‘Zaangfahnak’ Ngei
1. Tuchan mi tampi nih zeidah an herh tuk?
1 Hlan nakin atu ah mi tampi cu zaangfahnak in bawmh an herh khun. Vawlei sining a chiat chin ruang ah mi cu an i nuam ti lo, an lung a dong i ruahchannak zong an ngei lo. Mi tampi cu bawmh an herh i Khrihfa a simi kannih cu mi cung siaherhnak langhter khawhnak sining kan ngei. (Matt. 22:39; Gal. 6:10) Zeitindah langhter khawh a si?
2. Zaangfahnak langhter khawhnak lam ṭha bik cu zeidah a si?
2 Zaangfahnak Langhter khawhnak Rian: Pathian sin lawng in hnemhnak taktak hmuh khawh a si. (2 Kor. 1:3, 4) Jehovah nih amah i zohchunh in ‘zaangfahnak’ langhter awk a kan forh i mi sin ah Pennak thawng ṭha chim awk rian a kan pek. (1 Pit. 3:8) Mah rian ah i tel hi “lung a kuaimi hna” hnemh khawhnak lam ṭha bik a si, zeicahtiah Pathian Pennak lawng hi harnak a tongmi hna caah ruahchannak taktak a si. (Isa. 61:1) Jehovah nih a miphun a zaangfah hna caah a rauhhlan ah ṭhatlonak vialte a hrawh dih lai i dinnak a umnak vawlei thar a ser cang lai.—2 Pit. 3:13.
3. Jesuh nih mi a hmuh hna ning in zeitindah kan hmuh khawh ve hna?
3 Mi kha Jesuh Hmuhning bantukin Hmu: Jesuh nih mibupi a cawnpiak hna tikah mibu bu khat men in a hmu hna lo. Pakhat cio kha thlaraulei bawmh a herhmi in a hmuh hna. Annih cu khaltu a ngei lomi tuu bantuk an si. An sining Jesuh nih a hmuh tikah a zaangfak hna i lungsau tein a cawnpiak hna. (Mar. 6:34) Mi kha Jesuh hmuhning in kan hmuh hna ahcun pakhat cio cungah zaangfahnak langhter awk a kan forh lai. Mah cu kan awcawi le kan mithmai ah a lang lai. Phungchim cu biapi bik kan chiahmi ah a cang lai i pakhat cio herhmi ning in kan bia kha kan thlen lai.—1 Kor. 9:19-23.
4. Zaangfahnak zeicah kan langhter zungzal awk a si?
4 Miphun kip chung in a rami mibu nganpi cu Pennak kong le siaherhnak kan langhtermi nih an lung a suk hna i biatak kha an cohlan. Zaangfahnak kan langhter zungzal ahcun zaangfah hmangmi Pathian, Jehovah thang a ṭhatter lai i a lung kan lawmhter lai.—Kol. 3:12.