Zeitindah Caan A Dongh Lai

1. Hliphlau tein hngah awk le hneksaknak inkhawh awkah zeinihdah a kan bawmh lai?

ARAUH hlan ah vawleicung ah khuaruahhar thil a cang cang lai. Baibal chimchungbia a tlinmi nih mah thil a cang taktak lai ti a kan zumhter. Cucaah hliphlau tein kan hngah a hau. Cutin hngah awkah zeinihdah a kan bawmh lai? Lamkaltu Paul nih “hmuh khawhmi thil hi si lo in hmuh khawh lomi thil” kha zoh awkah tha a kan pek. Jehovah nih van asiloah vawlei ah zungzal nunnak a kan pek lai ti kha kan philh lo awk a si. Paul nih a chankhat unau pawl kha Pathian cung zumhfek tein an umnak thawngin an hmuh laimi thluachuah kha zoh awkah thapeknak bia a ṭialmi a si. Cutin tuahnak nih hremnak le hneksaknak inkhawh awk zong a bawmh hna lai.—2 Kor. 4:8, 9, 16-18; 5:7.

2. (a) Kan i ruahchanmi ṭhawnter awkah zeidah tuah a herh? (b) Hi capar le a hnu capar ah zei kong dah kan i ruah lai?

² Paul ruahnak cheuhnak nih a biapimi thil a kan cawnpiak: Kan i ruahchannak ṭhawnter awkah kan hmuh khawhmi thil leng in zoh a hau. Atu ah hmuh khawh a si rih lomi a biapimi thil kha zoh a hau. (Heb. 11:1; 12:1, 2) Cucaah hi capar le a hnu capar ah kan i ruahchanmi zungzal nunnak he aa tlaimi hmailei i a cang hngami thil pahra kan i ruah lai.

Donghnak a Phanh Laite ah Zeidah a Cang lai?

3. (a) 1 Thesalon 5:2, 3 ah hmailei i a cang hngami zei kong dah aa ṭial? (b) Nainganzi hruaitu pawl nih zeidah an chim te lai, ahote nih dah cutin an chim ve men lai?

³ Paul nih Thesalon Khrihfabu sin a cakuat ah hmailei i a cang dingmi thil hna lak i pakhat kha a ṭial. (1 Thesalon 5:2, 3 rel.) Paul nih ‘Jehovah Ni’ kong kha a ṭial. Mah cu a hmaan lomi biaknak hrawh a sinak in aa thawk lai i Armageddon raltuknak ah a dong lai. Jehovah ni aa thawk hlan deuhte ah vawlei nawlngeitu pawl nih “a dai dih ko i a him dih ko” tiah an ti lai. Cutin voikhat lawng an ti men lai asiloah voi tam nawn an ti men lai. Vawleicung nawlngeitu pawl nih kan tonmi buainak nganpi cheukhat kan tei khawh deng cang tiah an ruah lai. Biaknaklei hruaitu pawl tah zeitin? Annih zong hi vawlei ta an si ve caah nainganzi hruaitu pawl he “a dai dih ko i a him dih ko” tiah an ti ve men lai. (Biat. 17:1, 2) Biaknaklei hruaitu pawl nih cutin an chimnak thawng in Judah ram i nal profet pawl tuahmi kha an tuah ve lai. Annih zong nih ‘himnak a um lo nain a him dih ko, a him dih ko’ tiah an rak chim.—Jer. 6:14, NW; 23:16, 17.

4. Kannih cu mi tampi nih an hngalhthiam lomi zei kong dah kan hngalh?

⁴ “A dai dih ko i a him dih ko” tiah aho nih an chim hmanh ah, mah nih Jehovah ni aa thawk cang lai ti kha a langhter lai. Mah ruang ah Paul nih hitin a rak chim: “U le nau hna, nannih cu mui padap chung i khua a sami nan si lo i mifir bantuk in cu ni nih cun a hlaoh in an hlaoh hna awk a si lo. Nannih cu nan dihlak in ceunak mi nan si.” (1 Thes. 5:4, 5) Kannih cu tuchan ah a cangmi thil kong, Baibal chimmi kha kan hngalhthiam nain mi tampi nih cun an hngalthiam lo. “A dai dih ko i a him dih ko” tiah an chim lai timi chimchungbia tah zeitindah a tlin lai? Hngah le thil sining hmuhthiam a hau. Cucaah ‘i ṭhangh awk le lung fim tein um awkah’ bia khiak hna u sih.—1 Thes. 5:6; Zef. 3:8.

A Hmaan lomi Biaknak nih Hrawh a si lai kha aa Hngal lo

5. (a) ‘Harnak nganpi’ cu zeitindah aa thawk lai? (b) Ka cung ah ngaihchiatnak a tlung bal lai lo tiah aa ruatmi “siangpahrang bawinu” cu ahodah a si?

⁵ Mah hnu ah zeidah a cang lai? Paul nih “‘a dai dih ko i a him dih ko’ an ti lio te ah khin rawhnak nih cun a den hna lai” tiah a ti. Mah rawhnak cu vawleicung ah a ummi a hmaan lomi biaknak vialte dohnak in aa thawk lai. Baibal nih a hmaan lomi biaknak kha “a liannganmi Babilon” asiloah “hlawhhlangnu” tiah a auh. (Biat. 17:5, 6, 15) Mah dohnak cu Khrihfaram tel in a hmaan lomi biaknak vialte cung ah a tlung lai i mah cu ‘harnak nganpi’ a hram thawknak a si lai. (Matt. 24:21; 2 Thes. 2:8) Mi tampi cu mah thil a can tikah an lau lai. Zeicahtiah mah caan tiang hlawhhlangnu nih kei cu “siangpahrang bawinu” ka si i “ngaihchiatnak cu ka ing bal lai lo” tiah aa ruah caah a si. Ka cung ah ṭhatlonak zei hmanh a tlung lai lo tiah aa ruah. Asinain a ruahnak a palh kha ruahlopi in a hun hngalh lai. Amah cu rang tuk in hrawh a si lai caah “nikhatte” ah hrawh bantuk a si lai.—Biat. 18:7, 8.

6. Aho nih dah a hmaan lomi biaknak a hrawh lai?

⁶ “Ki pahra” a ngeimi “sahrang” nih hlawhhlangnu kha a doh lai tiah Baibal nih a ti. Biathlam cauk kan hlathlai tikah sahrang nih United Nations (UN) a langhter ti kan hngalh. “Ki pahra” nih mah “sahrang sen” a bawmmi cozah vialte kha a aiawh.a (Biat. 17:3, 5, 11, 12) Mah dohnak nih zeitluk tiang in dah a rawhter lai? UN chung ah aa telmi ram pawl nih hlawhhlangnu kha a ngeihmi vialte an chuh dih lai, a ziaza ṭhalo le a sining taktak kha an langhter lai, a sa kha an ei lai i “an khangh” lai. Cuticun a hmaan lomi biaknak cu a zungzal in hrawh a si lai.—Biathlam 17:16 rel.

7. “Sahrang” dohnak cu zeitindah aa thawk lai?

⁷ Mah dohnak zeitindah aa thawk lai ti zong Baibal chimchungbia nih a langhter. Jehovah nih hlawhhlangnu hrawh ding timi “aa tinhmi” tlinter awkah nawlngeitu pawl kha lam khatkhat in a forh hna lai. (Biat. 17:17) Biaknak nih ral a thawhter i vawleicung ah buainak tampi a chuahter. Cucaah vawleicung nawlngeitu pawl nih hlawhhlangnu hi kan hrawh ahcun a ṭha lai tiah an ruah lai. Cutin hlawhhlangnu an doh tikah kanmah duhmi kan tuah tiah an ruah lai. A taktak ti ahcun Pathian nih a hmaan lomi biaknak vialte hrawh awkah a hmanmi hna a si. Cucaah Satan vawlei cheubang cu pakhat le pakhat an i do lai nain mah kha Satan nih a ngolter kho hna lai lo.—Matt. 12:25, 26.

Pathian Miphun Dohnak

8. ‘Magog ram i Gog’ dohnak cu zeidah a si?

⁸ A hmaan lomi biaknak hrawh a si hnu ah Pathian miphun cu ‘ralhruang a ngei lomi’ khua ah ‘daite le ahohmanh nih hnahnawh loin’ an um rih lai. (Ezek. 38:11, 14) Huhphenhnak zeihmanh a ngei lomi a lomi, Jehovah a biami hna cu zeidah an ton lai? “Miphun tampi” nih an doh men hna lai. Mah kha ‘Magog ram i Gog’ dohnak tiah Baibal nih a ti. (Ezekiel 38:2, 15, 16 rel.) Mah dohnak kha zeitindah kan hmuh awk a si?

9. (a) Khrihfa a simi caah zeidah a biapi bik? (b) Kan zumhnak a feh nakhnga atu in zeidah kan tuah a herh?

⁹ Pathian miphun cu doh kan si lai ti kan hngalh ko nain kan lungre a thei tuk lo. Khamh kan si lai le si lai lo nakin Jehovah min thianternak le cungnung bik a sinak langhternak hi a biapi deuh. Jehovah nih “BAWIPA ka si kha nan ka hngalh lai” tiah a ti. Mah bia le cu bantuk phun bia cu Ezekiel cauk chung ah voi 60 leng a um. (Ezek. 6:7) Mah chimchungbia zeitindah a tlin lai kha hmuh kan i ngaih tuk. “Pathian nih harnak an inmi chungin Pathian a ṭihmi hna khamh cu a thiam” ti kan zumh. (2 Pit. 2:9) Mah caan chung ah kan zumhnak a feh nakhnga kan tuah khawhmi zei thil paoh tuah kan duh. Mah lawngah zei thil kan ton hmanh ah Jehovah cung ah zumhfek tein kan um kho lai. Zeidah tuah a herh? Thlacam, Baibal hlathlai, mah kha ṭha tein ruah le Pennak kong thawngṭha mi sin chim a hau. Mah nih zungzal nunnak kan i ruahchannak kha “thircangai” bantukin a ṭhawnter lai.—Heb. 6:19; Salm 25:21.

Miphun pawl nih Jehovah an Hngalh lai

10, 11. Armageddon cu zeitindah aa thawk lai? Mah caan ah zeidah a cang lai?

¹⁰ Jehovah miphun doh an si tikah zei bantuk khuaruahhar thil dah a cang lai? Jehovah nih Jesuh le vancung ralkap pawl kha hmang in a miphun a bawmh hna lai. (Biat. 19:11-16) Mah cu Armageddon tiah auhmi “Lianngan bik Pathian ni lianngan ni” a si lai.—Biat. 16:14, 16.

¹¹ Mah raldohnak he aa tlai in Jehovah nih Ezekiel hmang in hitin a chim: “Gog doh awkah ka thil ṭihnung phun zakip kha ka auh hna lai i a mi hna cu pakhat le pakhat vainam in an i sam lai.” Satan mi hna cu an lung aa tuai lai i an lau tuk lai caah anmah le anmah an i that lai. Jehovah nih hitin a chim: “Mei le kat cu amah le a ralkapbu hna le amah sinah aa fon ṭhupmi hna cungah cun ka tlakter lai.” (Ezek. 38:21, 22) Pathian nih cutin a tuah tikah zeidah a cang lai?

12. Mi nih an hngalh duhlo buin zeidah an hngalh lai?

¹² Mi nih hrawh kan simi hi Jehovah nawlpeknak ruang ah a si ti kha an hngalh lai. Rili Sen tiang Israel mi a dawitu Izipt mi hna bantuk in Satan mi hna cu hitin an au ve lai: “BAWIPA pei anmah lei ah a ṭang i kanmah a kan do ko hi.” (Ex. 14:25) Mi nih Jehovah kha hngalh an duhlo buin an hngalh lai. (Ezekiel 38:23 rel.) Mah thil pawl a can lainak cu zeitluk in dah a naih cang?

Vawleicung Nawlngeitu dang a Um ti lai lo

13. Daniel chimmi milem i a panganak pumnge he aa tlai in zeidah kan hngalh?

¹³ Daniel cauk chung i chimchungbia pakhat nih zei bantuk caan ah dah kan nun ti hngalh awk a kan bawmh. Daniel nih thil phunphun in sermi, minung he aa lomi milem kong a chim. (Dan. 2:28, 31-33) Mah nih hlanlio le tuchan i Pathian miphun cung ah huham a ngei ngaimi vawleicung nawlngeitu pawl kha a langhter. Mah ah Babilon, Medo-Persia, Grik le Rom an i tel. A donghnak vawleicung nawlngeitu cu kan chan ah a um. Daniel chimchungbia ah mah vawleicung nawlngeitu cu milem i a kepha le a kedong a si ti kha kan hngalh. Vawlei Ralpi Inak lioah Britain le United States cu special in rian an hun ṭuanṭi. Cucaah Daniel hmuhmi milem i a panganak pumnge cu Vawleicung Nawlngeitu Anglo-American a si. A kepha cu milem pumnge i a donghnak a si. Mah nih minung uknak a simi vawleicung nawlngeitu dang a chuak ti lai lo ti a langhter. A kepha le a kedong cu thir le tlak aa cawhmi a si, mah nih Vawleicung Nawlngeitu Anglo-American i a derthawmnak kha a langhter.

14. Armageddon a rat tikah ahodah vawleicung nawlngeitu a si lai?

¹⁴ Mah chimchungbia nih Pathian Pennak kha 1914 ah tlangcung in a rak rilmi lung nganpi in a langhter. Tlang nih Jehovah nawlngeihnak kha a langhter. A rauhhlan ah lung nih milem kepha kha a den cang lai. Armageddon ah milem i a kepha le a pumnge dang pawl cu khuai an si lai. (Daniel 2:44, 45 rel.) Cucaah vawleicung nawlngeitu Anglo-American cu Armageddon a rat tiang nawlngeitu a si lai. Mah chimchungbia a tlin lai hmuh cu lungthawhawk ngai a si lai.b Jehovah nih Satan tah zeitindah a tuah lai?

Pathian Ral Ngan Bik Zeitin Tuah a si lai?

15. Armageddon a dih hnu ah Satan le a khuachia cu zeidah an ton lai?

¹⁵ Satan nih vawleicung i a mi pawl hrawh dih cikcek an si kha a hmuh lai. Mah hnu ah amah theng zeidah a ton lai ti kha lamkaltu Johan nih a kan chimh. (Biathlam 20:1-3 rel.) “Dongh hngal lo khor tawh” aa putmi vancungmi Jesuh Khrih nih Satan le a khuachia kha dongh hngal lo khor ah a thlak hna lai i kum thongkhat chung a hren hna lai. (Luka 8:30, 31; 1 Johan 3:8) Cuticun rul lu cu rial hram thawk a si lai.c—Gen. 3:15.

16. Satan cu “dongh hngal lo khor” ah thlak a si timi cu zei sullam dah a ngeih?

¹⁶ Satan le khuachia pawl thlak an si lainak “dongh hngal lo khor” cu zeidah a si? Mah cu Jehovah le “dongh hngal lo khor tawh” aa putmi a vancungmi dah ti lo cu ahohmanh kal khawh lonak hmun a si. Satan cu “mi kha a hlen khawh ti hna nakhnga lo” cuka ah thlak a si lai. Baibal nih Satan cu a ngurmi “chiandeih” bantuk a si tiah a ti. Asinain dongh hngal lo khor i thlak a si tikah cun daite in a um cang lai.—1 Pit. 5:8.

Daihnak a Phak hlan ah a Cang dingmi Thil

17, 18. (a) A rauh hlan ah a cang dingmi zei kong dah hi capar ah kan i ruah? (b) Mah thil pawl a can hnu ah zeidah aa thawk lai?

¹⁷ A rauhhlan ah a biapimi le khuaruahhar a simi thil pawl a cang lai. “A dai dih ko i a him dih ko” timi bia zeitin a tlin lai kha hmuh kan i ngaih ngaingai. Mah hnuah a Liannganmi Babilon hrawh a sinak, Magog ram i Gog dohnak le Armageddon ral dohnak kha kan hmuh lai. Cun Satan le a khuachia pawl cu dongh hngal lo khor ah thlak an si lai. Mah thil a can dih hnu ah ṭhatlonak vialte an lo dih lai. Khrih Kum Thongkhat Uknak chung ah “daihnak kha tlamtling” tein kan hmuh lai i kan nunnak cu aa thleidang tuk cang lai.—Salm 37:10, 11.

¹⁸ Hi capar ah, “hmuh khawh lomi thil” asiloah atu ah a cang rih lomi thil panga kong kan i ruah cang. “Kan i zohchih” a haumi a dang “hmuh khawh lomi thil” a um rih. Mah kong cu a hnu capar ah kan i ruah lai.