Caanṭha na Hmuhmi kha Ṭha tein Hmang
A Ra Laimi Ruahnolhnak ah naa Lawmhnak Langhter
1. Ruahnolhnak puai nih a hlei khunmi zei caanṭha dah a kan hmuhter lai?
1 April 14 i tuah hnga dingmi Ruahnolhnak ah Jehovah a ṭhatnak cungah naa lawmhnak langhter awk le ṭhanternak caanṭha na hmuh lai. Luka 17:11-18 ah aa ṭialmi in Jehovah le Jesuh nih lunglawmhnak kha zeitindah an hmuh timi kong kan hngalh khawh. Ngaihchiat awk cu thinghmui zawtnak in a damtermi hna pahra lakah pakhat lawng nih lunglawmhnak a rak langhter. Tlanhnak man nih hmailei zongah zawtnak vialte a lohter dih lai i zungzal nunnak a kan hmuhter lai. Cubantuk thluachuah ruangah nifatin te Jehovah Pathian kan thangṭhat lai ti cu a fiang ko. A ra laimi zarh hna ah zeitindah lunglawmhnak kan langhter khawh?
2. Tlanhnak man cung kan i lawmhnak kha zeitindah kan ṭhanter khawh?
2 Lunglawmhnak Ṭhanter: Lunglawmhnak cu ruahnak in a rami a si. Ruahnolhnak ca a hlei in tuahmi Baibal relnak nih tlanhnak man cung kan i lawmhnak ṭhanter awkah a kan bawmh lai. Mah Baibal cang relnak hna kha Calendar le Cathiang kha Nifate Ṭha tein Rel timi cauk ah hmuh khawh a si. Mah kong hna kha nan chungkhar ningin i ruahṭi u. Cutin kan tuah ahcun tlanhnak man cung kan i lawmhnak a ṭhanter lai. Mah lengah kan i lawmhnak kha kan tuahsernak in langhter awkah a kan forh lai.—2 Kor. 5:14, 15; 1 Johan 4:11.
3. Ruahnolhnak thla chungah naa lawmhnak kha zeitindah na langhter khawh?
3 Lunglawmhnak Langhter: Lunglawmhnak kha tuahsernak in langhter awk a si. (Kol. 3:15) Lawmh a hngalmi thinghmui zawtnak a ngeimipa nih Jesuh kha a kawl i lawmhnak bia a va chimh. Cun khuaruahhar in damnak a hmuhmi kong kha midang zong lungtho tein a chimh hna lai ti cu a fiang ko. (Luka 6:45) Ruahnolh-nak tuah lio i zapi sin campaign tuahnak ah lungtho tein i tel ve awkah tlanhnak man cung naa lawmhnak nih an forh maw? Kan i lawmh-nak langhter khawhnak a dang lamkhat cu Ruahnolhnak thla ah manhcaan hmaikal ṭuan asiloah phungchimnak ah tam deuh in i telnak in a si. Ruahnolhnak tuah ni zanlei ah lunglawmhnak lungthin nih khual pawl don hna awk le an biahalnak hna kha leh hna awk caah timhcia si awkah a kan forh lai.
4. I ngaihchihnak a um lo nakhnga mah Ruah-nolhnak puai ah zeidah kan tuah khawh?
4 Mah Ruahnolhnak puai hi kan caah hmanung bik a si lai maw? (1 Kor. 11:26) Kan hngal lo. Asinain mah ruahnolhnak puai hi hmanung bik a si ahcun lunglawmhnak langhter awkah atu bantuk caanṭha hi kan hmu ṭhan ti lai lo. Mah caanṭha na hmuhmi kha ṭha tein na hmang lai maw? Kan kaa in kan chimmi lunglawmhnak bia le kan lung in kan ruahmi nih siang ngai in tlanhnak man a kan Petu Jehovah kha a lung a lawmhter.—Salm 19:14.