Khrihfabu Rian Ṭuan Khawh Awkah Unaupa Kha Bawm Hna
“Siangngakchia nih a cawnnak kha a dih tikah cun a saya bantuk a si lai.”—LUKA 6:40.
1. Jesuh nih vawleicung a um lio ah Khrihfabu zeitindah a dirh?
LAMKALTU Johan nih Jesuh nunnak kong a ṭialmi a donghnak ah hitin a ṭial: “Jesuh nih a tuahmi a dang tampi a um ko rih. An dihlak in pakhat hnu pakhat in ṭial si hna seh law, an ṭialnak cauk cu vawlei nih hin a tlum hna hnga lo, tiah ka ruah.” (Johan 21:25) Jesuh cu vawleicung caan tawite a nunchung ah fakpi in rian a ṭuan. A ṭuanmi ah van a kai hnu in phungchimnak rian a hruai kho hngami pa pawl kawl le cawnpiak zong aa tel. C.E., 33 i van a kai tikah phungchim rian a ṭuan hngami Khrihfabu hmete a dirh cang. A rauhhlan ah Khrihfa pawl cu a thong in an hung karh.—Lam. 2:41, 42; 4:4; 6:7.
2, 3. (a) Khrihfabu rian a ṭuan hngami unaupa pawl zeicah a herh tuk? (b) Hi capar ah zei kong dah kan i ruah lai?
2 Tuchan ah vawleicung pumpi ah Khrihfabu 100,000 leng a um cang i phungchimtu nuai sarih leng kan si cang. Cucaah Khrihfabu a hruai kho hngami unaupa le Khrihfa upa a herh tuk. Mah rian ṭuan a duhmi cu “rian ṭha ngai a duh a si” caah thangṭhat awk an si.—1 Tim. 3:1.
3 Unaupa pawl nih Khrihfabu rian an ṭuan khawh nakhnga tlinh an herhmi sining a um. Catang, hmuhtonnak le thilti khawhnak in mah sining kha tlinh khawh a si lo. Baibal nih a halmi hna sining an ngeih lawng ah an tlinh khawh lai. Unaupa pawl kha thlaraulei ṭhancho awk le Khrihfabu rian ṭuan khawh awkah zeitindah bawmh khawh an si? “Siangngakchia nih a cawnnak kha a dih tikah cun a saya bantuk a si lai” tiah Jesuh nih a ti. (Luka 6:40) Hi capar ah Jesuh nih a zultu pawl a cawnpiak hna ning cheukhat le mah in zeidah kan i cawn khawh timi kong kan i ruah lai.
“Ka Hawile” tiah Kaan Auh hna
4. Jesuh nih a zultu pawl caah hawi ṭha a si kha zeitindah a langhter?
4 Jesuh nih a zultu pawl kha nautat lo in a hawi bantuk in a pehtlaih hna. Anmah he umṭi kha a duh, a zumh hna i ‘a Pa sinin a theihmi vialte kha a chimh dih hna.’ (Johan 15:15 rel.) A zultu pawl nih “na ratnak ding hmelchunhnak le atu chan donghnak ding hmelchunhnak ah zei thil dah a um hna lai?” tiah an halmi a leh hna tikah zeitlukin dah an i nuamh lai khi ruathmanh. (Matt. 24:3, 4) Jesuh nih a hmuhning le a ruahning zong a chimh hna. Tahchunhnak ah, Jesuh cu tlaih a si lai zan ah Piter, Jeim le Johan he Gethsemane dum ah an kal i lungrethei ngai in fakpi’n thla a cam. A zultu pawl nih zeidah a cam ti cu an thei lai lo nain a lungre a theih tuk tu cu an hngalh ko lai. (Mar. 14:33-38) Jesuh muihmai aa thlenmi zong an rak hmuh i mah in thazaang an rak hmu tuk ko lai. (Mar. 9:2-8; 2 Pit. 1:16-18) Jesuh he pehtlaihnak ṭha an ngeihmi nih a biapimi an rian ṭuan khawh zungzal awkah thazaang a pek hna.
5. Khrihfa upa nih unau pawl kha zeitindah an bawmh hna?
5 Tuchan Khrihfa upa zong nih Jesuh bantukin unau pawl kha an komh hna i an bawmh hna. An dawt hna le an siaherh hna kha an langhter. Unau pawl kha an zumh ko hna nain chim awk a si lomi kong cu an chim hna lo, asinain Baibal an hlathlainak in an hngalhmi kong kha cu an chimh hna. Anmah nakin a ngakchia deuhmi bu rianṭuantu pawl kha an nautat hna lo. Thlaraulei ah a ṭhangchomi le Khrihfabu ṭhatnak caah anmah he rian a ṭuanṭimi in an hmuh hna.
‘Nan caah Zohchunhawk Kaan Tuahpiak hna’
6, 7. Jesuh nih a zultu pawl caah zei zohchunhawk ṭha dah a chiah i mah cu a zultu pawl cungah zeitindah huham a ngeih?
6 Jesuh zultu pawl nih Pathian Bia kha an duh kho nain an sining le an nunphung nih an ruahnak a tei tawn. (Matt. 19:9, 10; Luka 9:46-48; Johan 4:27) Asinain Jesuh nih a soi bal hna lo, an cung ah a thin zong a hung lo. An tuah khawh lomi thil tuah le amah nih a tuah lomi thil tuah zong a fial hna lo. A nunning in zohchunhawk ṭha a langhter.—Johan 13:15 rel.
7 Jesuh nih a zultu pawl caah zei zohchunhawk dah a chiah? (1 Pit. 2:21) Nunning sawhsawh tein a nun caah a caan kha midang caah a hman khawh. (Luka 9:58) Jesuh nih amah ruahnak cawnpiak lo in Baibal hrambunh in a cawnpiak hna. (Johan 5:19; 17:14, 17) Zaangfahnak a ngei i naih a fawi. Mi a dawt hna kha a tuahsernak in a langhter. (Matt. 19:13-15; Johan 15:12) Jesuh nunning cu a zultu pawl cung ah huham a ngei. Jeim nih Jesuh aa zohchunh caah an thah hlan tiang ralṭha tein Pathian rian a ṭuan khawh. (Lam. 12:1, 2) Johan zong nih Jesuh aa zohchunh i kum 60 leng tiang zumhfek tein a um.—Biat. 1:1, 2, 9.
8. Khrihfa upa nih pa no deuh pawl le midang caah zei zohchunhawk dah an chiah?
8 Khrihfa upa nih toidornak le dawtnak an langhternak thawng in le an caan le an thazaang mi ca an hmannak thawng in pa no deuh pawl caah zohchunhawk ṭha an chiah. (1 Pit. 5:2, 3) An zumhnak, mi an cawnpiak ning, an nunning le phung an chimning cu unau dang caah zohchunhawk ṭha a si ti an hngalh caah Khrihfa upa cu an i lawm.—Heb. 13:7.
Lamhruainak a Chimh hna i a Thlah hna
9. Jesuh nih a zultu pawl kha phungchim rian caah a cawnpiak hna ti zeitindah kan hngalh khawh?
9 Jesuh nih kum hnih chung phung a chim hnu in zultu 12 zong kha phungchim ah a thlah hna. Asinain lamhruainak a chimh hmasa hna. (Matt. 10:5-14) Voikhat cu mibu kha rawl tlawmte in a dangh hna hlan ah mi kha zeitindah ṭhutter ding a si le zeitindah rawl phawt ding a si kha a chimh hna. (Luka 9:12-17) Cucaah Jesuh nih a zultu pawl kha a fiangmi lamhruainak a chimh hna i a cawnpiak hna ti a fiang. Mah cawnpiaknak le thiang thlarau bawmhnak an hmuh caah lamkaltu pawl nih C.E., 33 in thawkmi, a kau ngaimi phungchimnak rian kha an timhlamh khawh.
10, 11. Unaupa pawl kha Khrihfabu rian ṭuan khawh awkah zeitindah kan bawmh hna lai?
10 Tuchan ah pa pakhat nih Baibal cawnpiaknak a cohlan cu thlaraulei kong cawnpiaknak a cohlan a si. Ṭha tein ca a rel khawh nakhnga bawmh a hau men lai. Baibal a cawn chung vialte bawmh a hau. Hmaante in a hun i pumh tikah Theocratic Rianṭuannak Sianginn ah i tel a herh le tipil a ing rih lomi thawngthanhtu si a herh kha a hngalh lai. Tipil a in hnu ah biakinn zohkhenhnak ah i tel ve awk cawnpiak khawh a si. Cun Khrihfa upa nih bu rianṭuantu si awkah zeidah a herh ti a hngalh nakhnga an bawmh khawh.
11 Khrihfa upa nih tipil a ing cangmi unaupa pakhat rian a pek tikah bupi rianṭuan ningcang le zeidah a tuah awk a si kha a chimh lai. Mah rian kha ṭha tein a ṭuan khawh lo ahcun sining a tlinh lo tiah Khrihfa upa nih biakhiah colh awk a si lo. Mahnak cha cun zeidah tuah a herh le zeitindah tuah awk a si kha dawtnak he a chimh ṭhan lai. Unaupa nih a rian ṭha tein ṭuan aa zuam le aa nuamh kha an hmuh tikah Khrihfa upa cu an i nuam.—Lam. 20:35.
“Lungthin Cheuhmi a Ngaimi cu Mifim an si”
12. Jesuh chimhhrinnak cu zeicah man a ngeih?
12 Jesuh nih a zultu pawl kha a herh tikah a chimhhrin hnanak thawng in a bawmh hna. Tahchunhnak ah, Jeim le Johan nih Jesuh a cohlang lomi Samaria mi kha van in mei tla sehlaw kang hna seh ti an duh tikah Jesuh nih a sik hna. (Luka 9:52-55) Jeim le Johan nu nih Jesuh kha na Pennak ah ka fapale hi hmunṭha pe hna tiah a nawl. Mah cu a fapale duhmi a si a hngalh caah Jesuh nih Jeim le Johan kha hitin a ti hna: “Ka orhlei ah anih ṭhu seh, ka kehlei ah anih ṭhu seh, ti cu keimah thim khawhmi a si lo. Cuka hmun cu ka Pa nih a timhpiakmi hna caah a si.” (Matt. 20:20-23) Jesuh chimhhrinnak cu a zungzal in a fiangmi le hmantlakmi le Baibal ah hram aa bunhmi a si. A zultu pawl kha Baibal phunglam tuaktan awk le mah ning in nun awkah a cawnpiak hna. (Matt. 17:24-27) Jesuh nih a zultu pawl an chambaunak kha a hngalh i an tuah khawh lai lomi kha aa ruahchan lo. A chimhhrin hna cu a dawt hna caah a si.—Johan 13:1.
13, 14. (a) Ahodah chimhhrin a herh? (b) Khrihfa upa nih unaupa pakhat kha zei kong hna ah dah an chimhhrin khawh?
13 Khrihfabu ca rian ṭuan a duhmi unaupa paohpaoh Baibal in ruahnak cheuh an herh caan a um tawn. Phungthlukbia 12:15 nih “lungthin cheuhmi a ngaimi cu mifim an si” tiah a ti. Mino unaupa pakhat nih Pathian rian ṭuan awkah sining ka tlinh lo timi ruahnak ka ngei, asinain Khrihfa upa pakhat nih Pathian rian ṭuan tikah sining tlinh dih taktak cu a hau lo ti hngalh awk a ka bawmh tiah a chim.
14 Khrihfa upa nih unaupa pakhat cu thlaraulei ṭhancho awkah a tuahsernak nih a dawnh ti a hmuh ahcun i remh awkah nem tein a chimh lai. (Gal. 6:1) A caan ah a ruahnak remh awkah chimhhrin a hau men lai. Tahchunhnak ah, unaupa pakhat cu a tuah khawhmi zat in a tuah men lai lo. Cu tikah Khrihfa upa nih Jesuh kong ruah awk an forh khawh. Jesuh cu phungchim rian fakpi in a ṭuanmi a si i a zultu pawl kha ka nawl i cawn u tiah a forh hna. (Matt. 28:19, 20; Luka 8:1) Unaupa pakhat cu hawi dang nakin langh deuh a duhmi a si ahcun minthan duhnak ṭih a nunnak kong Jesuh nih a zultu pawl a cawnpiakmi hna kha Khrihfa upa nih an chimh khawh. (Luka 22:24-27) Unaupa pakhat nih mi ngaihthiam aa harh men lai. Cu tikah Khrihfa upa nih a leiba tampi ngaihthiam a si nain a sal hawi batmi tlawmte, a ngaithiam lo mipa bianabia an chimh khawh. (Matt. 18:21-35) Chimhhrin a herhmi an um ahcun Khrihfa upa nih a rannak in an tuah awk a si.—Phungthlukbia 15:23 rel.
‘Pathian he aa Tlakmi Nunnak Ngeih I Zuam’
15. Unaupa cu Khrihfabu rian ṭuan khawh awkah a chungkhar nih zeitindah an bawmh khawh?
15 Khrihfa upa nih unaupa pawl kha Khrihfabu rian ṭuan khawh awkah an bawmh hna. Midang zong nih bawmh khawh a si. Tahchunhnak ah, unaupa i a chungkhar zong nih an bawmh khawh. Khrihfa upa a si cangmi zong a nupi le a fale nih an bawmh ahcun Khrihfabu rian ṭha tein a ṭuan khawh lai. A caan le a thazaang kha unau pawl caah hman a herh kha an theihthiampiak. Unaupa zong a chungkhar nih mahca ṭhatnak an hlawt caah aa lawm i unau dang zong an i lawm ve.—Ptb. 15:20; 31:10, 23.
16. (a) Unau pawl ca rianṭuan duhnak kha ahonihdah langhter awk a si? (b) Unaupa cu bu rianṭuantu asiloah Khrihfa upa si a duh ahcun zeidah a tuah lai?
16 Unaupa cu unau dang nih an bawmh khawh ko nain amah theng nih ṭuan duhnak a ngeih a langhter a hau. (Galati 6:5 rel.) Unau pawl bawmh khawh awk le phungchimnak ah tam deuh i tel khawh awkah bu rianṭuantu, Khrihfa upa si a hau lo ti cu a hmaan ko. Asinain unaupa nih bu rianṭuantu asiloah Khrihfa upa si a duh ahcun Baibal ah ṭialmi sining kha a tlinh a hau. (1 Tim. 3:1-13; Titas 1:5-9; 1 Pit. 5:1-3) Unaupa cu bu rianṭuantu asiloah Khrihfa upa si a duh nain a si rih lo ahcun zei zawn ah dah ṭhancho ka herh rih ti hngalh aa zuam a hau. Ṭhanchonak caah nifate Baibal rel le hlathlai le ṭha tein ruah a hau, lungtak in thla cam le phungchimnak ah lungtho tein i tel a hau. Cuti a tuah ahcun Paul nih Timote sin a chimmi hi bia a zulh a si: “Pathian he aa tlakmi nunnak kha ngeih i zuam zungzal.”—1 Tim. 4:7.
17, 18. Unaupa cu sining ka tlinh lai lo timi ruahnak a ngeih asiloah ṭuan duhnak lungthin a ngeih lo ahcun zeidah a tuah khawh?
17 Unaupa cu bu rianṭuantu asiloah Khrihfa upa ka si kho lai lo timi ruahnak a ngeih ah tah? Jehovah le Jesuh nih zeitlukin dah an kan bawmh ti ruah cu a ṭha. Jehovah cu “nikhat hnu nikhat kan thilrit a kan chaangtu” a si. (Salm 68:19) Cucaah unaupa kha bu rian ṭuan khawh awkah Jehovah nih a bawmh khawh. Bu rianṭuantu asiloah Khrihfa upa a si lomi unaupa nih Khrihfabu rian a ṭuan kho hngami unaupa zeitlukin dah a herh kha a ruah awk a si. Cun Jehovah sin ah thiang thlarau a hal awk a si. Mah nih lungdaihnak le sumnak a ngeihter lai i sining ka tlinh lai lo timi ruahnak ngeih lo awk a bawmh lai. (Luka 11:13; Gal. 5:22, 23) Mah zawn ruatlo in unau pawl ca rian ṭuan a duhmi unaupa pawl kha Jehovah nih thluachuah a pek hrimhrim ko hna lai.
18 Unaupa cu Khrihfabu ca rian ṭuan duhnak a ngei men lai lo. Ṭuan a duh nakhnga zeinihdah a bawmh khawh? Lamkaltu Paul nih hitin a ṭial: “Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko.” (Fil. 2:13) Ṭuan duhnak lungthin a pe khotu cu Pathian a si i a rian ṭuan khawh awkah thiang thlarau in ṭhawnnak a pek lai. (Efe. 6:10) Cun unaupa nih thil ṭha tuah ka duh nakhnga ka bawm tiah thla a cam khawh.—Salm 25:4, 5.
19. “Tuukhal pasarih le upa pariat” an um lai timi cu zei sullam dah a si?
19 Jehovah nih midang bawmh aa zuammi Khrihfa upa pawl kha thluachuah a pek hna. Cun Khrihfabu rian ṭuan duhnak a ngeimi unaupa pawl zong thluachuah a pek hna. Pathian miphun lak ah “tuukhal pasarih le upa pariat” an um lai tiah Baibal nih a ti. Cucaah Khrihfabu a zohkhenh khomi unaupa pawl a herhmi zat in an um lai kha kan zumh khawh. (Mik. 5:5, Judson) Tuchan ah unau pawl ca rian ṭuan a duhmi le Khrihfabu zohkhenh awkah cawnpiak a simi aa toidormi unaupa tampi an um. Mah nih Jehovah thang a ṭhatter i thluachuah tampi a kan hmuhter.
Zeitindah Na Leh Lai?
• Jesuh nih a zultu pawl a cawnpiak hna ning cheukhat cu zeidah an si?
• Khrihfa upa nih Khrihfabu hruaitu si awkah unaupa pawl an cawnpiak hna tikah zeitindah Jesuh an i zohchunh khawh?
• Unaupa kha Khrihfabu rian ṭuan khawh awkah a chungkhar nih zeitindah an bawmh khawh?
• Unaupa nih Khrihfabu rian ṭuan a duh zeitindah a langhter khawh?
[Cahmai 31nak i hmanthlak]
A ṭhangcho liomi Baibal na cawnpiakmi kha zeitindah na bawmh khawh?
[Cahmai 32nak i hmanthlak]
Unaupa nih Khrihfabu rian ṭuan a duh kha zeitindah a langhter khawh?