A Sungmi Ro Thil Pekmi
1 Lamkaltu Paul nih Pathian pekmi phungchimnak rian kha a sungmi in a hmuh i khakha “ro thil” in a rak langhter. (2 Kor. 4:7) Mah rian a ṭuan ah khan harnak le hremnak a rak tong. A rak hmuhmi hna paoh kha a ba kho lomi bantukin a rak chimh hna. Cun a har ngaingaimi le ṭihnungmi khual lam ah tlang lam le ti lam in khual a rak tlawng. Kan phungchim rian kan sunsak langhternak ah Paul kha zeitindah kan i zohchunh khawh? (Rom 11:13) Zei nih dah kan phungchim rian kha a sungmi ro thil a siter?
2 A Sung Deuhmi Ro Thil: Vawlei ro thil hna cu fakpi in lung-retheihnak a pemi a si i ri ngei in asiloah caan tawite lawng a ṭha-hnem. Asinain kan phungchimnak rain cu kanmah he midang he zungzal ṭhathnemnak a pemi a si. (1 Tim. 4:16) Mah nih lungthin ṭha a ngeimi hna kha Jehovah kong a hngalhter hna i an nunnak ah a herhmi thlennak a tuahter hna i zungzal nunnak a hmuhter hna. (Rom 10:13-15) Kan phungchim rian kan sunsaknak thawngin kan nunnak ah tinhmi a kan ngeihter, zungzal a hmunmi hlawhtlinnak kan ngei ti a kan theihter i hmailei caah ruahchannak a kan ngeihter.—1 Kor. 15:58.
3 Na Ro Thil Na Sunsak Kha Langhter: Pakhatkhat caah kan dihmi kan zohnak thawngin zeitluk in a man a sun kha kan hngalh khawh. Kan caan le kan thazang kha Jehovah thangṭhatnak i hman cu caan ṭha a va si dah! (Efe. 5:16, 17) Kan caan hman ning nih thilri chawva nakin thlarau lei man sung deuh ah kan chiah kha kan langhter awk a si. A sungmi ro thil kan ngeih caah mah kha mi dang lungtho tein chimh kan duh hna. Cun caan ṭha kan hmuh fate thawngṭha bia chim kan duh.
4 A sungmi ro thil kha thuh loin mi dang nih an hmuh nakhnga hmuhsak a si tawn. Kan phungchim rian kha ro thil in kan hmuh a si ahcun cucu kan nunnak ah a biapi bik a hung si lai. (Matt. 5:14-16) Kan phungchim rian kha ro thil pakhat in kan sunsak langhter awkah lamkaltu Paul bantukin caan ṭha hmuhmi paohpaoh kha hmang hna u sih.