lunglawm tein cohlan in Jehovah nih sal bu a hman hna ti kan zumhnak a fehter chin awk a si. Zumhawk a tlakmi le a fimmi sal a aiawhtu, Uktu Bu nih Baibal fianternak cheukhat thlen a herh ti an hmuh tikah thlen loin an um lo. Thlennak tuah ruang ah mi nih a kan soi lai ti an hngalh nain Pathian duhmi ning in tuah tu kha biapi ah an chiah. Baibal fianternak an thlen tikah zeitindah na lehrulh?—Luka 5:39 rel.

10, 11. Phungchim ning a thar hman awk an chim tikah cheukhat nih zeitin an rak leh, mah in zeidah kan hngalh khawh?

¹⁰ A dang tahchunhnak pakhat zohhmanh u sih. A luancia kum 100 lio hrawng ah vantlang phungchim a thiammi Baibal Siangngakchia cheukhat nih vantlang phungchimnak cu a ṭha bikmi phungchim ning a si tiah an ruah. Aa pummi nih an thangṭhat hna caah vantlang phungchim cu an duh ngai. Asinain, a hnu ah Jehovah nih innkhat hnu innkhat phungchim ning tel in lam phunphun in phung chim hna seh ti a duh kha an hun hngalh. Mah kha phungchim a thiammi cheukhat nih an duh lo. Annih cu vantlang phungchimnak i phung an chim tikah mi nih Jehovah a dawmi le nawlngaimi in an hmuh hna, asinain an tuahsernak in nawl an ngaih lo an langhter. An tuahsernak nih Jehovah lung a lawmhter lo. A hnu ah Jehovah bupi kha an chuahtak.—Matt. 10:1-6; Lam. 5:42; 20:20.

¹¹ Bupi cung zumhfek tein a ummi ca zong ah mi sin phungchim cu a har. A hlei in chimka ah a har khun. Asinain nawl an ngai. A hnu ah ṭihphannak kha an tei khawh i Jehovah thluachuah tampi an hmu. Na hman bal lomi phungchim ning hman awkah sal bu nih an chim tikah zeitindah na lehrulh? Lungtho tein zulh naa zuam maw?

Dawtmi Pakhatkhat nih Jehovah a Kaltak tikah

12, 13. (a) Aa ngaichih lomi misual kha bu chung in chuah u tiah zeicah Jehovah nih a ti? (b) Khrihfa nulepa cu zei a harmi thil dah an ton?

¹² Pathian lungton awkah pumsalei, ziazalei le thlaraulei ah thian a herh ti kha na hna a tla ko lai. (Titas 2:14 rel.) Asinain a caan ah cutin um cu a har kho men. Tahchunhnak ah, zumhfekmi nuva hna an fapa ngeihchunte nih biatak a kaltak hei ti u sih. Jehovah le a nu le a pa he pehtlaihnak ṭha ngeih nakin “sualnak chung i caan tawite chung i nawmh” a duh deuh caah bu chung in an chuah.—Heb. 11:25.

¹³ A nu le a pa cu an ngaih a chia tuk. Bu chung chuahnak kong he aa tlaimi hi Baibal cang cu an hngalh: “Khrihfa ka si ve aa ti ṭung i sualnak a tuahmi, a hak a kaumi, siasal a biami, mifir a simi, hi hna he hin nan i kom lai lo ka ti duhnak a si; cu bantuk mi hna he cun rawl hmanh hmunkhat ah ei ṭi hlah u.” (1 Kor. 5:11, 13) “Cu bantuk mi” timi ah innkhat i a um lomi chungkhar mi zong an i tel ti an hngalh. Asinain an fapa an dawt tuk caah hitin an ti men lai: ‘Kan fapa cu kan chawnhbiak lo ahcun Jehovah sin kir ṭhan awkah zeitindah kan bawmh khawh lai? Kan chawnh lawng ah pei kan bawmh khawh lai cu.’b

14, 15. Bu chung chuahmi fale chawnh le chawnh lo kong nulepa nih bia an khiah tikah zeidah an i cinken awk a si?

¹⁴ Mah hna nuva an ngaihchiat kan hmuh tikah kan ngaih a chia ve. An fapa cu a nunning thlennak nawl a ngei ko, asinain a nu le a pa le zumtu unau pawl he pehtlaihnak ṭha ngeih nakin thil ṭhalo tuah tu aa thim. A nu le a pa nih bawmh an duh nain an fapa nih thil ṭhalo tuah kha aa thimmi a si caah zeihmanh an tuah kho lo. A nu le a pa zeicah an lung a fah kha hngalhthiam khawh a si ko.

¹⁵ A nu le a pa nih zeidah an tuah lai? Jehovah nawl pekmi kha an ngai lai maw? Asiloah “chungkhar he aa tlaimi kongkau a si” ti in an fa kha an chawnh zungzal lai dah? Mah kong bia an khiah tikah Jehovah nih zeidah tuah hna seh ti a duh hna kha an i cinken awk a si. Jehovah nih a duhmi cu a bupi thianter le a si khawh ahcun sualnak a tuahmi bu chung kir ṭhan kha a si. Khrihfa nulepa nih Pathian duhmi an duh ve kha zeitindah an langhter khawh?

16, 17. Aaron kong in zeidah kan hngalh khawh?

¹⁶ Moses upa, Aaron zong a fapa pahnih ruang ah a har ngaimi thil sining a tong. A fapa Nadab le Abihu nih Jehovah sinah a thiang lomi mei an khangh caah Jehovah nih dan a tat hna i an thi. A fale cu an thih cang caah pehtlaihnak an ngei kho ti lo. Asinain Aaron le a chungkhar caah a har ngaimi thil a um. Jehovah nih Aaron le a felmi a fale kha hitin nawl a pek hna: “Nan sam i thlah hlah u, [ṭah in] nan puan kha thlek hna hlah u, nan thih sual i mibu dihlak cungah [Jehovah] thinhunnak a rat sual nakhnga lo.” (Lev. 10:1-6) Mah in zeidah kan hngalh khawh? Zumhfek lomi kan chungkhar mi nakin Jehovah kan dawt deuh awk a si.

¹⁷ Tuchan ah Jehovah nih a nawl a buarmi kha thih dan a tat colh hna lo. Ngaihchihnak caanṭha dawtnak in a pek hna. Asinain nulepa nih Jehovah nawl ngai loin bu chung chuahmi an fale kha a herh setsai lo in an chawnh lengmang hna ahcun Jehovah zeitindah a um lai?

18, 19. Chungkhar mi hna nih Jehovah cung zumhfek tein an um ahcun zei thluachuah dah an hmuh lai?

¹⁸ Bu chung in chuah a rak simi hna nih kan chungkhar le kan hawile cu zumhfek tein an um i a kan chawnh lo caah bu chung kan luh ṭhan khawhmi a si tiah an chim. Tahchunhnak ah, mino unaunu pakhat nih Khrihfa upa hna sinah ka nunning kaa thlennak a ruang pakhat cu ka ṭa tuahsernak ruang ah a si tiah a chim. Bu leng i a um lio ah a ṭa cu Jehovah cung ah zumhfek tein a um i a far kha a chawn lo. Mah nih a farnu cu Khrihfabu ah kir ṭhan ding a bawmh.

¹⁹ Kannih tah zeidah kan tuah awk a si? Zei bantuk thil sining paoh ah Jehovah nawl kan ngaih a hau. Mitling lo kan si caah a caan ah a har kho men. Asinain Jehovah nih a kan fialmi paoh cu kan ca ṭhatnak a si kha kan zumh awk a si.

“Pathian Bia cu A Nung”

20. Hebru 4:12 kha zei lam pahnih in dah kan fianter khawh? (A tanglei fianternak zoh.)

²⁰ Paul nih “Pathian bia cu a nung” tiah a ṭial lioah Baibal kong a chimmi a si lo.c A hnu hmai bia zoh tikah Pathian biakam kong a chimmi a si. Pathian nih bia aa kam tikah a biakam tlinter lo in a um lo ti kha Paul nih a chim duhmi a si. Jehovah nih profet Isaiah sin ah a biakam kong kha hitin a chim: “Ka kaa in a chuakmi bia cu . . . ka sinah a lawngin a ra kir ṭhan lai lo. . . . ka thlahhnawh chanmi thil ah khan a tlam a tling lai.” (Isa. 55:11) Cucaah kan i ruahchanmi caan ah Pathian biakam a tlin lo tikah lungsau lo in kan um awk a si lo. Jehovah cu a biakam tlinter awkah atu tiang “rian a ṭuan zungzal” ko.—Johan 5:17.

21. Hebru 4:12 nih Jehovah rian ṭuan peng awkah tar pawl kha zeitindah a bawmh hna?

²¹ “Mibu nganpi” chung ah aa telmi zumhfekmi tar pawl cu Jehovah rian kum tampi chung a ṭuanmi an si. (Biat. 7:9) Hi chan ṭhalo cu hi tluk in a sau lai tiah an rak ruat lo. Asinain an lung a dong lo. (Salm 92:14) “Pathian Bia cu a nung” i a biakam cu a tling hrimhrim lai ti an zumh. (Heb. 4:12) Pathian cu vawlei le minung caah aa tinhmi tlinter awkah rian a ṭuan zungzal ti an hngalh. Pathian nih aa tinhmi biapi tuk ah a chiah caah biapi ah kan chiah ve ahcun a lung aa lawm lai. Jehovah cu aa dinh ni, ni sarihnak ni chung ah aa tinhmi tlinter awkah zeihmanh nih a dawn kho lai lo. Cun a miphun nih an bu ning in aa tinhmi tlinter awkah an bawmh lai kha Pathian nih a hngalh. Nangtah Pathian dinhnak chung ah na lut cang maw?

[A Tanglei Fianternak]

Naa Cinken Maw?

• Tuchan ah Pathian dinhnak chung luh awkah zeidah kan tuah a herh?

• Baibal in Pathian nih tuahter a kan duhmi kan hngalh tikah Pathian lungton kan duh zeitindah kan langhter khawh?

• Zei bantuk thil sining ah dah Jehovah nawl ngaih a har khawh, asinain zeicah ngaih a herh?

• Hebru 4:12 kha zei lam pahnih in dah fianter khawh a si?

[Cahmai 31nak i hmanthlak]

A nu le a pa cu an ngaih a chia tuk!