“Pakhat Le Pakhat Thazaang I Pe U”

1. Kuatkhat Thesalon 5:11 ningin kan dihlak in zei rian ah dah kan i tel?

NAN Khrihfabu ah Biakinn saknak asiloah remhnak a um bal maw? A um ahcun biakinn thar ah a voikhatnak naa pumh lio kha naa cinken ko lai. Jehovah cungah naa lawm tuk. A tak ti ahcun pumh hramthawknak hla nan sak tikah naa lawmh tuknak ah na mitthli hmanh a ha dih ko lai. Ṭha tein sakmi Biakinn nih Jehovah thang a ṭhatter. Asinain biakinn ah a rami pawl thazaang kan pekmi hna nih a thang a ṭhatter chinchin. Lamkaltu Paul nih a bik in lakmi Baibal caang, 1 Thesalon 5:11 ah kan hmuhmi bia a ṭial lioah mah kong hi a lungthin ah a chiah.—Rel.

2. Hi capar ah zei kong dah kan i ruah hna lai?

² Lamkaltu Paul cu zumtukhat unau pawl thazaang peknak ah zohchunh awk a ṭha bikmi pakhat a si. Unau pawl cungah zawnruahnak a ngei. Hi capar ah unau pawl kha (1) harnak inkhawh awk, (2) pakhat le pakhat karah daihnak ser awk le (3) Jehovah an zumhnak fehter awkah a bawmh hna ning kong kan i ruah lai. Zeitindah Paul kha kan i zohchunh khawh i unau pawl thazaang kan pek khawh hna timi kong i ruah hna u sih.—1 Kor. 11:1.

Paul Nih Unau Pawl Kha Harnak Inkhawh Awkah A Bawmh Hna

3. Paul nih zei a tlarimi hmuhnak dah a ngeih?

³ Paul nih unau pawl kha a dawt tuk hna. Paul cu amah theng harnak tampi a tongmi a si caah harnak a tongmi unau pawl cungah zaangfahnak le zawnruahnak a langhter khawh. Voikhat cu tangka a ngei ti lo i amah le a hawile pawcawmnak caah rian a ṭuan. (Lam. 20:34) Thlam sernak in a paw aa cawm. Korin khua a phanh tikah a hmasa ah thlam sertu Akuila le Priscilla te he rian an ṭuanṭi. Asinain “sabbath fate” Judah mi le Greek mi kha a cawnpiak hna. A hnu i Silas le Timote an phanh tikah “Paul nih a caan kha a dihlak in phungchimnak ah khan a hman.” (Lam. 18:2-5) Paul nih a nunnak ah a biapi bikmi aa tinhnak Jehovah rian ṭuan ding kha zeitikhmanh ah a philh lo. Paul cu phungchim rian ah aa zuammi le amah pumpak herhbaunak aa zohkhenh khomi a si caah unau pawl kha thazaang a pek khawh hna. Nunnak he aa tlaiin lungretheihnak le chungkhar zohkhenhnak ruangah “a biapi deuhmi thil”—Jehovah biaknak ah aa telmi vialte kha zei rel loin um lo awkah ralrin a pek hna.—Fil. 1:10, NW.

4. Paul le Timote nih zumtukhat unau pawl kha hremnak tei khawh awkah zeitindah an bawmh hna?

⁴ Thesalonika Khrihfabu dirh a si hnu tlawmpal ah zumtu thar pawl cu a fakmi ralchanhnak an tong. Ralchanhtu pawl nih Paul le Silas kha an hmuh hna lo tikah “unau pawl a cheukhat kha khua uktu bawi hna sinah an hnuh hna i” “Sizar Siangpahrang nawl a buarmi an dihlak hin an si” tiah an au. (Lam. 17:6, 7) Mah Khrihfa a sikami hna cu khua mi nih an ralchanhmi hna an hmuh tikah zeitluk in dah an lau lai ti khi na mitthlam ah na cuanter kho maw? Jehovah rianṭuannak ah an lungthawhnak cu a zor kho, asinain Paul nih cutin siter a duh hna lo. Silas he khua in an chuak ko nain mah Khrihfabu thar kha ṭha tein zohkhenh a si nakhnga an timhtuah. Paul nih Thesalon mi kha hitin a ti hna: “Timote kha nan sinah rak thlah u sih kan ti. . . . Nan cung i a tlungmi hremnak nan inmi ruangah hin ahohmanh nan i let nakhnga lo nanmah cu thazaang pek awkah le nan zumhnak ah fek tein nan dir khawh nakhnga nanmah bawmh awkah amah cu kan hun thlah.” (1 Thes. 3:2, 3) Timote cu a khua Listra ah hremnak rak ton cang dawh a si. Paul nih cuka i unau pawl thazaang a pek hna ning kha a rak hmuh. Jehovah nih a bawmhmi hna a hmuh caah unau thar pawl zong an caah thil sining zei paoh a hung ṭha ve lai tiah aamah a khaan khawh hna.—Lam. 14:8, 19-22; Heb. 12:2.

5. Unaupa Bryant nih Khrihfa upa pakhat bawmhnak in zeitindah ṭhatnak a hmuh?

⁵ Zumtukhat unau pawl thapek awkah Paul nih a dang zeidah a tuah? Paul le Barnabas cu Listra, Ikonium le Antiok khua ah an tlawng i “Khrihfabu kip ah khan Khrihfa upa an chiah hna.” (Lam. 14:21-23) Mah rian pekmi pa hna cu tuchan Khrihfa upa pawl bantukin Khrihfabu caah hnemhnak hrampi an si lai ti cu lunghrin awk a um lo. Unaupa Bryant chimmi bia hi ruathmanh: “Kum 15 ka si ah ka pa cu inn in a chuak i ka nu cu buchung chuah a si. Mah tikah hlawtmi ka si timi ruahnak ka ngei i ka lung a dong.” Mah a har tukmi caan ah inkhawhnak ngeih dingin Bryant cu zeinihdah a bawmh? Hitin a ti: “Khrihfa upa a simi Tony nih pumhnak ah le caan dang ah bia a ka ruah. Harnak a tong ko nain aa nuammi hna an kong kha a ka chimh. Salm 27:10 kha a ka relpiak, cun a pa cu zohchunh awk ṭha a si lo nain zumhfek tein Jehovah a biami Hezekiah kong kha a ka chimh tawn.” Cu bantuk bawmhnak hna cu Bryant cungah zei huham dah a ngeih? “Tony thazaang peknak thawngin a donghnak ah lungsinak a pemi, caantling rian kha ka hun ṭuan” tiah Bryant nih a ti. Khrihfa upa hna, Bryant bantukin thazaang a pemi “dawtnak bia” a herhmi hna kha bawmh awkah hliphlau tein um u.—Ptb. 12:25.

6. Paul nih unau pawl thazaang pek awkah Baibal chung i an kong ṭialmi hna kong kha zeitindah a hman?

⁶ Paul nih zumtukhat unau pawl kha Jehovah pekmi thazaang thawngin “a nganmi tehte bu” nih harnak an inkhawh tiah a ti hna. (Heb. 12:1) Paul nih harnak a phunphun a tong nain hlawhtlinnak a hmumi, hlanlio mi hna kong nih unau pawl kha ralṭhatnak ngeih awk le “a nungmi Pathian khualipi” ah lungthin pek peng awkah a bawmh khawh hna ning kha a hngalh. (Heb. 12:22) Tuchan zongah cutin a si. Jehovah nih Gideon, Barak, David, Samuel le a dang mi tampi a bawmh hna ning rel tikah thazaang a hmu lomi ahodah a um? (Heb. 11:32-35) Tuchan i zumhnaklei ah zohchunh awk ṭha a simi hna kong ah tah zeitin? Tuchan i zumhfekmi Jehovah salle kong relnak in thazaang a hmumi unau pawl sinin vawleicung pumpi zungpi nih cakuat kan hmuh tawn.

Paul Nih Pakhat Le Pakhat Karah Daihnak Ser Ning Kha Unau Pawl A Hmuhsak Hna

7. Rom 14:19-21 i Paul ruahnak cheuhnak in zeidah na cawn khawh?

⁷ Lungtho tein Khrihfabu ah daihnak kan sernak thawngin unau pawl kha thazaang kan pek hna. Kan hmuh ning aa khah lonak kha ṭhencheunak ah kan hmang lo. Baibal phunglam buar a si lomi kong hna ah a tlarimi kan si. Tahchunhnak pakhat hi zohhmanh. Rom Khrihfabu cu Judah mi le Jentail mi in dirhmi a si. Moses Nawlbia hrawh a si tikah rawl cheukhat he aa tlaiin ei lo ding timi thlauhnak a um ti lo. (Mar. 7:19) Mah caan thawkin Judah mi Khrihfa cheukhat nih zeipaoh ei khawh a si tiah an ruah. Asinain a dang Judah mi Khrihfa cheukhat nih cun cutin an ruat lo. Mah kong he aa tlaiin Khrihfabu cu an hun i ṭhencheu. Paul nih daihnak hmunhter le nawlngaih a biapitnak kha a hleiin a langhter: “Sa ei i sum te hna, zu din i sum te hna, nan unau a tlukrilhtertu a si ding paohpaoh tuah i sum te hna kha a hmaanmi thil a si.” (Rom 14:19-21 rel.) Cu bantuk lung i khahlonak nih pumpak in siseh, Khrihfabu dihlak in siseh zeitluk in dah a hnorsuan ti kha zumtukhat unau pawl nih an hngalhthiam nakhnga Paul nih a bawmh hna. Paul nih midang a tlukrilhter khomi a ziaza hna kha lungtho tein thlen a duh. (1 Kor. 9:19-22) Pumpak duhmi kongkau ah buaibainak chuahter kha kan hrial ahcun midang thazaang a pemi le daihnak a hmunhtermi kan si lai.

8. Khrihfabu daihnak a hnorsuangmi, a biapimi kongkau a chuah tikah Paul nih zeitindah a lehrulh?

⁸ A biapimi kongkau ah an lung aa khat lomi hna he daihnak sernak ah Paul cu zohchunh awk ṭha a si. Tahchunhnak ah, kumzabu pakhatnak i Khrihfabu chungmi cheukhat nih Khrihfa a hung simi Jentail mi hna kha lenglei mi nih an soi hna nakhnga lo cuarpar i tan dingin an fial hna. (Gal. 6:12) Paul nih cutin an hnekmi hna kha fakpi in a al hna, asinain amah hmuh ning zulh awkah hnek loin lamkaltu pawl le Jerusalem i upa pawl sinah toidor tein ruahnak a hal hna. (Lam. 15:1, 2) A phichuak cu a tuahsernak nih Khrihfabu ah lawmhnak le daihnak um peng awkah a bawmh.—Lam. 15:30, 31.

9. Paul nunning kha zeitindah kan i zohchunh khawh?

⁹ A fakmi bia i alnak a chuah tikah Khrihfabu zohkhenh dingin Jehovah nih rian a pekmi hna sinah lamhruainak kan kawlnak thawngin daihnak kan ser khawh. Tahchunhnak ah, Baibal ah hram aa bunhmi lamhruainak kha bupi chuahmi cauk hna ah kan hmuh tawn. Kanmah pumpak hmuhnak hna hlorh canah mah lamhruainak hna zulhnak ah lungthin kan pek ahcun Khrihfabu ah daihnak kan chuahter lai.

10. Paul nih Khrihfabu ah daihnak a karh nakhnga zeidah a tuah rih?

¹⁰ Paul nih unau pawl i an derthawmnak kha si loin an ṭhatnak a langhternak thawngin daihnak a karhter. Tahchunhnak ah, Rom mi hna sin a cakuat a donghnaklei ah Paul nih mi tampi kha an min in a langhter i thil sining tam deuh ah a thangṭhat hna asiloah an sining hna kha a langhter. Kannih zong unau pawl i an sining ṭha hna kan chimnak thawngin Paul kha kan i zohchunh khawh. Cutin kan tuahmi nih unau pawl he a kan naihter chin i Khrihfabu ah dawtnak a fehter chin.

11. Lung i khahlonak hna a um tikah zeitindah daihnak kan umter ṭhan khawh?

¹¹ A caan ah Khrihfa nutling, patling a simi hmanh pakhat le pakhat karah lung i khah lonak asiloah bia i alnak hna a um kho men. Paul le a hawikom ṭha Barnabas zong cutin an rak si ve. Missionary khual an tlawnnak ah Marka kan i kalpi lai maw, kalpi lai lo timi kongah an duhnak aa khat lo. Cucaah bia “fakpi in an i al” i an i ṭhen. (Lam. 15:37-39) Asinain Paul, Barnabas le Marka nih a rawkmi an i hawikomhnak kha an sersiam ṭhan i Khrihfabu daihnak le lungrualnak an sunsak kha an langhter. A hnuah Paul nih Barnabas le Marka kha ṭha tein a chawnhbiak hna. (1 Kor. 9:6; Kol. 4:10) Kannih zong unau dang he kan i khahlonak zei paoh kha kan tawnghtham a hau i an ngeihmi sining ṭha cung tu ah lungthin kan pek peng a hau. Cuticun daihnak le lungrualnak kan karhter lai.—Efe. 4:3.

Paul Nih Unau Pawl Zumhnak Kha A Fehter

12. Unau pawl nih an tonmi zuamcawhnak cheukhat cu zei hna dah an si?

¹² Unau pawl kha Jehovah an zumhnak kan fehternak thawngin thazaang kan pek hna. Unau cheukhat cu zumlotu an chungkhar, rianṭuanṭi hawi asiloah sianginn kaiṭihawi nih an nihsawh hna. Cheukhat cu a zualmi zawtnak an ngei asiloah an tonmi lungfahnak hna tei khawh awkah an i zuam. Cheukhat cu tipil an ing cang ko nain hi chan donghnak an hngahnak caan saupi a si cang. Mah thil sining hna cu tuchan Khrihfa hna caah an zumhnak a hneksakmi thil a si kho. Kumzabu pakhatnak i Khrihfa hna zong cu bantuk zuamcawhnak hna an rak tong ve. Paul nih unau pawl thapek awkah zeidah a tuah?

13. An zumhnak ruangah nihsawhnak a tongmi hna kha Paul nih zeitindah a bawmh hna?

¹³ Paul nih unau pawl an zumhnak fehter awkah Baibal a hman. Tahchunhnak ah, Judah mi Khrihfa hna nih Judah biaknak cu Khrihfa nakin a ṭha deuh tiah a timi, zumlotu an chungkhat pawl i soiselnak kha leh awk an hngal men lai lo. Hebru mi hna sin Paul cakuat nih cuka i Khrihfa pawl kha thazaang a ngeihter tuk hna lai ti cu lunghrin awk a um lo. (Heb. 1:5, 6; 2:2, 3; 9:24, 25) Paul i hmual a ngeimi mah bia hna nih ralchanhtu pawl sinah zeidah chim ding ti kha hngalh awkah a bawmh hna. Tuchan zongah nehsawhnak a tongmi zumtukhat unau pawl kha an zumhnak kong ṭha tein fianter awkah Baibal hrambunhmi cauk hna hman dingin kan bawmh khawh hna. Mino pawl cu biaknaklei puai pawl le chuahni an tuah lo ruangah nihsawh an si ahcun zeicah mah puai hna an tuah lo ti a langhtermi Nunnak Kha Zungzal In I Nuamhpi! timi cauk, Cawn Dingmi 44nak i a konglam pawl kawl awkah kan bawmh khawh hna.

14. Paul cu phungchimnak le cawnpiaknak ah a rian a tam ko nain zeidah a tuah?

¹⁴ Paul nih ‘thilṭha i tuahpiaknak’ thawngin dawtnak langhter awkah unau pawl kha tha a pek hna. (Heb. 10:24) A bia lawngin si loin a tuahsernak in unau pawl kha a bawmh hna. Tahchunhnak ah, Judea i zumtukhat unau nih mangṭam an ton tikah Paul nih an herhmi bawmhnak cheukhat a rak pek hna. (Lam. 11:27-30) Paul cu phungchimnak le cawnpiaknak ah a rian a tam tuk ko nain thilrilei bawmh a herhmi unau pawl bawmh khawhnak lam kha a kawl zungzal. (Gal. 2:10) Cutin a tuahnak thawngin Jehovah nih a kan zohkhenh lai timi zumtukhat unau pawl i an zumhnak kha a fehter chin. Tuchan ah kan caan, kan thazaang le kan thiamnak kha har tongmi hna bawmhnak ah kan hman ahcun unau pawl an zumhnak zong kan fehter lai. Vawleicung pumpi rian caah thawhlawm hmaan tein kan peknak thawngin cutin kan tuah khawh. Mah bantuk lam le a dang lam hna in unau pawl kha Jehovah nih zeitikhmanh ah a kan hlaw lai lo tiah zumh dingin kan bawmh hna.

15-16. A zumhnak a hung dermi unau pawl kha zeitindah kan pehtlaih hna awk a si?

¹⁵ Paul nih an zumhnak a hung dermi hna kha a bawmh peng hna. An cungah zaangfahnak a langhter i panh tein le a ṭhatnaklei in a chawnhbiak hna. (Heb. 6:9; 10:39) Tahchunhnak ah, Hebru mi hna sin a cakuat ah a pekmi hna ruahnak cheuhnak cu amah zong zulh a hau ve ti langhter awkah “kan” timi le “kannih” timi biafang hna a hman tawn. (Heb. 2:1, 3) Paul bantukin kannih zong a zumhnak a hung dermi hna cungah kan lung a dong lo. Mah canah lungtak tein an cungah siahernak kan langhternak thawngin thazaang kan pek hna. Cuticun kan dawt hnanak kha kan fehter. Panh tein le nem tein bia kan chimmi nih a ngaitu kha a lawmhter hna i thazaang a ngeihter hna.

¹⁶ Paul nih unau pawl kha an ṭuanmi rian Jehovah nih a hngalh ko tiah tha a pek hna. (Heb. 10:32-34) A zumhnak a der thluahmahmi unau pakhat kan bawmh tikah cutin kan tuah khawh ve. Biatak chung a rak luh ning kha kan hal khawh asiloah Jehovah bawmhnak a rak hmuh lio caan hna kha ruah ṭhan awkah tha kan pek khawh. Hlanah a rak langhtermi dawtnak kha Jehovah nih a philh lai lo ti le hmailei ah Jehovah nih a hlaw lai lo ti kha zumh awkah mah caanṭha kha kan hman khawh. (Heb. 6:10; 13:5, 6) Cu bantuk biaruahnak nih kan dawtmi unau pawl kha Jehovah rian ṭuan peng awkah a forh men hna lai.

“Pakhat Le Pakhat Thazaang I Pe U”

17. Zei bantuk sining hna ah dah kan ṭhancho khawh?

¹⁷ Innsaknak rian ah a ṭuanmi pakhat cu caan a rauh deuh tikah a thiamnak a ṭhancho bantukin kannih zong pakhat le pakhat thapeknak ah hmual a ngei deuhmi kan hung si kho ve. Unau pawl kha an tonmi harnak inkhawh awkah thazaang ngeih dingin hlanlio i inkhawhnak a ngeimi hna kong kan chimh hnanak thawngin kan bawmh khawh hna. Midang an ṭhatnak kong kan chimnak thawngin daihnak kan karhter khawh, daihnak a hnorsuangmi thil a um tikah daihnak kan hmunhter khawh i lung i khahlonak hna a um tikah daihnak kan ser ṭhan khawh. Cun a biapimi Baibal biatak kong kan chimnak in, a herhmi bawmhnak kan pek hnanak in le thlaraulei ah a dermi hna kan bawmh hnanak thawngin unau pawl an zumhnak kha kan fehter khawh.

18. Zei tuah awkah dah bia na khiah?

¹⁸ Thlaraulei thazaang peknak rian a ṭuanmi hna nih nuamhnak le lungsinak an hmu. Kannih zong unau pawl an zumhnak fehter dingin kan bawmh hna tikah nuamhnak le lungsinak kan hmu kho ve. A hnuah a rawk ṭhan khomi innsaknak rian he i lo loin midang thazaang peknak rian i a phichuak cu zungzal in a hmun kho. ‘Pakhat le pakhat thazaang i pek awk le i bawmh awkah’ biakhiak hna u sih.—1 Thes. 5:11.