‘Nan Ceu Awk A Si’
1. Zei tinvo dah kan ngeih?
1 Zinglei in zanlei nitlak tiang a ceumi, aa dawhmi nika ceunak nih Jehovah Pathian thang a ṭhatter. Asinain Jesuh nih a zultu pawl kha a dang ceunak a simi “nunnak ceunak” kha ngei u tiah a ti hna. (Johan 8:12) Mah thlaraulei ceunak ngeih cu tinvo sung zong a si, rian ngan zong a si. Midang nih ṭhathnemnak an hmuh nakhnga ‘mi hmai ah nan ceu awk a si’ tiah Jesuh nih a ti. (Matt. 5:16) Thlaraulei a mui tukmi tuchan ah thlaraulei ceunak kha hlan nakin mi hmai ah ceuter a herh khun. Khrih bantuk in kan ceunak zeitindah ceuter khawh a si?
2. Jesuh nih biatak ceunak kong chim a biapitnak kha zeitindah a langhter?
2 Phungchimnak Thawng in: Jesuh nih a caan, a thazaang le a ngeihmi thil hmang in tlangcung, mi an tamnak, inn le mi a hmuh khawhnak hmun paoh ah biatak ceunak kong a chim. Cuti tuah cu zeitluk in dah man a ngeih kha ṭha tein a hngalh. (Johan 12:46) Mi tam khawh chung tam sin phanh awkah Jesuh nih a zultu pawl kha hi “vawlei ceunak” an si khawh nakhnga a cawnpiak hna. (Matt. 5:14) Annih nih mi ca ṭhatnak tuahnak le thlaraulei biatak chimnak thawng in an ceunak kha an langhter.
3. Biatak ceunak kan sunsak zeitindah langhter khawh a si?
3 Pathian miphun nih “ceunak mi a simi bantuk in nan um awk a si” timi bia kha biapi ah an chiah i mi an hmuh hnanak hmun paoh ah phung an chim. (Efe. 5:8) Rianṭuan dinh caan le sianginn dinh caan ah Baibal asiloah bupi chuahmi cauk pawl kha mi hmuhnak i relnak nih Baibal kong i ruah awk lam a awnter khawh. Cutin a tuahmi mino unaunu nih Baibal cawnpiaknak pakhat a thawk khawh i a khaan hawi pawl kha cauk 12 a pek khawh hna.
4. Kan ceunak ceuternak ah zeicah ziaza ṭhat zong aa tel?
4 Ziaza Ṭha In: Ceunak ceuternak ah nifate kan tuahsernak zong aa tel. (Efe. 5:9) Rianṭuannak, sianginn le hmun dangdang ah Khrihfa ziaza ṭha kha mi nih fawi tein an hmuh caah Baibal biatak chimnak caanṭha kan hmu kho. (1 Pit. 2:12) Tahchunhnak ah, kum nga a simi ngakchiapa a ziaza a ṭhat ruang ah a sayama nih a nu le a pa kha phone a chawnh hna i hitin a ti hna: “Thil ṭha le thil ṭhalo a thleidang khomi hi bantuk ngakchia ka hmu bal hna lo.” Phungchimnak le ziaza ṭha nih mi kha “nunnak ceunak” ah a hnuh hna i Pathian thang a ṭhatter.