Carel A Thiam Set Lomi kha Cawnpiak Hna
1. Phungchim rianṭuannak ah zei harnak dah kan ton khawh?
1 Phungchimnak rian kan i tel lioah carel aa harhmi hna biatak cawnpiak a harnak kha a caancaan ah kan ton. Zeidah kan tuah kawh?
2. Carel a thiam set lomi kan upat hna kha zeitin in le zeiruangah langhter awk a si?
2 Na Upat hna Kha Langhter: Jehovah caah a biapimi cu mi pakhat a catang si loin a lungthin a si. (1 Sam. 16:7; Ptb. 21:2) Cucaah carel a thiam set lomi kha kan zohchuk hna lo. Upatnak le lungsaunak kan langhter tikah annih nih kan bawmh hnanak kha an cohlan khawh deuh men. (1 Pit. 3:15) Mah ah mi pakhat kha Baibal cang asiloah catlang bu pakhat rel ding hramhram in hnek lo aa tel. Mi pakhat nih a sung tukmi Baibal biatak a hun hngalh deuh tikah Pathian Bia a rel i ‘chunzan in a ruahnak’ in lawmhnak hmuh awkah a carel thiamnak ṭhanchoter awk a tha a tho deuh lai.—Salm 1:2, 3.
3. Carel a thiam set lomi pawl cawnpiaknak ah zei lam hna dah kan hman khawh?
3 Lam Tampi In Baibal Cawnpiaknak: Hmanthlak cu cawnpiaknak ah lam ṭha bik a si i cinken awk a bawmh. Na hmanmi cauk chung hmanthlak ah zeidah na hmuh tiah na cawnpiakmi kha na hal khawh men. Cun hman-thlak cawnpiakmi kha a hngalhthiam nakhnga cu sette timi biahalnak hna kha hmang. Hman-thlak in langhter khun na duhmi a kong cheukhat a fiantermi cacang kha hmang hna. Cawnmi zoh ṭhannak zongah hmanthlak na hman khawh. Voikhatte ah a kong tam tuk huap in chim hlah. Cawnmi i a kongpi le a bik in a langhtermi kha hmulngei deuh in chim, cawnmi chung a um lomi kong i ruahnak kha hrial. Baibal cang hna kha Baibal chungin dairek rel, relmi kha cawnpiakmi nih a hngalh-thiam nakhnga biahalnak hna hmang. Mah nih a dang Baibal biatak kong amah tein hlat-hlai khawh awkah a carel thiamnak ṭhanchoter duhnak a ngeihter deuh lai.
4. Kan cawnpiakmi carel thiamnak a ṭhancho nak-hnga zeitindah kan bawmh khawh?
4 Carel A Thiamter deuhmi Bawmtu: Ca-rel a thiam set lomi asiloah tluangte rel thiam dingin cawnnak caanṭha a ngei lomi hna nih a konglam hna kha ṭhate hngalthiam in an i cinken khawh ko. Annih kha hmuh khawh a simi awkhumhmi kan cauk pawl hman awkah tha na pek khawh hna. Cauk kha kau in careltu nih a rel lioah ṭhate in ngaihnak, biafang hna kha aw din tein atu le atu relnak hmanh nih a carel thiamnak kha a ṭhanchoter lai. Relnak le Ţialnak ah Teimak Tein I Zuam brochure zong bawmtu a si kha a hmuh lai. Hmun cheukhat ah Khrihfa upa nih khrihfabu ah carel cawnnak hna zong an timhtuah ko lai. Khamhnak caah fim ngai in thil a kan tuahtermi “cathiang” kha hngalhthiam awkah carel a thiam set lomi pawl bawmh tikah mah zulh tlakmi ruahnak cheuhnak hna nih a kan bawmh lai.—2 Tim. 3:15.