A Hmasa ah Kan Chiahmi
1. Jesuh nih phungchim rian a caah a biapit kha zeitindah a langhter?
1 Jesuh nih phungchim rian hi hmasa bik ah a chiahmi a si. Palestine ram chungah meng tampi a ke in a kal i mi tampi kha phung a chimh hna. Phungchimnak ah tam deuh tel awk le lungtak in ṭuan awkah sawhsawh tein a nung. (Matt. 8:20) Mizaw damter awkah mi bupi nih kan kaltak ti hlah tiah an hnek tikah “Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu” tiah a leh hna.—Luka 4:43.
2. Jesuh caah phungchim rian cu zeicah a biapit tuk?
2 Jesuh caah phungchim rian cu zeicah a biapit tuk? A biapi bik ah a chiahmi cu Jehovah min thianternak a si. (Matt. 6:9) Vancung a Pa a dawt caah a duhnak tlinter le a chimmi paoh ngaih a duh. (Johan 14:31) Cun, mi kha lungtak in an zawn a ruah hna caah bawmh a duh hna.—Matt. 9:36, 37.
3. Phungchim rian biapi ah kan chiah zeitindah kan langhter khawh?
3 Jesuh i Zohchunh: Jesuh bantuk in phungchim rian hmasa ah chiah cu kan i harh men lai. Zeicahtiah vawlei ah caan tampi pek a haumi le lung a vaivuanhtermi thil a tam tuk caah a si. (Matt. 24:37-39; Luka 21:34) Cucaah a biapi deuhmi thil hmasa ah kan chiah khawh nakhnga phungchim rian ca i timh chung in hmaan tein i tel khawh awkah a caan suai a hau. (Fil. 1:10) Sawhsawh tein nun khawh peng awk le hi vawlei tling tein hman lo awkah kan i zuam lai.
4. A biapimi thil hmasa ah chiah peng cu zeicah a biapit?
4 Caan tam a um lo ahcun a fimmi nih a biapi bik thil kha hmasa ah a tuah. Thlichia a hrang lai ti a theih ahcun a chungkhar himnak ca timhtuah awk le innpa ralrin pek awkah a caan le a thazang a hman lai. A biapi deuh lomi kha a tuah lai lo. Armagedon thlichia a hran lainak cu a naih tuk cang. (Zef. 1:14-16; 1 Kor. 7:29) Kanmah le kan bia a ngaimi hna khamh awkah Khrihfa bu chung le a lengah kanmah theng le kan cawnpiaknak kha i ralrin zungzal awk a si. (1 Tim. 4:16) Khamh kan si lainak cu phungchim rian biapi kan chiahnak cungah aa hngat.