Jehovah Kut Cu A Tawi Bal Lo

1. Izipt ram in Israel mi a chuahpi hna lioah Moses nih Jehovah aa bochan kha zeitindah a langhter?

HEBRU Baibal ah a langhtermi zumhfekmi hna lakah Moses zong aa tel ve. (Heb. 3:2-5; 11:23-25) Izipt ram in Israel mi a chuahpi hna lioah zumhnak a langhter. Faraoh le a ralkap pawl tlerhkhonhnak kha a ṭih lo. Jehovah kha aa bochan i mi pawl kha Rili Sen tan in thetse ram ah a hruai hna. (Heb. 11:27-29) Israel mi tam deuh cu Jehovah zohkhenh khawhnak cung ah zumhnak an ngei ti lo. Asinain Moses nih cun a Pathian kha aa bochan peng. Moses nih cutin a zumhmi cu aa tlak tukmi a si. Zeicahtiah ramcar chung ah Pathian nih khuaruahhar lam in tirawl a pek hna i a zohkhenh hna.a—Ex. 15:22-25; Salm 78:23-25.

2. Pathian nih Moses kha “Bawipa kut cu a tawi dara?” tiah zeicah a hal? (Nambar 11:21-23)

² Moses cu zumhfekmi pakhat a si ko nain Izipt ram in Israel mi an chuah hnu kumkhat hrawng ah Jehovah nih sa ka pek hna lai tiah a timi cung ah lunghrinnak a ngei. Ramcar ah a riakmi mi nuai tampi an i zat dingmi sa cu zeitindah a pek khawh hna lai ti kha Moses nih a mitthlam ah a cuanter kho lo. Cucaah Jehovah nih Moses kha: “Bawipa kut cu a tawi dara?” tiah a rak hal. (Nambar 11:21-23 rel.) “Bawipa kut” timi biafang nih Pathian thiang thlarau asiloah a rianṭuan ṭhawnnak kha a langhter. A tak ti ahcun Jehovah nih “Ka chimmi ning in ka tuah kho lai lo tiin maw na ruah?” tiah a halmi bantuk a si.

3. Moses le Israel mi kong cu zeicah hngalh duh awk ngai a si?

³ Jehovah nih nangmah le na chungkhar aan zohkhenh khawh hna timi cung ah lunghrinnak na ngei bal maw? Moses kong le Jehovah zohkhenh khawhnak cung ah zumhnak a ngei lomi Israel mi hna kong kha i ruah hna u sih. Jehovah kut cu a tawi bal lo ti kan zumhnak a fehtermi Baibal phunglam cheukhat zong kan i ruah hna lai.

Moses Le Israel Mi Sinin Cawng

4. Jehovah zohkhenh khawhnak cung ah mi pawl cu zeicah lunghrinnak an ngeih?

⁴ A hnuhmai bia kha i ruahṭi hna u sih. Israel miphun le an sinah a kal vemi “midang tampi” cu biakammi ram an phanh hlanah ramcar chung ah saupi an um. (Ex. 12:38; Deut. 8:15) An sinah a kal vemi miphun dang hna cu manna changreu ei nih a simh hna. Israel mi tampi zong cutin an si ve. Cucaah an dihlak in Moses sinah an phunzai. (Nam. 11:4-6) Izipt ram ah an rak eimi rawl hna kha an ngai. An phunzai hnawh tuk caah Moses nih rawl timhpiak hna awkah rian ka ngei tiah a hun ruah.—Nam. 11:13, 14.

5-6. Israel mi nih miphun dang hna lungput an i iapternak kong in zeidah kan cawn khawh?

⁵ Miphun dang cu Jehovah nih a pekmi hna cung ah an i lawm lo. Mah lungput nih Israel mi kha a iap hna. Kannih zong lawmh a hngal lomi hna nih an kan iap khawh i Jehovah pekmi cung ah lungsinak kan ngei ti lai lo. A hlanah kan ngeihmi thil kha kan ngai ṭhan i mi thil kan nahchuah hna ahcun cutin kan si kho ve. Asinain zei bantuk thil kan ton hmanh ah lungsinak ngeih ding in kan i zuam ahcun kan i nuam deuh lai.

⁶ Pathian nih biakammi ram an phanh tikah thilri chawva tampi kaan pek hna lai tiah a timi hna kha Israel mi nih an i cinken awk a si. Mah biakam cu ramcar chung an um lioah si loin biakammi ram an phanh tik lawng ah a tling dingmi a si. Cu bantuk in hi vawlei ṭhalo ah kan ngeih lomi thil cung ah lungthin pek loin vawlei thar ah Jehovah nih a kan pek dingmi thil cung tu ah lungthin kan pek awk a si. Jehovah kan i bochannak a fehter dingmi Baibal caang hna zong ṭha tein kan ruah awk a si.

7. Jehovah kut cu a tawi lo ti kha zeicah kan zumh khawh?

⁷ “Bawipa kut cu a tawi dara?” tiah Pathian nih Moses kha zeicah a hal tiah na ruah men lai. Jehovah nih Moses kha mah thil pahnih hi ruahter a duh: Pakhatnak, a ṭhawnnak cu ri a ngei lo. Pahnihnak, a ṭhawnnak cu khoika hmun paoh ah a phan kho. Israel mi cu ramcar chung i an um hmanh ah Pathian nih sa tampi a pek khawh ko hna. A ṭhawngmi a kut le a ban in cutin a tuah khawh kha a rak langhter. (Salm 136:11, 12) Cucaah harnak kan ton tikah Jehovah kut cu kan sinah a phan kho taktak hnga maw tiah lunghrinnak kan ngeih awk a si lo.—Salm 138:6, 7.

8. Ramcar ah mi tampi nih an tuahmi palhnak bantuk kha zeitindah kan hrial khawh? (Hmanthlak zong zoh.)

⁸ Jehovah nih a biakam ning in a tuah i nimte tampi kha an riahhmun pawng ah a tlakter. Asinain Israel mi cu Pathian tuahpiakmi khuaruahhar thil cung ah an i lawm lo. Mah canah hakkauhnak an langhter. Chun nitlak, zan khuadei, cun a thaizing zong nimte cu an char hna. Izipt ram i sa le a dang rawl a hawmi hna cung ah Jehovah cu a thin a hung i dan a tat hna. (Nam. 11:31-34) Mah kong in kan cawn khawhmi a um. Hakkauhnak lungput kan ngeih nakhnga lo kan i ralrin a hau. Mirum kan si ah, misifak kan si ah Jehovah le Jesuh he kan i pehtlaihnak kan fehternak thawng in vancung ah chaw a khongmi si awkah kan i zuam a hau. (Matt. 6:19, 20; Luka 16:9) Cutin kan tuah tikah Jehovah nih a kan zohkhenh hrimhrim lai ti kha kan zumh khawh.

9. Pathian bawmhnak he aa tlaiin zeidah kan zumh khawh?

⁹ Jehovah nih tuchan i a mi pawl bawmh awkah a kut kha a samh. Asinain thilri chawva sunghnak kan tong bal lai lo i ṭamhal in kan um bal lai lo tinak cu a si lo.b Jehovah nih zeitik hmanh ah a kan hlaw lai lo. Zei bantuk harnak kan ton hmanh ah inkhawh awkah a kan bawmh lai. Jehovah nih a kan zohkhenh lai ti kan zumh kha zeitindah kan langhter khawh? Thil sining pahnih kha i ruah hna u sih. (1) Tangkalei chambaunak kan ton tik, (2) hmailei i pumsalei kan herhbaunak ca kan i timhchung tikah a si.

Tangkalei Chambaunak Kan Ton Tikah

10. Zei bantuk tangkalei chambaunak dah kan ton khawh?

¹⁰ Donghnak caan a naih chin cang caah chawlehnak zong a ṭumchuk chin lai ti kha kan i ruahchan. Ramkhellei buaibainak, raldohnak, leiser ral le pulrai ruang ah ruahlopi in tangkalei chambaunak kan tong kho i kan rian, kan ngeihmi thilri chawva le kan inn hmanh kan sung kho. Chungkhar zohkhenh khawh awkah rian thar kan kawl a hau men lai asiloah a dang hmun hmanh ah i ṭhial kan hau men lai. Jehovah bawmhnak kan i bochan ti a langhtermi biakhiahnak tuah awkah zeinihdah a kan bawmh khawh?

11. Tangkalei chambaunak tawnghtham awkah zeinihdah aan bawmh khawh? (Luka 12:29-31)

¹¹ Jehovah sinah na lungretheihnak vialte phuan cu a biapi tukmi le hmual a ngei tukmi a si. (Ptb. 16:3) A ṭhami biakhiahnak tuah khawh awkah fimnak kha hal. Cun na sining kong he aa tlaiin a hleihluat tuk in lungretheih lo awkah lungdaihnak zong hal. (Luka 12:29-31 rel.) Na ngeihmi thil cung te ah naa lungsi khawh nakhnga bawmhnak hal. (1 Tim. 6:7, 8) Tangkalei chambaunak tawnghtham ning kong kha kan cauk hna ah hlathlainak tuah. JW.ORG ah taarmi chawlehnaklei buaibainak tawnghtham ning kong he aa tlaimi capar hlathlainak in mi tampi cu ṭhatnak an hmu.

12. Khrihfa pakhat kha zei biahalnak nih dah a chungkhar caah a ṭhami biakhiahnak tuah ding in a bawmh khawh?

¹² Mi cheukhat cu an chungkhar he aa hlatnak ah i ṭhial in rianṭuan awkah hnek an si. Asinain mah cu a ṭhami biakhiahnak a si lo ti kha a hnuah an hun hngalh. Rian thar na cohlan hlanah na hmuh dingmi tangka kong lawng si loin mah nih thlaraulei kha zeitindah a hnorsuan khawh ti zong ṭha tein ruat. (Luka 14:28) Hitin i hal: ‘Ka innchunghawi he saupi kan i hlat ahcun kan i pehtlaihnak cu zei ah dah a cang kho? Unau pawl he kan i pehtlaihnak le ka phungchim rian tah zeitindah a hnorsuan khawh?’ Fa a ngeimi na si ahcun hitin i hal: ‘Ka fale he kan umṭi lo ahcun “Jehovah lamhruainak ning in cawnpiak chimhhrinh hna u” timi lamhruainak kha zeitindah ka zulh khawh lai?’ (Efe. 6:4) Baibal phunglam a upat lomi chungkharmi le hawikom pawl ruahnak kha si loin Pathian ruahnak kha lam i hruaiter.c Nitlaklei Asia ah a ummi Tony cu ramdang ah rianṭuan ding in lemsoinak a tong. Asinain mah kong he aa tlaiin thla a cam i a nupi he an i ruahceihṭi hnuah ramdang ah kal lo ding in le an hmanmi tangka tu ṭhumh deuh ding in bia a khiah. Tony nih hitin a ti: “Mi tampi kha Jehovah hngalh awkah ka bawmh khawh hna i ka fale zong biatak cung ah an lung a tho tuk. Matthai 6:33 kha kan zulh ahcun Jehovah nih a kan zohkhenh zungzal lai ti kha kan chungkhar ning in kan hun hngalh.”

Hmailei I Kan Herhbaunak Ca Kan I Timhchung Tikah

13. Kan tar tikah pumsalei kan herhbaunak caah atu in kan tuah khawhmi thil cheukhat cu zeidah an si?

¹³ Kan tar tik caan kong kan ruah tikah Jehovah bawmhnak kan i bochannak cu hneksak a si kho. Baibal nih hmailei i pumsalei kan herhbaunak caah rian i zuam ding in tha a kan pek. (Ptb. 6:6-11) Hmailei caah tangka i khon cu aa tlakmi a si ko. Tangka nih ri pakhat tiang in a kan huhphenh khawh. (Pct. 7:12) Asinain kan nunnak ah thilri chawva kawlnak kha pakhatnak ah kan chiah awk a si lo.

14. Hebru 13:5 nih lungretheih tuk lo awkah zeitindah a kan bawmh?

¹⁴ Tangka tampi aa khon nain “Pathian hmaiah a si a fakmi” mihrut pa tahchunhnak kong kha Jesuh nih a chim. (Luka 12:16-21) Thaizing ah zeidah kan ton lai ti kha ahohmanh nih kan hngal lo. (Ptb. 23:4, 5; Jeim 4:13-15) Khrih zultu kan si caah a hleiin zuamcawhnak kan tong. Jesuh nih a zultu si kan duh ahcun kan ngeihmi thil vialte “hlawt” a siangmi kan si a hau tiah a ti. (Luka 14:33) Judea ram i kumzabu pakhatnak Khrihfa hna nih an ngeihmi thilri chawva kha lungtho tein an rak hlawt. (Heb. 10:34) Tuchan zong ah unau pawl cu ramkhellei in khoikalei hmanh ah an ṭan lo caah tangkalei in harnak an tong. (Biat. 13:16, 17) Zeinihdah a bawmh hna? “Kaan kaltak bal hna lai lo i kaan hlaw bal hna lai lo” timi Jehovah biakam kha lungthin dihlak in an zumh. (Hebru 13:5 rel.) Hmailei ca i timhchung awkah kan si khawh chung in kan i zuam. Kan i ruahchan lomi thil kan ton hmanh ah Jehovah nih a kan bawmh lai ti kha kan zumh.

15. Khrihfa nulepa nih an fale he aa tlaiin zei bantuk a tlarimi hmuhnak dah an ngeih awk a si? (Hmanthlak zong zoh.)

¹⁵ Nunphung tampi ah nuva hna nih fa an ngeihnak a ruang cu kan upat tikah kan zohkhenh hna seh ti an duh caah a si. Asinain Baibal nih cun an fale herhbaunak kha nulepa nih an zohkhenh hna awk a si tiah a ti. (2 Kor. 12:14) Nulepa nih an tar tikah bawmhnak cheukhat an herh i an fale nih bawmh an duh hna ti cu a hmaan ko. (1 Tim. 5:4) Asinain Khrihfa nulepa nih tangkalei in a kan zohkhenh khomi si loin Jehovah a biami si awkah kan bawmh hna ahcun lawmhnak taktak kan hmu lai ti kha an hngalh.—3 Joh. 4.

16. Nulepa nih an fale kha anmah tein a paw aa cawn khomi si awkah zeitindah an bawmh khawh hna? (Efesa 4:28)

¹⁶ Anmah tein an paw an i cawm khawh nakhnga na fale na bawmh hna tikah Jehovah naa bochan kha na tuahsernak in langhter. An ngakchiat lio tein rian i zuam cu a phu tukmi a si ti kha cawnpiak hna. (Ptb. 29:21; Efesa 4:28 rel.) An upat deuh tikah sianginn ah an si khawh chung in ca i zuam awk zong ah bawm hna. Khrihfa nulepa nih Baibal phunglam hna kha ṭha tein an hlathlai i an fale an cawnpiak hna. Cutin an tuah ahcun an fale nih anmah tein an paw i cawm khawh awkah a bawmmi fimcawnnak kha an i thim kho lai i Pathian rianṭuannak ah tling tein an i tel kho lai.

17. Zeidah kan zumh khawh?

¹⁷ Jehovah nih pumsalei kan herhmi a kan zohkhenh khawh lawng si loin zohkhenh a kan duh ti kha zumhfekmi a salle nih kan zumh. Donghnak caan a naih chin cang caah Jehovah kan i bochannak cu hneksak a si lai ti kha kan i ruahchan. Asinain zei bantuk thil kan ton hmanh ah Jehovah nih a ṭhawnnak hmang in pumsalei kan herhmi thil a kan zohkhenh lai ti kan zumhnak kha fehter peng hna u sih. A ṭhawngmi a kut le a ban cu kanmah bawmh awkah a tawi bal lo ti kha fek tein kan zumh khawh.