Phungchimnak ah a Caan kha Ṭha tein Hmang
2014, rianṭuannak kum chungah Jehovah Tehte Hna nih phungchimnak rian caah suimilam 1,945,487,604 kan hman. Mah nih Jehovah Pathian rian kha i manh lo ngaiin kan ṭuan ti a langhter. (Salm 110:3; 1 Kor. 15:58) “Caan hi tampi a taang ti lo” i cucaah phungchimnak rian ah mi tampi he i ton khawh awkah a sunglawimi na caan kha na hmang kho lai maw?—1 Kor. 7:29.
Phungchimnak rian ah a caan kha ṭha tein kan hman khawh nakhnga a tlari tein um thiam a herh. Tahchunhnak ah, phungchim kal lioah mi pakhat he hmanh bia i ruah loin suimilam pakhat, pahnih a dih ahcun mi tampi sin phungchim khawh awkah thlennawnnak na tuah kho lai maw? Thil sining cu hmunkhat le hmunkhat aa lo lai lo. Asinain “a ping a pang a thongmi” bantuk si loin a caan kha ṭha tein kan hman khawh nakhnga a tanglei i ruahnak cheuhnak hna nih a kan bawmh khawh.—1 Kor. 9:26.
Innkhat hnu Innkhat Phungchimnak: Kan tuah tawn ningin phungchimnak rian ah innkhat hnu innkhat phungchimnak in hram kan thawknak hi kum hrabu tampi chung a si cang. Mi tampi cu chun ah rian an ṭuan caah rianṭuannak in an ṭin caan asiloah an i dinh caan a simi zanlei sang ah innkhat hnu innkhat phungchim dingin i zuam chun hmanh. Chun ah cun lamcung asiloah chawlehnak hmun ah phungchim cu ṭhatnak a um deuh kho men.
Zapi Lak Phungchimnak: Khrihfabu sang ah a ummi mi tampi an i chawhnak hmun ah cabuai le fawi tein ṭhial khawhmi cauk chiahnak hna kha hmangin phungchim awk a si. (2013, July Kannih Pennak Rianṭuannak, ca. 5 ah zoh.) Cabuai asiloah fawi tein ṭhial khawhmi cauk chiahnak hna kha hmangin zapi lak phungchimnak hmun ah aa chawkmi an tlawm deuh cang ahcun aa chawkmi an tam deuhnak hmun dangah i ṭhial dingin Khrihfabu Rianṭuannak Kawmiṭi nih bia an khiah khawh.
Lennolh le Baibal Cawnpiaknak: Phungchimnak rian ah a dang lam hna ṭhathnemhnak a um lo caan ah lennolh le Baibal cawnpiaknak na kal kho lai maw? Tahchunhnak ah, Zarhte Ni zinglei ah innkhat hnu innkhat phungchim kal cu ṭhathnemhnak a um ahcun Baibal cawnpiaknak kha chunhnu asiloah zanlei sang ah na kal kho lai maw? Phungchimnak rian ah ṭhathnemhnak a um deuh khawh nakhnga sang pakhat chungah a ummi lennolh hna kha kal dingin naa tim kho lai maw?
Phungchimnak rian ah kan i telmi caan hna kha suimilam pek khawh a si ko nain ṭhathnemhnak a um tikah kan i lawm deuh. Rikhiahmi caan chungah phungchimnak rian ah hmanmi lam pakhat cu ṭhathnemhnak a um lo ahcun a dang lam in thlen i zuam. Phungchimnak rian ah a caan ṭha tein hman khawh awkah lam ka hruai tiah “rawlṭuan uktu bawi” Jehovah sinah thlacam!—Matt. 9:38.