Pennak Kong Chimnak—A Sunglawimi Tinvo
1 Vawlei cung minung nuai tampi cu an nunnak caah Jehovah nih siang ngaiin a pekmi hna in ni fate ṭhatnak an hmuh. (Matt. 5:45) Si-hmanhsehlaw, Pathian Pennak kong thawng ṭha chimnak in an Sertu cung i lunglawmhnak langhternak tinvo ṭha a ngeimi cu mi tlawmte lawng an si. (Matt. 24:14) Mah a sunglawimi tinvo kha zeitluk indah na sunsak?
2 Pennak kong chimnak nih Pathian thangṭhatnak a chuahter i a hnok ngaimi nihin caan ah lung-retheihnak a tongmi hna kha ruahchannak le daihnak a pek. (Heb. 13:15) Thawngṭha a cohlang mi hna kha zungzal nunnak ruahchannak a pek. (Johan 17:3) Zeibantuk vawlei rian nih dah mah bantuk ṭhatnak cu a chuahter lai? Lamkaltu Paul nih phungchimnak rian a sunsaknak kha a rianṭuannak in a langhter. Mah kha ro sung bantuk-in a rak hmuh.—Lam. 20:20, 21, 24; 2 Kor. 4:1, 7.
3 A Sunglawimi Kan Tinvo Sunsaknak: Kan phungchimnak tinvo kan sunsak ti kan langhter khawhnak lam phunkhat cu kan rianṭuannak thiamnak cungah lungthin peknak in a si. Kan bia a ngaimi hna lung a tong hngami chimning pakhat caah a caan la in timhtuahnak kan ngei maw? Baibal hmannak le mi he tuaktan ṭinak ah kan thiamnak kha kan ṭhanter deuh maw? Rian pek kan sinak hmun ah felfai tein kan ṭuan maw? Zeitindah Baibal cawnpiaknak kan thawk khawh? A luan cia caan le atu caan i zumhawktlak mi Khrihfa hna bantukin, hi rian cungah aa tlakmi hmuhnak ngeihnak nih kan tinvo kha sunsak awkah a kan forh.—Matt. 25:14-23.
4 Tar lei sang harnak, ngandamlonak asiloah a dang a harmi sining hna kan ton tikah phung-chim rianṭuannak i tel awk kan i zuamnak cu man a ngei tukmi a si ti hngalhnak nih a kan nuamhter. Midang mit hmuh ah zeihmanh a si lo hmanhah Jehovah nih a rian kan ṭuannak i kan i zuamnak kha man a ngeihter ti kha Baibal nih fiang tein a kan hngalhter.—Luka 21:1-4.
5 Pennak kong chimnak cu lungsinak hrampi a si. Kum 92 a simi unau nu nih hitin a chim: “Pathian rian ka ṭuannak a luan cia kum 80 kha ka ruah ṭhan tikah tinvo ṭha taktak a si—kaa ngaichih hrimhrim lo! Ka nunnak kha thawkṭhan khawh a si ahcun, mah bantuk khan ka nung lai. A taktak ti ahcun ‘A fek mi Pathian dawtnak cu nunnak nakin a ṭha deuh.’ (Salm 63:3) Pennak kong chimnak—Pathian sinin hmuhmi a sunglawimi tinvo kha sunsak kho hna u sih.