Jesuh Hliphlau Tein A Ummi Kha I Zohchunh

“Hngilh lo tein um u law thlacam tuah u.”—MATT. 26:41.

ZEITINDAH NA LEH LAI?

Hliphlau tein kan um kha kan thlacamnak nih zeitindah a langhter khawh?

Phungchimnak ah hliphlau tein kan um kha zeitindah kan langhter khawh?

Harnak ton tikah hliphlau tein um cu zeicah a biapit, cutin zeitindah um khawh a si?

1, 2. (a) Jesuh hliphlau tein a umnak he aa tlai in zei biahalnak dah a chuak? (b) A tlinglomi minung nih a tlingmi Jesuh nawl i cawn khawh a si maw? Tahchunhnak pe.

JESUH bantukin hliphlau tein um cu a si kho hnga maw? tiah na ruat men lai. Zeicahtiah Jesuh cu mitling a si. Cun a caan ah hmailei kum tampi ah a cang dingmi thil zong ṭha tein a hngalmi a si. Cu a si ah Jesuh cu hliphlau tein a um a hau taktak maw? (Matt. 24:37-39; Heb. 4:15) Mah biahalnak pahnih kha i ruah hmasa u sih. Mah tikah hliphlau tein um zeicah a biapit kha kan hngalh lai.

² A tlinglomi minung pakhat nih a tlingmi nawl kha aa cawn kho lai maw? Fimnak a cawngmi pakhat nih saya ṭha nawl aa cawn khawh bantukin aa cawn khawh ko. Thalkah a cawngka mi pakhat khi na mitthlam ah cuanter hmanh. A hmasa ahcun a hmuichon kha a kheng kho lai lo, asinain fakpi in aa zuam. Thalkah a thiammi a saya kah ning kha ṭha tein a zoh. A saya a dir dan, a kut a chiah ning le likuk hri a tlaih dan ṭha tein a zoh. A hri tlaih tikah tha zeizat chuah ding ti le thli nih thal kha zeitindah a umter khawh ti kha duhsah duhsah in a hun hngalh. Fakpi in aa zuam le a saya nawl aa cawn ahcun thal a kah tikah a hmuichon kha a hun khen deng thluahmah ko lai. Cu bantukin kannih zong Jesuh lamhruainak kan zulh le a tlingmi a nunning kan i zohchunhnak thawng in Khrihfa ṭha si kan i zuam.

3. (a) Jesuh nih hliphlau tein a um a herh kha zei a chimmi bia in dah a langhter? (b) Hi capar ah zei kong dah kan i ruah lai?

³ Jesuh cu hliphlau tein a um a hau taktak maw? A hau. Tahchunhnak ah, a thih lai zan ah zumhfekmi a zultu hna kha ‘keimah he hngilh lo tein um u’ tiah a ti hna. Cun “tukforhnak chungah nan luh nakhnga lo hngilh lo tein um u law thlacam tuah u” ti zong in a ti hna. (Matt. 26:38, NW, 41) Jesuh cu vawleicung a um lioah hliphlau tein a um zungzal. A hlei in a thih lai caan, a har tukmi caan ah hliphlau te’n um le vancung a Pa he naih te’n um a duh. A zultu pawl zong atu lawng si loin hmailei zong ah hliphlau te’n an um a herh kha a hngalh. Jesuh nih zeicah hliphlau tein um hna seh ti a kan duh kha i ruah u sih. Cu hnuah Jesuh bantukin hliphlau tein um khawhning phun thum kan i ruah lai.

Jesuh nih Zeicah Hliphlau tein Umter a Kan Duh

4. Zeicah hliphlau tein um awk a si?

⁴ Jesuh nih hliphlau tein um hna seh ti a kan duhnak a ruang pakhatnak cu hmailei ah a cang dingmi thil a dihlak in kan hngalh lo caah a si. Jesuh cu vawleicung a um lioah hmailei ah a cang dingmi thil a dihlak cun a hngal lo. Mah kha hi a bia ah kan hmuh: “Cu ni le cu caan cu zeitik ah dah a si lai, ti kha ahohmanh nih an hngal lo; vancungmi zong nih an hngal lo, Fapa zong nih a hngal hlei lo, Pa lawnglawng nih a hngalh.” (Matt. 24:36) Mah lioah “Fapa” a simi Jesuh nih hi vawlei ṭhalo a dongh lai ni le caan cu a rak hngal lo. Kannih tah zeitin? Hmailei ah a cang dingmi vialte kan hngal dih maw? Kan hngal lo. Hi vawlei ṭhalo hrawh awkah Jehovah nih a Fapa zeitik ah a thlah lai caan cu kan hngal lo. Hmailei ah a cang dingmi thil a dihlak in kan hngalh ahcun hliphlau tein um a hau hnga lo. Jesuh nih a chim bang in donghnak cu kan i rin lo caan ah ruahlopi in a ra lai, cucaah hliphlau tein um a hau.—Matthai 24:43 rel.

5, 6. (a) Pathian Pennak kong kan hngalhmi nih hliphlau tein um awk zeitindah a kan bawmh? (b) Satan kong kan hngalhmi nih hlan nakin hliphlau tein um chin awk zeicah a kan forh awk a si?

⁵ Jesuh nih hliphlau tein um hna seh ti a kan duhnak a ruang pahnihnak cu hmailei ah a cang dingmi thil tampi kan hngalh caah a si. Jesuh cu vawleicung a um lioah mi tampi hngalh lomi hmailei kong tampi a rak hngalh. Kannih cu Jesuh tluk cun kan hngal lo nain Pathian Pennak kong le Pennak nih hmailei ah zeidah a tuah lai timi kong tampi Jesuh nih a kan chimh. Mah kong kha sianginn, rianṭuannak le phungchimnak ah kan tonmi mi tampi nih an hngal lo. Cu ruangah hliphlau tein kan um a herh. Jesuh bantukin Pathian Pennak kong mi sin chim khawhnak caanṭha hmuh awkah hliphlau tein um a hau. Mah caanṭha cu a sung tukmi a si caah caanṭha kan hmuhmi kha kan tlolh awk a si lo. Phung kan chim lo ahcun mi cu nunnak an hmu kho lai lo.—1 Tim. 4:16.

⁶ Jesuh nih a hngalhmi thil pakhat a um rih i mah zong nih hliphlau tein um awk a bawmh. Satan nih amah hneksak awk, hrem awk le Pathian cung a zumhfehnak hrawh awk bia a chah kha Jesuh nih a hngalh. A ṭha lo tukmi Satan cu Jesuh hneksak awkah caanṭha a kawl zungzal. (Luka 4:13) Jesuh cu hliphlau tein a um zungzal. Tukforhnak a si zongah, ralchanhnak a si zongah, hremnak a si zongah, zei bantuk hneksaknak paoh in awkah timhcia in um a duh. Kannih zong Jesuh tonmi thil kan tong ve. Satan cu “seh awk kawl ah, chiandeih bangin a vak cuahmah” rih ko ti kan hngalh. Cucaah Khrihfa dihlak kha “fim hringte in um u, ralringte in um u” tiah Baibal nih a kan forh. (1 Pit. 5:8) Cutin zeitindah kan um khawh lai?

Thlacamnak nih Hliphlau tein Um awk a Kan Bawmh

7, 8. Thlacamnak he aa tlaiin Jesuh nih zei bia dah a chim i zeitindah zohchunhawk ṭha a chiah?

⁷ Hliphlau tein um khawh awkah thlacam hi a biapi tuk tiah Baibal nih a ti, thla kan cam ahcun Jehovah he kan i pehtlaihnak a fek lai. (Kol. 4:2; 1 Pit. 4:7) Jesuh nih a zultu pawl kha amah he hliphlau tein um awk a chimh hna hnu tlawmpal ah hitin a ti hna: “Tukforhnak chungah nan luh nakhnga lo hngilh lo tein um u law thlacam tuah u.” (Matt. 26:41) A zultu hna kha a har tukmi mah caan chung lawng ah thla nan cam a hau tiah a timi hna a si maw? A si lo, a chimmi cu nifate zulh ding a simi phunglam a si.

⁸ Jesuh zohchunhawk ṭha nih thlacam a biapit kha a kan hngalhter. A Pa sinah zan khuadei thla a cam kha naa cinken ko lai. (Luka 6:12, 13 rel.) Mah hi na mitthlam ah cuanter hmanh: A caan cu ṭhal chuahka ah a si i Jesuh cu Kapernaum khua pawng ah a um lio a si men lai. Khua a hun muih tikah Galili Rili pawng tlang pakhat ah a kai. Tlang cung in a vun zoh tikah Kapernaum khua le a pawngkam khua hna ah meiinn ceu tete a hmuh ko lai. Cu hnuah Jesuh cu zei hnahnawhnak hmanh um lo in Jehovah sinah thla a cam. Caan cu a liam thluahmah. Khua chung meiceu tete pakhat hnu pakhat a mih le van ah thlapa aa thawn thluahmah le zan ah rawl a kawlmi saram pawl rawl an kawl te hna kha Jesuh nih a hngal lo. Lamkaltu 12 ah ahote dah ka thim hna lai timi a biapi tukmi biakhiahnak tuah awkah thla a cammi a si kho men. A Pa sinah zultu pakhat cio he aa tlai in a ruahmi le a lungretheihmi kha chim in lamhruainak le fimnak a halmi kha kan mitthlam ah kan cuanter khawh.

9. Jesuh zan khuadei thla a cammi in zeidah kan i cawn khawh?

⁹ Jesuh tuahmi in zeidah kan cawn khawh? Thla cam tikah suimilam tampi chung cam ding tinak a si maw? A si lo. Jesuh nih a zultu hna he aa tlaiin “thlarau nih cun a huam ko, sihmanhsehlaw titsa cu a der ko hi ta” tiah zaangfahnak he a rak chim. (Matt. 26:41) Asinain Jesuh nawl i cawn khawh a si ko. Tahchunhnak ah, kanmah theng, kan innchungkhar le Khrihfa unau pawl caah ṭhatnak, chiatnak a chuahter khomi biakhiahnak kan tuah hlan ah vancung kan Pa sin ah thla kan cam maw? Unau pawl caah thla kan cam maw? Thla kan cam tikah lungtak in maw kan cam asiloah kan chim cangmi bia kan nolh lengmang dah? Jesuh cu a Pa he an pahnih te lawng biaruah a duh tuk kha i cinken. Ṭuan awk rian a tam tukmi hi vawlei ah a biapi bikmi thil philh a fawite. Jehovah sinah lungtak in thlacamnak caan tampi kan pek ahcun hliphlau tein kan um kho deuh lai. (Matt. 6:6, 7) Jehovah he kan i pehtlaihnak a fehter khomi thil paohpaoh kan tuah le kan i pehtlaihnak a hrawk khomi thil kan hrial ahcun Jehovah he kan i naih deuh lai.—Salm 25:14.

Phungchimnak ah Hliphlau tein Um khawhning

10. Jesuh cu mi sin phungchim khawhnak caanṭha hmuh awkah hliphlau tein a um kha zeinihdah a langhter?

¹⁰ Jesuh cu Jehovah nih a pekmi rian a ṭuan tikah hliphlau tein a um. Rian cheukhat cu ṭuan pah in khuadang ruah zong ah thil poipang a chuak men lai lo. Asinain rian tam deuh cu ṭuan lioah khuadang ruat lo in hliphlau te’n ṭuan a hau. Phungchim rian cu cu bantuk rian a si. Jesuh cu hliphlau tein a um i thawngṭha chim khawhnak caanṭha a kawl zungzal. Tahchunhnak ah, Jesuh le a zultu hna cu zingka tein khual an tlawn hnu ah Saikhar khua an phan i a zultu hna cu rawl cawk ah an kal. Jesuh tu cu i dinh awkah tikhor pawng ah a ṭhu nain hliphlau tein a um caah phungchimnak caanṭha a hmu. Samaria nu pakhat cu ti than ah a ra. Jesuh cu chikkhat aa hngilh ta kho asiloah mah nu cu chawnh awk a si lo timi ruahnak a ngei kho ko. Asinain minu kha bia a ruah i phung a chimh caah khuami tampi zong zumtu an hung si. (Johan 4:4-26, 39-42) Kannih tah nifate kan tonmi hna sin phungchim khawhnak caanṭha hmuh awkah hliphlau tein um deuh awkah Jesuh nawl kan i cawn kho lai maw?

11, 12. (a) Jesuh nih a lung vaivuanh awk a tuahmi hna kha zeitindah a ti hna? (b) Jesuh nih phungchimnak ah a tlarimi a si kha zeitindah a langhter?

¹¹ A caan ah lungthin ṭha a ngeimi hna nih Jesuh kha a rian in a lung a vaivuanh nakhnga an tuah tawn. Tahchunhnak ah, Kapernaum khua ah mi kha khuaruahhar thil tuah in a damter hna caah khuami nih an khua ah umter an duh. Cuti an duh cu theihthiam a si ko. Asinain Jesuh rian cu khua khat lawng ah phungchim si lo in “Israel mi lak i a tlaumi tuu” dihlak sin phungchim kha a si. (Matt. 15:24) Cucaah khuami kha “Pathian Pennak kong thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu” tiah a ti hna. (Luka 4:40-44) Jesuh nih phungchim rian kha biapi bik ah a chiah ti cu a fiang ko. Zei thil ruang hmanh ah a lung a vaivuanhter lo.

¹² Jesuh cu a rian lawng biapi chia in a dang nuamhnak caah caan pe kho lo in a um maw? Asiloah phungchimnak ah a rian a tam tuk caah midang herhmi hmu lo in tah a um maw? A um lo. Anih cu a tlarimi a si. Nuam tein a um i a hawile he i nuamhṭinak caan zong a pek. Innchungkhar he a ummi pawl kha a zaangfah hna, an herhmi le an tonmi harnak kha a theihthiampiak hna. Ngakchia zong a dawt hna.—Marka 10:13-16 rel.

13. Phungchimnak ah hliphlau tein a ummi le a tlarimi Jesuh kha zeitindah kan i zohchunh khawh?

¹³ Hliphlau tein umnak ah Jesuh nawl kan i cawn lioah zeitindah a tlarimi kan si khawh ve lai? Hi vawlei ruang ah kan rian ah lung vaivuanh kan duh lo. Kan hawile le kan rualchan hmanh nih siaherh ngai in phungchim rian kan ṭuanmi ṭhumh deuh awk asiloah midang nunning in nun awk a kan forh men lai. Asinain Jesuh nawl kan i cawn ahcun phungchim rian cu kan caah rawl bantukin a biapimi a si lai. (Johan 4:34) Phungchimnak nih Jehovah he kan i pehtlaihnak a fehter i a kan nuamhter. Asinain a hlei a hluat tuk in a tuahmi, ka ding ti langhter a duhmi asiloah nuamhnak zeihmanh a kawl lomi si kha kan duh lo. Jesuh bantukin aa nuammi le a tlarimi si kan duh, zeicahtiah kannih cu aa lawmmi Pathian a biami kan si caah a si.—Salm 104:31.

Harnak Ton tikah Hliphlau tein Um khawhning

14. Harnak ton tikah zeidah philh lo awk a si? Zeicah?

¹⁴ Jesuh nih hneksaknak a ton lioah a zultu hna kha a biapi tukmi thil a rak cawnpiak hna. (Marka 14:37 rel.) Harnak kan ton tikah voi dang nakin Jesuh nunning kha kan ruah awk a si. Harnak ton tikah a biapi tukmi biatak pakhat kha kan philh tawn, mah kha Phungthlukbia cauk ah hitin kan hmuh: “Lam dik tiah na ruahmi kha thihnak lei kalnak lam a si kho ko.” (Ptb. 14:12) Mah biatak cu a biapit tuk caah cu bantuk bia kha Phungthlukbia 16:25 zong ah kan hmuh ṭhan. A hlei in, harnak nganpi kan ton tikah kanmah ruahnak lawng kan i bochan ahcun kan dawtmi hna zong, kanmah zong harnak kan tong kho.

15. Chungkhar zohkhenh awkah fakpi in rianṭuan a haumi chungkhar lu cu zei tuah awk dah forh a si men lai?

¹⁵ Tahchunhnak ah, chungkhar lu pakhat cu “a innchungkhar” pumsalei herhmi zohkhenh awkah fakpi in rian a ṭuan a hau men lai. (1 Tim. 5:8) Anih cu Khrihfabu pumhnak le chungkhar pumhnak asiloah phungchim vah tlolh lengmang a haumi rian cohlan awkah forh a si men lai. Minung ruahnak ahcun mah rian cohlan cu a hmaanmi a lo men lai. Asinain mah rian nih thlaraulei a derter khawh asiloah a thihter khawh. Cucaah, Phungthlukbia 3:5, 6 i Solomon ruahnak cheuhmi zulh hi a ṭha: “BAWIPA kha na lung chung dihlak in i bochan law nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.”

16. (a) Jehovah fimnak i bochannak ah Jesuh nih zei zohchunhawk ṭha dah a chiah? (b) Chungkhar lu tampi nih harnak an ton tikah Jesuh kha zeitindah an i zohchunh?

¹⁶ Jesuh cu hneksaknak a ton tikah amah fimnak aa bochan lo. Mah hi ruathmanh. Vawleicung i a nung balmi lakah a fim bikmi pa nih amah fimnak aa bochan lo. Tahchunhnak ah, Satan nih a tukforh lioah “Cathiang nih pei” ti in a rak leh lengmang. (Matt. 4:4, 7, 10) Tukforhnak tei khawh awkah a Pa fimnak aa bochan. Cuticun Satan ngeih lomi le huatmi ziaza, toidornak kha a langhter. Kannih tah Jehovah fimnak kan i bochan maw? Jesuh bantukin hliphlau tein a ummi chungkhar lu cu a hlei in harnak a ton caan ah Cathiang lamhruainak a zul. Cutin a tuahmi chungkhar lu tampi vawleicung ah an um. Annih nih pumsalei herhmi nakin Pathian Pennak le a hmaanmi biaknak kha biapi deuh ah an chiah. Cuticun an innchungkhar kha a ṭha bik in an zohkhenh hna. An innchungkhar pumsalei zohkhenh ding an i zuamnak ah Jehovah nih bia aa kam bantukin thluachuah a pek hna.—Matt. 6:33.

17. Hliphlau tein umnak kongah zeicah Jesuh cu i zohchunh na duh?

¹⁷ Hliphlau tein umnak kong ah Jesuh cu zohchunhawk ṭha bik a si ti cu a fiang ko. A nawl i cawn cu man a ngei i nunnak zong a khamh khawh. Satan nih thlaraulei ah aa hngilhmi, zumhnak a dermi le Jehovah biaknak ah a lung a tho ti lomi siter aan duh i na zumhfehnak hrawh aa zuam. (1 Thes. 5:6) Satan kha i teiter hlah! Jesuh bantukin hliphlau tein um. Lungtak in thlacamnak ca caan pe, phungchimnak ah hliphlau tein um law harnak na ton tikah Jehovah i bochan. Cutin na tuah ahcun hi vawlei ṭhalo donghnak a nai tuk cangmi tuchan hmanh ah nuamhnak le lungtlinnak na hmu lai. Hliphlau tein na um ahcun hi vawlei ṭhalo hrawh awk i Jesuh a rat tikah hliphlau tein na um le Pathian rian ah na rian a tam kha a hmuh lai. Zumhfek tein na um ruang ah Jehovah cu aa lawm tuk lai i thluachuah aan pek lai!—Biat. 16:15.

[Cahmai 6nak i hmanthlak]

Tikhor ah Jesuh nih minu kha phung a chimh. Nangtah nifate phungchim khawh awk caanṭha na kawl maw?

[Cahmai 7nak i hmanthlak]

Na chungkhar thlaraulei ṭhancho awk na bawmh hnanak thawng in hliphlau tein na um na langhter