‘Thiang Thlarau Thawng In Nan Hmuhmi Lungrualnak Kha Kilveng’
LAMKALTU Paul nih Efesa Khrihfabu kha hitin ca a kuat hna: “Pakhat le pakhat rem tein um u. Thiang thlarau thawng in nan hmuhmi lungrualnak kha kilven awkah fakpi in i zuam u.”—Efe. 4:2, 3.
Kan lakah a ummi “lungrualnak” cu Pathian “thiang thlarau” thawng in hmuhmi a si. Asinain Paul nih kan lungrualnak cu kilven a haumi a si tiah a ti. Aho nih dah a kilven awk a si? Khrihfa pakhat cio nih ‘thiang thlarau thawng in hmuhmi lungrualnak kha kilven’ awkah rian kan ngei.
Tahchunhnak ah, mi pakhatkhat nih mawṭaw thar laksawng aan pek hei ti u sih. Mah mawṭaw zohkhenh awkah ahodah rian a ngei? Nangmah na si. Mah mawṭaw ṭha tein na zohkhenh lo ruang i a rawh ahcun laksawng aan petu kha mawhchiat khawh a si lai maw? A si lai lo!
Cu bantuk in Pathian pekmi lungrualnak laksawng kilven awkah rian a ngeimi cu kanmah tu kha kan si. Unau pakhatkhat he kan i rem lo ahcun hitin kan i hal awk a si: ‘Lungrualnak kilven ding in ka tuah awk a simi thil ka tuah taktak maw?’
Lungrualnak Kilven Awkah “Fakpi In I Zuam”
Paul nih lungrualnak kilven cu a caan ah a har kho tiah a ti. A hleiin unau pakhatkhat nih kan lung a kan fahter tikah a si men lai. Pakhatkhat nih na lung aan fahter tik paoh ah a sin na chim a hau tinak a si maw? A si lo. Hitin i hal hmasa: ‘A sin ka chim ahcun thil sining a ṭha deuh taktak lai maw, a zual chin lai dah?’ A caan ah zeihmanh chim loin ngaihthiam tu kha a ṭha bik.—Ptb. 19:11; Mar. 11:25.
Hitin i hal: ‘Ka lung a ka fahtertu sin ka chim ahcun thil sining a ṭha deuh taktak lai maw, a zual chin lai dah?’
Lamkaltu Paul nih a chim bantuk in ‘lungsaunak ngei u sih law pakhat le pakhat dawtnak in i ing u sih.’ (Efe. 4:2) Mah cu “an sining tein cohlang hna” tinak a si tiah Baibal hlathlainak cauk pakhat nih a ti. Cucaah kanmah bantuk in zumtukhat unau pawl zong mitlinglo an si ti kha kan cohlan a hau. Kan dihlak in “mithar” hruk kan i zuam ti cu a hmaan ko. (Efe. 4:23, 24) Asinain ahohmanh nih tling tein kan i hruk kho lo. (Rom 3:23) Mah kha kan cohlan ahcun pakhat le pakhat i in awk, i ngaihthiam awk le ‘thiang thlarau thawng in hmuhmi lungrualnak kha kilven’ awkah kan i fawih deuh lai.
Mi nih kan lung an kan fahter tikah kan ngaihthiam hna i philh kan i zuam ahcun “pakhat le pakhat rem tein” kan um kho lai. Efesa 4:3 i “lungrualnak” timi Greek biafang cu Kolose 2:19 ah “tha” tiin leh a si. Tha timi cu ruh pakhat le pakhat kha fek tein a ṭemṭawntu tete an si. Cu bantuk in lungrualnak le dawtnak nih sining aa lo lomi unau pawl he rem tein um peng awkah a kan bawmh.
Cucaah unau pakhatkhat nih na lung aan fahter tikah amah kha a chiatnaklei in hmuh canah a sining tu kha theihthiam i zuam. (Kol. 3:12) Kan dihlak in mitlinglo kan si caah nang zong midang lung na fahter caan a um ve ko lai. Cutin naa cinkenmi nih ‘thiang thlarau thawng in hmuhmi lungrualnak kha kilven’ awkah aan bawmh lai.