Zumhfekmi Pa Pawl i a Donghnak an Biacahmi in Cawng

1. Kum upa pawl sinin zeicah kan cawn awk a si?

A ṬHAMI biakhiahnak tuah khawh awkah kan dihlak in lamhruainak kan herh. Mah bantuk lamhruainak kha Khrihfa upa le a dang Khrihfa nutling patling hna sinin kan hmuh khawh. Kanmah nakin kum tampi a upa deuhmi nih ruahnak an kan cheuh tikah kan chan he aa tlak ti lo tiah kan ruah awk a si lo. Jehovah nih kum upa pawl sinin cawng hna seh ti a kan duh. Kanmah nakin kum sau deuh an nun caah hmuhtonnak, hngalhthiamnak le fimnak zong tam deuh an ngei.—Job 12:13.

2. Hi capar ah zei kong dah kan i ruah hna lai?

² Baibal chan ah a miphun kha thazaang le lamhruainak pek awkah Jehovah nih zumhfekmi kum upa pawl a hman hna. Tahchunhnak ah, Moses, David le lamkaltu Johan kong kha ruat hmanh. An chan aa lo lo i an tonmi thil sining zong aa dang tuk. An thih hlante ah mino deuh pawl kha a ṭhami ruahnak cheuhnak an pek hna. Mah zumhfekmi kum upa hna nih Pathian nawlngaih cu zeitluk in dah a biapit ti kha an rak chim. An sinin kan cawn khawh nakhnga fimnak aa telmi an bia kha Jehovah nih Baibal ah a ṭialter hna. Mino kan si ah, upa kan si ah, an ruahnak cheuhnak kong kan hlathlai ahcun ṭhatnak kan hmu lai. (Rom 15:4; 2 Tim. 3:16) Hi capar ah mah kum upa pathum i a donghnak an biacahmi kong le mah in kan cawn khawhmi kong kan i ruah hna lai.

‘Nannih caah Nunsau a Si’

3. Moses nih zeiti lam in dah Pathian rian a rak ṭuan?

³ Moses nih Jehovah kha lungthin dihlak in a biak. Profet, biaceihtu, hruaitu le Baibal ṭialtu a rak si. Moses cu hmuhtonnak tampi a ngeimi a si. Israel mi kha sal an tannak Izipt ram in a chuahpi hna. Mah leng ah Moses nih Jehovah tuahmi khuaruahhar thil tampi zong a hmuh. Jehovah nih a hmasa bik Baibal uk nga le Salm 90 kha a ṭialter. Salm 91 le Job Baibal cauk zong ṭialter dawh a si.

4. Moses nih ahote dah thazaang a pek hna, zeicah?

⁴ Moses nih a thih hlante, kum 120 a si ah Israel mi dihlak kha a pumh hna i Jehovah nih a rak tuahpiakmi hna kong kha a theihter ṭhan hna. A bia a ngaitu cheukhat cu an no lioah Jehovah tuahmi khuaruahhar thil, hmelchunhnak le Izipt mi cung ah a tlungmi dantatnak hna a hmumi an si. (Ex. 7:3, 4) Rili Sen kha an tan i Faraoh ralkapbu hrawh an simi zong an hmuh. (Ex. 14:29-31) Thetse ram i an um lio zong ah Jehovah nih a huhphenh hna i a zohkhenh hna. (Deut. 8:3, 4) Atu Israel miphun cu Biakammi Ram ah an lut cang lai. Cucaah Moses nih a thih hlanah thazaang pek a duh hna.a

5. Deuteronomi 30:19, 20 i Moses biacahmi nih Israel miphun kha zeitindah thazaang a pek hna?

⁵ Moses nih zeidah a chim? (Deuteronomi 30:19, 20 rel.) Israel miphun cu a ṭha tukmi hmailei ruahchannak an ngei. Jehovah nih thluachuah a pek hna lai i Biakammi Ram ah saupi an um kho lai. Mah ram cu aa dawh tukmi le eidin tampi a chuahnak hmun a si! Cucaah Moses nih “Nangmah nih na sakmi a si lomi khua nganngan le khua ṭhaṭha hna le, nangmah nih na rawnmi a si lomi thil ṭhaṭha in a khatmi inn hna le, nangmah nih na huahmi a si lomi tikhor hna le, nangmah cinmi a si lomi mitsur dum hna le oliv thing hna he” a khatmi ram a si tiah a ti hna.—Deut. 6:10, 11.

6. Israel miphun tei awkah miphun dang kha zeicah Pathian nih nawl a awnh hna?

⁶ Moses nih Israel mi kha ralrin zong a pek hna. Mah aa dawh tukmi ram ah um peng an duh ahcun Jehovah nawl an ngaih a hau lai. A nawl an ngaihnak thawng in le ‘amah lei ah an i beknak’ thawng in “nunnak kha i thim” awkah Moses nih a forh hna. Asinain Israel mi cu Jehovah nawl an ngai lo. Cucaah Assiria mi le Babilon mi nih Israel mi kha an tei hna i sal in an kalpi hna tikah Jehovah nih nawl a rak awnh hna.—2 Si. 17:6-8, 13, 14; 2 Chan. 36:15-17, 20.

7. Moses biacahmi in zeidah kan cawn khawh? (Hmanthlak zong zoh.)

⁷ Zeidah kan cawn khawh? Jehovah nawlngaihnak nih zungzal nunnak a hmuhter. Biakammi Ram ah a lut dingmi Israel miphun bantuk in kannih zong Pathian kamhmi vawlei thar ah kan lut cang lai. Mah ah vawlei cu paradis ah a cang ṭhan lai. (Isa. 35:1; Luka 23:43) Satan le a khuachia pawl cu hrawh an si cang lai. (Biat. 20:2, 3) Jehovah kong lih in a cawnpiakmi a hmaan lomi biaknak zong a um ti lai lo. (Biat. 17:16) Minung cozah hna nih an kut tang ah a ummi kha an hrem kho ti hna lai lo. (Biat. 19:19, 20) Paradis ah cun ralchanhtu zong an um ti lai lo. (Salm 37:10, 11) Mikip nih Jehovah i a dingmi nawlbia kha an zulh lai caah lungrual te le dai tein kan um lai. Pakhat le pakhat karah dawtnak le zumhnak a um lai. (Isa. 11:9) Mah cu a ṭha tukmi ruahchannak a si ko lo maw? Jehovah nawl kan ngaih ahcun vawlei paradis ah zungzal in kan nung lai.—Salm 37:29; Joh. 3:16.

8. Kum tampi chung missionary a ṭuanmi unaupa kha zungzal nunnak biakam nih zeitindah a bawmh? (Judas 20, 21)

⁸ Zungzal nunnak biakam cung ah lungthin kan pek peng ahcun zei bantuk harnak kan ton hmanh ah Jehovah nawl kan ngai kho lai. (Judas 20, 21 rel.) Mah biakam nih pumpak derthawmnak zong tei awkah a kan bawmh khawh. Africa ram ah kum tampi chung missionary a ṭuanmi unaupa pakhat cu pumsa duhnak kha fakpi in a doh. Hitin a ti: “Zungzal nunnak ruahchannak ka sung kho timi hngalhnak nih pumsa duhnak doh awkah a ka forh. Cucaah lungtak tein thla ka cam i Jehovah bawmhnak thawng in pumsa duhnak kha ka tei khawh.”

‘Na Hlawh a Tling Lai’

9. David nih zei bantuk harnak dah a rak ton?

⁹ David cu siangpahrang ṭha pakhat a si. Ringawn tum thiammi, biazai ṭialtu, ralbawi le profet zong a si. Asinain harnak tampi a rak tong. Siangpahrang Saul nih thah a timh caah kum tampi chung a zam i aa thup. Siangpahrang a si hnu zong ah a fapa Absalom nih siangpahrang sinak chuh aa zuam caah David cu a rak zam ṭhan. Harnak tampi a tong i palhnak zong a tuah nain a thih tiang Pathian cung ah zumhfek tein a um. Jehovah nih David cu “ka lung duhmi phun a si” tiah a ti. Cucaah David ruahnak cheuhnak cu kan caah man a ngei tuk!—Lam. 13:22; 1 Si. 15:5.

10. Amah a changtu ding a fapa Solomon kha David nih zeicah ruahnak a cheuh?

¹⁰ Tahchunhnak ah, David nih amah a changtu ding a fapa Solomon sinah ruahnak a cheuhmi kong kha i ruah hna u sih. A thiangmi biaknak karhter awk le Pathian thang a ṭhattermi biakinn sak awkah Jehovah nih mah mino pa kha a thim. (1 Chan. 22:5) Mah cu Solomon caah a har tuk ko lai. David nih zei ruahnak dah a cheuh ti kha zoh hna hmanh u sih.

11. Siangpahrang Pakhatnak 2:2, 3 ning in David nih Solomon kha zei ruahnak dah a cheuh, mah cu a hmaan ti kha zeinihdah a langhter? (Hmanthlak zong zoh.)

¹¹ David nih zeidah a chim? (1 Siangpahrang 2:2, 3 rel.) Jehovah nawl na ngaih ahcun hlawtlinnak na hmuh lai tiah David nih a fapa kha a chimh. Kum tampi chung Solomon cu hlawtlinnak a rak hmu taktak. (1 Chan. 29:23-25) Aa dawh tukmi biakinn a sak i Baibal cauk tampi a ṭial leng ah a chimmi bia cheukhat cu a dang Baibal cauk hna zong ah khumh a si. A fimnak le a rumnak ruang ah a min a thang. (1 Si. 4:34) Asinain David nih a chim bantuk in Jehovah nawl a ngaih lawng ah Solomon nih hlawtlinnak a hmu lai. Ngaihchiat awk ngai a simi cu a kum a upat deuh tikah a hmaan lomi pathian tampi a hun biak. Jehovah mithmai ṭha a sung i a mi pawl ding tein uk awkah a herhmi fimnak zong a ngei ti lo.—1 Si. 11:9, 10; 12:4.

12. David chimmi bia in zeidah kan cawn khawh?

¹² Zeidah kan cawn khawh? Jehovah nawlngaihnak nih hlawhtlinnak a hmuhter. (Salm 1:1-3) Jehovah nih Solomon bantuk in rumnak le minthannak pek awkah bia a kan kamh lo. Asinain a nawl kan ngaih ahcun a ṭhami biakhiahnak tuah awkah a herhmi fimnak a kan pek lai. (Ptb. 2:6, 7; Jeim 1:5) Rian, fimcawnnak, nuamhsaihnak le tangka kong he aa tlaiin a ṭhami biakhiahnak tuah khawh awkah Jehovah phunglam nih a kan bawmh. Jehovah lamhruainak kan zulh ahcun amah he pehtlaihnak ṭha kan ngei peng lai i zungzal nunnak zong kan hmu lai. (Ptb. 2:10, 11) Mah leng ah hawikom ṭha le a nuammi chungkhar zong kan ngei lai.

13. Hlawtlinnak hmuh awkah Carmen kha zeinihdah a bawmh?

¹³ Mozambique ram ah a ummi Carmen nih hlawtlinnak hmuh awkah fimcawnnak cu a biapi bikmi a si tiah a rak ruah. Cucaah sianghleiruun a kai i innsak ning he aa tlaiin a rak cawn. Hitin a ti: “Ka cawnmi kha ka duh tuk. Asinain zinglei 7:30 in zanlei 6:00 tiang ka kai caah ka caan le ka thazaang tampi a dih. Kaa pumh kho tuk ti lo i thlaraulei zong in ka hun der. Bawi pahnih sal si awkah kaa zuam ti kha ka hun hngalh.” (Matt. 6:24) Cucaah mah kong he aa tlaiin thla a cam i kan cauk pawl hmang in hlathlainak a tuah. Hitin a ti chap: “Khrihfa upa hna le ka nu nih ruahnak an ka cheuh hnuah caantling in Jehovah rian ṭuan awkah sianghleiruun kai ti lo ding in bia ka khiah. Mah cu ka nunnak ah a ṭha bikmi thimnak a si i kaa ngaichih bal lo.”

14. Moses le David an biacahmi nih a bik in zei kong dah a langhter?

¹⁴ Moses le David nih Jehovah kha an dawt i a nawl ngaih cu a biapi tukmi a si ti kha an hngalh. A donghnak an biacahmi ah anmah i zohchunh in Jehovah lei i bek peng awkah an bia a ngaitu pawl kha thazaang an pek hna. Cun Jehovah an kaltak ahcun a mithmai ṭha an sung lai i thluachuah an hmu lai lo ti zong in ralrin an pek hna. An ruahnak cheuhmi cu kan ca zong ah man a ngei tukmi a si. Kum tampi hnuah a dang Jehovah sal pakhat nih Pathian cung ah zumhfek tein um a biapitnak kong kha a langhter ṭhan.

“A Ka Lawmhter Deuhtu Zeihmanh a Um ti Lo”

15. Lamkaltu Johan nih a nun chung ah zeidah a rak hmuh?

¹⁵ Johan cu Jesuh Khrih dawtmi a zultu a si. (Matt. 10:2; Joh. 19:26) Johan cu Jesuh he phungchim rian an ṭuanṭi caah Jesuh tuahmi khuaruahhar thil tampi kha a rak hmuh. A harmi thil sining hmanh ah Jesuh cung ah zumhawktlak tein a um peng. Jesuh thah a si lio kha Johan nih a hmuh i a thawh ṭhan hnu zong ah a hmuh. Cun Johan nih Khrihfabu an ṭhanchomi le “vanrang tang i a ummi mi vialte sinah” thawngṭha chim a simi zong a rak hmuh.—Kol. 1:23.

16. Johan cakuat in ahote nih dah ṭhathnemhnak an hmuh?

¹⁶ A thih lai ah Johan cu Pathian Bia, Baibal ṭial awkah tinvo sung a hmu. Khuaruahhar a simi “Jesuh Khrih nih a phuanmi thil kong” kha a ṭial. (Biat. 1:1) Johan thawngṭha cauk le Johan cakuat pakhatnak, pahnihnak, pathumnak zong a rak ṭial. A cakuat pathumnak cu a fapa bantuk in a dawtmi, zumhfekmi Gaius sinah a ṭialmi a si. (3 Joh. 1) Thlaraulei ah a fale bantuk in a hmuhmi Khrihfa tampi an um. Mah zumhfekmi kum upa nih a ṭialmi cu tuchan tiang Jesuh zultu vialte caah thazaang petu taktak a si.

17. Johan Kuatthumnak 4 ning in zeinihdah lunglawmhnak a chuahter?

¹⁷ Johan nih zeidah a ṭial? (3 Johan 4 rel.) Johan nih Pathian nawlngaihnak in hmuhmi lawmhnak kong kha a ṭial. Johan nih a cakuat pathumnak a ṭial lioah mi cheukhat nih a hmaan lomi cawnpiak kha an karhter i ṭhencheunak an chuahter. Asinain cheukhat cu “biatak chung ah khua an sa.” Annih cu Jehovah ‘nawl zul in an nung.’ (2 Joh. 4, 6) Mah zumhfekmi Khrihfa hna nih Johan lawng si loin Jehovah lung zong an lawmhter.—Ptb. 27:11.

18. Johan ṭialmi bia in zeidah kan cawn khawh?

¹⁸ Zeidah kan cawn khawh? Zumhfek tein umnak nih lunglawmhnak a chuahter. (1 Joh. 5:3) Tahchunhnak ah, Jehovah lung kan lawmhter ti kan hngalh tikah kan i nuam ve. Ṭhatlonak kan hrial i a nawl kan ngaih tikah Jehovah cu aa lawm. (Ptb. 23:15) Vancungmi zong an i lawm. (Luka 15:10) Zumtukhat unau hna cu harnak le hneksaknak an tong ko nain zumhfek tein an ummi kan hmuh tik zong ah kan i lawm. (2 Thes. 1:4) Cun Satan vawlei hrawh a si tik zong ah Jehovah cung ah zumhfek tein kan rak um peng timi hngalhnak in lungsi hngangamnak kan hmu lai.

19. Rachel timi unaunu nih biatak kong midang cawnpiaknak he aa tlaiin zeidah a chim? (Hmanthlak zong zoh.)

¹⁹ Midang kha Jehovah kong kan cawnpiak hna tikah a hleiin kan i lawm. Dominican Republic ah a ummi Rachel nih kan biakmi Pathian kong midang kan cawnpiakmi hna cu tinvo sung taktak a si tiah a ruah. Jehovah biak awkah mi tampi a bawmh cang hna. Hitin a ti: “Ka cawnpiakmi hna nih Jehovah an dawt i an i bochanmi, a lunglawmhter awkah thlennak an tuahmi ka hmuh tikah zeitluk in dah kaa lawmh ti kha a chim zia hmanh ka thiam lo. Cucaah anmah cawnpiak awkah kaa zuammi le mahca ṭhatnak ka hlawtmi cu a phu ko.”

Zumhfekmi Pa Pawl a Donghnak an Biacahmi in Ṭhatnak i Lak

20. Moses, David le Johan he kan i lawhnak zeidah a um?

²⁰ Moses, David le Johan cu a luancia kum tampi lioah a nungmi an si caah an nunning cu tuchan he aa lo lo. Asinain anmah he kan i lawhnak zong tampi a um. Anmah bantuk in a hmaanmi Pathian kan biak. Cun anmah bantuk in Jehovah kan i bochan, a sinah thla kan cam i lamhruainak kan hal. Mah leng ah mah pa pathum bantuk in Jehovah nawl a ngaimi hna cu thluachuah an hmu lai ti kha kan zumh.

21. Moses, David le Johan ti bantuk zumfekmi pa pawl i an biacahmi kha kan zulh ahcun zei thluachuah dah kan hmuh lai?

²¹ Mah zumhfekmi pa pawl i a donghnak an biacahmi kha zul u sih law Jehovah nawl ngai hna u sih. Cutin kan tuah ahcun kan tuahmi thil kip ah hlawhtlinnak taktak kan hmu lai. Mah cu kan caah ‘nunsaunak’ a si lai, phundang in cun zungzal nunnak a si lai. (Deut. 30:20) Mah leng ah vancung kan Pa a lung kan lawmhter caah kan i nuam lai i Pathian nih kan ruah khawh leng in thluachuah a kan pek lai.—Efe. 3:20.