“Pathian Nih Aan Dawt”

1-2. Jehovah caah a sunglawimi kan si ti kha zeicah kan zumh khawh?

JEHOVAH nih a salle kha a sunsak tuk hna. Asinain Jehovah a biami cheukhat cu Jehovah dawtnak cung ah lunghrinnak an ngei. Nang tah cutin na si ve maw? Na si ahcun Jehovah caah ka sunglawi timi na zumhnak kha zeitindah na fehter khawh?

² Jehovah nih mi pawl kha zeitindah a hmuh hna ti a langhtermi Baibal tuanbia hna nih a dawtnak cung na zumhnak fehter awkah aan bawmh khawh. Jesuh nih mi pawl kha zaangfahnak le upatnak he a pehtlaih hna. Cutin a tuahnak thawng in san ka tlai lo tiah aa ruatmi hna kha amah le a Pa nih an dawt tuk hna ti a langhter. (Joh. 5:19; Heb. 1:3) Hi capar ah (1) Jesuh nih mi pawl kha man an ngeihnak kong zeitindah a hngalhter hna ti le (2) Pathian nih a kan sunsak ti kan zumhnak zeitindah kan fehter khawh timi kong kan i ruah hna lai.—Hag. 2:7.

Jesuh Nih Mi Pawl Kha Man An Ngeihnak Kong A Hngalhter Hna

3. Jesuh nih Galili i bawmh a herhmi kha zeitindah a pehtlaih hna?

³ Galili ram i Jesuh a voithumnak phung a chim lioah mi tampi cu a sinah an ra i an zawtnak damter awkah an nawl. Jesuh nih mi pawl kha “an hma he kaltakmi, khaltu a ngei lomi tuu” bantuk in a hmuh hna. (Matt. 9:36) Biaknaklei hruaitu hna nih mi pawl kha zei ah an rel hna lo i “chiatserhmi” ti hmanh in an ti hna. (Joh. 7:47-49) Asinain Jesuh nih a caan pe in mi pawl kha a cawnpiak hna i an zawtnak a damter hnanak thawng in man an ngei ti kha a hngalhter hna. (Matt. 9:35) Lamkaltu pawl zong nih mi tampi an bawmh khawh hna nakhnga Jesuh nih hmualngei tein phungchim awkah a cawnpiak hna. Cun a zawmi le pum a tlamtling lomi pawl damter khawhnak ṭhawnnak zong a pek hna.—Matt. 10:5-8.

4. Jesuh nih mi pawl a pehtlaih hna ning in zeidah kan cawn khawh?

⁴ Mi nih zei ah an rel lomi hna kha Jesuh nih upatnak le zaangfahnak he a pehtlaih hnanak thawng in amah le a Pa nih an sunsak hna ti kha a langhter. Jehovah a biami na si ko nain a dawtnak cung ah lunghrinnak na ngeih ahcun Jesuh nih mi pawl a pehtlaih hna ning kha ṭha tein ruat. Mah nih Jehovah caah ka sunglawi timi na zumhnak kha a fehter lai.

5. Galili ram i Jesuh nih a tonmi nu pakhat kong kha fianter.

⁵ Jesuh nih mibu a cawnpiak hna leng ah pakhat cio zong a bawmh hna. Tahchunhnak ah, Jesuh cu Galili ram i phung a chim lioah thichuah zawtnak a ngeimi nu pakhat he an i tong. (Mar. 5:25) Mah nu cu a zawtnak ruang ah Nawlbia ning in a thiang lomi a si i amah a tawngmi paoh zong a thiang lomi an si lai. Mah ruang ah midang he caan a hmangṭi kho lo. Cun pumhnak inn ah a kal kho lo i biaknaklei puai hna zong ah aa tel kho lo. (Lev. 15:19, 25) Cucaah mah nu cu a zawt lawng si loin san ka tlai lo timi ruahnak zong a ngei ko lai.—Mar. 5:26.

6. Thichuah zawtnak a ngeimi nu cu zeitindah damter a si?

⁶ Jesuh nih a ka damter lai tiah mah nu nih aa ruahchan nain damter awkah a hal ngam lo. Zeicah? A zawtnak ruang ah a ning a zak i a si men lai. Asiloah a thi a chuah lio i mibu lak a kal caah Jesuh nih a ka sik sual lai ti a phan ca zong ah a si men lai. Cucaah ka dam lai timi zumhnak he Jesuh puanki kha a thli tein a tawngh. (Mar. 5:27, 28) A zumh ning in a dam colh! Jesuh nih ahodah a ka tawng tiah a hal tikah mah nu nih keimah ka si tiah a leh. Mah tikah Jesuh nih zeidah a tuah?

7. Jesuh nih thichuah zawtnak a ngeimi nu kha zeitindah a pehtlaih? (Marka 5:34)

⁷ Jesuh nih mah nu kha zaangfahnak le upatnak he a pehtlaih. “Ṭih le ther” in a ummi kha a hmuh. (Mar. 5:33) Cucaah Jesuh nih a zaang a fak tuk i a hnemh. Cun “ka fanu” ti hmanh in a auh. Mah nih a upat lawng si loin a dawt ti zong a langhter. (Marka 5:34 rel.) Baibal ah Jesuh nih mah nu pakhat lawng kha “ka fanu” tiah a auh. A intuarnak kha ṭha tein a hngalhthiam caah mah biafang a hmanmi a si men lai. Jesuh nih cutin a auh tikah mah nu cu zeitindah a um lai ti kha na mitthlam ah cuanter hmanh! Jesuh nih hnemhnak bia rak chim hlah seh law mah nu a zawtnak cu a dam ko lai nain a thli tein Jesuh a rak tawngh caah a lung chung in amahle amah sual aa phaw kho. Jesuh nih damter a duh lawng si loin Jehovah caah a sunglawi tukmi fanu a si ti zong kha hngalhter a duh.

8. Brazil ram ah a ummi unaunu pakhat cu zei bantuk zuamcawhnak dah a ton?

⁸ Tuchan zong ah Pathian salle cheukhat cu zawtnak asiloah pum tlamtlin lonak ruang ah man ka ngei lo timi ruahnak an ngei. Brazil ram ah hmaanhmaan hmaikal a ṭuanmi unaunu Mariaa kong hi ruat hmanh. Anih cu a chuahka in a ke le a kehlei kut zong a ngei lo. Hitin a ti: “Pum tlamtlinglo ka si caah sianginn ah an ka nehsawh lengmang. Minchia a phunphun in an ka soi. Ka chungkhar hmanh nih an ka thleidan.”

9. Maria nih Jehovah caah a sunglawi tukmi ka si ti a hngalh khawh nakhnga zeinihdah a bawmh?

⁹ Maria kha zeinihdah a bawmh? Jehovah Tehte pakhat a hun si hnuah unau pawl nih an hnemh i Jehovah hmuh ning in amahle amah aa hmuh ve nakhnga an bawmh. Hitin a ti: “A ka bawmtu unau an tam tuk caah an min kha cauk hmanh ah ka ṭial cawk lo! Jehovah nih dawtnak a ngeimi thlaraulei chungkhar a ka pek caah kaa lawm tuk.” Maria nih Pathian caah a sunglawimi ka si ti a hngalhthiam nakhnga unau pawl nih an bawmh.

10. Mary Magdalin nih zei bantuk thil sining dah a ton, zeitindah a intuar khawh men? (Hmanthlak zong zoh.)

¹⁰ Jesuh nih Mary Magdalin a rak bawmh ning kong kha ruat hmanh. Anih cu khuachia pasarih nih an tuahmi a si. (Luka 8:2) Cucaah a biachim le a umtu ning cu aa phundang tuk lai i midang zong nih an hrial ko lai. Cun bawmtu ka ngei lo tiah a ruah men lai. Jesuh nih khuachia pawl a ṭhawlpiak hnuah Mary cu a zultu a hung si. Pathian caah a sunglawi tukmi ka si ti a hngalhthiam nakhnga Mary kha Jesuh nih zeiti lam in dah a bawmh rih?

11. Mary Magdalin cu Jehovah caah a sunglawimi a si ti kha Jesuh nih zeitindah a langhter? (Hmanthlak zong zoh.)

¹¹ Jesuh nih khua khat hnu khua khat phungchim a kalnak ah Mary Magdalin kha a sawm ve.b Cucaah Jesuh nih midang a cawnpiakmi a theih tikah Mary cu ṭhatnak tampi a hmu ko lai. Jesuh cu a thawhṭhan ni zong ah Mary sinah a lang. Mah ni i Jesuh nih a chawnh hmasa bikmi zultu hna lakah aa tel ve. A thawhṭhannak kong lamkaltu pawl sin thanh awk hmanh ah Mary kha rian a pek. Jesuh nih cutin a tuahnak thawng in Mary cu Jehovah caah a sunglawi tukmi a si ti kha fiang tein a langhter!—Joh. 20:11-18.

12. Lidia kha san ka tlai lo tiah zeinihdah a ruahter?

¹² Tuchan zong ah Mary Magdalin bantuk in san ka tlai lo timi ruahnak a ngeimi tampi an um. Tahchunhnak ah, Spain ram ah a ummi unaunu Lidia kong hi ruat hmanh. A nu nih a pawi lioah hrawh a rak i tim. A ngakchiat lio tein a nu nih ṭha tein a zohkhenh lomi le a volhpamhmi kha aa cinken rih. Hitin a ti: “Ka nu nih ka cung ah dawtnak a langhter bal lo caah midang nih ka cohlang hna seh law ka daw hna seh ti ka duh tuk. Ka nu nih miṭhalo ka si tiah a ka ruahter caah ahohmanh nih an ka daw kho lai lo ti ka phang.”

13. Lidia nih Jehovah caah a sunglawi tukmi ka si ti a hngalh khawh nakhnga zeinihdah a bawmh?

¹³ Lidia cu biatak a hngalh hnuah thlacamnak, Baibal hlathlainak le unau pawl hnemhnak bia nih Jehovah caah a sunglawimi ka si ti hngalhthiam awkah a bawmh. Hitin a ti: “Ka vapa nih zeitluk in dah a ka dawt ti kha a chim lengmang. Sining ṭha hna ka ngeihnak kong zong atu le atu a ka hngalhter. Dawtmi ka si ti ka hngalhthiam nakhnga unau pawl zong nih an ka bawmh.” Lidia bantuk intuarnak a ngeimi, na bawmh khawhmi pakhatkhat an um maw?

Jehovah Nih Aan Hmuh Ning In I Hmu

14. Jehovah nih a kan hmuh ning kong he aa tlaiin 1 Samuel 16:7 nih zeidah a kan hngalhter? (“Zeicah Jehovah Nih A Mi Pawl Kha A Sunsak Hna?” timi rinli kulh zong zoh.)

¹⁴ Hi vawlei hmuh ning in Jehovah nih aan hmu lo ti kha i cinken. (1 Samuel 16:7 rel.) Na muisam, na ngeihchiah le na cawnmi fimnak cung ah i hngat in Jehovah nih man na ngeihnak kha ri a khiak lo. (Isa. 55:8, 9) Cucaah Jehovah nih aan hmuh ning in nangmahle nangmah hmuh i zuam. Baibal ah Elijah, Naomi le Hannah ti bantuk man ka ngei lo tiah aa ruatmi, mi tampi kong a langhter. An kong kha rel law Jehovah nih zeitindah a hmuh hna timi cung ah lungthin pe. Jehovah nih aan dawt i aan sunsak ti a langhtermi na hmuhtonnak hna kha na philh nakhnga lo ca in i ṭial. Cun man ka ngei lo tiah aa ruatmi hna caah bawmtu a simi kan cauk pawl zong kha hlathlai.c

15. Jehovah nih zeicah Daniel kha a “dawt” tuk? (Daniel 9:23)

¹⁵ Jehovah nih na zumhfehnak a sunsak ti kha i cinken. Profet Daniel cu kum 90 leng a si hnuah a lung a dong i “a tha a ba tuk.” (Dan. 9:20, 21; NWTd) Jehovah nih zeitindah thazaang a pek? “Pathian nih aan dawt” i na thlacamnak aan ngaihpiak ti Daniel sin chim awkah Jehovah nih vancungmi Gabriel kha a thlah. (Daniel 9:23 rel.) Pathian nih Daniel kha zeicah a dawt? Anih cu zumhfekmi, miding pakhat a si caah a si. (Ezek. 14:14) Mah in hnemhnak kan hmuh khawh ve nakhnga Jehovah nih mah kong kha Baibal ah a ṭialter hna. (Rom 15:4) Cu bantuk in nang zong zumhfekmi, miding pakhat na si caah Jehovah nih aan sunsak lai i na thlacamnak kha aan ngaihpiak lai.—Mik. 6:8; Heb. 6:10.

16. Jehovah kha dawtnak a ngeimi Pa bantuk in hmuh awkah zeinihdah aan bawmh khawh?

¹⁶ Jehovah kha dawtnak a ngeimi Pa bantuk in hmu. Jehovah nih na sualnak a kawl lo. Lungtho tein bawmh aan duh. (Salm 130:3; Matt. 7:11; Luka 12:6, 7) Mah kong ṭha tein na ruahmi nih san ka tlai lo timi intuarnak kha hloh awkah aan bawmh lai. Tahchunhnak ah, Spain ram ah a ummi unaunu Michelle kong hi ruat hmanh. Kum tampi chung a vapa nih a volhpamh caah san ka tlai lo timi ruahnak a hun ngei. Hitin a ti: “Man ka ngei lo timi ruahnak ka ngeih fatin Jehovah nih tuukhal bantuk in ka cung ah dawtnak a langhtermi le a ka venmi kha ka mitthlam ah ka cuanter.” (Salm 28:9) Thlanglei Africa ram ah a ummi unaunu Lauren nih hitin a ti: “Jehovah nih a sinah dawtnak in a ka hnuh, kum tampi chung a ka umpi i midang cawnpiaknak rian ah a ka hman caah a ka sunsak ti kha fiang tein ka hngalh.”—Hos. 11:4.

17. Jehovah mithmai ṭha ka hmu ti zumh awkah zeinihdah aan bawmh khawh? (Salm 5:12) (Hmanthlak zong zoh.)

¹⁷ Jehovah mithmai ṭha na hmu ti kha zum. (Salm 5:12 rel.) David nih Jehovah mithmai ṭha kha miding a hupphengmi “phaw” pakhat he a tahchunh. Jehovah mithmai ṭha ka hmu timi hngalhnak nih san ka tlai lo timi ruahnak in aan huhphenh khawh. Jehovah mithmai ṭha na hmu ti kha zeicah na zumh khawh? Kan i ruah cang bantuk in Jehovah nih aan dawt ti kha Baibal hmang in a langhter. Mah leng ah Khrihfa upa pawl, hawikom ṭha hna le midang hmang in aan sunsak ti zong kha a langhter. Cu a si ah mi nih thazaang an in pek tikah zeitindah na lehrulh awk a si?

18. Midang thazaang peknak kha zeicah na cohlan awk a si?

¹⁸ Aan dawtu hna nih thazaang an in pekmi kha ṭha tein cohlang. Mah cu Jehovah sinin a rami a si ti kha i cinken. A hmasa ah langhtermi Michelle nih hitin a ti: “Midang nih thazaang an ka pekmi kha cohlan awkah duhsah duhsah in ka cawn. Man ka ngei ti zumh awkah kaa harh rih ko nain mah cu Jehovah nih zumter a ka duhmi a si ti kha ka hngalh.” Michelle cu Khrihfa upa pawl sin zong in bawmhnak a hmu. Atu cu hmaikal a ṭuan i Bethel rian zong lamhla in a bawmh hna.

19. Pathian caah a sunglawimi na si ti kha zeicah na zumh khawh?

¹⁹ Jesuh nih vancung kan Pa caah a sunglawi tukmi kan si ti kha a kan hngalhter. (Luka 12:24) Cucaah Jehovah nih a kan sunsak ti kha zeitik hmanh ah philh hna hlah u sih! Cun midang zong Pathian caah a sunglawimi an si ti an hngalh nakhnga bawm peng hna u sih!