Harnak Caan Inkhawh Awkah Midang Kha Bawm Hna

1. Jehovah nih a salle thlacamnak kha zeitindah a leh tawn hna?

JEHOVAH nih lungtho tein thla a cammi pakhatkhat a thlacamnak lehnak ah nangmah aan hman khawh ti kha na hngal maw? Khrihfa upa, bu rianṭuantu, hmaikal asiloah thawngthanhtu na si ah midang kha na bawmh khawh hna. Mino asiloah kum upa na si ah, unaupa asiloah unaunu na si ah midang kha na bawmh khawh hna. Jehovah a dawmi pakhatkhat nih a sinah bawmhnak an hal tikah Khrihfa upa le a dang zumhfekmi a salle kha “bawmtu ṭhahnem ngaingai” si awkah Jehovah nih a hman tawn hna. (Kol. 4:11) Mah bantuk lam in Jehovah le unau pawl caah rian kan ṭuan khawhmi cu tinvo sung taktak a si! Zawtnak a karh tik, leiser ral a tlun tik asiloah hremnak a um tikah unau pawl kha bawmhnak le hnemhnak kan pek khawh hna.

Zawtnak A Karh Tikah Midang Kha Bawm Hna

2. Zawtnak a karh lioah midang bawmh cu zeicah zuamcawhnak a si khawh men?

² Zawtnak a karhmi nih pakhat le pakhat i bawmh awkah a harter khawh. Tahchunhnak ah, kan hawile sinah len kan duh men hna lai nain cutin i len cu a him lo. Pawcawmnak caah aa harhmi hna rawl ei sawm kan duh men hna lai nain mah zong cu a si kho lo. Midang kha bawmh kan duh men hna lai nain kanmah chungkhar theng harnak an ton tikah mah cu zuamcawhnak a si kho. Asinain unau pawl kha bawmh kan duh hna i kan si khawh chungin kan bawmh hna tikah Jehovah nih a sunsak tuk. (Ptb. 3:27; 19:17) Zeidah kan tuah khawh?

3. Desi te Khrihfabu i Khrihfa upa hna sinin zeidah kan cawn khawh? (Jeremiah 23:4)

³ Khrihfa upa tuah khawhmi. Khrihfa upa pakhat na si ahcun tuu pawl kong kha ṭha tein hngalh i zuam. (Jeremiah 23:4 rel.) A hmasa capar ah langhtermi unaunu Desi nih hitin a ti: “Kan phu i Khrihfa upa pawl cu phungchim rian ah keimah le unau hna he an ṭuanṭi i caan zong kan hmangṭi tawn hna.”b Mah nih COVID-19 pulrai a tlun hnu le mah zawtnak ruangah chungkhar thihtaknak a tongmi Desi kha bawmh dingin Khrihfa upa pawl caah a fawiter deuh.

4. Khrihfa upa pawl nih Desi kha zeicah an bawmh khawh, mah in zeidah kan cawn khawh?

⁴ Desi nih hitin a ti, “Khrihfa upa pawl cu ka hawile bantuk an si caah ka intuarnak le ka lungretheihnak kong an sinah chim kha kaa fawih.” Khrihfa upa nih zeidah an cawn khawh? Harnak caan a phanh hlanah nan tuu pawl kha ṭha tein zohkhenh hna u. An caah hawikom si u. Zawtnak a karh ruangah nan mipum in nan len khawh hna lo ahcun a dang lam in pehtlaihnak tuah hna u. Desi nih hitin a ti: “A caan ah nikhat chungah Khrihfa upa tampi nih phone an ka chawnh asiloah ca an ka kuat. An ka relpiakmi le an ka kuatmi Baibal caang pawl cu ṭha tein ka hngalhciami a si hmanhah ka lung a ka suk tuk.”

5. Khrihfa upa nih zeitindah unau pawl herhmi kha an hngalh khawh i an caah bawmtu an si khawh?

⁵ Unau pawl herhmi hngalh khawhnak lamkhat cu fimkhur tein biahalnak tuahnak thawngin a si. (Ptb. 20:5) Eidin, sii le a dang thil hna a za in an ngei maw? An rian asiloah an inn hmanh a sungmi an si maw? Cozahlei bawmhnak an hmuh nakhnga bawmh an herh maw? Desi cu zumtukhat unau pawl sinin thilrilei bawmhnak a rak hmu. Asinain Khrihfa upa nih an langhtermi dawtnak le Baibal in tha an pekmi nih a harnak inkhawh awkah a hleiin a rak bawmh. Hitin a ti: “Khrihfa upa pawl nih thla an ka campi. Zei kong dah an cam ti cu a dikthliar in kaa cinken ti lo nain ka intuarnak tu cu kaa cinken. Jehovah nih ‘Nangmah lawng na si lo’ tiah a ka timi bantuk a si.”—Isa. 41:10, 13.

6. Khrihfabu i unau tampi nih midang bawmh awkah zeidah an tuah khawh? (Hmanthlak zoh.)

⁶ Midang tuah khawhmi. Khrihfa upa nih unau pawl kha an zohkhenh hna lai tiah kan i ruahchan. Asinain Jehovah nih pakhat le pakhat thazaang i pek awk le i bawmh awkah a kan fial. (Gal. 6:10) A zawmi pakhatkhat cungah kan langhtermi dawtnak cu thil hmete a si hmanhah huham a ngei tuk kho. Ngakchia pakhat nih unaupa pakhat kha thazaang pek awkah card asiloah zuk suaimi a kuat khawh. Mino unau pakhat nih unaunu pakhat caah dawr ah thil a cawkpiak khawh asiloah thil pakhatkhat a tuahpiak khawh. A dang unau pawl nih a dam lomi unau pakhat caah rawl an chuanpiak khawh i a inn ah an va chanh khawh. Zawtnak a karh tikah Khrihfabu i unau kip nih thazaang pek an herh ti cu a hmaan ko. Pumh dih hnuah unau pawl he mipum in siseh, video call in siseh i chawnhbiak khawh awkah sau deuh kan umta kho. Khrihfa upa zong thazaang pek an herh ve. Unau cheukhat nih zawtnak a karh chungah unau pawl caah a rian a tam pengmi Khrihfa upa pawl sinah lawmhnak ca an kuat hna. ‘Pakhat le pakhat thazaang i pek awk le i bawmh’ peng awkah kan si khawh chung kan i zuammi cu zeitluk in dah a ṭhat!—1 Thes. 5:11.

Leiser Ral A Tongmi Kha Bawm Hna

7. Leiser ral a tlun tikah zei zuamcawhnak dah a um kho?

⁷ Leiser ral nih mi pakhat nunnak kha mitṭhep ah a hrawh khawh. Leiser ral a tongmi hna cu an thilri le an inn an sung kho asiloah an dawtmi pakhatkhat hmanh an thi kho. Cu bantuk thil ṭhalo hna kha unau pawl zong an tong ve. Anmah bawmh awkah zeidah kan tuah khawh?

8. Leiser ral a tlun hlanah Khrihfa upa le chungkhar lu nih zeidah an tuah khawh?

⁸ Khrihfa upa tuah khawhmi. Khrihfa upa hna, leiser ral a tlun hlanin unau pawl kha i timhtuah awkah bawm hna u. Unau dihlak nih an him nakhnga le Khrihfa upa he pehtlaihnak an tuah nakhnga a herhmi thil hna kha hngalh awkah bawm hna u. A hmasa capar ah langhtermi Margaret nih hitin a ti: “Khrihfa upa pawl nih mahle hmun herhbaunak ah kan umnak hmun ah ram mei a kang kho tiah ralrinnak an kan pek. Nawlngeitu pawl nih inn in chuak u tiah nawl an kan pek tik asiloah thil sining ṭih a nun tikah inn in chuah colh awkah Khrihfa upa nih an kan fial.” Mah cu a caante ah kan hmuhmi lamhruainak a si, zeicahtiah mah hnu zarh nganak ah ram mei a kang i ṭih a nung tuk hringhran. Chungkhar pumhnak ah chungkharmi pakhat cio nih tuah dingmi thil hna kha chungkhar lu nih ruahceihpi khawh a si. Nan fale he nan i timhtuah chung a si ahcun leiser ral a tlun tikah lungdai tein nan um kho deuh lai.

9. Leiser ral a tlun hlan le a tlun hnuah Khrihfa upa nih zeitindah an bawmh khawh hna?

⁹ Phu zohkhenhtu na si ahcun na phu ah a ummi unau dihlak i an phone nambar le address pawl kha hngalh awkah i zuam. Leiser ral a tlun hlanin cutin na tuah awk a si. Cazin tuah law hmanung bik an hmanmi ningin a si nakhnga hal ṭhan lengmang hna. Cutin na tuah ahcun leiser ral a tlun tikah bawmh a herhmi unau pakhat cio kha pehtlaihnak na tuah khawh hna lai. Thil sining kha Khrihfa upa phu i khuakhangtu sinah chim colh law amah nih peng zohkhenhtu kha pehtlaihnak a tuah lai. Mah unaupa pawl cutin rian an ṭuanṭi tikah a ṭha bikmi lam in unau pawl kha an bawmh khawh hna lai. Ram mei a kangh tikah Margaret te peng zohkhenhtu cu suimilam 36 chung a it lo. An inn a chuahtakmi unau 450 hrawng kha pehtlaih awk le zohkhenh awkah Khrihfa upa pawl he rian an ṭuanṭi. (2 Kor. 11:27) Cuticun dornak hmun a herhmi unau vialte kha an bawmh khawh hna.

10. Khrihfa upa nih tuu pawl zohkhenhnak rian kha zeicah a biapi tukmi in an hmuh awk a si? (Johan 21:15)

¹⁰ Khrihfa upa cu Baibal in unau pawl thapek awk le a lung a dongmi pawl bawmh awkah rian an ngei. (1 Pet. 5:2) Leiser ral a tlun tikah Khrihfa upa pawl nih unau pakhat cio cu an him i rawl, thilpuan le dornak hmun an ngeih nakhnga an timhtuah hmasa awk a si. Asinain thla tampi a rauh hnu zongah hartongmi unau pawl nih thlaraulei le lungthinlei bawmhnak an herh men lai. (Johan 21:15 rel.) Zung Ṭengnge Kawmiṭi rian a ṭuan i leiser ral a tongmi unau tampi he tonnak a ngeimi Harold nih hitin a ti: “An lung a dam nakhnga a caan pek a hau. An tonmi sunghzatlaknak kha an hun tei men ko lai nain an dawtmi mithi kong, an sunsak tukmi thilri le harnak an rak tonnak kong tu cu an philh men lai lo. Mah nih an ngaih a chiatter ṭhan lengmang men lai. Mah cu zumhnak an ngeih lo caah si loin minung phung a si.”

11. Chungkhar hna nih zeidah an herh khawh men?

¹¹ Khrihfa upa nih “a ṭapmi sinah va ṭap ve u” timi ruahnak cheuhnak kha an zulh. (Rom 12:15) Hartongmi hna nih Jehovah dawtnak asiloah Khrihfa unau pawl dawtnak kan hmu peng ti kha an hngalh ṭhan a hau men lai. Thlacamnak, hlathlainak, pumhnak le phungchimnak hna i telin thlaraulei tuah tawnmi thil hna an tuah khawh peng nakhnga Khrihfa upa nih bawmh an duh hna. Cun leiser ral nih a hrawh khawh lomi thil cungah lungthin pek dingin nulepa nih an fale kha bawmh awkah Khrihfa upa nih tha an pek khawh hna. Nulepa hna, nan fale kha Jehovah cu nan Hawi a si zungzal lai i aan bawmh zungzal hna lai ti kha hngalhter hna u. Cun anmah bawmh awkah timhcia a simi vawleicung pumpi chungkhar an ngei ti kha hngalhter hna u.—1 Pet. 2:17.

12. Leiser ral a tongmi hna bawmhnak rian ah i tel dingin midang nih zeidah an tuah khawh? (Hmanthlak zoh.)

¹² Midang tuah khawhmi. Nan pawngkam ah leiser ral a um ahcun zeitindah bawmh khawh a si ti kha Khrihfa upa sinah hal hna. An inn a chuahtakmi hna asiloah innsaknak ah mah lungtho tein aa pemi hna kha nan inn ah chikkhat nan umter khawh hna. Bawmh a herhmi unau pawl kha eidin nan kuat khawh hna i nan bawmh khawh hna. Leiser ral a tlunnak cu lamhla a si hmanhah nan bawmh khawh rih hna. Zeitin in dah? An caah thla campiaknak thawngin a si. (2 Kor. 1:8-11) Vawleicung pumpi rianṭuannak caah thawhlawm peknak thawng zongin hartongmi kha nan bawmh khawh hna. (2 Kor. 8:2-5) Leiser ral a tlunnak hmun ah na kal khawh ahcun bawmh awkah na tuah khawhmi kha Khrihfa upa sinah hal hna. Bawmh dingin sawm na si ahcun a herh biknak hmun le a herh bikmi caan ah bawmhnak pek khawh dingin cawnpiaknak cheukhat na hmu men lai.

Hremnak Inkhawh Awkah Unau Pawl Kha Bawm Hna

13. Kan rian khenkham a sinak ram hna ah unau pawl nih zei zuamcawhnak dah an ton?

¹³ Kan rianṭuannak khenkham a sinak ram hna ah hremnak nih kan nunnak kha a harter chin. Mah ah a ummi unau pawl cu tangkalei buaibainak, zawtnak le dawtmi nih thihtaknak hna an tong. Asinain khenkhamnak ruangah Khrihfa upa pawl cu thazaang pek a herhmi unau pawl sinah va kal in an leng kho men hna lai lo. A hmasa capar ah langhtermi Andrei zong cutin a rak tong. An phu chung i unaunu pakhat cu tangkalei ah harnak a tong. Mah unaunu cu mawṭaw accident a tong i khuaihlainak tampi tuah a hau, cun rian zong a ṭuan kho lo. Khenkhamnak le pulrai lakah unaupa pawl nih bawmhnak pek awkah an si khawh chungin an i zuam, mah thil sining vialte kha Jehovah nih a hngalh.

14. Khrihfa upa nih Jehovah an i bochannak thawngin zeitindah zohchunh awk ṭha an chiah khawh?

¹⁴ Khrihfa upa tuah khawhmi. Andrei nih thla a cam i a tuah khawhmi thil kha a tuah. Jehovah nih zeitindah a lehrulh? Mah unaunu bawmh awkah tam deuh in aa pe kho dingmi Khrihfabu i unau pawl kha a forh hna. Unau cheukhat nih unaunu kha siizung ah an piah i a dang nih tangkalei in an bawmh. Jehovah nih unau pawl kha an tuah khawhmi thil tuah awkah a forh hna i unau pawl lungrualnak le ralṭha tein an i zuamnak cungah thluachuah a pek hna. (Heb. 13:16) Khrihfa upa hna, kan rianṭuannak khenkham a si tikah midang kha bawmhnak hal hna u. (Jer. 36:5, 6) A biapi bikmi cu Jehovah kha i bochan u. Jehovah nih unau pawl an herhmi bawmhnak pek awkah aan bawmh khawh hna.

15. Hremnak lakah Khrihfa lungrualnak kha zeitindah kan kilven khawh?

¹⁵ Midang tuah khawhmi. Khenkhamnak ruangah unau pawl he phu hmetete lawngin i ton khawh a si men lai. Cucaah kan lakah daihnak umter cu a hlan nakin a biapi chinchin. Pakhat le pakhat kha si loin Satan tu kha do u. Unau pawl palhnak cungah lungthin pe hlah asiloah buaibainak tawnghtham awkah caan saupi tiang hngak hlah. (Ptb. 19:11; Efe. 4:26) Pakhat le pakhat i bawmh awkah timhcia tein um u. (Titas 3:14) Unau dang nih bawmh a herhmi unaunu pakhat an bawmhmi nih mah lohmun phu cungah ṭhathnemhnak a chuahter. Chungkhar pakhat bantukin an hun i naih chinchin hna.—Salm 133:1.

16. Kolose 4:3, 18 ningin hremnak a tongmi unau pawl kha zeitindah kan bawmh khawh hna?

¹⁶ Cozahlei khenkhamnak lakah Khrihfa unau tampi cu Jehovah rian kha an ṭuan. Unau cheukhat cu an zumhnak ruangah thong thlak an si. Anmah ca le an chungkhar caah thla kan cam khawh. Mah unau pawl thlaraulei, pumsalei le upadi lei bawmhnak pek awkah an zalonnak a thapmi unau pawl ca zongah thla kan cam khawh.c (Kolose 4:3, 18 rel.) Na thlacamnak cu mah unau pawl caah bawmtu a si ti kha zeitikhmanh ah philhhlah!—2 Thes. 3:1, 2; 1 Tim. 2:1, 2.

17. Hremnak caah atu in zeitindah naa timhtuah khawh?

¹⁷ Hremnak caah nan chungkhar ningin atu in nan i timtuah kho. (Lam. 14:22) A cang khomi thil ṭhalo vialte kha ruat hlah. Mah canah Jehovah he nan i pehtlaihnak kha fehter law na fale zong cutin tuah awkah bawm hna. Na lungre a theih tikah Pathian sinah lungtak tein thlacam. (Salm 62:7, 8) Nan chungkhar ningin Pathian nan i bochan khawhnak a ruang vialte kha i ruah u.d Leiser ral a tlun tikah naa timhtuahnak le Jehovah naa bochannak nih na fale kha ralṭha tein le lungdai tein um awkah a bawmh hna lai.

18. Zei bantuk hmailei nunnak nih dah a kan hngah?

¹⁸ Pathian daihnak nih himnak a kan hmuhter. (Fil. 4:6, 7) Cuticun Jehovah nih a kan hnorsuang khomi zawtnak, leiser ral le hremnak hna lakah kan lungthin kha a daihter. Jehovah nih kanmah zohkhenh awkah rian aa zuammi Khrihfa upa pawl kha a hman hna. Cun Pathian nih kan dihlak in pakhat le pakhat i bawmh khawhnak caanṭha a kan pek. Atu bantuk a daih lio caan ah a ra laimi, a har deuhmi “harnak” nganpi caah kan i timtuah chung kho. (Matt. 24:21) Mah tikah daihnak kilven peng le midang zong nih cutin an tuah nakhnga bawmh a hau lai. Asinain mah hnu cun kan lungre a theihtermi buaibainak pawl a um ti lai lo. Jehovah nih a kan duhpiak zungzalmi a tlingmi le a hmunmi daihnak kha kan ngei cang lai.—Isa. 26:3, 4.