“Pathian Cu Khoika Ah Dah A um?”
“PATHIAN CU KHOIKA AH DAH A UM TIMI BIAHALNAK KHA KA HAL TAWN”—Pahlei Ruknak Pope Benedict, Poland ram, Auschwitz khua i rianhrang ṭuannak thonginn ah a va len hna lio.
THIL ṬHALO A UM TIKAH ‘PATHIAN CU KHOIKA AH DAH A UM’ TIAH NA RUAT BAL MAW? ASILOAH NGAIHCHIATNAK NA TON TIKAH PATHIAN NIH A KA ZOHKHENH MAW TIAH LUNGHRINNAK NA NGEI MAW?
United States ah a ummi Sheila bantukin na intuar ve men ko lai. Anih cu biaknaklei aa zuammi chungkhar in a ṭhangmi a si i hitin a ti: “Pathian cu a kan Sertu a si caah ka ngakchiat lio tein Pathian kong kha ka hngalh. Asinain Pathian he kan i naih tiah zeitikhmanh ah ka ruat bal lo. Lamhla lawngin a ka zoh tiah ka ruah. Pathian nih a ka hua lo i a daw zong a ka daw lo tiah ka ruah.” Sheila nih zeicah lunghrinnak a ngeih? Hitin a ti: “Kan chungkhar nih harnak pakhat hnu pakhat kan tong i Pathian nih a kan bawm lo.”
Sheila bantukin Lianngan Bik Pathian cu a um tiah na ruah ko lai. Asinain a ka zohkhenh taktak maw tiah lunghrinnak na ngei kho men. Sertu i a ṭhawnnak le a fimnak a zummi miding Job zong cu bantuk lunghrinnak a rak ngei. (Job 2:3; 9:4) Job cu harnak Pakhat hnu pakhat a ton hnuah Pathian kha hitin a hal: “Zeicahdah na hmai kha na thuh i kei cu na ral ah na ka rel?”—Job 13:24.
Baibal nih zeidah a chim? Harnak ton tikah Pathian mawhchiat awk a si maw? Pathian nih minung kha kan zapi in le pumpak pakhat cio in a kan zohkhenh ti a langhtermi thil a um maw? Pathian nih pakhat cio kha a kan hngalh, a kan theihthiam, zawn a kan ruah, buaibainak ton tikah a kan bawmh ti kha zeitindah kan hngalh khawh?
Pathian nih a kan zohkhenh kha sermi thil nih zeitindah a kan cawnpiak ti kha a hnu capar ah kan i ruah hna lai. (Rom 1:20) Cun Pathian nih a kan zohkhenhnak kong Baibal chimmi zong kan i ruah hna lai. Sermi thil in le Baibal in Pathian kong na “hngalh” deuhdeuh tikah “aan zohkhenh” kha na zumh deuhdeuh ve lai.—1 Johan 2:3; 1 Peter 5:7.