Cawnpiaknak ah Hmuhnak Bawmtu Thil kha Hmang
1. Jehovah nih hlanlio a salle cawnpiaknak ah hmuhnak bawmtu thil kha zeitindah a hman i, zeidah a rak chuak?
1 Jehovah nih hlanlio a salle hna sin ah a biapimi thawngpang theihter awkah langhnak le mang kha a caancaan ah a rak hman tawn. Ezekiel nih Jehovah vancung leng langhnak a hmuhmi kha ruat hmanh. (Ezek. 1:1-28) Vawlei nawlngeihnak pakhat hnu pakhat an hun chuahmi profet mang a hmuh hnu ah Daniel zeitindah a um kha ruat hmanh. (Dan. 7:1-15, 28) “Bawipa ni” ah a cang hngami kong he aa tlai in zultu Johan kha “hmelchunhnak hna in” ṭihnungmi bia-thlam langhnak he aa tlai in tah zeitindah a si? (Biat. 1:1, 10, Nw) Jehovah nih a fiang ngaimi muisam le a ṭhawngmi cawlcanghnak hna kha hmang in annih kha a cawnpiak tik hna ah an lung chungah a caam peng.
2. Baibal biatak midang cawnpiaknak ah zei hmuhnak bawmtu thil dah kan hman khawh?
2 Baibal biatak kong kha midang kan chimh tik hna ah fawi tein an philh lo nakhnga kan video phel pawl kha hmangin cawnpiak khawh a si. Kan video phel ah a kong a phunphun aa tel i Baibal, Jehovah bupi le Khrihfa nunning ṭha le phunglam hna cungah zumhnak a fehter. Cawnpiaknak ah video hman khawhnak lam cheukhat kha ruat hmanh. A tanglei hi hman khawhmi video phel pawl an si.
3. Baibal a cawngmi kha bupi ah lamhruai dingah zeidah hman khawh a si?
3 Phungchim Rianṭuannak ah: Baibal a cawngmi kha kan Khrihfa unau rual kong na chim bal maw? Vawlei Pumpi Kan Unau Rual timi video kha piahpiak khawh a si. A hnu Baibal nan cawn hlan i zoh awkah hlan asiloah a ra laimi zarh ah Baibal nan cawn lio ah zoh ṭi u. Cun June 2002 Kannih Pennak Rianṭuannak chung i i ruah awk biahalnak kha i ruah ceih ṭi u.
4. Hngaltu mino pakhat nih sianginn ah zei cawnpiaknak hriamnam dah a hman khawh?
4 Mino hna Jehovah’s Hngaltu hna Nazi Hremnak Tangah Fekte in An Dir asiloah Jehovah Hngaltu hna—Min Hnulei ah A Ummi Bu timi video kha nan sianginn khaan chungah piah khawh a si kha nan sayate nan chimh khawh hna. Sianginn khaan chung i ceihṭi awkah June 2001 asiloah October 2000 le February 2003 Kannih Pennak Rianṭuannak i biahalnak hna kha aa tlak ningin remh awkah i tim.
5. Chungkhar Baibal cawnnak i hman awkah nu le pa hna nih hmuh khawhmi cu zeidah a si?
5 Chungkhar le Hawikom he: Nu le pa hna Mino hna Biahalnak—Zeitindah Hawikom Ṭhatak Ser Khawh A Si? timi video kha hmasa bik chuah a sinak in nan fale zeitluk tiangin dah an ṭhan kha ruat hmanh u. A hnu chungkhar Baibal cawnnak ah mah kha zoh ṭhan u. April 2002 Kannih Pennak Rianṭuannak nih thatho te le lungthiang tein i ruah ceih ṭinak caah biahalnak hna kha a langhter.
6. Hawikom hna he a nuammi caan kha zeitindah na timhtuah khawh?
6 Khrihfabu chungah inn i leen sawm na duhmi na hawi an um maw? Noah—Pathian he An Kalṭi timi video zoh ṭinak nih a nuam ngaimi zan a siter khawh, a hleiin February 2002 Kannih Pennak Rianṭuannak chung aa telmi biahalnak hna kha hmangin cawnmi chungin i ruah dih hnuah a si.
7. Kan video phel hman khawhnak zei lam hna dah na ruah khawh?
7 A Dang Caanṭha: A dang zei ti lam in dah kan video 20 kha hman khawh a si? Thlaraulei ṭhancho awkah bawmh a herhmi na va len tawn lengmangmi pakhatkhat kha mah video hna chungin phelkhat phelhnih kha na piah kho lai maw? Mah le hmun i tar hna zohkhenhnak inn ah mah video piah na duh kha na chim kho hna lai maw? Hngaltu a si lomi na rualchan pawl, na innpa pawl le rianṭuan ṭi pawl sinin upatnak hmuh awkah mah video nih an bawm lai maw? Kan video pawl hi lunghmuih awk ngai a si i mi cawnpiak khotu a si i hmual a ngeimi hmuhnak bawmtu thil a si. Cawnpiak awkah mahcu hmang.