Jehovah Toidornak Kha I Zohchunh

1. Jehovah toidornak cu zeicah khuaruahhar awk a si?

TUCHAN nawlngeitu pawl cu toidornak an ngei tiah na ruat maw? Na ruat men lai lo. Asinain Lianngan Bik Jehovah tu cu aa toidor. (Salm 113:5-8) Jehovah tluk in toidornak a ngeimi ahohmanh an um lo. Anih cu zeitik hmanh ah aa porhlaw bal lo. Hi capar ah Jehovah i duh a nung tukmi a sining pali kong le mah sining pakhat cio ah zeitindah toidornak a langhter timi kong kan i ruah hna lai. Cun Jesuh nih a Pa toidornak aa zohchunh ning kong zong kan i ruah hna lai. Mah nih Jehovah he i naih chin awk le a toidornak i zohchunh khawh deuh awkah a kan bawmh lai.

Jehovah Cu Naih A Fawimi A Si

2. Salm 62:8 nih Jehovah kong zeidah a langhter? (Hmanthlak zong zoh.)

² Aa porhlawmi hna cu naih a fawimi an si lo. Midang nakin ka ṭha deuh timi ruahnak an ngei i puarhrang ngai in pehtlaih an hman caah midang nih an hrial tawn hna. Asinain Jehovah cu cutin a si lo! Vancung kan Pa cu toidornak a ngeih caah kan lungthin chung a ummi vialte kha a sin phuan dih awkah a kan sawm. (Salm 62:8 rel.) Dawtnak a ngeimi pa pakhat nih a fale intuarnak kha ṭha tein a ngaihpiak hna bantuk in Jehovah nih kan thlacamnak a kan ngaihpiak ve. Hlanlio a salle tampi i an thlacamnak zong kha Jehovah nih Baibal ah a ṭialter hna. Mah nih Jehovah cu naih a fawimi a si ti kha a langhter. (Josh. 10:12-14; 1 Sam. 1:10-18) A caan ah Jehovah naih awkah kaa tlak lo timi ruahnak kan ngeih ah tah zeitin?

3. Jehovah nih a sinah thlacam peng hna seh ti a kan duh kha zeitindah kan hngalh?

³ Jehovah dawtnak hmuh awkah kaa tlak lo tiah kan ruah hmanh ah a sinah thla kan cam awk a si. Zeicah? Fapa tlau bianabia ah Jesuh nih Jehovah kha dawtnak a ngeimi pa he a tahchunh. Fapa tlau nih palhnak tampi ka tuah caah ka pa nih zeitik hmanh ah a chungkhar in a ka cohlang ti lai lo tiah a rak ruah. Inn a kir ṭhan tikah a pa nih zeitindah a lehrulh? A pa nih a fapa kha lamhlat in a hmuh tikah “a va tlik hnawh, cun a kuh i a hnamh.” (Luka 15:17-20) Jehovah cu mah pa bantuk a si. Palhnak kan tuah ruang i kan lung a rawh caan ah siseh, kan lungre a theih caan ah siseh Jehovah nih kan thlacamnak kha ṭha tein a kan ngaihpiak. Zeicahtiah toidornak nih a forh caah a si. (Lam. 3:19, 20) Jehovah nih a kan zaangfah caah a kan tlik hnawh, a dawtnak kong a kan hngalhter i a kan hnemh bantuk a si. (Isa. 57:15) Tuchan ah tah Jehovah nih zeitindah a kan “tlik hnawh”? A caan ah Khrihfa upa, Jehovah a biami kan chungkharmi le zumtukhat unau hna thawng in a si. (Jeim 5:14, 15) Jehovah nih cutin a tuahmi cu ka naih hna seh ti a duh caah a si.

4. Jesuh nih naih a fawimi a si kha zeitindah a langhter?

⁴ Jesuh nih a Pa aa zohchunh. Jesuh cu a Pa bantuk in aa toidormi a si ve. Cucaah vawleicung a um lioah mi nih fawi tein an naih khawh i biahalnak zong zalong tein an tuah khawh. (Mar. 4:10, 11) Jesuh nih an ruahnak kong a hal hna tikah an intuarnak kha hmaan tein an chim ngam. (Matt. 16:13-16) Cun palhnak an tuah tik hmanh ah an thin a phang lo. Zeicahtiah Jesuh cu dawtnak, zaangfahnak le lungsaunak a ngei ti an hngalh caah a si. (Matt. 17:24-27) Jesuh nih a Pa kha tling tein aa zohchunh caah a zultu pawl nih amah kong lawng si loin Jehovah kong zong ṭha tein an hun hngalh. (Joh. 14:9) A puarhrangmi le aa porhlawmi biaknaklei hruaitu hna he i lo loin Jehovah cu aa toidormi le naih a fawimi a si ti zong kha a zultu pawl nih an cawn.

5. Toidornak nih zeitindah naih a fawimi a kan siter?

⁵ Jehovah kha zeitindah kan i zohchunh khawh? Toidornak taktak ngeih awkah kan i zuamnak thawng in naih a fawimi kan si kho. Toidornak kan ngeih lo ahcun midang kan nahchuah khawh hna, anmah nakin ka ṭha deuh tiah kan ruah khawh i an palhnak zong ngaihthiam kan duh men lai lo. Cutin kan si ahcun midang nih an kan naih ngam lai lo. (Kol. 3:12-14) Khrihfa upa hna cu naih a fawimi si awkah a hleiin an i zuam a hau. Cutin tuah awkah unau pawl he caan an hmanṭi a hau. Cucaah Khrihfa upa hna cu online si loin pumpak in i pumh awkah an si khawh chung in an i zuam. Cun innkhat hnu innkhat phungchim rian ah unau pawl he kalṭi ding zong in an i zuam. Unau pawl cu Khrihfa upa hna he an i naih deuh ahcun an intuarnak kong chim ding in an i fawih deuh ve lai.

Jehovah Cu A Tlarimi A Si

6-7. Jehovah nih a tlarimi a si kha zeitindah a langhter?

⁶ Aa porhlawmi hna cu a tlarimi hmuhnak an ngei lo i midang ruahnak kha an cohlang duh lo. Jehovah cu mi vialte nakin a ruahnak a sang deuh nain a tlarimi a si. Aa toidor caah midang ruahnak kha a ngaihpiak hna i a caan ah a biakhiahnak hmanh a thlenpiak hna. Jehovah nih Moses unu Miriam a pehtlaih ning kong hi ruat hmanh. Jehovah nih hruaitu in a thimmi Moses kha Miriam le Aaron nih an thangchiat. Mah cu Jehovah theng an thangchiatmi bantuk a si. Cucaah Jehovah cu a thin a hung tuk i Miriam kha thinghmui zawtnak in dan a tat. Aaron cu Moses sinah a kal i an unu damter ding in Jehovah a nawlter. Mah tikah Jehovah nih zeidah a tuah lai? Aa porhlawmi pakhat nih cun a biakhiahnak thlen a duh ti lai lo. Asinain Jehovah tu cu cutin a si lo. Aa toidormi a si caah Moses nih a nawl ning in Miriam kha a damter.—Nam. 12:1-15.

⁷ Siangpahrang Hezekiah a pehtlaih ning zong ah Jehovah nih toidornak a langhter. Jehovah nih siangpahrang kha a rauhhlan ah na thi lai ti chimh awkah a profet kha a thlah. Mah tikah Hezekiah cu lunghno ngai in a ṭap i dam ṭhan awkah Jehovah kha a nawl. Cucaah Jehovah nih a zaangfah i kum 15 a nunter chap. (2 Si. 20:1, 5, 6) Jehovah kha a tlarimi si awk le mi cung ah zaangfahnak langhter awkah toidornak nih a forh.

8. Jesuh nih a tlarimi a si kha zeitindah a langhter? (Marka 3:1-6)

⁸ Jesuh nih a Pa aa zohchunh. Vawleicung a um lioah Jesuh nih mi pawl kha a si khawh chung in a bawmh hna. Tahchunhnak ah, biaknaklei hruaitu hna nih Sabbath ni ah mizaw damter cu Nawlbia buar a si tiah an ti. Asinain Jesuh cu Nawlbia cung lawng ah lungthin a pe lo. A tlarimi a si caah mi pawl kha an herh ning in a bawmh hna. (Marka 3:1-6 rel.) Tuchan Khrihfabu lam a hruai ning zong ah Jesuh nih a tlarimi a si kha a langhter. Tahchunhnak ah, pakhatkhat nih sualnak ngan a tuah tikah Jesuh nih lungsau tein a bawmh i thlennak tuah awkah caanṭha a pek.—Biat. 2:2-5.

9. A tlarimi kan si kha zeitindah kan langhter khawh? (Hmanthlak zong zoh.)

⁹ Jehovah kha zeitindah kan i zohchunh khawh? Kan khuaruah ning le kan thil ti ning ah a tlarimi le aa toidormi si awkah kan i zuamnak thawng in a si. (Jeim 3:17) Tahchunhnak ah, nulepa nih an fale kha an thlahthlam awk a si lo i an tuah khawhmi leng in an sinin an i ruahchan awk a si fawn lo. Genesis 33:12-14 ah Jakob nih nulepa caah zohchunh awk ṭha a chiahpiak hna. Aa toidor i a tlarimi nulepa nih an fale kha pakhat le pakhat an tahchunh hna lo. Khrihfa upa hna zong a tlarimi an si a hau. Tahchunhnak ah, Khrihfa upa pakhat nih a dang Khrihfa upa pawl kha amah duh ning zulh awkah a hnek hna awk a si lo. Mah canah a si khawh ahcun a dang Khrihfa upa hna an duh ning tu kha a cohlan awk a si. (1 Tim. 3:2, 3) Midang ruah ning le intuar ning cu kanmah he aa lawh lo hmanh ah hngalhthiam kan i zuam a hau. (Rom 14:1) Khrihfa dihlak nih ‘a tlarimi kan si kha mizapi nih an hngalh’ nakhnga kan i zuam a hau.—Fil. 4:5.

Jehovah Cu A Lung A Sau

10. Jehovah nih zeiti lam in dah lungsaunak a langhter?

¹⁰ Aa porhlawmi hna nih midang hngah kha an duh lo. An i porhlawt caah an thin a tawi. Asinain Jehovah cu cutin a si lo. Anih cu a lung a sau bikmi a si! Tahchunhnak ah, Noah chan ah Jehovah nih miṭhalo pawl hrawh ding in kum 120 ka hngah lai tiah a ti. (Gen. 6:3) Cucaah Noah fale cu an hun ṭhang manh i an pa he lawng sak awkah caanṭha an hmu. A hnuah Sodom le Gomorrah khua hrawh a si lainak kong he aa tlaiin Abraham nih voi tampi biahalnak a tuah lioah Jehovah vancungmi nih lungsau tein a ngaihpiak. Aa porhlawmi pakhat nih cun ‘Zei ah dah naa rel i biahalnak na ka tuah ngam?’ tiah a ti men lai. Asinain vancungmi nih Jehovah i zohchunh in Abraham cung ah lungsaunak a langhter.—Gen. 18:20-33.

11. Peter Kuathnihnak 3:9 ning in zeicah Jehovah nih tuchan tiang lungsaunak a langhter?

¹¹ Jehovah cu aa toidormi a si caah tuchan tiang lungsaunak a langhter. Hi vawlei ṭhalo hrawh awkah lungsau tein a hngah. Zeicah? “Ahohmanh hrawh a duh hna lo i mi vialte nih sual ngaihchihnak ngei hna seh ti a duh caah a lung a saumi a si.” (2 Peter 3:9 rel.) Jehovah lungsaunak cu a phu taktak maw? A phu ko. Mah nih lungthin ṭha a ngeimi, mi nuai tampi kha amah he i naih awkah caanṭha a ngeihter hna. Mi tam khawh chung tam nih Jehovah an naih ve lai timi ruahchannak kan ngei. Asinain Jehovah lungsaunak cu ri a ngei. Mi pawl a dawt hna nain an duhmi paoh tuah awkah nawl a awnh zungzal hna lo. A rauhhlan ah miṭhalo vialte a hrawh dih hna lai.—Hab. 2:3.

12. Jesuh nih Jehovah lungsaunak kha zeitindah aa zohchunh?

¹² Jesuh nih a Pa aa zohchunh. Kum thong tampi chung Satan nih Jehovah lawng si loin zumhfekmi a salle zong a thangchiat hna. Jesuh nih mah kha a hmuh nain Jehovah aa zohchunh i lungsaunak a langhter. (Gen. 3:4, 5; Job 1:11; Biat. 12:10) Mi tampi harnak an tonmi kha Jesuh nih a hmuh. “Satan rianṭuannak vialte hrawh awkah” zeitluk in dah aa ngaih lai ti kha na mitthlam ah cuanter hmanh! (1 Joh. 3:8) Satan ruang i a chuakmi harnak vialte hloh ding in Jehovah nih ri a khiahmi caan tiang Jesuh nih lungsau tein a hngah. Zeicah? Donghnak caan rikhiaktu cu amah si loin Jehovah tu a si ti kha toidor tein a cohlan caah a si.—Lam. 1:7.

13. Jesuh nih a lamkaltu pawl cung ah zeitindah lungsaunak a langhter, zeicah?

¹³ Vawleicung a um lioah Jesuh nih a lamkaltu pawl cung ah lungsaunak a langhter. Tahchunhnak ah, lamkaltu pawl nih ahodah a ngan bik tiah atu le atu bia an i al nain Jesuh cu an cung ah a lung a dong bal lo. Mah canah lungsau tein a cawnpiak hna. (Luka 9:46; 22:24-27) Duhsah duhsah in a herhmi thlennak an tuah te ko lai ti kha a zumh. Nang tah aa lomi palhnak kha atu le atu na tuah maw? Na tuah ahcun kan Siangpahrang cu aa toidormi le a lung a saumi a si caah naa lawm tuk ko lai!

14. Zeitindah lungsaunak kan ngeih khawh?

¹⁴ Jehovah kha zeitindah kan i zohchunh khawh? Kan khuaruah ning le kan thil ti ning ah Jehovah i zohchunh khawh awkah “Khrih lungthin” kan ngeih a hau. (1 Kor. 2:16) Zeitindah Khrih lungthin kan ngeih khawh? Fawi tein ngeih khawhmi cu a si lo. Thawngṭha Cauk kha ṭha tein kan rel a hau. Cun kan relmi in Jesuh khuaruah ning kong zeidah kan cawn khawh ti kha a caan pek in kan ruah a hau. Jesuh toidornak i zohchunh khawh awkah Jehovah bawmhnak kan herh. Khrih lungthin kan ngeih ahcun zumtukhat unau pawl cung lawng si loin kanmahle kanmah cung zong ah kan lung a sau deuh lai.—Matt. 18:26-30, 35.

Jehovah Nih Aa Toidormi Kha A Cawisan Hna

15. Jehovah nih aa toidormi kha a sunsak hna ti a langhtermi tahchunhnak cheukhat pe. (Salm 138:6)

¹⁵ Salm 138:6 rel. Van le vawlei i Cung Nung Bik Pathian nih aa toidormi hna a sunsakmi cu khuaruahhar awk ngai a si! Jehovah nih hlanlio zumhfekmi pawl a cawisanmi kong hi ruat hmanh. An lak i cheukhat cu kan lung ah an chuak men lai lo nain an kong kha Jehovah nih Baibal ah a ṭialter hna. Tahchunhnak ah, Jehovah thiang thlarau forhfialnak thawng in Moses nih Deborah timi nu pakhat kong a ṭial. Anih cu sinum pakhat a si i Isaak le Jakob innchungkhar kha kum 125 chung zumhawktlak tein a rak zohkhenh hna. Deborah kong tampi kan hngal lo nain Jehovah nih a sunsak tuk caah a kong kha Baibal ah a ṭialter hna. (Gen. 24:59; 35:8) Kumzabu tampi a rauh hnuah Jehovah nih ngakchia men a simi tuukhal David kha a hlorh i Israel siangpahrang ah a ser. (2 Sam. 22:1, 36) Jesuh chuahnak kong kha Pathian nih ahote sinah dah a thanh hmasa? Aa toidormi tuukhal pawl sinah vancungmi a thlah hna i Bethlehem khua ah Messiah cu a chuak cang tiah thawng a thanhter hna. (Luka 2:8-11) Cun Josef le Mary nih Jesuh kha biakinn an kalpi lioah Jehovah nih kum upa Simeon le Ana kha a hlorh hna i Messiah hmuhnak caanṭha a pek hna. (Luka 2:25-30, 36-38) Jehovah cu “a sang hringhran ko nain mi nauta kha an zawn a ruah hna.”

16. A Pa nih midang a pehtlaih ning kha Jesuh nih zeitindah aa zohchunh?

¹⁶ Jesuh nih a Pa aa zohchunh. A Pa bantuk in Jesuh nih aa toidormi kha a cawisan hna. “Fimthiamnak a ngei lomi le mi sawhsawh men” kha Pathian Pennak kong a cawnpiak hna. (Lam. 4:13; Matt. 11:25) Jesuh nih mi pawl kha pumsalei in a damter hna leng ah lungthinlei zong in hnangamnak a pek hna i upatnak he a pehtlaih hna. (Luka 5:13) Cun a thih lai zan ah lamkaltu pawl kha sal pakhat bantuk in an ke a ṭawlpiak hna. (Joh. 13:5) Mah leng ah Jesuh van a kai hlan zong ah toidornak a ngeimi a zultu vialte kha a biapi tukmi rian a pek hna. Mah cu zungzal nunnak a pemi thawngṭha kha midang sin chim awkah a si. Tuchan tiang mah a biapi tukmi rian a kan peknak thawng in Jesuh nih a kan cawisan ve.—Matt. 28:19, 20.

17. Midang kha zeitindah kan cawisan khawh hna? (Hmanthlak zong zoh.)

¹⁷ Jehovah kha zeitindah kan i zohchunh khawh? Hnulei sining le fimthiamnak aa lo lomi, mi phunzakip kha thawngṭha kan chimh hnanak thawng in kan cawisan hna. Cun zei bantuk thiamnak le tinvo sung a ngeimi an si hmanh ah unau dihlak cung ah upatnak kan langhter. (Fil. 2:3) “Nanmahlei in thawk u” timi Baibal phunglam ning in pakhat le pakhat cung ah toidor tein upatnak kan langhtermi a hmuh tikah Jehovah cu aa lawm tuk.—Rom 12:10; Zef. 3:12.

18. Jehovah toidornak kha zeicah zohchunh na duh?

¹⁸ Toidornak a ngeimi vancung kan Pa bantuk in naih a fawimi, a tlarimi, a lung a saumi le midang a cawisangmi si ding in i zuam peng hna u sih. Cutin kan tuahnak thawng in Jehovah he kan i naih chin lai i a mithmai ṭha kan hmuh lai!—Isa. 43:4.