Profet kha I Zohchunh hna U—Jonah
1. Jonah nih zei ziaza ṭha dah a ngeih?
1 Profet Jonah kong na ruah tikah zeidah na lung ah a chuak? Mi cheukhat nih a ral a chiami asiloah a lung a khongmi in an hmuh men lai. Asinain Jonah cu toidornak, ralṭhatnak le mahzawn ruah lonak lungput a ngeimi a si. Mah a ṭhami ziaza hna kha zeitindah ‘kan i zohchunh’ khawh lai?—Jeim 5:10.
2. Jonah aa toidornak kha zeitindah kan i zohchunh khawh?
2 Toidornak: A hramthawk ahcun Jonah cu Pathian nih rian a peknak hmun in kaa dang leiah a rak zaam. Assiria miphun cu ṭhatlonak leiah a min a thang ngaimi an si i Nineveh khua cu “thisen aa nehmi khuapi” tiah auh a si caah a zaammi cu khuaruahhar awk a si lo. (Nah. 3:1-3) Asinain Jehovah nih Jonah kha a chimhhrin i a voihnihnak rian a pek ṭhan tikah toidor tein a cohlan. (Ptb. 24:32; Jonah 3:1-3) A hmasa ahcun a rak zaam nain a hnuah Jehovah duhnak kha a rak tuah ṭhan. (Matt. 21:28-31) Kannih tah chimhhrin kan si hmanhah asiloah rianpek kan sinak hmun cu a har ngaimi a si hmanhah thawngṭha kha chim awkah bia kan khiak maw?
3. Phungchimnak ah zei bantuk caan ah dah ralṭhatnak le mahzawn ruah lonak lungput a herh?
3 Ralṭhatnak le Mahzawn Ruah Lonak: Jonah nih a ṭhalomi a biakhiahnak ruangah lawngcawng pawl an thi kho ti kha a hngalh tikah a nunnak kha lungtho tein a rak i pe. (Jonah 1:3, 4, 12) A hnuah Jehovah biaceihnak kong thanh awkah Nineveh khua lai pi tiang a ke in a rak kal, mah cu hmun rem kawl awkah a si kho men. Cu bantuk thil cu a ral a chiami nih si loin a ral a ṭhami Pathian profet lawng nih a tuah khawhmi a si. (Jonah 3:3, 4) Tuchan ah tah zeitin? Ralchanhnak ton caan ah ralṭha tein phungchim khawh awkah Pathian pekmi ralṭhatnak a herh. (Lam. 4:29, 31) Phungchimnak ah kan caan le kan ngeihchiah hman awkah mahzawn ruah lonak lungput a herh.—Lam. 20:24.
4. Jehovah profet hna kong kha zeicah kan ruah awk a si?
4 Jehovah profet pakhatkhat kong na rel fate an sining ah naa umter chunh ahcun ṭhatnak na hmu lai. Hitin i hal: ‘Keimah si ninglaw zeitindah ka leh hnga? A ziaza ṭha kha zeitindah kaa zohchunh khawh?’ (Heb. 6:11, 12) A dang zumhfekmi Jehovah profet hna sinin kan i cawn khawhmi kong kha a hnu i chuah laimi Kannih Pennak Rianṭuannak chung capar hna zongah kan i ruah ṭhan te lai.