Leiser Ral caah Timhcia In Na Um Maw?
1. Leiser ral caah timhcia in um cu zeicah a ṭhat?
1 Kan unau hna i tel in vawlei cung minung nuai tampi hna cu lihnin, tsunamis, ruah, thlichia thli fak le tilian ruangah harnak an tong. Cu bantuk leiser ral cu ruah lopi in a hung um i aho paoh harnak kan ton khawh caah a hlankan in timhcia in um cu a ṭhami a si.—Ptb. 21:5.
2. Atu mahle umnak inn le telephone nambar kha Khrihfa upa pawl zeicah hngalhter awk a si?
2 A Hlankan in Timhchungnak: A caancaan ah cozah pawl nih a hung um hngami leiser ral kha a hlankan in ralrin peknak bia an chim tawn. Mah ralrin peknak kha biapi ah chiah awk a si. (Ptb. 22:3) Cu bantuk thil umtu-ning ah Khrihfa upa pawl nih Khrihfabu chung i a ummi dihlak herhmi timhchungnak tuah awkah pehtlaihnak an tuah lai. Lei-ser ral pakhat a dih hnuah Khrihfa upa pawl nih an zapi in an him maw him lo ti le zei bantuk bawmhnak dah a herh kha hngalh awkah Khrihfabu he aa kawmmi dihlak ah pehtlaihnak an tuah lai. Khrihfa upa pawl nih hmanung bik thawng an theih lo ahcun a sungsaimi an caan kha pakpalawng ah a cang kho. Cucaah thawngthanhtu hna nih atu mahle umnak inn le telephone nambar kha chungṭuan le caukpi cawnnak a tlaitu kha hngalhter a biapi.
3. Harnak a umnak hmun chung i kan um a si ahcun Khrihfa upa pawl he zeitindah lungkhat in ṭuan ṭi khawh a si?
3 Leiser ral a umnak chungah a ummi Khrihfabu i Khrihfa upa pawl nih thil poipang ca i thawng thanh awkah leiser ral a umlonak i an chungkhat asiloah an hawikom pakhatkhat an min le telephone nambar kha thawngthanhtu hna kha an hal hna lai. Cuticun Khrihfa upa pawl nih aa ṭhialmi hna kha an kawl khawh hna lai. Cun Khrihfa upa pawl nih thil poipang ca i bawmhnak thilri cazin, i ṭhial kamnak, a hlei in bawmh a herhmi hna kha zeitindah bawmh a si lai ti bantuk, a hung um kho ṭhanmi thil umtuning caah a hlankan in timhchungnak kha an tuahlai. Mah bantuk dawtnak in timhtuahnak tuah tik ah lungkhat in ṭuan ṭi cu a biapi tuk.—Heb. 13:17.
4. Kan umnak hmun ah leiser ral pakhat a tlun ahcun zeidah tuah awk a si?
4 Harnak a Dih Hnu ah: Na umnak hmun ah leiser ral pakhat a tlun a si ahcun zeidah tuah awk a si? Na chungkhar atu an herhmi pumsa lei kha ṭha tein zoh. Na si khawh a si ahcun midang an herhmi zong bawm hna. Nan caukpi cawnnak a zohkhenhtu asiloah Khrihfa upa pakhatkhat he a rannak in pehtlaihnak tuah. Na him ko i bawmh na herh lo hmanh ah cuticun tuah ko. Bawmh na herh a si ahcun unau pawl nih a si khawh chung in an in bawmh khawh kha zum. (1 Kor. 13:4, 7) Na sining kha Jehovah nih a hngalh phil hlah law bawmhnak caah amah cu i bochan. (Salm 37:39; 62:8) Midang kha thlarau lei le lungthin lei bawmh khawh awkah caan ṭha kawl. (2 Kor. 1:3, 4) Theocratic tuah tawnmi kha tuah khawh a si cangka in tuah ṭhan colh.—Matt. 6:33.
5. Leiser ral nih Khrihfa hna kha zeitindah a kan hnorsuan tawn?
5 Leiser ral nih lungretheihnak a tamter ko nain kan hmailei kha hnabeisei ngai in kan hngah khawh. Leiser ral vialte cu a rauh hlanah a hlan i a rak cangmi lawng te an si cang lai. (Biat. 21:4) Cu caan chungah midang kha thawng ṭha bia chimh pah in sifah harnak caan caah a hlankan in timhchungnak kan tuah khawh.